Ki Ifi Nto ya Pili mwa Bupilo bwa Mina?

“U ni bonise nzila ye ni swanezi ku ya ka yona.”—SAMU 143:8.

1. Ki sifi seo Mulena Salumoni n’a fitile fa ku bulela ka za lindongwamo ni ze petiwa za butu?

NE MU kana mwa ziba sina mw’a zibela mutu ufi kamba ufi kuli bupilo bu tezi misebezi ni licisehelo. Ha mu nahana ka za teñi, mwa kona ku lemuha kuli ze ñwi za zona ki za butokwa hahulu. Misebezi ni licisehelo ze ñwi haki za butokwa hahulu kamba mane ki za mbango. Ku lemuha kwa mina seo ku talusa kuli mwa lumelelana ni yo muñwi wa batu ba ba butali ka ku fitisisa ya kile a ba teñi, Mulena Salumoni. Hamulaho wa ku nyakisisa ka tokomelo misebezi ya mwa bupilo, n’a fitile fa ku bulela kuli: “Saba Mulimu, mi u mamele milao ya hae. Kakuli ki yona swanelo kaufela ya mutu.” (Muekelesia 2:4-9, 11; 12:13) Seo si na ni taluso mañi ku luna kacenu?

2. Ki puzo mañi ye mutomo yeo batu ba ba saba Mulimu ba swanela ku ipuza, mi i isa kwa lipuzo mañi ze amana ni yona?

² Haiba mu bata ku ‘saba Mulimu ni ku mamela milao ya hae,’ mu ipuze puzo ye ye shemaeta, ‘Ki ifi nto ya pili mwa bupilo bwa ka?’ Ki niti kuli ne mu si ke mwa nahana ka za puzo yeo ka zazi, kono ki kabakalañi ku sa i nyakisisa cwale? Ka mo ku inezi fela, i tahisa lipuzo ze ñwi ze amana ni yona, ze cwale ka ze, ‘Kana ni isa hahulu mamelelo ye sa swaneli fa mubeleko kamba bucaziba bwa ka kamba fa lika za sifumu? Ndu ya ka, lubasi lwa ka, ni balatiwa ki ba butokwa cwañi mwa bupilo bwa ka?’ Yo munca n’a kana a’ ipuza kuli, ‘Tuto i nga cwañi buñata bwa mamelelo ni nako ya ka? Kana luli ndongwamo ya ku ikatuluseza teñi, lipapali, kamba mufuta o muñwi wa za ku itabisa ka zona, kamba zibo ya za bumapanga-panga ki zona licisehelo za ka ze mutomo?’ Ku si na taba ni buhulu kamba muinelo wa luna, lu swanela ku ipuza ka swanelo kuli, ‘Sebelezo ya Mulimu i na ni kabelo mañi mwa bupilo bwa ka?’ Mwendi ne mu ka bona tokwahalo ya ku fa mamelelo ya pili kwa lika za butokwa. Kono ki ka mukwa ufi mi ki ka kai k’o lu kona ku fumana tuso ya ku li tomahanya ka butali?

