Ki Lifi Z’a Bata Jehova ku Luna Kacenu?

“Kwa utwahala linzwi le li zwa mwa lilu, le li li: Yo ki Mwan’a ka ya latwa, ye ni katelwa; mu mu utwe.”—MATEU 17:5.

1. Mulao n’o petile lili ze n’o lelezwi?

JEHOVA n’a file sicaba sa Isilaele Mulao, ni litaelo za ona ze ñata. Ka za litaelo zeo, muapositola Paulusi n’a ñozi kuli: “Ne li litaelo za butu fela, . . . mane ku fite nako ya ku lukisa sinca.” (Maheberu 9:10) Mulao n’o petile ze n’o lelezwi ha n’o tusize bomasiyaleti ba Isilaele ku amuhela Jesu kuli ki yena Mesiya, kamba Kreste. Kacwalo, Paulusi a li: “Fo u felela Mulao ki ku Kreste.”—Maroma 10:4; Magalata 3:19-25; 4:4, 5.

2. Ki bomañi be ne ba li mwatas’a Mulao, mi ne ba lukuluzwi lili ku ona?

² Kana seo si talusa kuli Mulao ha u lu tami kacenu? Taba kikuli, buñata-ñata bwa batu ne ba si ka ba mwatas’a Mulao, ka mwa n’a taluselize fela walisamu kuli: “[Jehova] u patululezi Jakobo linzwi la hae, mi u file Isilaele milao ni likatulo za hae. H’a si ka eza macaba a mañwi cwalo, mi haili milao ya hae, macaba h’a i zibi.” (Samu 147:19, 20) Mulimu ha n’a tomile bulikani bo bunca ka sitabelo sa Jesu, niheba sicaba sa Isilaele ne ba tuhezi ku ba mwa tamo ya ku mamela Mulao. (Magalata 3:13; Maefese 2:15; Makolose 2:13, 14, 16) Cwale haiba Mulao ha u sa sebeza, ki lifi z’a bata Jehova ku ba ba lakaza ku mu sebeleza kacenu?

Z’a Bata Jehova

3, 4. (a) Ki sifi seo luli Jehova a bata ku luna? (b) Ki kabakalañi ha lu swanela ku hata mw’a n’a hatile Jesu?

³ Mwa silimo sa mafelelezo sa bukombwa bwa Jesu, baapositola ba hae bo Pitrosi, Jakobo, ni Joani ne ba ile ni yena kwa lilundu le li lumbile, mwendi fa sibaka se si alañani sa lilundu la Hermoni. Ne ba boni pono ya bupolofita ya Jesu a na ni kanya ye mbwetukisa mi ba utwa linzwi tota la Mulimu ha li shaela kuli: “Yo ki Mwan’a ka ya latwa, ye ni katelwa; mu mu utwe.” (Mateu 17:1-5) Seo luli ki sona s’a bata Jehova ku luna—ili ku utwa Mwan’a hae ni ku ya ka mutala ni lituto za hae. (Mateu 16:24) Kacwalo, muapositola Pitrosi n’a ñozi kuli: “Kreste . . . u utwile butuku bakeñisa mina, a mi siyela mutala, kuli mu hate mw’a n’a hatile.”—1 Pitrosi 2:21.

⁴ Ki kabakalañi ha lu swanela ku hata mw’a n’a hatile Jesu? Kakuli ha lu mu likanyisa, lu likanyisa ni Jehova Mulimu. Jesu n’a ziba Ndate hande hahulu, kakuli n’a pilile ni yena kwa lihalimu libilioni-za-libilioni za lilimo pili a si ka taha kale fa lifasi-mubu. (Liproverbia 8:22-31; Joani 8:23; 17:5; Makolose 1:15-17) Ha n’a li fa lifasi-mubu, Jesu n’a likanyisize Ndat’ahe ka busepahali. N’a talusize kuli: “Ni bulela z’a ni lutile Ndate.” Mane, Jesu n’a likanyisize mw’a inezi fela Jehova kuli mane n’a kona ku bulela kuli: “Ya ni boni, u boni Ndate.”—Joani 8:28; 14:9.

