Bibele ibulela kuli bupilo bwa batu ki ‘bobukuswani mi butezi liziyezi.’ (Jobo 14:1) Kana Mulimu ubata kuli lupile bupilo bobucwalo? Haiba haki cwalo, Mulimu ubata kuli lupile bupilo bobucwañi? Kana nako yeñwi lukapila bupilo bwabata Mulimu kuli lupile? Halunyakisiseñi litaba zeomba-omba ze mwa Bibele.

1. Jehova ubata kuli lupile bupilo bobucwañi?

Jehova ubata kuli lupile bupilo bobunde hahulu. Jehova hanaabupile batu bapili, bona bo Adama ni Eva, naababeile mwa paradaisi yende ili simu ya Edeni. Mi “Mulimu abafuyola, mi ali ku bona: ‘Mupepe mi muate, mutaze lifasi mi mubuse fahalimwaa lona.’” (Genese 1:28) Jehova naabata kuli bo Adama ni Eva babe ni bana, bafetule lifasi kaufela kuba paradaisi ni kubabalela lifolofolo. Mulimu naabata kuli batu kaufela babe ni buikangulo bobunde ni kupila kuya kuile.

Nihaike kuli nekusikaba cwalo,a Mulimu usabata kuli batu bapile bupilo bobucwalo. (Isaya 46:10, 11) Ubata kuli batu baba muutwa bapile bupilo bobunde kuya kuile.—Mubale Sinulo 21:3, 4.

2. Ki nto mañi yekona kulutusa kupila bupilo bobunde cwale?

Jehova naalubupile ni takazo ya kubata kumuziba ni kumulapela. (Mubale Mateu 5:3-6.) Ubata kuli lube ni silikani sesinde ni yena, ‘luzamaye mwa linzila zahae kaufela, mi lumulate,’ ni kumusebeleza ‘ka pilu yaluna kaufela.’ (Deuteronoma 10:12; Samu 25:14) Haluka eza cwalo, lukaba ni tabo kusina taba ni miinelo yetaata yelukopana ni yona. Kulapela Jehova kulutusa kupila bupilo bobunde bobu mutabisa.

3. Jehova ubata kuli batu bapile bupilo bobunde

Mubuhe VIDIO, mi kihona mukanyakisisa puzo yelatelela.

VIDIO: Mulimu Naabupeziñi Lifasi? Kalulonyana ya vidio (1:41)

• Ki kabakalañi Mulimu hanaabupile lifasi laluna lelinde?

Mubale Muekelesia 3:11, mi kihona mukanyakisisa puzo yelatelela:

• Taba ye imilutañi ka za Jehova?

4. Jehova hasika cinca mulelo wahae

Mubale Samu 37:11, 29 ni Isaya 55:11, mi kihona mukanyakisisa puzo yelatelela:

• Luziba cwañi kuli Jehova usabata kuli lupile bupilo bobunde?

5. Kulapela Jehova kulutusa kupila bupilo bobunde

VIDIO: Kuituta Bibele Kunitusize Kuziba Mulelo wa Bupilo (5:03)

• Bo Terumi nebatusizwe cwañi kuziba kuli Jehova ubata kuli lupile bupilo bobunde?

Mubale Muekelesia 12:13, mi kihona mukanyakisisa puzo yelatelela:

• Bakeñisa kuli Jehova uluezelize lika zeñata, luswanela kubonisa cwañi kuli lwaitumela ku yena?

LITABA KA BUKUSWANI

Jehova ubata kuli luikole bupilo bobunde kuya kuile fa lifasi. Halulapela Mulimu ka pilu yaluna kaufela, lwakona kupila bupilo bobunde nihaiba ka nako yacwale.

Mulundulule

• Jehova naabata kuli Adama ni Eva bapile bupilo bobucwañi?

• Luziba cwañi kuli Mulimu usabata kuli batu bapile bupilo bobunde?

• Ki lika mañi zekona kumitusa kupila bupilo bobunde?

MUBONE LITABA ZEÑWI

Munyakisise bupaki bobubonisa kuli simu ya Edeni neili teñi.

“Kana Simu ya Edeni—Neisiyo Kamba Neili Teñi?” (Tawala ya Mulibeleli, January 1, 2011)

Muitute litaba zebonisa kuli lifasi likaina kuya kuile.

“Kana Lifasi Likasinyiwa?” (Taba ya fa webusaiti)

Munyakisise zeibulela Bibele zekona kumitusa kupila bupilo bobunde.

“Mulelo wa Kupila ki Ufi?” (Taba ya fa webusaiti)

Mubone zanaaitutile muuna yomuñwi yanaanga kuli naanani lika kaufela.

Senipila Bupilo Bobunde Cwale (3:55)

2. Ki bo mañi babaka busa ni Jesu?

Jesu haana kubusa anosi. Batu babazwa “mwa mishobo kaufela ni malimi ni batu ni sicaba. . . bakabusa sina malena fahalimwaa lifasi.” (Sinulo 5:9, 10) Ki batu babakai babaka busa ni Kreste? Kuzwa feela fanaatezi Jesu fa lifasi, Bakreste babañata-ñata babile balateleli bahae. Kono kwa batu bao, ki ba 144,000 feela babakaya kwa lihalimu kuyo busa ni Jesu. (Mubale Sinulo 14:1-4.) Bakreste babañwi kaufelaa bona bakabusiwa ki Mubuso wo inze bali fa lifasi.—Samu 37:29.

Mubuso wa Mulimu ukalile kale kubusa. Mubuso wo utuha ueza licinceho zetuna fa lifasi. Halunyakisiseñi zeñwi za lika zende zeuka peta Mubuso wa Mulimu.