3. Ku tomahanya lika za butokwa ku ama nto mañi kwa Bakreste?

³ Pulelo ya kuli “nto ya pili” i na ni muhupulo o mutomo wa nto ye ñwi ye ba fapil’a ze ñwi kaufela kamba ye tokwa ku nyakisiswa pili. Ibe kuli mu yo muñwi wa Lipaki za Jehova kamba mu mwahal’a bolule-lule ba baituti ba ba buniti ba Linzwi la Mulimu ba ba swalisana ni bona, mu nyakisise niti ye ye li: “Nto ni nto i na ni nako ya yona, mi nako i teñi ya linto kamukana mwatas’a lihalimu.” (Muekelesia. 3:1) Ka swanelo, seo si kopanyeleza ku bonisa kwa mina mamelelo ye lilato kwa liswalisano za lubasi. (Makolose 3:18-21) Si ama ku fumanela ka busepahali ba ndu ya mina ze tokwahala ili ka musebezi wa silifasi. (2 Matesalonika 3:10-12; 1 Timotea 5:8) Mi ka ku shatukela kwa nto ye ñwi, ne mu kana mwa ba ni nako ya ndongwamo ya ku ikatuluseza teñi kamba za ku itabisa ka zona za ka siwela kamba ku ishumusa. (Mu bapanye Mareka 6:31.) Nihakulicwalo, ka ku fa nahanisiso ye tuna, kana ha mu boni kuli ha ku na ni se sikana ku zona zeo se si li sa pili mwa bupilo? Nto ye ñwi ki ya butokwa hahulu.

4. Mafilipi 1:9, 10 i ama cwañi kwa ku tomahanya kwa luna lika za butokwa?

⁴ Ne mu kana mu lemuhile kuli likuka za Bible ze etelela ki lituso za butokwa mwa ku tomahanya lika za butokwa ni ku eza likatulo ze butali. Sina ka mutala, kwa Mafilipi 1:9, 10, Bakreste ba susuezwa ku ‘ekezeha mwa zibo ni mwa kutwisiso kaufela.’ Ka libaka lifi? Muapositola Paulusi u ekeza kuli: “Kuli mu zibe ku lemuha linto ze nde ku fita.” Kana leo haki libaka le li utwahala? Ka ku toma fa zibo ye nepahezi, Mukreste ya lemuha lika u kona ku bona se si swanela ku ba cisehelo ya pili—ya butokwa—mwa bupilo.

Mutala wa Se Si Li Sa Pili

5. Ka ku talusa mutala o siyezwi Bakreste, Mañolo a bonisa cwañi se ne si li sa pili mwa bupilo bwa Jesu?

⁵ Lu fumana kalulo ye ñwi ya butokwa hahulu ya zibo mwa manzwi a muapositola Pitrosi a li: “Ki sona se mu bizelizwe; kakuli Kreste ni yena u utwile butuku bakeñisa mina, a mi siyela mutala, kuli mu hate mw’a n’a hatile.” (1 Pitrosi 2:21) Ee, kwa neku la ketelelo ya ku se si li sa pili mwa bupilo, lwa kona ku nyakisisa seo Jesu Kreste na nahanile ka za sona. Samu 40:8 ne i bulezi ka ku polofita ka za hae kuli: “Se ni tabela, ki ku eza tato ya hao, Mulimu wa ka; E, mulao wa hao u mwa pilu ya ka.” N’a bulezi muhupulo o swana wo cwana: “Sico sa ka, kikuli ni eze se si latwa ki Ya ni lumile, mi ni feleleze musebezi wa hae.”—Joani 4:34; Maheberu 12:2.

6. Lu kona ku ba cwañi ni ze zwa mwateñi ze swana ni za Jesu mwa ku beya tato ya Mulimu mwa sibaka sa pili?

⁶ Mu lemuhe sinotolo seo—ku eza tato ya Mulimu. Mutala wa Jesu u koñomeka seo balutiwa ba hae ba swanela ku eza ka swanelo ku ba sa pili mwa bupilo bwa bona, kakuli n’a bulezi kuli “mulutiwa kaufela ikaba ya petehile, h’a swana sina muluti wa hae.” (Luka 6:40) Mi Jesu ha n’a nze a zamaya mwa nzila yeo Ndat’ahe n’a lelile, n’a bonisize kuli ne ku na ni “tabo” mwa ku eza tato ya Mulimu ku ba ya pili. (Samu 16:11; Likezo 2:28) Kana mwa bona se si taluswa ki seo? Balateleli ba Jesu ha ba nze ba keta ku eza tato ya Mulimu ku ba ya pili mwa bupilo bwa bona, ba ka ikola “tabo” ni bupilo sakata. (1 Timotea 6:19) Kacwalo ku na ni mabaka a fitelela li li liñwi a ku eza tato ya Mulimu ku ba nto ya butokwa mwa bupilo bwa luna.

