TABA YA KUITUTA 20
PINA 7 Jehova, Maata Aluna
Mukolwe Kuli Jehova Uka Miomba-Omba
“Kulumbekwe . . . Ndate sishemo ni Mulimu yaomba-omba mwa miinelo kaufela.”—2 MAKOR. 1:3.
ZEKAITUTIWA
Zeluituta kwa nzila yeo Jehova naaomba-ombile ka yona Majuda bane baisizwe mwa buhapiwa.
1. Mutaluse muinelo one bali ku ona Majuda bane bali mwa buhapiwa.
MUNAHANE feela mone baikutwezi Majuda bane baisizwe mwa buhapiwa kwa Babilona. Nebaiponezi naha yabona haisinyiwa. Nebazwisizwe mwa naha yabona ni kuisiwa kwa naha isili kabakala libi zabona ni za bo kuku wabona. (2 Makol. 36:15, 16, 20, 21) Ki niti kuli bahapiwa nebalukuluhile kueza misebezi yabona ya ka zazi mwa Babilona. (Jer. 29:4-7) Niteñi, bupilo nebuli taata mi nebapila mwa sibaka sene basalati kupila ku sona. Nebaikutwile cwañi ka za muinelo one bali ku ona? Mulemuhe manzwi anaabulezi yomuñwi wa bahapiwa babasepahala, naaize: “Neluinzi kwa linuka za Babilona. Lwalila haluhupula Sione.” (Samu 137:1) Bahapiwa babalobehile pilu bao nebatokwa kuomba-ombiwa, kono cwale ki mañi yanaaka baomba-omba?
2-3. (a) Ki lika mañi zanaaezize Jehova kwa Majuda bane bali mwa buhapiwa? (b) Lukanyakisisañi mwa taba ye?
2 Jehova ki “Mulimu yaomba-omba mwa miinelo kaufela.” (2 Makor. 1:3) Ka kuba Mulimu yalilato, utabela kuomba-omba batu kaufela babasutelela ku yena. Jehova naaziba kuli babañwi kwa batu bane baisizwe mwa buhapiwa, nebaka amuhela kalimelo ni kukutela ku yena. (Isa. 59:20) Kacwalo, lilimo zefitelela 100 pili basika isiwa kale mwa buhapiwa, Jehova naasusumelize mupolofita Isaya kuñola buka yebizwa ka libizo lahae. Mulelo neli ufi? Isaya utalusa kuli: “Mulimu wahao uli: ‘Muomba-ombe, muomba-ombe batu baka.’” (Isa. 40:1) Jehova naaitusisize mupolofita yo kuñola litaba zeneka omba-omba Majuda bane baisizwe mwa buhapiwa.
3 Ka kuswana ni Majuda bane baisizwe mwa buhapiwa bao, ni luna lutokwanga kuomba-ombiwa ka linako zeñwi. Mwa taba ye, lukanyakisisa linzila zetaalu zeo Jehova naaomba-ombile ka zona Majuda bane bali mwa buhapiwa: (1) Naasepisize kuswalela bane bakabaka, (2) naafile batu bahae sepo, ni (3) naabatusize kusaikalelwa hahulu. Halunze lunyakisisa litaba zeo, mulemuhe molukona kutusezwa ki manzwi a Jehova aomba-omba.
JEHOVA WALUSWALELANGA KA SISHEMO
4. Jehova naabonisize cwañi kuli ki Mulimu yasishemo? (Isaya 55:7)
4 Jehova ki “Ndate sishemo.” (2 Makor. 1:3) Naabonisize kalemeno kao hanaasepisize kuli ukaswalela bahapiwa bane babakile. (Mubale Isaya 55:7.) Naabulezi kuli: “Ka lilato laka lelisa feli nika kushemuba.” (Isa. 54:8) Jehova naakabonisa cwañi sishemo sahae? Nihaike kuli Majuda nebakaba mwa Babilona ka lilimo zeñata kabakala likezo zabona zemaswe, Jehova naasepisize kuli nebasike bazwelapili kuba mwa Babilona kuya kuile. (Isa. 40:2) Manzwi ao alukela kuba anaaomba-ombile hahulu Majuda bane babakile, ili bane babata kutabisa Jehova!