1. Mubuso wa Mulimu ukatahisa cwañi kozo ni kuluka fa lifasi?

Jesu, yena Mulena wa Mubuso wa Mulimu, ukayundisa batu babamaswe ni mibuso ya lifasi fa ndwa ya Armagedoni. (Sinulo 16:14, 16) Ka nako yeo, sepiso ya mwa Bibele yelatelela ikatalelezwa: “Kusiyezi feela nakonyana, mi babamaswe habasana kubateñi.” (Samu 37:10) Ka nako yeo, Jesu ukatahisa kozo ni kuluka mwa lifasi kaufela.—Mubale Isaya 11:4.

2. Bupilo bukaba cwañi tato ya Mulimu haika eziwa fa lifasi?

Mubuso wa Mulimu hauka busa lifasi, “babalukile bakaluwa lifasi, mi bakapila ku lona kuya kuile.” (Samu 37:29) Nako yeo ikaba yende hahulu kakuli batu kaufela babaka pila fa lifasi bakaba babalukile, bakalatana, mi bakalata Jehova! Hakuna mutu yakakula, mi batu kaufela bakapila kuya kuile.

3. Ki lika mañi zeuka peta Mubuso wa Mulimu batu babamaswe hase bayundusizwe?

Batu babamaswe hase bayundisizwe, Jesu ukabusa sina Mulena ka lilimo ze 1,000. Ka nako yeo, Jesu ni ba 144,000 bakabusa ni bona, bakatusa batu kuba babapetahalile. Kwa mafelelezo a lilimo zeo, lifasi likaba paradaisi yende, fokuka pila feela batu babautwa milao ya Jehova. Hasamulaho, Jesu ukakutisa Mubuso ku Ndatahe, yena Jehova. Ka nako yeo, ‘libizo la Mulimu likakeniswa’ ka nzila yeipitezi luli. (Mateu 6:9, 10) Batu bakaiponela kuli Jehova ki Mubusi yomunde ili yalata batanga bahae. Jehova ukayundisa Satani, madimona, ni batu kaufela babaiketezi kumukwenuhela. (Sinulo 20:7-10) Lika zende zeuka eza Mubuso wa Mulimu likaina kuya kuile.

MUBATISISE

4. Mubuso wa Mulimu ukafelisa mibuso ya batu

‘Mutu ubile ni maata a kuhatelela yomuñwi, kumueza maswe.’ (Muekelesia 8:9) Ka kuitusisa Mubuso wahae, Jehova ukafelisa kusaluka.

Mubale Daniele 2:44 ni 2 Matesalonika 1:6-8, mi kihona mukanyakisisa lipuzo zelatelela:

• Ki lika mañi zakaeza Jehova ni Mwanaa hae, yena Jesu, kwa mibuso ya batu ni baba iyemela?

• Zemuitutile ka za Jehova ni Jesu limikolwisa cwañi kuli bakaatula ka kuluka?

5. Jesu ki Mulena yomunde

Ka kuba Mulena wa Mubuso wa Mulimu, Jesu ukaeza lika zeñata zekatusa batu fa lifasi. Mubuhe VIDIO kuli mubone mwaboniselize Jesu kuli unani takazo ni maata afilwe ki Mulimu a kutusa batu.

VIDIO: Jesu Naabonisize Zeuka Peta Mubuso wa Mulimu (1:13)

Hanaali fa lifasi, Jesu naaezize lika zebonisa zeuka peta Mubuso wa Mulimu kwapili. Ki limbuyoti lifi zemutabela fa mukoloko olatelela? Mubale mañolo azamaelela ni limbuyoti zebonisizwe.

6. Mubuso wa Mulimu ukaeza lika zende

VIDIO: Lika Zelutusa Kuziba Zebaka Ikola Batu Kwapili (4:38)

Mubale Samu 145:16, mi kihona mukanyakisisa puzo yelatelela:

• Muikutwa cwañi kuziba kuli Jehova ‘ukakulisa takazo ya zepila kaufela’?

LITABA KA BUKUSWANI

Mubuso wa Mulimu ukapeta tato yahae. Ukatahisa kuli lifasi libe paradaisi mokuka pila batu babande babaka lapela Jehova kuya kuile.

Mulundulule

• Mubuso wa Mulimu ukakenisa cwañi libizo la Jehova?

• Ki kabakalañi halukona kukolwa kuli Mubuso wa Mulimu ukataleleza lisepiso za mwa Bibele?

• Kwa limbuyoti zeuka tahisa Mubuso wa Mulimu, ki mbuyoti ifi yemunyolelwa hahulu?

MUBONE LITABA ZEÑWI

Mubatisise kuli Armagedoni ki nto mañi.

“Ndwa ya Armagedoni ki Nto Mañi?” (Taba ya fa webusaiti)

Munyakisise zekaezahala ka nako ya puso ya Jesu ya lilimo ze 1,000 ni kwa mafelelezo ayona.

“Ñalelwa Yetuna ki Nto Mañi?” (Taba ya fa webusaiti)

Munyakisise zekona kutusa mabasi kunahanisisa limbuyoti zebaka ikola ka nako yeuka busa lifasi Mubuso wa Mulimu.

Muipone Mwa Paradaisi (1:50)

Mwa taba yeli, “Neninani Lipuzo Zeñata,” mubone mo muuna yomuñwi naafumanezi likalabo kwa lipuzo zanaanani zona.

“Bibele Yacincanga Bupilo Bwa Batu” (Tawala ya Mulibeleli, January 1, 2012)