7, 8. Ki miliko ifi yeo Jesu n’a talimani ni yona, mi ki sifi se lu kona ku ituta ku zwelela ku seo?

⁷ Hamulaho fela Jesu ha sa bonisize ku itahisa kwa ku eza tato ya Mulimu, Satani n’a likile ku mu sikulula. Ka mukwa ufi? Ka ku likwa mwa likalulo ze talu. Mwa mulikelo o muñwi ni o muñwi Jesu n’a alaba ka Mañolo, ili ka ngambu. (Mateu 4:1-10) Kono litiko ze ñwi ne li sa mu libelezi—nyandiso, ku sheununwa, ku betekwa ki Judasi, litamilikezo za buhata, mi kwa mafelelezo ni lifu la fa kota ya linyando. Niteñi, ne ku si na ni o mukana kwa miliko yeo o ne u yauluzi Mwan’a Mulimu ya sepahala mwa nzila ya hae. Mwa muinelo o ne u li o t’ata hahulu, Jesu n’a lapezi kuli: “Ku si ke kwa ezwa mo ni latela, ku ezwe mo u latela Wena. . . . Ku ezwe se si latwa ki Wena.” (Mateu 26:39, 42) Kana yo muñwi ni yo muñwi wa ku luna ha swaneli ku susuezwa ka butuna ki mufuta wa mutala wo o lu siyezwi, o lu tahiseza ku ‘tundamena mwa ku lapela’?—Maroma 12:12.

⁸ Ee, muta lu tomahanya lika za butokwa mwa bupilo bwa luna, ketelelo ya bumulimu ki ye na ni tuso hahulu, sihulu ha lu talimana ni lila za niti ni ba ba lwanisa tato ya Mulimu. Mu hupule likupo za ka buikokobezo za Mulena Davida ya sepahala kwa neku la ketelelo ha n’a ipumani mwa ku lwaniswa ki lila. Lu ka utwisisa se ha lu nze lu nyakisisa kalulo ya Samu 143. Seo si swanela ku lu tusa ku lemuha ka mo lu konela ku tiiseza swalisano ya luna ya ka butu ni Jehova ni ku tiiswa mwa ku zwelapili ku eza tato ya Mulimu ku ba ya pili mwa bupilo bwa luna.

Jehova Wa Utwa ni ku Alaba Litapelo za Luna

9. (a) Nihaike kuli Davida ne li muezalibi, manzwi ni likezo za hae li patulula nto mañi? (b) Ki kabakalañi ha lu sa swaneli ku tuhela ku eza se si lukile?

⁹ Nihaike kuli ne li mutu ya li muezalibi, Davida n’a na ni tumelo ya kuli Jehova n’a ka teeleza kupo ya hae ya buikokobezo. N’a kupile ka ku ikokobeza kuli: “[Jehova, NW], utwa tapelo ya ka, u teeleze likupo za ka za buikokobezo; U ni alabe mwa ku sepahala kwa hao, ni kabakala niti ya hao. Mi u si ke wa isana mwa muzeko ni mutang’a hao, kakuli ku ba ba pila, ha ku na ya ka fumanwa kuli u lukile fapil’a hao.” (Samu 143:1, 2) Davida n’a lemuhile ku sa petahala kwa hae, kono niteñi pilu ya hae ne li ye tezi ku Mulimu. Kacwalo, n’a na ni buikolwiso bwa kuli n’a ka amuhela kalabo ka ku luka. Kana seo ha si lu susuezi? Nihaike kuli ha lu fiti fa ku luka kwa Mulimu, lwa kona ku ba ni buikolwiso bwa kuli wa lu utwa haiba lipilu za luna ki ze tezi ku yena. (Muekelesia 7:20; 1 Joani 5:14) Ha lu nze lu tundamena mwa tapelo, lu lukela ku lela ku ‘tula bumaswe ka bunde’ mwa mazazi a a maswe.—Maroma 12:20, 21; Jakobo 4:7.