5. Ki kabakalañi haluutwisisa hande sishemo sa Jehova kufita Majuda bane bali mwa buhapiwa?
5 Luitutañi? Jehova walata kuswalela batanga bahae ka kutala. Kacenu lwakona kuutwisisa hande taba yeo kufita mone baiutwisiseza Majuda bane bali mwa buhapiwa. Kabakalañi? Kakuli luna lwaziba zaezize Jehova kuli libi zaluna liswalelwe. Hamulaho wa lilimo zeñata kuzwa fanaabulelezi Isaya ka za kulata kuswalela kwa Jehova, Jehova naalumile mwanaa hae yalatwa kutaha fa lifasi kuli ato fa bupilo bwahae sina sitabelo, ilikuli aliulule baezalibi kaufela bababakile. Sitabelo seo ki sona sesitahisa kuli libi “litakulwe” ka kutala. (Lik. 3:19; Isa. 1:18; Maef. 1:7) Kaniti luli, Mulimu yelulapela unani hahulu sishemo!
6. Kunahanisisa ka za sishemo sa Jehova kukona kulutusa cwañi? (Mubone ni siswaniso.)
6 Manzwi a Jehova a kwa Isaya 55:7 akona kuluomba-omba haiba luikutwa mulatu. Babañwi ku luna bakona kuzwelapili kuikutwa mulatu kabakala mafosisa ane baezize kwamulaho niha sebabakile. Kukona kuba cwalo sihulu haiba bakopana ni miinelo yetaata yetahisizwe ki mafosisa ane baezize. Kono haiba luipulezi libi zaluna ni kucinca mupilelo waluna, lwakona kuba ni buikolwiso bwa kuli Jehova uluswalezi. Mi Jehova haluswalezi, uikatulelanga kusahupula libi zaluna. (Mubapanye Jeremia 31:34.) Bakeñisa kuli Jehova haazwelangipili kuhupula mafosisa ane luezize kwamulaho, ni luna haluswaneli kuzwelapili kuahupula. Sa butokwa ku Jehova ki zelueza ka nako ya cwale, isiñi mafosisa ane luezize kwamulaho. (Ezek. 33:14-16) Mi honacwale-cwale fa, Ndataa luna yasishemo ukafelisa manyando kaufela atahisizwe ki mafosisa aluna.
Sa butokwa ku Jehova ki zelueza ka nako ya cwale, isiñi mafosisa ane luezize kwamulaho (Mubone paragilafu 6)
7. Ki lika mañi zekona kulususueza kukupa tuso kwa baana-bahulu haiba lupatile sibi seluezize?
7 Ki lika mañi zeluswanela kueza haiba lizwalo laluna lalusisita kabakala kupata sibi sesituna seluezize? Bibele ilususueza kukupa tuso kwa baana-bahulu. (Jak. 5:14, 15) Nihakulicwalo, kukona kulubela taata kutaluseza baana-bahulu mafosisa eluezize. Kono lukasusuezwa kutaluseza baana babasepahala bao haiba lubakile mi lwaziba kuli Jehova ni baana baketile bao baka lutusa ka lilato ni kulubonisa sishemo. Mulemuhe mo kuboniswa sishemo ki Jehova nekutuselize muzwale yabizwa Arthur,a yanaasisitwa ki lizwalo. Bo Arthur batalusa kuli: “Nenibuhanga maswaniso a mapunu ka nako yebato ba silimo. Kono hamulaho wa kuteeleza kwa ngambolo yenebulela za lizwalo, naipulela sibi saka ku bo musalaaka ni kwa baana-bahulu. Hamulaho wa kueza cwalo, lizwalo nelituhezi kunisisita, nihaike kuli nenisa ikutwa hahulu bumaswe kabakala lika zene niezize. Baana-bahulu banihupulisa kuli Jehova naasabata kuli nibe mulikanaa hae. Walukalimelanga bakeñisa kuli walulata. Manzwi abona asishemo naanifitile kwa pilu ni kunitusa kuutwisisa kuli Jehova naaniswalezi luli.” Muzwale Arthur ka nako ya cwale ki paina mi hape ki sikombwa sa puteho. Kwaomba-omba luli kuziba kuli Jehova walubonisanga sishemo halubakile!