5. Bakreste ba mwatas’a mulao ufi, mi mulao wo n’o kalile lili ku sebeza?

⁵ Ku tokwahalañi kuli lu utwe Jesu ni ku mu likanyisa? Kana ku tokwahala ku ba mwatas’a mulao o muñwi? Paulusi n’a ñozi kuli: “Na ka sibili ha ni yo mwatas’a mulao.” (NW) F’o, n’a talusa “bulikani bwa kale,” bona bulikani bwa Mulao bo ne bu ezizwe ni Isilaele. Paulusi n’a itumelezi kuli n’a li “mwa mulao wa Kreste.” (1 Makorinte 9:20, 21; 2 Bakorinte 3:14, Bibele ye Kenile, hatiso ya 1984) Bulikani bwa Mulao bwa kale ha se bu felile, “bulikani bo bunca” bwa kala ku sebeza ni “mulao wa Kreste” wa bona, w’o batanga ba Jehova kaufela kacenu ba tamehile ku u mamela.—Luka 22:20; Magalata 6:2; Maheberu 8:7-13.

6. “Mulao wa Kreste” u kana wa taluswa cwañi, mi lu kona ku u mamela cwañi?

⁶ Jehova n’a si ka eza kuli “mulao wa Kreste” u ñolwe sina sishañata sa litaelo, ili ku lukisa likalulo-kalulo mo li wela litaelo zeo, sina mo ne bu ezelizwe bulikani bwa Mulao bwa kale. Mulao o munca wo wa balutiwa ba Kreste ha u na mukoloko o mutelele-telele wa litaelo. Nihakulicwalo, Jehova mwa Linzwi la hae u bulukile libuka z’e ne ze tezi litaba za bupilo ni lituto za Mwan’a hae. Hape, Mulimu n’a buyelezi ba bañwi kwa balutiwa ba Jesu ba kwa makalelo ku ñola litaelo ka za mupilelo wa ka butu, litaba ze ama puteho, muzamao mwa lubasi, ni litaba ze ñwi. (1 Makorinte 6:18; 14:26-35; Maefese 5:21-33; Maheberu 10:24, 25) Ha lu pila ka ku latelela mutala ni lituto za Jesu Kreste ni ku mamela likelezo za ba mwa lilimo za mwanda wa pili be ne ba buyelezwi ku ñola litaba ze ñwi mwa Bibele, u zibe lu mamela “mulao wa Kreste.” Seo ki sona s’a bata Jehova kwa batanga ba hae kacenu.

Butokwa bwa Lilato

7. Jesu n’a koñomekile cwañi mutomo wa mulao wa hae ha n’a ca Paseka ya mafelelezo ni baapositola ba hae?

⁷ Hailif’o lilato ne li la butokwa mwatas’a Mulao, ki lona mutomo, kamba nto ya butokwa ka ku fitisisa, ya mulao wa Kreste. Jesu n’a koñomekile taba yeo ha n’a t’o ca ni baapositola ba hae mukiti wa Paseka ya 33 C.E. Ka ku ya ka tabanyana ya muapositola Joani ka za ze n’e ezahezi busihu b’o, za n’a bulezi Jesu ze zwelela kwa pilu ne li amile h’a 28 kwa lilato. Seo ne si tusize hahulu baapositola ba hae ku utwisisa muinelo, kamba mulelo, wa mulao wa hae. Nto ye lemuseha kikuli, Joani n’a kalisize taba ya hae ka za likezahalo za busihu bwa butokwa hahulu b’o ka ku bulela kuli: “Mukiti wa Paseka ha u s’o li fakaufi, Jesu ya n’a ziba kuli nako ya hae s’e fitile ya kuli a siye lifasi, ku ya ku Ndat’ahe, cwale sina ha n’a latile ba hae ba ba mwa lifasi, a ba lata ku feleleza.”—Joani 13:1.

8. (a) Ki nto mañi ye n’e bonisize kuli baapositola ne ba sa hohana? (b) Jesu n’a lutile cwañi baapositola ba hae tuto ya buikokobezo?