10. Ki kabakalañi Davida ha bile ni linako za ku ikalelwa?

¹⁰ Davida n’a na ni lila, sina ha lu na ni zona. Ku be ha n’a li nyambaeti ka ku saba Saule, ili ku tunulelwa mwa libaka ze kuzize, ze sa konwi ku fitwa teñi, kamba sina mulena ya n’a lwaniswa ki lila, Davida n’a bile ni linako za ku ikalelwa. N’a talusize ka mo seo ne si mu amezi: “Sila si zuma bupilo bwa ka . . . Si ni kalameleza mwa mabaka a lififi . . . Kabakaleo, bupilo bwa ka bu ya kwatasi, pilu ya ka i felelwa ki sepo.” (Samu 143:3, 4) Kana se mu bile ni libaka la ku ikutwa ka nzila ye swana?

11. Ki linako lifi ze bilaeza zeo batanga ba Mulimu ba mwa lizazi la cwale se ba talimani ni zona?

¹¹ Sineneketo ya lila, miliko ye tiswa ki butata bo butuna bwa za mali, makulanu a matuna, kamba butata bo buñwi bo bu bilaeza li isize batu ba Mulimu ba bañwi kwa ku ikutwa kuli ba felelwa ki sepo. Ka linako ze ñwi lipilu za bona hape se li bile sina ze fokola. Ku swana sina inge kuli batu ka buñwi se ba lilokile kuli: “Wena ya [ni tahiselize ku bona] liñalelwa ze ñata, ze butuku, u ka [ni] zusa hape . . . U ni kutele hape, u ni wise pilu.” (Samu 71:20, 21) Se ba tusizwe cwañi?

Ka Mwa ku Talimanela ni Likezo za Lila

12. Mulena Davida n’a talimani cwañi ni lubeta ni miliko?

¹² Samu 143:5 i bonisa seo Davida n’a ezize ha n’a taselizwe ki lubeta ni miliko ye mituna: “Ni hupula mazazi a kwakale, ni kengeela z’o ezize kaufela; Ni nahana za misebezi ya mazoho a hao.” Davida n’a hupuzi ka mo Mulimu n’a sebelisanezi ni batanga ba Hae ni ka mo yena ka sibili n’a iponezi ku lukululwa. N’a nahanile ka za seo Jehova n’a ezize kabakala libizo la Hae le lituna. Ee, Davida yena ka sibili n’a iyakatitwe ka za misebezi ya Mulimu.

13. Muta lu talimana ni miliko, ku nyakisisa kwa luna mitala ya kwaikale ni ya cwale ya batanga ba ba sepahala ku lu tusa cwañi ku itiisa?

¹³ Kana ha lu hupulangi hañata ka mo Mulimu a sebelisanezi ni batu ba hae? Kaniti luli lwa hupulanga! Seo si kopanyeleza ni litaba ze ne ezizwe ki “lilu le lituna la lipaki” mwa linako za makalelo pili Bukreste bu si ka ba teñi kale. (Maheberu 11:32-38; 12:1) Bakreste ba ba tozizwe mwa lilimo za mwanda wa pili ne ba susuelizwe hape kuli ba “hupule mazazi ale a pili” ni ze ne ba tiyezi. (Maheberu 10:32-34) Ku cwañi ka ze ipumanwi ku zona za batanga ba Mulimu ba mwa linako za cwale, ze cwale ka ze ñozwi mwa buka ya Jehovah’s Witnesses—Proclaimers of God’s Kingdom?a Litaba ze ñozwi mwateñi ni mwa lihatiso ze ñwi li lu konisa ku hupula ka mo Jehova a tuselize batu ba hae ku tiyela likaniso, ku lengiwa mwa litolongo, ku lwaniswa ki likwata, ni minganda ya tukufazo ni ya ku sebeza sina batanga. Se ku bile ni miliko mwa linaha ze shandauzwi ki lindwa, ze cwale ka Burundi, Liberia, Rwanda, ni ye ne bizwa Yugoslavia. Muta nyandiso ne i ba teñi, batanga ba Mulimu ne ba itiisa kabakala ku bukeleza swalisano ye tiile ni Jehova. Lizoho la hae ne li tiisize ba ne ba ezize tato ya hae ku ba nto ya pili mwa bupilo bwa bona.