JEHOVA ULUFANGA SEPO
8. (a) Jehova naafile bahapiwa sepo mañi? (b) Ka kuya ka Isaya 40:29-31, sepo neikona kutusa cwañi Majuda bane babakile?
8 Ka mubonelo wa butu, nekukona kubonahala inge kuli Majuda bane bali mwa buhapiwa nebasike bakona kukutela kwa naha yabona. Mubuso Omutuna wa Lifasi wa Babilona neuzibahala kuli neusa lukululangi bahapiwa baona. (Isa. 14:17) Nihakulicwalo, Jehova naafile batu bahae sepo. Naasepisize kuli naakalukulula batu bahae, mi hakuna sene sika mupaleliswa kueza cwalo. (Isa. 44:26; 55:12) Ku Jehova, Babilona neiswana feela sina liluli. (Isa. 40:15) Jehova naakona kubalukulula ka bunolo sina feela moya moukona kufefulela liluli ka bunolo. Kuba ni sepo nekukona kutusa cwañi bahapiwa bao? Nekuka baomba-omba. Kono nebaka tuseha mwa linzila zeñwi hape. Isaya naañozi kuli: “Babasepile Jehova bakakutelwa ki maata.” (Mubale Isaya 40:29-31.) Kaniti luli, sepo neika batiisa; nebaka ‘fufa kuya mwahalimu sina limbande.’
9. Ki kabakalañi bahapiwa hane bakona kusepa lisepiso za Jehova?
9 Jehova hape naafile bahapiwa mabaka hane baswanela kusepa lisepiso zahae. Ka mukwa ufi? Munahane ka za lisepiso zenetalelelizwe kale. Nebaziba kuli Asiria neituzi mubuso wa Isilaele wa kwa mutulo ni kuisa batu mwa buhapiwa. (Isa. 8:4) Nebaiponezi Mababilona habayundisa Jerusalema ni kuisa bane bapila mwa muleneñi wo mwa buhapiwa. (Isa. 39:5-7) Neba liteñi Mulena Zedekia hapunyiwa meeto ni kuisiwa kwa Babilona. (Jer. 39:7; Ezek. 12:12, 13) Lika kaufela zanaapolofitile Jehova nelitalelelizwe. (Isa. 42:9; 46:10) Lika zeo kaufela lilukela kuba zenetiisize hahulu tumelo yabona ya kuli sepiso ya Jehova ya kubalukulula ni yona neika talelezwa!
10. Ki lika mañi zekona kulutusa kuzwelapili kuba ni sepo mwa mazazi a mafelelezo a?
10 Luitutañi? Haluikutwa kuzwafa, sepo yakona kuluomba-omba ni kulutusa kukutelwa ki maata. Lupila mwa linako zetaata mi lulwaniswa ki lila zemaata. Niteñi, haluswaneli kuzwafa. Jehova ulufile sepo yende ya kupila kuya kuile ni kuikola kozo ni buiketo sakata. Luswanela kuzwelapili kunahana ka za sepo yeo. Haiba lusaezi cwalo, kukaswana feela inge kuli luyemi fa lihaulo lelitezi masila kuli lubuhe sibaka sesinde, masila ao aka lupaleliswa kubona hande bunde bwa sibaka seo. Ki lika mañi zekona kulutusa kutiisa sepo yaluna, kamba ka mubulelelo omuñwi, “kukenisa lihaulo”? Luswanela kubanga ni nako ya kunahanisisa ka za bupilo bobunde boluka ikola mwa lifasi lelinca. Lwakona kubala litaba, kubuha mavidio, ni kuteeleza kwa lipina zebulela za sepo yaluna. Mi lwakona kutaluseza Jehova mwa tapelo ka za lisepiso zelunyolezwi hahulu kubona halitalelezwa.