⁸ Jesu n’a lata baapositola ba hae, nihaike ha n’a likile ku ba tusa ku tula takazo ya bona ye fitelezi ya ku busa ni ku bata litulo, ne ku bonahezi inge kuli u palezwi. Likweli-kweli pili ba si ka fita kale mwa Jerusalema, “ne ba pihile kañi ya ku ziba yo mutuna ku bona kuli ki mañi.” Mi ba sa li fakaufi ni ku kena mwa munzi kuli ba ce Paseka, kañi ka za litulo hape ya tumbuka. (Mareka 9:33-37; 10:35-45) Nto ye paka kuli butata b’o ne bu si ka fela i boniswa ki ze n’e ezahezi baapositola ba sa z’o kena fela mwa ndu ya kwahalimu kuli ba ce hamoho ye n’e ka ba yona Paseka ya mafelelezo. Ka nako yeo, ha ku na ya n’a akufile ku eza sebelezo ya ka sizo ya ku amuhela ka yona baeñi, yona ya ku tapisa mahutu a ba bañwi. Jesu kuli a ba lute tuto ya buikokobezo, yena ka sibili a tapisa mahutu a bona.—Joani 13:2-15; 1 Timotea 5:9, 10.

9. Jesu n’a ezizeñi ka za taba ye n’e ezahalile hamulaho wa Paseka ya mafelelezo?

⁹ Ku si na taba ni tuto yeo, Paseka ha se i cilwe mi Jesu a toma Kupuzo ya lifu la hae le ne li li fakaufi, mu lemuhe se ne si ezahezi hape. Taba ya Evangeli ya Luka i li: “Kwa taha kañi mwahal’a bona, ya ku ziba kuli yo mutuna ku bona ki mañi?” Ku fita ku nyemela baapositola ni ku ba yukaukela, Jesu a ba eleza h’a sishemo kuli ba tokwa ku shutana ni babusi ba lifasi ba ba lata hahulu litulo. (Luka 22:24-27) Kihona a fa o lu kana lwa bulela kuli ki ona mutomo wa mulao wa Kreste, kuli: “Ni mi fa mulao o munca, kikuli mu latane; sina mo ni mi latezi, ni mina mu latane cwalo.”—Joani 13:34.

10. Jesu n’a file balutiwa ba hae taelo mañi, mi ne i tokwañi?

¹⁰ Ona busihu b’o hape, Jesu a talusa m’o lilato le li swana sina la Kreste li swanela ku bela le lituna. N’a ize: “Taelo ya ka, kikuli mu latane, sina ha ni mi latile. Ha ku na lilato le li fita la ya fa balikani ba hae bupilo bwa hae.” (Joani 15:12, 13) Kana Jesu f’o n’a talusa kuli balutiwa ba hae ba swanela ku itombola ku shwela balumeli ba bañwi haiba muinelo u tokwa cwalo? Ki mona mwa n’a utwisiselize taba yeo Joani, ya n’a li teñi nako yeo, kakuli n’a til’o ñola kuli: “Mo lu zibezi lilato, ki Jesu h’a lu tobohezi moyo wa hae; ni luna lu swanezi ku tobohela banabahabo luna mioyo ya luna.”—1 Joani 3:16.

11. (a) Lu kona ku peta cwañi mulao wa Kreste? (b) Jesu n’a file mutala ufi?

¹¹ Kacwalo he, ha lu koni ku peta mulao wa Kreste ka ku luta fela ba bañwi ka za hae. Lu lukela hape ku pila ni ku eza sina Jesu. Ki niti, Jesu mwa lingambolo za hae n’a bulela lipulelo ze munati, ili ka ku swala lulimi. Niteñi, n’a lutile ni ka mutala. Nihaike Jesu n’a bile sibupiwa sa moya se si m’ata kwa lihalimu, n’a amuhezi kolo ya ku sebeleza Ndat’ahe fa lifasi ni ku bonisa mo lu swanela ku pilela. N’a na ni buikokobezo, sishemo, mi n’a tokomela za ba bañwi, ili ku tusa ba ba imezwi ni ku hatelelwa. (Mateu 11:28-30; 20:28; Mafilipi 2:5-8; 1 Joani 3:8) Mi Jesu n’a susuelize balutiwa ba hae ku latana, sina mwa n’a ba latezi.