14. (a) Ki ufi mutala o muñwi wa mutu ya n’a tusizwe ki Mulimu mwa muinelo o ne u kana wa swana ni wa luna? (b) Ki sifi se mu ituta ku zwelela kwa mutala wo?

¹⁴ Nihakulicwalo, ne mu kana mwa bulela kuli ha mu si ka ipumana mwa situhu sa ku itusiswa maswe se si cwalo, mi ne mu kana mwa ikutwa kuli mwendi ha mu na ku ipumana mwa muinelo o cwalo muta o muñwi. Nihakulicwalo, tuso ya Mulimu kwa batu ba hae ha i si ka ba kamita ku seo ba bañwi ne ba kana ba nga kuli ki miinelo ye ipitezi. S’a tusize “batu-tu fela” ba bañata mwa miinelo “ye si ka ipitela.” Ki wo o muñwi wa mitala ye miñata: The Watchtower ya December 1, 1996, ne i na ni taba ye ne kandekilwe ki Penelope Makris. Ki mutala o nyangumuna hakalo wa busepahali bwa Sikreste! Kana mwa kona ku hupula sa n’a tiyezi ku zwelela ku bomuyahwa ni yena, ka mwa n’a nyandezi mwa makulano a matuna, ni buikatazo bwa n’a ezize ka t’ata kuli a zwelepili mwa bukombwa bwa nako ye tezi? Ku cwañi ka za mupuzo wa sa n’a ipumani ku sona mwa Mytilene? Sisupo ki sa kuli, Kana mu nga mitala ye cwalo sina lituso ku luna kaufela mwa ku tomahanya lika za butokwa, ili ku eza tato ya Mulimu ku ba ya pili mwa bupilo bwa luna?

15. Ki lifi ze ñwi za ezize Jehova ze lu swanela ku yeya ku zona?

¹⁵ Kwa lu tusa ku yeya fa misebezi ya Jehova, sina ka mwa ezelize Davida. Kuli a pete mulelo wa hae, Jehova n’a ezize tukiso ya puluso ka lifu, zuho, ni ku kanyiswa kwa Mwan’a hae. (1 Timotea 3:16) U tomile Mubuso wa hae wa kwa lihalimu, ku zwisa Satani ni badimona ba hae mwa lihalimu, mi u kutisize sinca bulapeli bwa niti fa lifasi-mubu fa. (Sinulo 12:7-12) U ezize paradaisi ya kwa moya mi u fuyauzi batu ba hae ka kekezeho. (Isaya 35:1-10; 60:22) Batu ba hae ba sweli ku fa bupaki bwa mafelelezo cwale pili ñalelwa ye tuna i si ka fita kale. (Sinulo 14:6, 7) Ee, lu na ni ze ñata za ku yeya ku zona.

