Nikona Kueza Cwañi Haiba Batu Basweli Kuambola ka za Ka?

Libaka kuamboliwa ki batu hakukona kuutwisa butuku

Fokuñwi litaba zeñwi zeambolwanga ka za babañwi ki zemaswe—ka mutala, taba ya buhata yelelezwi kumisinya feela libizo. Nihaike kuli taba yabulezi ka za mina haki taba yetuna, taba yeo isakona kumiutwisa butuku sihulu haiba ya hasanyize taba yeo ki mutu yene muunga kuba mulikanaa mina luli!—Samu 55:12-14.

“Neniutwile kuli mulikanaaka naasweli kuniseba, inze ataluseza batu kuli haniisi pilu batu babañwi. Taba yeo nei niutwisize butuku kwa pilu! Nenisa utwisisi libaka hanaasweli kutaluseza batu taba yecwalo.”—Ashley.

Taba ya niti: Kusina taba kuli mutu yasweli kuhasanya litaba za buhata ka za mina ki mulikanaa mina kamba kutokwa, haki nto yetabisa kuziba kuli mutu yomuñwi usweli kuhasanya litaba zemaswe ka za mina.

Taba yemaswe ki ya kuli—hamukoni kutibela batu kuli basike bamiambola

Kunani mabaka amañata batu habaambolanga ka za batu babañwi, ili akopanyeleza mabaka alatelela:

Kuisa pilu batu babañwi. Batu batabela hahulu kueza siango ni babañwi. Kacwalo hakusika fosahala kuambola ni batu babañwi kamba kuambola ka za batu babañwi. Mane Bibele ilususueza ‘kuisa hahulu pilu’ batu babañwi.—Mafilipi 2:4.

“Kamita batu batabelanga hahulu kuambola ka za batu babañwi!”—Bianca.

“Naaitumelela kuli, ni mutu yatabela kuziba zeezahala kwa batu babañwi ni kuambola litaba zeo ni batu babañwi. Hanizibi luli libaka haniezanga cwalo—nitabela feela kueza cwalo.”—Katie.

Bulutu. Mwa linako zene iñolwa Bibele, nekunani batu bane “[basaezangi] sesiñwi mwa nako yabona ya kuikatulusa kwandaa kukandeka kamba kuteeleza kwa nto yenca.” (Likezo 17:21) Ni kacenu kunani batu babacwalo!

“Ka linako zeñwi, haiba hakuna nto yetabisa yeezahala, batu bakona kueza nto yeñwi kuli bafumane feela taba yebaka ambola.”—Joanna.

Kuikalelwa. Kunani libaka leliutwahala Bibele hai lulemusa kuli luswanela kutuhela mukwa wa kuibapanyanga ku babañwi. (Magalata 6:4) Ka bumai, batu babañwi babatanga kufelisa maikuto abona a kuikalelwa ka kuhasanya lusebo.

“Lusebo lubonisa nto yeñwi ka za mutu yaluhasanya. Hañata lusebo lubonisanga kuli mutu yasweli kuseba yomuñwi ushwela muna mutu yo yasweli kusebiwa. Bahasanyanga litaba za buhata ka za batu babañwi kuli baikutwe hande, ni kuli baikolwise kuli bona ki batu babande kufita mutu yebasweli kuseba.”—Phil.

Taba ya niti: Ibe kuli lwalata kamba kutokwa, batu bakaambola ka za batu babañwi kukopanyeleza cwalo ni luna.

Taba yende ki ya kuli—litaba zebaambola batu halikoni kumipaleliswa kueza lika zeñwi

Hamukoni kutibela batu kuli basike baambola ka za mina, kono mwakona kuketa zemuka eza ka za teñi. Haiba muutwa kuli kunani mabulatwi obasweli kubulela batu ka za mina, mwakona kuketa kuunga omuñwi wa mihato yemibeli yelatelela.

