Kuikauhanya Kwa Lifasi Kutalusañi?

Jesu naalutile balateleli bahae kuli habaswaneli kuba “ba lifasi.” (Joani 15:19) Taba yeo italusa kuli habaswaneli kuikenya mwa litaba za lipuso za naha kamba mwa lindwa. Kubulela feela niti, kuikauhanya kwa lifasi haki nto yebunolo. Batu bakona kubulela litaba zemaswe ka za luna bakeñisa kuikauhanya kwa lifasi. Ki lika mañi zekona kulutusa kusatuhela kuikauhanya kwa lifasi ni kuzwelapili kusepahala ku Jehova Mulimu?

1. Bakreste ba niti baanga cwañi mibuso ya batu?

Bakreste bakuteka mibuso ya batu. Lulatelela taelo ya Jesu ka ‘kukutiseza Sesare zeli za Sesare,’ ili kutalusa kuli, lwamamela milao yetomilwe ki mibuso ya batu inge cwalo mulao wa kuli lulife mitelo. (Mareka 12:17) Bibele iluta kuli mibuso ya batu yabusa bakeñisa kuli Jehova uituhelezi kueza cwalo. (Maroma 13:1) Kacwalo, lwaziba kuli maata ebanani ona babusi ba mibuso ye, anani maciñekelo. Lwaziba kuli ki Mulimu ni Mubuso wahae feela yakona kufelisa miinelo yetaata yebakopana ni yona batu fa lifasi.

2. Lukona kuikauhanya cwañi kwa lifasi?

Ka kuswana ni Jesu, haluikenyangi mwa litaba za lipuso za naha. Nako yeñwi batu hane baboni makazo yanaaezize Jesu ni kulika kumukukueza kuli abe mulena fa lifasi, Jesu naahanile. (Joani 6:15) Ki kabakalañi hanaahanile? Libaka lifumaneha mwa manzwi anaatilo bulela hasamulaho, hanaaize: “Mubuso waka haki wa lifasi le.” (Joani 18:36) Ka kuba balutiwa ba Jesu, luikauhanya kwa lifasi mwa linzila zeshutana-shutana. Ka mutala, haluikenyangi mwa lindwa. (Mubale Mika 4:3.) Lwakuteka lisupo za naha zecwale ka lindembela, kono halulapelangi lindembela zeo. (1 Joani 5:21) Mi haluyemelangi mutu yabata kuvotelwa kamba likopano za lipuso za naha. Ka kuikauhanya mwa linzila zeo ni zeñwi, lubonisa kuli lwasepahala ka kutala kwa Mubuso wa Mulimu.

MUBATISISE

3. Bakreste ba niti baikauhanyize kwa lifasi

Jesu ni balateleli bahae neba lutomezi mutala oluswanela kulatelela. Mubale Maroma 13:1, 5-7 ni 1 Pitrosi 2:13, 14. Mi hasamulaho, mubuhe VIDIO ni kunyakisisa lipuzo zelatelela.

VIDIO: Bakreste ba Niti Baikauhanyize Kwa Lifasi—Kalulo 1 (4:28)

• Ki kabakalañi haluswanela kukuteka mibuso ya batu?

• Ki mwa linzila mañi molukona kubonisa kuli lwautwa mibuso ya batu?

Ka nako ya lindwa, linaha zeñwi zakona kubulela kuli haliikenyi mwa lindwa mo, kono hape zakona kutusa batu babalwana mwa lindwa mo. Kuikauhanya kwa lifasi kutalusañi luli? Mubale Joani 17:16. Hasamulaho, mubuhe VIDIO ni kunyakisisa puzo yelatelela.

VIDIO: Bakreste ba Niti Baikauhanyize Kwa Lifasi—Kalulo 2 (3:11)

• Kuikauhanya kwa lifasi kutalusañi?

Lukona kuezañi haiba mibuso ya lifasi ibata kuli lueze nto yesalumelelani ni mulao wa Mulimu? Mubale Likezo 5:28, 29. Hasamulaho, mubuhe VIDIO ni kunyakisisa lipuzo zelatelela.

VIDIO: Bakreste ba Niti Baikauhanyize Kwa Lifasi—Kalulo 3 (1:18)

• Haiba kuli mibuso ya batu iluhapeleza kulatelela mulao osalumelelani ni mulao wa Mulimu, ki mulao wa mañi oluswanela kulatelela?

• Ki mwa miinelo mañi mo Bakreste bakona kuatula kusalatelela milao yetomilwe ki mibuso ya batu?

4. Muikauhanye kwa lifasi mwa lika zemunahana ni zemueza

Mubale 1 Joani 5:21. Hasamulaho, mubuhe VIDIO ni kunyakisisa lipuzo zelatelela.

