“Mu Sebeleze Jehova”

“Mu tukufalelwe, mu si ke mwa ba ni buzwa. . . . Mu sebeleze Jehova.”—MARO. 12:11.

MU BONA CWAÑI?

Ki butanga bo bu cwañi bo bu bulezwi kwa Maroma 12:11?

Lu kona ku ambuka cwañi ku ba batanga ba Satani ni lifasi la hae?

Jehova u fa batanga ba hae limbuyoti ze cwañi?

1. Batu ba bañata ba nga cwañi butanga, mi butanga bo, bu shutana cwañi ni butanga bo bu ñozwi kwa Maroma 12:11?

BATU ba bañata ba nga mutanga sina mutu ya zamaiswa ni ku ezwa maswe ki mulenaa hae. Kono ku ba mutangaa Mulimu ha ku swani ni ku ba mutangaa mutu yo muñwi. Linzwi la Mulimu li bulela kuli Mukreste wa kona ku iketela ku ba mutangaa Mulena ya lilato. Mane muapositola Paulusi ha naa susuelize Bakreste kuli ba “sebeleze Jehova,” naa ba taluseza kuli ba eze cwalo bakeñisa kuli ba mu lata. (Maro. 12:11) Ki butanga bo bu cwañi bo? Lu tokwa ku ezañi kuli lu si ke lwa ba batanga ba Satani ni lifasi la hae? Mi ki limbuyoti mañi ze lu kona ku fumana haiba lu ba batanga ba Jehova ni ku mu sebeleza ka busepahali?

“NI LATA MUÑAA KA”

2. (a) Ki kabakalañi Muisilaele ha naa tabelanga ku zwelapili ku ba mutanga? (b) Ki kabakalañi mutanga ha naa tabelanga ku punyiwa zebe, mi nto yeo ne i bonisañi?

² Mulao wa naa file Mulimu kwa Maisilaele u lu tusa ku utwisisa ze tokwahala kuli mutu a be mutangaa Jehova. Mutanga wa Muheberu naa lukululwanga ka mwaha wa bu 7 hamulaho wa ku sebeleza mulenaa hae ka lilimo ze 6. (Ex. 21:2) Kono haiba mutanga yo naa lata hahulu mulenaa hae kuli mane naa sa lati ku mu siya, mutanga yo naa zwelangapili ku ina ni mulenaa hae. Mulao wa Jehova ki ona o ne u konahalisa taba yeo. Mulenaa mutanga naa hohelanga mutanga fapilaa sikwalo kamba fapilaa musumo wa sikwalo ni ku mu punya zebe. (Ex. 21:5, 6) Ki kabakalañi ha naa ezanga cwalo? Mwa Siheberu, ku mamela litaelo ku zamaelela ni ku utwa kamba ku teeleza. Kacwalo, mutanga naa bonisanga kuli naa lata ku zwelapili ku ipeya ku utwa mulenaa hae ka ku punyiwa zebe. Nto yeo ya swana ni buineelo bwa luna. Ha lu ineela ku Jehova, lu bonisa kuli lwa lata ku mu utwa bakeñisa kuli lwa mu lata.

3. Ki kabakalañi ha lu ineelanga ku Mulimu?

³ Lu si ka kolobezwa kale, ne lu ezize keto ya ku sebeleza Jehova, kamba ku ba batanga ba hae. Ha ne lu ineezi ku yena, ne lu sepisize kuli lu ka mu utwa ni ku eza tato ya hae. Ha ku na mutu ya naa lu hapelelize ku eza cwalo. Mane nihaiba banana ba kolobezwanga bakeñisa kuli ba lata ku eza cwalo, isiñi kabakala kuli ba bata feela ku tabisa bashemi ba bona. Kaufelaa luna lu ezanga keto ya ku ineela ku Mulenaa luna ya kwa lihalimu yena Jehova bakeñisa kuli lwa mu lata. Muapositola Joani naa ñozi kuli: “Se ki sona se si taluswa ki ku lata Mulimu, kuli lu mamele milao ya hae.”—1 Joa. 5:3.