12. Ku kona ku bulelelwañi kuli mulao wa Kreste ha u keshebisi tokwahalo ya ku lata Jehova?

¹² Lilato la ku lata Jehova—yona taelo ye tuna ka ku fitisisa ya Mulao—ki la butokwa cwañi mwa mulao wa Kreste? (Mateu 22:37, 38; Magalata 6:2) Ki la butokwa hanyinyani nji? Kutokwa luli! Ku lata Jehova ni ku lata Bakreste ba bañwi ku swalani. Mutu h’a koni luli ku lata Jehova a sa lati ni muzwale wa hae, kakuli muapositola Joani n’a ize: “Mutu h’a li: Ni lata Mulimu, mi ki ya toile mwanahabo ye a bona, h’a koni ku lata Mulimu ye a sa boni.”—1 Joani 4:20; mu bapanye 1 Joani 3:17, 18.

13. Ne ku ezaheziñi balutiwa ha ne ba mamezi taelo ye nca ya Jesu?

¹³ Jesu ha n’a file balutiwa ba hae taelo ye nca ya ku latana sina mwa n’a ba latezi yena, n’a talusize ze n’e ka zwa mwateñi. N’a ize: “Se ba ka ziba batu kaufela kuli mu balutiwa ba ka ka sona, ki ha mu latana.” (Joani 13:35) Tertullian, ya n’a pilile hamulaho wa lilimo ze fitelela mwanda ku zwa fa lifu la Jesu, n’a talusize kuli lilato la sizwale la Bakreste ba kwa makalelo ne li bile ona cwalo. Tertullian n’a ize ba ba si Bakreste ne ba bulezi cwana ka za balutiwa ba Kreste: ‘Ha mu bone mo ba latanela mi mane ni mo ba sa kata-kateli ku shwelana.’ Lu kana lwa ipuza kuli, ‘Kana na bonisanga lilato le li cwalo kwa Bakreste ba bañwi kuli mane li paka kuli ni mulutiwa wa Jesu?’

Mwa ku Pakela Lilato La Luna

14, 15. Kiñi ze kona ku bisa t’ata ku mamela mulao wa Kreste, kono kiñi se si kona ku lu tusa ku u mamela?

¹⁴ Ku butokwa kuli batanga ba Jehova ba bonise lilato le li swana sina la Kreste. Kono kana mu fumananga t’ata ku lata Bakreste ba bañwi ba ba bonahaza mikwa ya buitati? Ka mo se lu bonezi, nihaiba baapositola ne ba pihile kañi ni ku lika ku ipatela za bona pili. (Mateu 20:20-24) Ba kwa Galatia ni bona ne ba ikomanisize. Paulusi ha s’a talusize kuli lilato la sizwale li peta Mulao, a ba lemusa kuli: “Kono ha mu lumana mi mu celana, mu bone kuli mu si ke mwa felisana.” Ha s’a bonisize shutano ya misebezi ya nama ni muselo wa moya wa Mulimu, Paulusi a ba eleza kuli: “Lu si ke lwa bata ku bubekwa ko ku si na tuso, ka ku ishemaeta ni ku shwelana muna.” Kihona muapositola a susueza kuli: “Mu lwalisane milwalo, mi mu pete cwalo mulao wa Kreste.”—Magalata 5:14–6:2.

¹⁵ Kana Jehova u fitelezi h’a bata kuli lu mamele mulao wa Kreste? Nihaike ku kana kwa lu bela t’ata ku bonisa ba bañwi sishemo ba ba lu longaulezi ni ku lu tunka mwa maikuto, lu tamehile ku ba “ba ba likanyisa Mulimu sina bana ba ba latwa; mi [lu] zamaye mwa lilato.” (Maefese 5:1, 2) Lu tokwa ku zwelapili ku likanyisa mutala wa Mulimu, yena y’a “tahisize kanya ya lilato la hae ku luna, kikuli lu sa li baezalibi Kreste u shwile bakeñisa luna.” (Maroma 5:8) Ka ku akufa ku tusa ba bañwi, niheba ba ba si ka lu eza hande, lw’a kona ku ba ni tabo ka ku ziba kuli lu likanyisa Mulimu mi lu mamela mulao wa Kreste.