16. Ki nto mañi yeo lu susuezwa ku iyakatwa ka za yona, mi seo si ka lu bonisa nto mañi hande-nde?

¹⁶ Ku ipuluka lu nze lu iyakatitwe ka za misebezi ya mazoho a Mulimu mwa sibaka sa ku patehiswa ki licisehelo za ka butu ku lu bonisa hande kuli m’ata a sebeza a Jehova ha konwi ku tibelwa. Nihakulicwalo, misebezi yeo haki ye ciñekezi fela fa misebezi ye minde ya pupo ye iponelwa mwa lihalimu ni fa lifasi-mubu fa. (Jobo 37:14 Samu 19:1; 104:24) Misebezi ya hae ye minde i kopanyeleza likezo za ku lukulula batu ba hae kwa lila ze hatelela, sina ka mo ku boniselizwe ku ze ipumanwi ku zona za batu ba hae ba ba ketilwe ba kwaikale.—Exoda 14:31; 15:6.

Ku Ziba Nzila Ye Lu Swanela ku Zamaya ka Yona

17. Jehova n’a bile cwañi wa luli ku Davida, mi lu kona ku tiiswa cwañi ki seo?

¹⁷ Davida n’a lapelezi tuso ya ku tibela ku kambuka kwa mukamo wa bupilo bwa hae kuli: “Ni otololela mazoho a ka ku Wena; Pilu ya ka i ku nyolezwi inge lifasi le li nyolilwe. [Jehova, NW], u ni alabe kapili, pilu ya ka ya letuka; U si ke wa ni patela pata ya hao. Kuli ni si ke na swana sina ba ba shetumukela mwa libita.” (Samu 143:6, 7) Davida, ili muezalibi, n’a ziba kuli Mulimu n’a lemuhile muinelo wa hae. (Samu 31:7) Ka linako ze ñwi ni luna ne lu kana lwa ikutwa kuli mayemo a luna a kwa moya a fitile fa sipimo sa kwatasi hahulu. Kono muinelo haki o si na sepo. Jehova, ya utwa litapelo za luna, n’a kana a akufisa ku kutiswa sinca kwa luna ka ku lu wetulusa ka maeluda ba ba lilato, litaba za mwa Tora ya ku Libelela, kamba likalulo za mukopano ze ne li kana za bonahala kuli ne li lukiselizwe fela luna.—Isaya 32:1, 2.

18, 19. (a) Ki ifi ye swanela ku ba kupo ya luna ya ka buikokobezo bo bu buniti ku Jehova? (b) Ki sifi seo lu kona ku ba ni buniti ka za sona?

¹⁸ Sepo ya luna ku Jehova i lu susueza ku mu kupa ka buikokobezo kuli: “U ni utwise mukekecima wa hao . . . Kakuli ki Wena ye ni sepa. U ni bonise nzila ye ni swanezi ku ya ka yona.” (Samu 143:8) Kana n’a palezwi ku tusa Kaizeli Makris, ya n’a li a nosi mwa soli se si li kalulo ya Greece? Kacwalo kana u ka palelwa ku mi tusa ha mu nze mu eza tato ya hae ku ba nto ya pili mwa bupilo bwa mina? Diabulosi ni ba hae ne ba ka tabela ku kwalela kamba ku tuhelisa ka ku tala musebezi wa luna wa ku shaela Mubuso wa Mulimu. Ku be kuli lu sebeza mwa linaha mo bulapeli bwa niti bu lumelezwa ka nañungelele kamba lu sebeza k’o bu haniswa, litapelo za luna ze swalisani li lumelelana ni kupo ya Davida ye li: “[Jehova, NW], u ni lamulele kwa lila za ka, ni sabela ku Wena kuli u ni pate.” (Samu 143:9) Silelezo ya luna kwa maziezi a kwa moya i itingile fa ku yaha mwa mukunda wa Muambakani-ya-Pahami.—Samu 91:1.

¹⁹ Buikolwiso bwa luna bwa se si li sa pili ki bo bu tomile ka ku tiya luli. (Maroma 12:1, 2) Kacwalo, mu hane likezo za lifasi za ku mi hapilikeza ku amuhela seo li nahana kuli ki sa butokwa mwa muinelo wa lika za butu. Mu zwelepili ku tuhelela muinelo ufi kamba ufi wa bupilo bwa mina ku bonahaza seo mu ziba kuli ki sa pili—ili ku eza tato ya Mulimu.—Mateu 6:10; 7:21.

