Kauhanyo 9

Lu Tokwa Ku Tiyela Miliko

KANA ku na ni mutu ya kile a ku bulelela ku eza nto ye ñwi ye si ka luka?— Kana n’a ku hapelelize ku i eza? Kamba kana n’a bulezi kuli kwa tabisa ni kuli ha ku si ka fosahala luli ku i eza?— Mutu ha eza cwalo ku luna, u lika ku lu beya mwa muliko.

Lu lukela ku ezañi ha lu li mwa muliko? Kana lu lukela ku ituhelela ni ku eza ze si ka luka?— Jehova Mulimu n’a si ke a tabela ha ne lu ka eza cwalo. Kono kana wa ziba ya n’a ka tabela?— Ki Satani Diabulosi.

Satani ki sila sa Mulimu, mi hape Satani ki sila sa luna. Ha lu koni ku mu bona kakuli ki lingeloi. Kono wa kona ku lu bona. Zazi le liñwi, Diabulosi n’a ambozi ni Jesu, yena Muluti yo Mutuna, mi n’a likile ku mu lika. Ha lu bone mwa n’a ezelize Jesu. Kihona lu ka ziba ze lukile ze lu lukela ku eza ha lu likiwa.

Jesu kamita n’a batanga ku eza tato ya Mulimu. N’a bonisize cwalo patalaza ka ku kolobezwa mwa Nuka ya Jordani. Hamulaho fela wa ku kolobezwa, Jesu a likiwa ki Satani. Bibele i bulela kuli ‘lihalimu la kwaluluhela’ Jesu. (Mateu 3:16) Mwendi f’o ki ku talusa kuli Jesu cwale n’a kalile ku hupula za bupilo bwa hae kaufela bwa kwa lihalimu ni Mulimu.

Jesu ha s’a kolobelizwe, a ya mwa lihalaupa kuli a y’o nahana ka za lika za n’a kalile ku hupula. Ne ku fitile mazazi ni masihu a 40. Ka nako yeo, Jesu n’a si ka ca se siñwi, mi kacwalo n’a shwile hahulu tala. N’e li ka nako yeo Satani ha n’a likile ku beya Jesu mwa muliko.

Diabulosi n’a ize: ‘Haiba u Mwan’a Mulimu, u bulelele macwe a kuli a fetuhe sinkwa.’ Linkwa ze ñwi ne li ka be li bile ze tabusa luli! Kono kana Jesu n’a ka kona ku fetula macwe ku a eza sinkwa?— Ee, n’a ka kona ku eza cwalo. Kabakalañi? Kakuli Jesu, yena Mwan’a Mulimu, n’a na ni m’ata a ipitezi.

Kana wena n’o ka fetula licwe ku li eza sinkwa Diabulosi ha n’a ka ku bulelela ku eza cwalo?— Jesu n’a shwile tala. Kacwalo, kana ne ku ka be ku bile ko ku lukile ha n’a ka eza cwalo hañwi fela?— Jesu n’a ziba kuli ku itusisa m’ata a hae cwalo ne ku si ka luka. Jehova n’a mu file m’ata ao ilikuli a suteleze batu ku Mulimu, isiñi ku itusisa ona ku ili yena.

Kacwalo, Jesu a bulelela Satani se si ñozwi mwa Bibele, kuli: ‘Mutu h’a lukeli ku pila sinkwa fela, kono u lukela ku pila ka linzwi kaufela le li zwa mwa mulomo wa Jehova.’ Jesu n’a ziba kuli ku eza ze tabisa Jehova ku butokwa hahulu ku fita ku ba ni lico za ku ca.

Kono Diabulosi a mu lika hape. A isa Jesu mwa Jerusalema ni ku mu yemisa fa muongola wa tempele. Cwale Satani a li: ‘Haiba u Mwan’a Mulimu, ha ku tulele fafasi, kakuli ku ñozwi kuli mangeloi a Mulimu a ka ku sileleza kuli u si ke wa holofala.’

Satani n’a buleleziñi cwalo?— N’a bulezi cwalo kuli a like Jesu ku eza nto ye ñwi ya butoto. Kono Jesu hape n’a si ka utwa Satani. N’a ize ku Satani: ‘Ku ñozwi kuli: U si ke wa lika Mulena Mulimu wa hao.’ Jesu n’a ziba kuli ha ku si ka luka ku lika Jehova ka ku eza lika ze kona ku beya bupilo bwa hae mwa kozi.

Kono Satani n’a si ka tuhela. Kih’a isa Jesu fa lilundu le li telele-telele. Teñi, a mu bonisa mibuso kaufela, kamba milonga, ya lifasi ni kanya ya yona. Cwale Satani a li ku Jesu: “Zeo kamukana ni ka ku fa zona, ha u wa ka mañwele, wa ni kubamela.”