16. Lu kona ku paka cwañi kuli lw’a lata Mulimu ni Kreste?

¹⁶ Lu swanela ku hupula kuli lu paka lilato la luna ka ze lu eza, isi fela ka ze lu bulela. Nihaiba Jesu a kile a fumana t’ata ku amuhela kalulo ye ñwi ya tato ya Mulimu bakeñisa zote ze ne i ama. Jesu n’a lapezi kuli, “Ndate, kabe u ka lata ku sutisa sinwiso seo ku na!” Kono kapili-pili a li: “Kono ku si ke kwa ezwa se si latwa ki na, ku ezwe se si latwa ki Wena.” (Luka 22:42) Ku si na taba ni manyando kaufela a n’a wezi Jesu, n’a ezize tato ya Mulimu. (Maheberu 5:7, 8) Ku ipeya ku utwa ku paka lilato la luna mi ku bonisa kuli lu kozwi kuli nzila ya Mulimu ki yona ye nde ka ku fitisisa. Bibele i li: “Ku lata Mulimu, kiha lu mamela litaelo za hae.” (1 Joani 5:3) Mi Jesu n’a bulelezi baapositola ba hae kuli: “Ha mu ni lata, mu ka mamela litaelo za ka.”—Joani 14:15.

17. Jesu n’a file balutiwa ba hae taelo ifi ye ipitezi, mi lu ziba cwañi kuli ni luna lu swanela ku mamela taelo yeo?

¹⁷ Kreste n’a file balutiwa ba hae taelo ifi ye ipitezi kwand’a ku ba laela ku latana? N’a laezi kuli ba eze musebezi wa ku kutaza wa n’a ba lutile. Pitrosi n’a ize: “U lu laezi ku bulelela sicaba, ni ku paka.” (Likezo 10:42) Jesu n’a laezi kuli: “Mu ye cwale, mu lute macaba kaufela, mu ba kolobeze ka Libizo la Ndate, ni la Mwana, ni la Moya o Kenile; mu ba lute ku mamela ze ni mi laezi kaufela.” (Mateu 28:19, 20; Likezo 1:8) Jesu n’a bonisize kuli litaelo ze cwalo li filwe ni balutiwa ba hae ba cwale mwa “nako ya maungulo” ye, kakuli n’a ize: “Evangeli ye ya mubuso i ka bulelwa mwa lifasi kaufela, ibe bupaki mwa macaba kamukana; kihona ku ka taha mafelelezo.” (Daniele 12:4; Mateu 24:14) Kaniti, Mulimu u lata kuli lu kutaze. Niteñi, ba bañwi ba kana ba nahana kuli Mulimu u fitelezi h’a tokwa kuli lu eze musebezi wo. Kono kana luli ku cwalo?

Libaka Ha Ku Kona ku Bonahala ku Ba T’ata

18. Lu swanela ku hupulañi ha lu nyanda kabakala ku eza z’a bata Jehova?

¹⁸ Ka mo se lu bonezi, Jehova u bulelezi batu ku mamela litaelo ze fapana-fapana ku zwa fo ba bupezwi. Mi sina ze ba bulelezwi ku eza ha li shutani-shutani, ni mifuta ya miliko i shutana cwalo. Mwana ya latwa wa Mulimu n’a tulukezwi ki miliko ye t’ata ka ku fitisisa, kwa nalulelule mane a bulawa ka nzila ye situhu ka ku fitisisa kabakala ku eza za n’a bata Mulimu. Kono ha lu nyanda bakeñisa ku eza z’a bata Jehova ku luna, lu hupule kuli haki yena ya lu tiseza miliko yeo. (Joani 15:18-20; Jakobo 1:13-15) Buipanguli bwa Satani ne bu tisize sibi, manyando, ni lifu, mi ki yena ya tahisize miinelo ye tisize kuli hañata ku be t’ata ku eza zeo Jehova a bata kwa batanga ba hae.—Jobo 1:6-19; 2:1-8.