11. Ki lika mañi zetusanga kaizeli yomuñwi yakula matuku asafoli kukutelwa ki maata?
11 Mulemuhe mo sepo iomba-ombezi ni kutiiseza kaizeli yabizwa Joy, ili yakula matuku asafoli. Utalusa kuli: “Haniikutwanga hahulu kuzwafa, nitalusezanga Jehova moniikutwela luli mi naaziba kuli waniutwisisa. Jehova ualabanga litapelo zaka ka kunifa ‘maata afita a butu.’” (2 Makor. 4:7) Hape uiponanga inzaali mwa lifasi lelinca, ili mo “hakuna yayahile mwa naha yakali: ‘Nakula.’” (Isa. 33:24) Haiba lutaluseza Jehova ze mwa pilu yaluna kaufela ni kuzwelapili kunahana ka za sepo yaluna, lwakona kukutelwa ki maata.
12. Ki mabaka afi alukolwisa kuli lisepiso za Jehova kaufela likatalelezwa? (Mubone ni siswaniso.)
12 Sina feela Jehova mwanaafezi Majuda bane bali mwa Babilona mabaka amañata a kusepa lisepiso zahae, uezize cwalo ni ku luna. Munahane feela ka za bupolofita bolusweli kuiponela inze butalelezwa. Ka mutala, lwaiponela mubuso omaata ka kufitisisa mwa lifasi ‘otiile kwa neku leliñwi ni kufokola kwa neku leliñwi.’ (Dan. 2:42, 43) Hape luutwanga lipiho ka za “lizikinyeho kuzwa mwa sibaka sesiñwi kuya ku sesiñwi,” mi lukutazanga taba yende kwa “macaba kaufela.” (Mat. 24:7, 14) Bupolofita bo ni bupolofita bobuñwi bobuñata bwatiisa tumelo yaluna mwa lisepiso za Jehova zeomba-omba zetuha litalelezwa.
Bupolofita bolusweli kuiponela inze butalelezwa bulutusa kusepa hahulu Jehova (Mubone paragilafu 12)
JEHOVA ULUTUSANGA KUSAIKALELWA HAHULU
13. (a) Ki miinelo mañi yetaata yene bakakopana ni yona Majuda ka nako yene bakalukululwa? (b) Sina mokutaluselizwe kwa Isaya 41:10-13, Jehova naaomba-ombile cwañi Majuda bane bali mwa buhapiwa?
13 Nihaike kuli Jehova naaomba-ombile Majuda bane bali mwa buhapiwa ka kubafa sepo yende, naaziba kuli nebaka kopana ni miinelo yetaata ka nako yene bakalukululwa. Jehova naapolofitile kuli nako ya kulukululwa kwa Majuda bane bali mwa buhapiwa hane ikasutelela, mulena yamaata naakasinya linaha zenepotolohile Babilona ni kulwanisa ona muleneñi wo. (Isa. 41:2-5) Kana Majuda nebatokwa kuikalelwa? Pili bupolofita bo busika talelezwa kale, Mulimu naaomba-ombile batu bahae ka kubulela kuli: “Usike wasaba, kakuli niinzi ni wena. Usike wabilaela, kakuli ki na Mulimu wahao.” (Mubale Isaya 41:10-13.) Naatalusañi hanaabulezi kuli “ki na Mulimu wahao”? Naasahupulisi Majuda kuli bamulapele, kakuli nebaziba kuli nebaswanela kueza cwalo. Kono naabahupulisa kuli naasali kwa lineku labona.—Samu 118:6.
14. Jehova naatusize cwañi hape Majuda bane bali mwa buhapiwa kusaikalelwa hahulu?
14 Jehova hape naatusize Majuda bane bali mwa buhapiwa kusaikalelwa hahulu ka kubahupulisa kuli naanani maata amatuna hahulu ni butali. Naataluselize Majuda bane bali mwa buhapiwa bao kuli batalimele kwa mahalimu kuli babone linaleli. Naabataluselize kuli ki yena yabupile linaleli ni kuli mane waziba libizo la naleli ni naleli. (Isa. 40:25-28) Haiba Jehova waziba libizo la naleli ni naleli, uzibe waziba libizo la mañi ni mañi wa batanga bahae! Mi haiba Jehova naanani maata a kubupa linaleli, uzibe unani maata a kutusa batanga bahae. Kaniti luli, Majuda bane bali mwa buhapiwa nebasa swaneli kusaba kamba kuikalelwa.