MUHATO WAPILI: Musike mwaeza sesiñwi ka za teñi. Hañata, tatululo yende luli ki kusaisa kwateñi pilu sihulu haiba haki taba yetuna luli. Musebelise kelezo ya mwa Bibele yeli: “Usike waakufa kuhalifa.”—Muekelesia 7:9.

“Nekunani mabulatwi a kuli nenili mwa libato ni mushimani yomuñwi ili mutu yene nisika kopana kale ni yena! Taba yeo neli ya bukuba luli kuli mane neni sehile feela ka za teñi.”—Elise.

“Libubo lelinde ki sona silwaniso sesinde hahulu sesikona kukoma lusebo. Haiba munani libubo lelinde, mutu nihaka hasanya taba yemaswe ka za mina, batu babañata habana kulumela taba yeo. Niti ka za mina yakona kukoma taba ya buhata.”—Allison.

Akalezo: Muñole (1) taba yene bulezwi ka za mina ni (2) mone muikutwezi ka za teñi. Hase munyakisisize taba yeo “mwa pilu yamina,” kwakona kumibela bunolo kulibala feela ka za teñi.—Samu 4:4.

MUHATO WABUBELI: Muikambote ni mutu yanaakalile kuhasanya taba yemaswe ka za mina. Mwa miinelo yemiñwi, mukana mwaikutwa kuli taba yemaswe yemuutwile ka za mina ki yetuna hahulu kuli mane mutokwa kuambola ni mutu yanaakalile kubulela taba yeo.

“Haiba muatumela batu babasweli kumiseba, bakona kulemuha kuli litaba zemaswe zebabulelanga ka za babañwi zautwiwanga ki batu bane basebiwa. Hape kueza cwalo kukona kutahisa kuli batu bazibe niti ka za mina mi mwendi kwakona kutatulula butata.”—Elise.

Pili musika atumela kale mutu yanaa miseba, munyakisise likuka za mwa Bibele zelatelela mi muipuze lipuzo zezamaelela ni likuka zeo.

• “Mutu kaufela haalaba taba asika utwa kale litaba kaufela, ki bukuba.” (Liproverbia 18:13) ‘Kana luli niutwile litaba kaufela? Esi mwendi kukona kuba kuli mutu yanitaluselize kuli nenisebiwa naasika utwisisa litaba zanaautwile?’

• ‘Mulukela kuba yaakufa kuteeleza, yasaakufi kubulela, yasaakufi kuhalifa.’ (Jakobo 1:19) ‘Kana ye ki yona nako yende ya kuatumela mutu yanaa niseba? Kana niikoIwisize kuli monibata kuzamaiseza taba ye kwaswanela? Kamba esi mwendi neikaba hande kulibelela kuli kufite nakonyana ni kuli niwe pilu?’

• “Mueze babañwi sina mone muka batela kuli bamiezeze.” (Mateu 7:12, Bibele ya NET Bible) ‘Kambe ki na yanaabulezi taba yeñwi ka za mutu yomuñwi, nenika tabela kuli mutu yo aniatumele cwañi? Nenika tabela kuli luikambotele za butata bo mwa sibaka sesicwañi? Ki manzwi a cwañi anaaka nitusa mi mutu yo uswanela kuabulela ka nzila yecwañi?’

Akalezo: Pili musika atumela kale mutu yanaa miseba, muñole litaba zemubata kubulela. Mulibelele kuli kufite sunda iliñwi kamba zepeli, kihona mukabala manzwi ane muñozi kuli mubone haiba kunani litaba zeñwi zene muñozi zemuka bata kucinca. Hape, muikambote za mulelo wamina ni bashemi bamina kamba mulikanaa mina yahulile, mi mubakupe kuli bamituse.

Taba ya niti: Sina moliinezi lika zeñata mwa bupilo, hañata hamukoni kucinca muinelo wa kuli musike mwa sebiwanga. Kono taba yeo haitalusi kuli lusebo luswanela kumipaleliswa kueza lika zeñwi!