LU LUKULUHILE, KONO LU BATANGA

4. Lu tokwa ku ezañi kuli lu be “batanga ba ku luka”?

⁴ Lu itumela hahulu ku Jehova kabakala kuli u lu fa ze lu tokwa kuli lu be batanga ba hae! Ku ba ni tumelo mwa sitabelo sa Kreste ku tahisa kuli lu si ke lwa ba batanga ba sibi, ili ku talusa kuli ha lu na ku zamaiswa ki sona ka ku tala. Taba yeo i bonisa kuli nihaike kuli ha lu si ka petahala, lu itatela ku utwa Jehova ni Jesu sina Malenaa luna. Paulusi naa talusize hande taba yeo ku le liñwi la mañolo a hae. Naa ize: “Mu ipale kuli mu shwile luli kwa neku la sibi kono mu pilela Mulimu ka Kreste Jesu.” Kihona a fa kelezo ye li: “Kana ha mu zibi kuli haiba mu zwelapili ku ifana ku mutu ufi kamba ufi, sina batanga ba hae ba ba mu utwa, mu batanga ba yena yo ye mu utwa, ibe ba sibi se si libisa kwa lifu, kamba ba ku utwa ko ku libisa kwa ku luka? Kono ni itumela ku Mulimu kakuli ne mu banga batanga ba sibi kono ku zwelela kwa pilu mu mamezi mufuta wa tuto ye ne mu filwe. Ki cwalo, bakeñisa kuli ne mu lukuluzwi kwa sibi, ne mu fetuhile batanga ba ku luka.” (Maro. 6:11, 16-18) Mu lemuhe kuli Paulusi u bulela kuli lu swanela ku ‘mamela kamba ku utwa ku zwelela kwa pilu.’ Kacwalo ha lu ineela ku Mulimu, lu ba “batanga ba ku luka.”

5. Ki ndwa mañi ye lu swanela ku lwana, mi ki kabakalañi?

⁵ Ka ku ba batanga ba Mulimu ba ba ineezi, ku na ni lindwa ze peli ze lu swanela ku lwana. Ndwa ya pili ki ya ku sa petahala kwa luna. Paulusi ni yena naa lwanile ndwa yeo. Naa bulezi kuli: “Luli ni tabela mulao wa Mulimu ku likana ni mutu ye ni li yena mwahali, kono mwa mubili wa ka ni bona mulao u sili o lwanisana ni mulao wa munahano wa ka mi u ni isa mwa butanga bwa mulao wa sibi o mwa lilama za ka.” (Maro. 7:22, 23) Bakeñisa kuli ha lu si ka petahala, lu swanela ku zwelapili ku lwanisa litakazo za luna za kwa mubili, zona litakazo ze ba na ni zona batu za ku eza lika za sa tabeli Mulimu. Muapositola Pitrosi naa lu file kelezo ye li: “Mu be sina sicaba se si lukuluhile, mu sa itusisi tukuluho ya mina sina kubo ya ku kwahela bufosi ka yona, kono mu be sina batanga ba Mulimu.”—1 Pit. 2:16.

6, 7. Satani u tahisa cwañi kuli lifasi li bonahale ku ba le linde?

⁶ Ndwa ya bubeli ki ya ku lwana ni lifasi le li zamaiswa ki madimona. Satani ki yena mubusi wa lifasi, mi u itusisa lilwaniso kaufela za na ni zona kuli a sinye busepahali bwa luna ku Jehova ni Jesu. U bata kuli lu be batanga ba hae ka ku lu kukueza kuli lu be ba lifasi. (Mu bale Maefese 6:11, 12.) Nzila ye ñwi ya itusisa Satani ki ya ku tahisa kuli lifasi li bonahale hahulu ku ba le linde, kuli mane lu tabele hahulu lika ze mwateñi. Muapositola Joani u lu lemusa kuli: “Haiba mutu u lata lifasi, lilato la Ndate ha li yo ku yena; kakuli lika kaufela ze mwa lifasi—takazo ya nama ni takazo ya meeto ni moya wa ku iponahaliseza za na ni zona mutu mwa bupilo—ha li zwi ku Ndate, kono li zwa mwa lifasi.”—1 Joa. 2:15, 16.

⁷ Batu kaufela mwa lifasi ba na ni takazo ye tuna ya ku ba ni lika ze ñata. Satani u bata kuli batu ba lumele kuli ku ba ni masheleñi a mañata ku ka ba tahiseza tabo. Lintolo ze tuna li fumaneha kai ni kai. Bafundoti ba susueza batu ku isa hahulu pilu kwa ku ba ni lika ze ñata ni ku lata hahulu ku itabisa. Ka mutala, ku na ni likampani ze eza pisinisi ya ku lukisanga misipili ya ku ya kwa libaka ze nde. Mwa misipili yeo hañata ku fumanehanga batu ba ba na ni munahanelo wa lifasi. Kai ni kai lu susuezwa kuli lu pile mo ba pilela batu ba lifasi.