VIDIO: Libaka Bakreste ba Niti Habatokwa Bundume—Kuli Baikambuse Kwa Lifasi (2:49)

• Mwa vidio yelubuhile, ki kabakalañi bo Ayenge hane basika swalisana ni kopano ya lipuso za naha kamba kueza mikiti ya naha ka kucaela ndembela silutu?

• Kana katulo yabona neli yende?

Ki miinelo mañi yemiñwi yekona kulupalelwisa kuikauhanya kwa lifasi? Mubuhe VIDIO, mi kihona mukanyakisisa lipuzo zelatelela.

VIDIO: Lituto Zezwa Mwa Tawala ya Mulibeleli—Muzwelepili Kuikambusa Kwa Lifasi Lelialuhani (5:16)

• Lukona kuikauhanya cwañi kwa lipapali za kukangisana mwahalaa linaha?

• Lukona kuikauhanya cwañi kwa lifasi nihaikaba kuli likatulo zebaeza batu baba mwa likopano za lipuso za naha zaluama ni luna?

• Litaba zebulelwa ki mitai ya makande ni tutengo twa mwa naha likona kutahisa kuli lube ni mubonelo ocwañi ka za kuikauhanya kwa lifasi?

LITABA KA BUKUSWANI

Bakreste balika mobakonela kaufela kuikauhanya kwa lifasi mwa lika zebanahana, mwa lika zebabulela, ni mwa lika zebaeza.

Mulundulule

• Luswanela kuezañi kwa mibuso ya batu?

• Ki kabakalañi haluzwelapili kuikauhanya kwa litaba za lipuso za naha?

• Ki miinelo mañi yekona kulupalelwisa kuikauhanya kwa lifasi?

MUBONE LITABA ZEÑWI

Ki buitomboli mañi bolukona kueza kuli luzwelepili kuikauhanya kwa lifasi?

Jehova Hasika Luyubeka (3:14)

Mabasi akona kuezañi kuli aitukiseze kuzwelapili kuikauhanya kwa lifasi?

Muzwelepili Kuikambusa kwa Lifasi ka Nako ya Lipapali (4:25)

Ki kabakalañi kuyemela naha yahabo mutu haisi yona nto yeswanela kukutekehisa hahulu mutu?

“Ku Mulimu Lika Kaufela Zakonahala” (5:19)

Munyakisise momukona kuikauhanyeza kwa lifasi hamuketa mufuta wa mubeleko omuka eza.

“Mañi ni Mañi Ukalwala Mushimbo Wahae” (Tawala ya Mulibeleli, March 15, 2006)

Honacwale-cwale fa, Bakreste kaufela bakalwaniswa, kamba mane kunyandiswa. Kana taba yeo yaswanela kulusabisa?

1. Ki kabakalañi halulibelela kuli lukanyandiswa?

Bibele ibulela kuli: “Batu kaufela babalakaza kupila ka kusepahala ku Mulimu ka kuswalisana ni Kreste Jesu ni bona bakanyandiswa.” (2 Timotea 3:12) Jesu naanyandisizwe bakeñisa kuli naasi wa lifasi la Satani. Ni luna haluba lifasi le, kacwalo, halukomoki halunyandiswa ki mibuso ya lifasi le ni likopano za bulapeli.—Joani 15:18, 19.

2. Lutokwa kuezañi kuli luto kona kuitiisa haluka nyandiswa?

Lutokwa kusepa hahulu Jehova ka nako ya cwale. Zazi ni zazi mufumanange nako ya kulapela ku yena ni kubala Bibele. Mufumanehange kwa mikopano ya puteho kamita. Kueza cwalo kuka mitusa kuba ni maata ni bundume bwa kuitiisa muta munyandiswa, nihaikaba kuli baba minyandisa ki ba mwa lubasi lwamina. Muapositola Paulusi yanaanyandiswanga hañata-ñata naañozi kuli: “Jehova ki yena yanitusa; hanina kusaba sesiñwi.”—Maheberu 13:6.

Nto yeñwi hape yekona kulutusa kuba ni bundume ki kukutazanga taba yende nako ni nako. Kukutaza kulutusa kusepa Jehova ni kusasaba batu. (Liproverbia 29:25) Haiba muba ni bundume bwa kukutaza ka nako ye, mukakona kuzwelapili kukutaza taba yende, ba muuso niha bakakwala musebezi waluna.—1 Matesalonika 2:2.