Nahana fela za n’a bulezi Diabulosi. Kana mibuso yeo kaufela, kamba milonga ya batu, luli ne i li ya Satani?— Jesu n’a si ka latula kuli ne i si ya Satani. N’a ka be a latuzi kambe ne i si ya Satani. Kaniti, Satani ki yena ya busa macaba kaufela a lifasi. Bibele mane i mu biza kuli ki yena “mulena wa lifasi le.”—Joani 12:31.

N’o ka eza cwañi Diabulosi ha n’a ka ku sepisa nto ye ñwi ha n’o ka mu lapela?— Jesu n’a ziba kuli neikaba ku fosa ku lapela Diabulosi ku si na taba ni za N’a ka fumana mwa ku eza cwalo. Kacwalo, Jesu a li: ‘Zwa Satani, kakuli Bibele i bulela kuli Jehova Mulimu wa hao ki yena y’o lukela ku lapela mi ki yena a nosi y’o lukela ku sebeleza.’—Mateu 4:1-10; Luka 4:1-13.

Ni luna lwa talimananga ni miliko. Kana wa ziba ye miñwi ya yona?— Ki o mutala. Bom’aho mwendi ba besize matumbuwa kamba sico se siñwi se si tabusa. Ba kana ba ku bulelela kuli u si ke wa lika ku ca kwateñi konji nako ya ku ca ha se i fitile. Kono wena u shwile tala, mi u kana wa ikutwa ku ba mwa muliko wa ku bata ku ca kwateñi. Kana u ka utwa bom’aho?— Satani u bata kuli u si ke wa ba utwa.

Hupula Jesu. Ni yena n’a shwile hahulu tala. Kono n’a ziba kuli ku tabisa Mulimu n’e li kwa butokwa hahulu ku fita ku ca sico. U bonisa kuli u swana sina Jesu ha u eza se ba ku bulelela bom’aho.

Mwendi banana ba bañwi ba kana ba ku bulelela ku miza tupilusi to tuñwi. Mwendi ba ka ku bulelela kuli u ka ikutwa hande luli ha u ka tu miza. Kono mwendi tupilusi t’o ki milyani ye kola. Twa kona ku ku kulisa hahulu mi mane ni ku ku bulaya. Kamba mutu yo muñwi wa kona ku ku fa kwai, ili mo ku na ni milyani ye kola, mi a kana a ku hapeleza kuli u i zube. U ka ezañi?—

Hupula Jesu. Satani n’a likile ku kukueza Jesu ku ikenya mwa kozi ka ku mu bulelela kuli a tule fahalimw’a tempele. Kono Jesu n’a si ka eza cwalo. N’o ka ezañi yo muñwi ha n’a ka ku hapeleza ku eza nto ye ñwi ye kona ku tahisa kozi?— Jesu n’a si ka utwa Satani. Ni wena ha u swaneli ku utwa mutu ya bata kuli u eze lika ze si ka luka.

Zazi le liñwi, mwendi u ka kupiwa ku lapela siswaniso, ili nto yeo Bibele i bulela kuli ha lu lukeli ku eza. (Exoda 20:4, 5) Mwendi ki mona mo ku ezezwanga kwa sikolo. Mwendi u ka bulelelwa kuli ha u hana ku eza cwalo, u ka lelekwa kwa sikolo. U ka eza cwañi?—

Ku bunolo ku eza se si lukile ba bañwi kaufela ha ba si eza. Kono ku eza se si lukile ku kona ku ba t’ata luli ba bañwi ha ba bata kuli lu eze ze si ka luka. Ba kana ba bulela kuli ze ba eza haki ze maswe luli. Kono puzo ya butokwa ki ya kuli, Mulimu u liñi fa taba yeo? Ki yena ya ziba hahulu ka ku fitisisa.

Kacwalo, ku si na taba ni ze ba bulela ba bañwi, ha lu swaneli ku eza lika z’a bulela Mulimu kuli ha li si ka luka. Ka ku eza cwalo, lu ka tabisanga Mulimu kamita, mi ni kamuta ha lu na ku sebeleza Diabulosi.

Litaba ze ñwi za mwa ku tiyela miliko ya ku eza ze si ka luka li konwa ku fumanwa kwa Samu 1:1, 2; Liproverbia 1:10, 11; Mateu 26:41; ni 2 Timotea 2:22.

[Siswaniso se si fa likepe 52]

Ki lifi zeo Jesu mwendi n’a kalile ku hupula ha n’a kolobelizwe?

[Siswaniso se si fa likepe 53]

Diabulosi n’a itusisize cwañi macwe kuli a like Jesu?

[Siswaniso se si fa likepe 55]

Ki kabakalañi Satani ha n’a kona ku fa Jesu mibuso yeo kaufela?

[Maswaniso a fa likepe 55]

U ka ezañi ha u likiwa?

[Siswaniso se si fa likepe 56]

Ki kabakalañi ha ku si ka luka ku itusisa maswaniso mwa bulapeli?