8, 9. Ki kozi mañi ye li teñi, mi ki kabakalañi?

⁸ Mwa lilimo za baapositola, Pitrosi naa lemusize Bakreste ka za batu ba bañwi ba ne ba li mwa puteho ba ne ba kalile ku nahana mo ba nahanela ba lifasi. Naa ize: “Ba fumana tabo ku pila mwa minyaka, mane nihaiba musihali. Bao ba swana sina koli ni litiba, ba tabela hahulu lituto za bona ze puma ha ba nze ba ca hamoho ni mina. Kakuli ba bulela lipulelo za ku ikutwisisa za mbwashula. Mi ka ku kukueza batu ku kolwisa litakazo za nama ni ka likezo za muzamao wa ku sa swabela bufosi, ba swasa ba ba sweli ku baleha kwa batu ba ba pila mwa bufosi. Niha ba ba sepisa tukuluho, bona ka sibili ki batanga ba ku bola. Kakuli haiba mutu a tulwa ki yo muñwi, se li mutangaa hae.”—2 Pit. 2:13, 18, 19.

⁹ Haiba lu lika ku kolwisa “takazo ya meeto,” fo kikuli, haiba lu lika ku ba ni lika kaufela ze lu bata, ha lu na ku ba ni tukuluho. Kono lu ka ba batanga ba Satani Diabulosi, yena mulena wa lifasi le ya sa bonwi. (1 Joa. 5:19) Kwa konahala luli kuli Mukreste a wele mwa kozi ya ku ba mutangaa sifumu. Mi mutu ha saa bile mutangaa sifumu, ku kona ku ba hahulu taata kuli a ikayutule kwa butanga bo.

MUSEBEZI O NA NI MULELO SAKATA

10, 11. Ki bo mañi sihulu ba tasezanga Satani kacenu? Mi tuto ye pahami i kona ku tahiseza cwañi ba banca butata?

¹⁰ Sina mwa naa ezelize mwa simu ya Edeni, Satani ni kacenu u tasezanga batu ba ba sa zibi hande lika. Batu ba nomile hahulu Satani kacenu ki ba banca. Ha tabelangi ku bona yo munca, kamba mutu ifi kamba ufi ha ikatulela ku sebeleza Jehova. Satani u bata kuli batu ba ba ineela ku Jehova ba palelwe ku zwelapili ku sepahala ku Mulimu.

¹¹ Mutanga ha naa punyiwa zebe, naa utwanga butuku. Kono hamulaho wa fo, naa siyalanga ni liñiba le ne li bonisa batu kaufela kuli naa ikatulezi ku zwelapili ku ina ni mulenaa hae. Ba banca ba kona ku fumana taata ku eza liketo ze shutana ni ze ba eza batu ba bañwi ba ba pila ni bona mwa silalanda. Ka mutala, Satani u susueza moya wa ku nahana kuli ku ba ni musebezi o munde mwa lifasi le, ki yona nto ye kona ku tusa mutu ku pila bupilo bo bunde. Kono niti kikuli lu kona feela ku pila hande haiba lu nga Jehova ku ba yena wa butokwa mwa bupilo bwa luna. Jesu naa bulezi kuli: “Tabo ki ya ba ba lemuha kuli ba tokwa za Mulimu.” (Mat. 5:3) Bakreste ba ineelanga ku Jehova ka mulelo wa kuli ba eze tato ya hae isiñi tato ya Satani. Ba balanga Bibele ni ku nahanisisa ze i bulela “musihali ni busihu.” (Mu bale Samu 1:1-3.) Kono buñata bwa lituto ze pahami ze ba amuhela batu mazazi a, ha li fi mutangaa Mulimu nako ya ku nahanisisa ze mwa Linzwi la Mulimu ni ku sebeleza Jehova.