15. Jehova naatusize cwañi Majuda bane bali mwa buhapiwa kuziba zene bakaeza ka nako yene bakalukululwa?
15 Jehova hape naataluselize batu bahae zene baswanela kueza ka nako yene bakalukululwa. Kwa makalelo a buka ya Isaya, Mulimu naabulelezi batu bahae kuli: “Mukene mwa mizuzu yamina ya mwahali, mi hamukena, mukwale likwalo zamina. Muipate ka nakonyana kufitela buhali bufela.” (Isa. 26:20) Kubonahala kuli bupolofita bo nebutalelelizwe lwapili, Mulena Sirusi hanaatuzi muleneñi wa Babilona. Caziba yomuñwi wa litaba zakale yali Mugerike naabulezi kuli Sirusi hanaakeni mwa muleneñi wa Babilona, “naalaezi [masole bahae] kuli babulaye mutu kaufela yene bakafumana fande.” Munahane feela sabo yetuna yene babile ni yona batu bane bapila mwa Babilona! Kono kubonahala kuli Majuda bane bali mwa buhapiwa bona nebasika bulaiwa kakuli nebamamezi litaelo za Jehova.
16. Ki kabakalañi halusa swaneli kuikalelwa hahulu ka za lika zekaezahala kwapili? (Mubone ni siswaniso.)
16 Luitutañi? Honacwale-cwale fa, kukaba ni ñalelwa yetuna yesika bonwa kale fa lifasi. Ñalelwa yeo haika kalisa, batu babañata mwa lifasi habana kuziba za kueza mi bakakenelwa ki sabo. Kono hakuna kuba cwalo kwa batu ba Jehova. Lwaziba kuli Jehova ki Mulimu waluna. Lukaba ni bundume kabakala kuziba kuli “kupiliswa [kwaluna] kusweli kwasutelela.” (Luka 21:28) Lukazwelapili kuba ni bundume mane nihaiba ka nako yeluka lwaniswa ki linaha zekaswalisana hamoho kululwanisa. Jehova ukaitusisa mangeloi kuli alusileleze, mi hape uka lufa litaelo zekapilisa bupilo bwaluna. Uka lufa cwañi litaelo zeo? Halusika ziba kale mwakaezeza cwalo. Nihakulicwalo, kubonahala kuli uka lufa litaelo zeo ka kuitusisa liputeho zaluna. Ka mubulelelo omuñwi, liputeho zeo likaswana sina ‘mizuzu yaluna ya mwahali’ yeka lusileleza. Lukona kuitukiseza cwañi zekaezahala kwapili? Luswanela kutiisa silikani saluna ni mizwale ni likaizeli baluna, kuba babaitukiselize kumamela litaelo zelufiwa ki kopano, ni kuba ni buikolwiso bwa kuli Jehova ki yena yazamaisa kopano yaluna.—Maheb. 10:24, 25; 13:17.
Kunahanisisa ka za maata amatuna hahulu anani ona Jehova ni kuziba kuli wakona kulupilisa, kwakona kulutusa kusaikalelwa hahulu ka nako ya ñalelwa yetuna (Mubone paragilafu 16)b
17. Mukona kukolwa cwañi kuli Jehova uka miomba-omba?
17 Nihaike kuli Majuda bane bali mwa buhapiwa nebakopana ni miinelo yetaata, Jehova naabaomba-ombile. Ni luna uka luomba-omba. Kacwalo, kusina taba ni zekona kuezahala ku mina kwapili, mukolwe kuli Jehova uka miomba-omba. Mube ni tumelo ya kuli waswalelanga ka kutala batanga bahae babasepahala ni kuli wamiisa pilu. Muzwelepili kutiisa sepo yamina. Muhupule kuli hamuswaneli kusaba sesiñwi kakuli Jehova ki Mulimu wamina.
PINA 3 Maata Aluna ni Sepo Yaluna
a Mabizo amañwi acincizwe.
b LITABA ZETALUSA SISWANISO: Sikwatanyana sa mizwale ni likaizeli bakopani hamoho. Banani buikolwiso bwa kuli Jehova unani maata amatuna hahulu mi wakona kusileleza batu bahae kusina taba ni kobapila.