19. Ki kabakalañi ku eza z’a bata Mulimu ku luna ka Mwan’a hae ha i li tohonolo?

¹⁹ Ka Mwan’a hae, Jehova u laezi kuli mwa nako ye ya maungulo, batanga ba Hae ba shaele mwa lifasi kamukana kuli puso ya Mubuso ki ona mulyani u nosi wa maswenyeho kaufela a batu. Mulonga wa Mulimu wo u ka feza matata kaufela fa lifasi—lindwa, bukebenga, bunjebwe, busupali, makulanu, ni mafu. Mubuso u ka tisa ni paradaisi ya fa lifasi ye nde hahulu, mo mane bafu ba ka zusezwa. (Mateu 6:9, 10; Luka 23:43, NW; Likezo 24:15; Sinulo 21:3, 4) Ki tohonolo kwa butuna ku shaela taba ye nde ya lika ze cwalo! Kacwalo kwa iponelwa hande kuli ha ku na se si fosahezi ka za z’a bata Jehova ku luna. Lwa lwaniswa, kono ki Satani Diabulosi ni lifasi la hae ba ba tisa cwalo.

20. Lu kona ku tula cwañi muliko kaufela w’a tisa Diabulosi?

²⁰ Lu kona ku tula cwañi muliko kaufela w’a tisa Satani? Ka ku hupula manzwi a, a’ li: “Mwan’aka u talife, mi u tabise pilu ya ka, mi ni ka kona ku alaba ya ni nyaza.” (Liproverbia 27:11) Jesu n’a fumanisize Jehova kalabo kwa nyazo ya Satani ka ku siya mbombolelwa ya bupilo bwa kwa lihalimu kuli a t’o eza tato ya Ndat’ahe fa lifasi. (Isaya 53:12; Maheberu 10:7) Ka ku ba mutu wa nama, Jesu n’a tiyezi litiko kaufela za n’a tiselizwe, mane ni lifu fa kota ya linyando. Haiba lu likanyisa mutala wa hae, ni luna lwa kona ku tiyela maswenyeho ni ku eza z’a bata Jehova ku luna.—Maheberu 12:1-3.

21. Mu ikutwa cwañi ka za lilato l’a bonisize Jehova ni Mwan’a hae?

²¹ Ki lilato kwa butuna leo Mulimu ni Mwan’a hae ba lu bonisize! Kabakala sitabelo sa Jesu, batu ba ba ipeya ku utwa ba na ni sepo ya ku pila ku ya ku ile mwa Paradaisi. Kacwalo lu si ke lwa tuhelela nto ifi ni ifi ku foufaza sepo ya luna. Haike luna ka butu lu itebuhe hahulu-hulu z’a konahalisize Jesu, sina mwa n’a itebuhezi Paulusi, ya n’a bulezi kuli: “Mwan’a Mulimu [u] ni latile, mi [u] itobohile mwa sibaka sa ka.” (Magalata 2:20, litaku li siyamisizwe ki luna.) Mi haike lu itebuhe hahulu-hulu ku Jehova, Mulimu y’a lilato, ya sa batangi ze fitelezi ku luna.

Ne Mu Ka Alaba Cwañi?

◻ Ki sika mañi seo Jehova a bata ku luna kacenu?

◻ Kreste n’a koñomekile cwañi butokwa bwa lilato busihu bwa mafelelezo bwa n’a bile ni baapositola ba hae?

◻ Lu kona ku paka cwañi kuli lw’a lata Mulimu?

◻ Ki kabakalañi ku eza z’a bata Jehova ku luna ha i li tohonolo?

[Siswaniso se si fa likepe 13]

Jesu n’a lutile tuto mañi ka ku tapisa mahutu a baapositola ba hae?

[Siswaniso se si fa likepe 15]

Niha lu lwaniswa, ku shaela taba ye nde ki tohonolo ye tabisa