Jesu Ufiwa Kwa Masole Mi Uisiwa Kwa Kubulaiwa

Kusina taba ni kuli Jesu unyandiswa maswe ni kunenaunwa, buikatazo bwa Pilato bwa kubata kumulukulula habutahisi kuli baprisita babahulu ni babali ni bona bashwele Jesu makeke. Babata luli kubulaya Jesu. Bazwelapili kuhuwaka bali: “Apahekiwe fa kota! Apahekiwe fa kota!” Pilato ualaba kuli: “Hamu muunge mina beñi muyo mubulaya, kakuli na hanifumani mulatu ku yena.”—Joani 19:6.

Majuda bapalelwa kukolwisa Pilato kuli Jesu uswanela kubulaiwa kabakala kukwenuhela mubuso, kono cwale batahisa libaka leliama za bulapeli. Bakutela kubulela za mulatu wa bunyefuli wanaatamelelizwe Jesu mwa Kuta ya Sanhedrini. Bali: “Lunani mulao, mi ka kuya ka mulao ulukela kushwa, kakuli uikezize mwanaa Mulimu.” (Joani 19:7) Pilato kihona autwa za mulatu wo.

Pilato ukena mwa ndu yahae, mi ubata kufumana nzila yakulukulula ka yona muuna yo yaeziwa maswe, ili yo musalaa Pilato naalolile ka zahae. (Mateu 27:19) Kono kucwañi ka za mulatu omunca obamutameleza Majuda wakuli lipantiti yo ki “mwanaa Mulimu”? Pilato waziba kuli Jesu uzwa kwa Galilea. (Luka 23:5-7) Kono ubuza Jesu kuli: “Uzwa kai?” (Joani 19:9) Kana Pilato unahana kuli Jesu mwendi naapilile pili kwa lihalimu kamba kuli mwendi neli mulimu?

Pilato naaikutwezi Jesu habulela kuli ki mulena kono Mubuso wahae haki wa lifasi le. Jesu habati kuekeza kuzabulezi kale, kabakaleo uikuzeza feela. Kusaalaba kwa Jesu kuutwisa Pilato butuku kwa pilu, mi ka bunyemi ubulelela Jesu kuli: “Kana haulati kubulela ni na? Hauzibi kuli ninani maata a kukulukulula ni maata a kukubulaya?”—Joani 19:10.

Jesu uli: “Neusike waba ni maata a kunieza sesiñwi nikamuta konji haiba neufilwe ona kuzwa kwahalimu. Ki lona libaka mutu yanitisize ku wena hanani sibi sesituna hahulu.” (Joani 19:11) Jesu hatalusi feela mutu alimuñwi. Kono utalusa kuli Kayafa, ni banali ni bona, ni Judasi Isikariota banani mulatu omutuna kufita Pilato.

Muezezo ni manzwi a Jesu, ni sabo yazwelapili kuba ni yona Pilato ya kuli mwendi Jesu neli mulimu, litahisa kuli Pilato alike kulukulula Jesu hape. Kono Majuda babulela nto yeñwi hape yesabisa Pilato. Bamubemba kuli: “Haiba ulukulula mutu yo, hau mulikanaa Sesare. Mutu kaufela yaikeza mulena ubulela litaba zelwanisa Sesare.”—Joani 19:12.

Mubusisi utisa Jesu kwande hape, uina mwa sipula sa katulo, kihona abulelela batu kuli: “Hamubone! Mulenaa mina ki yo!” Kono Majuda habacinci mubonelo wabona. Bahuwa kuli: “Umubulaye! Umubulaye! Apahekiwe fa kota!” Pilato uli: “Nibulaye mulenaa mina?” Majuda banyandisizwe ka nako yetelele ki puso ya Maroma; kono baprista babahulu babulela ka bundume kuli: “Haluna mulena yomuñwi kwandaa Sesare.”—Joani 19:14, 15.

Pilato ufa Jesu kwa masole kuli bayo mubulaya, bakeñisa sabo ni kupihelela kwa Majuda. Masole batubula Jesu siapalo sa mubala wa bufubelu bobutona ni kumutinisa siapalo sahae sa fahalimu. Jesu uswanela kulwala kota yahae ya linyando, hanze aiswa kwa kubulaiwa.

Seli musihali wa la Butanu, ili la Nisani 14. Jesu hasika lobala kuzwa la Bune kakusasana mi uzwezipili kutalimana ni miinelo yetaata yeshutana-shutana. Jesu ufelelwa ki maata bakeñisa kukuleka kota yebukiti. Ka mukwa ocwalo, masole bahapeleza mutu yaifitela feela mwa nzila, yabizwa Simoni wa kwa Sirene ya mwa Africa, kuli aise kota kwa yo bulaelwa Jesu. Batu babañata, balatelela inze balila ni kubokolola bakeñisa zeezahala.

Jesu ubulelela basali babalila, uli: “Basizana ba mwa Jerusalema, mutuhele kunilila. Kono muitile ili mina ni kulila bana bamina; kakuli hamubone! Mazazi ataha muta batu bakali: ‘Tabo ki ya basali babasa pepi, ni limba zenesika pepa, ni mazwele anaasika anyisa!’ Cwale bakakala kubulelela malundu, bali: ‘Hamu luwele!’ Mi bakali kwa malundunyana: ‘Hamu luapese!’ Haiba baeza lika zeo kota haili yemezi, kukaba cwañi hase iomile?”—Luka 23:28-31.

Jesu utalusa sicaba sa Majuda. Sicaba se, siswana sina kota yesali yemezi kono yetuha ioma, kakuli Jesu usali teñi mi kusanani Majuda babañwi babalumela ku yena. Jesu hasashwile ni balutiwa habaka zwa mwa bulapeli bwa Sijuda, sicaba sa Majuda sikashwa kwa moya, mi sikaswana sina kota yeomile. Kukaba ni sililo sesituna limpi za Maroma halika tahisa katulo ya Mulimu kwa sicaba seo!