Mu Zwelepili ku “Beya Muselo Hahulu”
1 Ka swanisezo, Jesu n’a bulezi kuli ki yena kota luli ya veine, Ndat’ahe ki Mulimi, mi balateleli ba hae ba ba tozizwe bona ki mitai ya kota ya veine ye beya muselo. Mi ha n’a talusa musebezi wa Mulimi wa swanisezo, Jesu n’a koñomekile butokwa bwa ku kumalela hahulu kwa kota ya veine. (Joa. 15:1-4) Tuto ya n’a luta Jesu f’o ki ya kuli mutu kaufela ya na ni silikani se si tiile ni Jehova u swanela ku ba sina mutai o beya muselo wa “kota luli ya veine,” yena Jesu Kreste. Lu lukela ku zwelapili ku beya hahulu ‘muselo wa moya’ hamohocwalo ni muselo wa Mubuso.—Magal. 5:22, 23; Mat. 24:14; 28:19, 20.
2 Muselo wa Moya: Hañata se si bonisa kuli lu hulile kwa moya ki mo lu boniseza hande muselo wa moya. Kana mu sweli mwa lika ka t’ata ku beya muselo wa moya wa Mulimu ka ku itutanga kamita Linzwi la Mulimu ni ku yeyanga ze mu itutile? (Mafil. 1:9-11) Mu si zina-zini ku kupa moya o kenile, o ka tisa kuli mu be ni tulemeno to tu lumbekisa Jehova ili to tu ka mi tusa ku zwelapili ku hula kwa moya.—Luka 11:13; Joa. 13:35.
3 Muselo wa moya hape u ka lu tusa ku tukufalelwa hahulu mwa bukombwa. Ka mutala, haiba lu na ni lilato ni tumelo, niha lu patehile hahulu lu ka fumana nako ya ku yanga kamita mwa bukombwa. Mi tulemeno to tu cwale ka kozo, pilu-telele, musa, ni buiswalo, tu ka lu tusa kuli lu si ke lwa lwana ni lila za luna. Mi kalemeno ka tabo ka ka lu tusa ku sa zwafa mwa bukombwa, batu niha ba sa lu amuheli hande.
4 Muselo wa Mubuso: Hape lu bata ku beya muselo wa Mubuso. Muselo wa Mubuso u kopanyeleza ni ku tiseza Jehova “sitabelo sa milumbeko, kikuli bupaki bo bu zwa mwa milomo ye lumba Libizo la hae.” (Maheb. 13:15) Lu eza cwalo ka ku shaela taba ye nde ka tukufalelo ili ka ku sa lisela. Kana mwa sebeza ka t’ata kuli mu beye hahulu muselo wa Mubuso ka ku eza ze ñata mwa bukombwa?
5 Jesu n’a bonisize kuli balateleli ba hae ba ba sepahala ba ka beya muselo ka ku shutana-shutana. (Mat. 13:23) Kacwalo lu si ke lwa bapanya sebelezo ya luna ku ya ba bañwi, kono lu sebeleze Jehova ka m’ata a luna kaufela. (Magal. 6:4) Lu lukela ku itusisa Linzwi la Mulimu kuli lu nyakisise miinelo ya luna ilikuli lu kone ku zwelapili ku lumbeka Jehova ka ku “beya muselo hahulu.”—Joa. 15:8.