3. Jehova u fitisa memo ifi ku luna, mi i zamaelela ni sepiso mañi?

³ Jehova u lu mema ku sutelela ku yena. U itukiselize ku lu amuhela ku ba balikani ba hae. Mi hape, u sepisa kuli ha lu ka nga muhato wa ku sutelela ku yena, ni yena u ka eza cwalo. U ka sutelela ku luna. Kacwalo lu kana lwa ipumana mwa nto ya butokwa hahulu—yona ya ku ba “ba likunutu za hae.”a (Samu 25:14) Linzwi la “likunutu” li na ni muhupulo wa ku ambola kunutu ni mulikani yo mutuna.

4. Ne mu ka talusa cwañi mulikani yo mutuna, mi Jehova u bonisanga cwañi kuli ki mulikani ya cwalo ku ba ba sutelela ku yena?

⁴ Kana mu na ni mulikani yo mutuna ye mu kona ku taluseza likunutu? Mulikani ya cwalo ki mutu y’a mi lata. Mu mu sepile, kakuli u bile ya sepahala. Tabo ya mina ya ekezehanga ha mu mu taluseza ze mi tabisize. Mu ikutwanga ku imuluha ha teeleza kwa manyando a mina ka ku mi utwela butuku. Wa mi utwisisanga, ba bañwi ni ha ba sa mi utwisisi. Ka nzila ye swana, ha mu sutelela ku Mulimu, mu ba ni Mulikani yo mutuna ya mi iseza pilu ha buniti, ya mi lata luli, ni ku mi utwisisa ka ku tala. (Samu 103:14; 1 Pitrosi 5:7) Mwa mu taluseza ze kwa pilu ya mina kaufela, kakuli mwa ziba kuli wa sepahala ku ba ba sepahala ku yena. (Samu 18:25) Kono se si lu konisa ku itama silikani se situna seo ni Mulimu kikuli yena u si konahalisize.