12. Ba banca ba bañata kacenu ba tokwa ku iketelañi?

¹² Mubelekisi wa lifasi u kona ku tahiseza hahulu mutangaa Mulimu butata. Mwa liñolo la hae la pili la naa ñolezi Makorinte, Paulusi naa ize: “Kana ne u bizizwe u li mutanga? U si ke wa bilaezwa ki seo; kono haiba wa kona ku fumana kolo ya ku lukuluha, u eze cwalo.” (1 Makor. 7:21) Haiba mulenaa mutanga ne li mutu wa lifasi mi naa tatafaleza lika mutanga yo, ne ku li hande kuli mutanga yo a itukulule. Mwa linaha ze ñata kacenu, mulao u tokwa kuli ba banca ba kene sikolo ka lilimo ze ñwi ze tomilwe. Hamulaho wa fo, baituti ba fiwanga kolo ya ku iketela. Ba kona ku iketela ku zwelapili ku ituta kamba ku tuhela. Ku kona ku ba hahulu taata ku Mukreste kuli a zwelepili ku ba ni tukuluho ya ku sebeleza Jehova mwa sebelezo ya nako kaufela haiba a iketela ku ndongwama tuto ye pahami ka mulelo wa kuli a be ni musebezi o munde mwa lifasi le.—Mu bale 1 Makorinte 7:23.

MU TOKWA TUTO MAÑI—YE PAHAMI KAMBA YE NDE KA KU FITISISA?

13. Ki tuto mañi ye tusa hahulu batanga ba Jehova kacenu?

¹³ Paulusi naa elelize Bakreste ba ne ba pila mwa Kolose kuli: “Mu tokomele kuli ku si ke kwa ba ni ya mi isa mwa butanga ka butali bwa lifasi ni bupumi ka ku ya ka lizo za batu, ka ku ya ka lituto za lifasi za matatekelo mi isiñi ka ku ya ka Kreste.” (Makolo. 2:8) Baluti ba bañata ba luta “butali bwa lifasi ni bupumi ka ku ya ka lizo za batu.” Tuto ye pahami, ili yeo hañata i kopanyelezanga lituto ze cwalo, ha i tusangi baituti ku ba ni zibo ya ku eza misebezi ya mazoho, mi baituti ba siyalanga ba si na za ku eza mwa bupilo. Kono Bakreste ba iketelanga tuto ye kona ku ba tusa ku ziba misebezi ya mazoho ilikuli ba pile bupilo bo bu bunolo ni kuli ba kone ku sebeleza Mulimu. Ba latelela kelezo ya naa file Paulusi ku Timotea, ye li: “Ki niti, ku sepahala ku Mulimu kwa fumisa, haiba lu kolwa ka ze lu na ni zona. Hakulicwalo, ha lu na ni lico ni liapalo, lu ka kolwa ka lika zeo.” (1 Tim. 6:6, 8) Mwa sibaka sa ku ba ni mapepa a kwa likolo ze pahami, Bakreste ba niti ba beleka ka taata kuli ba be ni ‘mañolo a ba paka’ ka ku eza musebezi wa ku kutaza ka mo ba konela kaufela.—Mu bale 2 Makorinte 3:1-3.

14. Ha lu bala liñolo la Mafilipi 3:8, lu itutañi ka za mubonelo wa naa na ni ona Paulusi wa ku ba mutangaa Mulimu ni wa Kreste?

¹⁴ Lwa kona ku ituta se siñwi kwa mutala wa Paulusi. Naa lutilwe ki Gamaliele muluti wa Mulao wa Sijuda. Tuto ya naa fumani i kona ku bapanywa kwa lituto ze fiwa kacenu kwa liyunivesiti. Kono Paulusi naa nga cwañi tuto yeo ha naa i bapanyize ni likute la kona ku fumana mutu bakeñisa ku ba mutangaa Mulimu kamba wa Kreste? Naa ñozi kuli: “Ni tobohile lika kaufela kabakala zibo ye tuna ni ku fita ya Kreste Jesu Mulenaa ka.” Mi naa ekelize kuli: “Kabakala hae ni tobohile lika kaufela mi ni li nga sina matakala, kuli ni fumane Kreste.” (Mafil. 3:8) Mubonelo wa naa na ni ona Paulusi wa kona ku tusa Bakreste ba ba sa li banana ni bashemi ba bona ku ziba hande tuto ye ba swanela ku keta. (Mu bone maswaniso.)

MU TUSIWE KI TUTO YE NDE KA KU FITISISA

15, 16. Kopano ya Jehova i fa lituto mañi, mi mulelo wa lituto zeo ki ufi?