3. Lutusiwa cwañi haiba luitiisa halunyandiswa?

Kaufelaa luna halutabelangi kunyandiswa, kono haiba luitiisa halunyandiswa, tumelo yaluna ikatiya. Lukasutelela hahulu ku Jehova bakeñisa kuli lukatusiwa ki yena muta luikutwa kuli halusa kona kuzwelapili kuitiisa. (Mubale Jakobo 1:2-4.) Jehova haikutwangi hande halubona inze lunyanda, kono ubanga ni tabo haluzwelapili kuitiisa. Bibele ibulela kuli: “Haiba muitiisa hamunyandiswa kabakala kueza zende, yeo ki nto yende ku Mulimu.” (1 Pitrosi 2:20) Jehova ukafa batu kaufela babaitiisa ka busepahali mupuzo wa bupilo bwa kuya kuile mwa lifasi mokusike kwaba ni batu babalwanisa bulapeli bwa niti.—Mateu 24:13.

MUBATISISE

4. Mwakona kuitiisa hamulwaniswa ki ba mwa lubasi lwamina

Jesu naatalusize kuli ba mwa lubasi lwaluna bakona kusaswalisana ni luna muta luketa kulapela Jehova. Mubale Mateu 10:34-36, mi kihona mukanyakisisa puzo yelatelela:

• Kukona kuezahalañi muta yomuñwi mwa lubasi aketa kusebeleza Jehova?

VIDIO: Jehova Naalubabalezi (5:13)

• Mukona kuezañi haiba mutu wahabo mina kamba mulikanaa mina amizwafisa kuli mutuhele kusebeleza Jehova?

Mubale Samu 27:10 ni Mareka 10:29, 30. Hamulaho wa kubala leliñwi ni leliñwi la mañolo ao, munyakisise puzo yelatelela:

• Sepiso ye kwa liñolo le ikona kumitusa cwañi muta ba mwa lubasi kamba balikani bamina bamilwanisa?

5. Muzwelepili kulapela Jehova niha munyandiswa

VIDIO: Kubonisa Bundume Niha Lunyandiswa (6:27)

• Ki mitala ifi ya mwa vidio yetiisa tumelo yamina?

Mubale Likezo 5:27-29 ni Maheberu 10:24, 25. Hamulaho wa kubala leliñwi ni leliñwi la mañolo ao, munyakisise puzo yelatelela:

• Ki kabakalañi halutokwa kuzwelapili kusebeleza Jehova ba muuso niha bakona kuluhanisa kueza musebezi waluna wa kukutaza kamba kukopananga hamoho kwa mikopano ya puteho?

6. Jehova uka mitusa kuitiisa

VIDIO: Jehova Mulimu Uka Nitiisa (3:40)

• Ki lika mañi zenetusize Lipaki belubuhile mwa vidio kuitiisa?

Mubale Maroma 8:35, 37-39 ni Mafilipi 4:13. Hamulaho wa kubala leliñwi ni leliñwi la mañolo ao, munyakisise puzo yelatelela:

• Liñolo le libonisa cwañi kuli mwakona kuitiisa hamukopana ni muinelo otaata?

Mubale Mateu 5:10-12 mi kihona mukanyakisisa puzo yelatelela:

• Ki kabakalañi hamukona kuba ni tabo niha munyandiswa?

LITABA KA BUKUSWANI

Jehova waitebuha kuli luzwelapili kumusebeleza kusina taba ni manyando elukona kukopana ni ona. Jehova wakona kulutusa kuitiisa halunyandiswa!

Mulundulule

• Ki kabakalañi Bakreste habaswanela kulibelela kunyandiswa?

• Mukona kuezañi kuli muto itiisa hamuka nyandiswa?

• Kiñi zekona kumitusa kuba ni bundume bwa kuzwelapili kusebeleza Jehova kusina taba ni miinelo yetaata?

MUBONE LITABA ZEÑWI

Mubuhe muzwale wa mukulwani hanze atalusa mwamutuselize Jehova kuitiisa hanaali mwa tolongo bakeñisa kuikauhanya kwa lifasi.

Kuitiisa Kusina Taba ni Kunyandiswa (2:34)

Munyakisise zenetusize muuna ni musalaa hae kusebeleza Jehova ka busepahali ka lilimo zeñata kusina taba ni kulwaniswa.

Kusebeleza Jehova Miinelo Haicinca (7:11)

Muitute momukona kuitiiseza ka bundume hamunyandiswa

“Muitukiseze Nyandiso ka Nako Yacwale” (Tawala ya Mulibeleli, July 2019)

Luswanela kuunga cwañi twaniso ya mwa lubasi, mi lukona kuitiisa cwañi muta ba lubasi balulwanisa?

“Niti Haitisi ‘Kozo, Kono Itisa Mukwale’” (Tawala ya Mulibeleli, October 2017)