24, 25. Jehova u bulela cwañi hape za Sirusi, mi nto yeo i lu hupulisa bupolofita bufi bo buñwi?

²⁴ Jehova hape u bulela za Sirusi kuli: “Ni bizize yo muñwi kwa Mutulo mi u tile; wa zwa ko ku pazulela lizazi, mi ki ya lapela Libizo la ka. U ka hatikela malena inge sileze, kamba sina mubupi ya luba lizupa.” (Isaya 41:25)d Ka ku fapana ni milimu ya macaba, Jehova wa kona ku peta lika. Ha ka biza Sirusi kwa upa, “ko ku pazulela lizazi,” Mulimu u ka bonisa m’ata a hae a ku polofita ni ku lukisa za kwapili kuli a taleleze bupolofita bwa hae.

²⁵ Manzwi ao a lu hupulisa mutalusezo wa bupolofita wa muapositola Joani ha bulela za malena be ne ba ka susuezwa ku nga muhato mwa miteñi ya luna. Kwa Sinulo 16:12, lu bala kuli ku ka lukiswa “nzila ya malena ba ba taha ba zwa kwa Upa.” Malena bao ki Jehova Mulimu ni Jesu Kreste. Sina Sirusi mwa n’a liululezi batu ba Mulimu kwaikale, ni malena bao ba ba m’ata hahulu ba ka yundisa lila za Jehova ni ku lisa batu ba hae mwahal’a ñalelwa ye tuna, ku ba libisa mwa lifasi le linca la ku luka.—Samu 2:8, 9; 2 Pitrosi 3:13; Sinulo 7:14-17.