¹⁵ Ki lika mañi ze ezahalanga kwa likolo ze ñata ze pahami? Batu ba ba fumaneha kwa likolo zeo hañata, ba ikutwanga ku lukuluha ku lwanisa muuso ni bazamaisi ba bañwi mane ni ku bonisa bunyemi bwa bona ka likezo. (Maef. 2:2) Kono kopano ya Jehova yona i fanga tuto ye nde ka ku fitisisa, mi tuto yeo i felwanga mwa sibaka mo ku na ni kozo ili mwa puteho ya Sikreste. Kaufelaa luna lwa kona ku tusiwa ki Sikolo sa Bukombwa sa Teokratiki se si eziwanga sunda ni sunda. Ku na ni likolo ze ñwi hape ze kona ku lu tusa. Ka mutala, ku na ni sikolo sa mizwale ba makwasha ba ba li mapaina, se si bizwa kuli Sikolo sa Bibele sa Mizwale ba Makwasha, mi hape ku na ni sikolo sa batu ba ba nyalani ba ba li mapaina, se si bizwa kuli Sikolo sa Bibele sa Bakreste ba ba Nyalani. Likolo zeo kaufela li lu tusa ku mamela litaelo za Mulenaa luna ya kwa lihalimu yena Jehova.

¹⁶ Lwa kona ku fumana litaba ze ñata za niti mwa buka ya lipatisiso ye bizwa Watch Tower Publications Index kamba mwa Sifalana sa lihatiso sa Watchtower Library se si fa litapa la CD-ROM. Mulelo o mutuna wa lituto zeo za mwa Bibele ki wa kuli lu lapele Jehova. Li lu luta mo lu kona ku tuseza ba bañwi kuli ni bona ba be balikani ba Mulimu. (2 Makor. 5:20) Mi batu be lu luta, ba ka kona ku luta ba bañwi ni bona.—2 Tim. 2:2.

MUPUZO WA MUTANGA

17. Ki limbuyoti mañi ze lu kona ku fumana haiba lu iketela tuto ye nde ka ku fitisisa?

¹⁷ Mwa swanisezo ya Jesu ya litalenta, batanga ba babeli ba ba sepahala ne ba lumbilwe kabakala musebezi o ne ba petile. Nto yeo ne i tabisize batanga bao ni mulenaa bona. Ka ku bonisa kuli naa tabezi ze ne ba ezize, mulena naa ba file musebezi o muñwi hape. (Mu bale Mateu 25:21, 23.) Lwa kona ku ba ni tabo ni ku ziba ze lu pilela haiba lu iketela tuto ye nde ka ku fitisisa. Ka mutala, Michael naa pasize hande hahulu kwa sikolo. Maluti ba hae ha ne ba mu bizize kuli ba to ikambota ni yena za kuli a ye kwa yunivesiti, ne ba komokile ha ba utwa kuli ha tabeli ku ya kwa yunivesiti. Mwa sibaka sa ku ya kwa yunivesiti, naa ezize kosi ye ne mu tusize ku ziba misebezi ya mazoho. Kosi yeo ne i mu tusize ku ziba mwa ku ipiliseza ha nzaa eza bupaina. Kana Michael naa ikutwile kuli naa ezize keto ye fosahalile? U bulela kuli tuto ya fumani mwa Bibele ni tuto ya fumani ka ku ba muuna-muhulu mwa puteho i mu tusize hahulu. Michael u bulela kuli: “Limbuyoti ni matohonolo ze ni fumani li fita masheleñi a ne ni ka fumananga. Ni tabile hahulu kuli ne ni si ka keta ku ndongwama tuto ye pahami.”

18. Ki kabakalañi ha lu iketezi tuto ye nde ka ku fitisisa?

¹⁸ Tuto ye nde ka ku fitisisa i lu tusa ku ziba tato ya Mulimu, ni ku lu tusa ku ba batanga ba Jehova. I lu fa sepo ya ku “lukululwa kwa butanga bwa ku bola,” mi kwa mafelelezo, “ni ku fumana tukuluho ye makaza ya bana ba Mulimu.” (Maro. 8:21) Mi sa butokwa ni ku fita ki kuli, tuto yeo ki yona nzila ye nde ka ku fitisisa ye lu kona ku bonisa ka yona kuli lu lata hahulu Mulenaa luna yena Jehova.—Ex. 21:5.

[Maswaniso a fa likepe 14, 15]

Ki mulena ufi ye mu ka sebeleza?