20. (a) Lu itutile nto mañi ka za Davida kwa Samu 143:1-9? (b) Bakreste ba bonisa cwañi moya wa Davida kacenu?

²⁰ Litimana za pili za Samu 143 li koñomeka swalisano ye tuna ya Davida ya ka butu ni Jehova. Ha n’a potolohiwa ki lila, n’a kupa ketelelo ku Mulimu ka tukuluho. N’a bulela maikuto a hae, a nze a bata tuso mwa nzila ye lukile ya ku zamaya ka yona. Ki nto ye swana ni kacenu ku bomasiyaleti ba ba ketilwe ka moya fa lifasi-mubu ni balikani ba bona. Ba nga swalisano ya bona ni Jehova ku ba ya butokwa hahulu ha ba nze ba kupa ka buikokobezo ketelelo ya hae. Ba eza tato ya Mulimu ku ba ya pili, ku si na taba ni lisineneketo ze zwa ku Diabulosi ni lifasi.

21. Ki kabakalañi ha kuli kwa butokwa ku luna ku bonisa mutala o munde kuli lu kone ku luta ba bañwi se si swanela ku ba sa pili mwa bupilo bwa bona?

²¹ Bolule-lule ba ba ituta Bibele ni Lipaki za Jehova ba tokwa ku lemuha kuli ku eza tato ya Mulimu ki nto ya pili. Lwa kona ku ba tusa ku utwisisa seo ha lu buhisana kauhanyo 13 ya buka ya Zibo Ye Isa kwa Bupilo bo Bu Sa Feli, ili ye koñomeka likuka ze amiwa mwa ku ipeya ku utwa Linzwi.b Ka buniti fela, ba swanela ku bona mutala o munde ku luna ku seo lu ba luta sona. Hasamulaho wa silengonyana sa nako, ni bona hape ba ka fita fa ku ziba nzila yeo ba swanela ku zamaya ka yona. Bona bolule-lule ba ha ba nze ba fita fa ku utwisisa ka butu se si swanela ku ba sa butokwa hahulu ka ku fitisisa mwa bupilo bwa bona, ba bañata ba ka susuezwa k’u nga mihato ya buineelo ni kolobezo. Ku zwa fo, puteho i kona ku ba tusa ku zwelapili ku zamaya mwa nzila ya bupilo.

22. Ki lipuzo mañi ze ka nyakisiswa mwa taba ye tatama?

²² Ba bañata ba lumela kuli tato ya Mulimu i swanela ku ba ya butokwa hahulu ka ku fitisisa mwa bupilo bwa bona. Niteñi, Jehova u luta cwañi batanga ba hae ka ku zwelapili ku eza tato ya hae? Seo si tahisa lituso mañi ku bona? Lipuzo ze li ka nyakisiswa mwa puhisano ya timana ye li mutomo ya Samu 143:10, mwa taba ye tatama.

[Litaluso za kwatasi]

Kalabo ya Mina Ki Ifi?

◻ Ka ku sebelisa Mafilipi 1:9, 10, lu kona cwañi ku tomahanya lika za butokwa?

◻ Jesu n’a bonisize cwañi se ne si li sa pili mwa bupilo bwa hae?

◻ Ki sifi se lu kona ku ituta ku zwelela kwa likezo za Davida ha n’a li mwa tiko?

◻ Samu 143:1-9 i lu tusa mwa nzila mañi kacenu?

◻ Ki sifi se si swanela ku ba sa pili mwa bupilo bwa luna?

[Siswaniso se si fa likepe 4]

Likezo za Davida ne li bonahalize ku itinga kwa hae ku Jehova

[Manzwi a bañi]

Ku tahisizwe sinca ku zwelela mwa Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s