LIPUZO ZE ZWA KWA BABALI
Ki kabakalañi Jesu ha naa lotisize miyoko pili a si ka zusa kale Lazaro, sina mo ku ñolezwi kwa Joani 11:35?
▪ Mutu ye lu lata ha timela, lwa lotisanga miyoko bakeñisa kuli lu ka mu tonda. Nihaike kuli Jesu naa lata hahulu Lazaro, naa si ka lotisa miyoko kabakala kuli Lazaro naa shwile. Jesu naa lotisize miyoko kabakala kuli naa utwela butuku lubasi lwa Lazaro lo ne lu lila, sina mo i boniseza taba ye ñozwi mwa buka ya Joani.—Joa. 11:36.
Jesu ha naa utwile lwa pili kuli Lazaro wa kula, naa si ka ya honafo kwa ndu ya Lazaro kuli a yo mu folisa. Bibele i bulela kuli: “[Jesu] ha utwile kuli Lazaro wa kula, a ina mazazi a mabeli mane mwa sibaka sa naa li ku sona.” (Joa. 11:6) Ki kabakalañi Jesu ha naa liyehile ku ya kwa ndu ya Lazaro? Ku na ni libaka le ne li tisize kuli a liyehe. Jesu naa bulezi kuli: “Mulelo wa butuku bo haki lifu, kono ki wa ku kanyisa Mulimu, kuli Mwanaa Mulimu a kone ku kanyiswa ka bona.” (Joa. 11:4) Lifu ne si ona mulelo wa butuku bwa Lazaro kamba kuli ne li ona mafelelezo a bona. Jesu naa bata kuli “Mulimu a kone ku kanyiswa” ka lifu la Lazaro. Kamukwaufi? Jesu naa tuha a eza makazo ye komokisa ya ku zusa mulikanaa hae ya naa shwile.
Jesu ha naa ambola ni balutiwa ba hae zazi leo, naa bapanyize lifu kwa buloko. Ki lona libaka ha naa bulelezi balutiwa ba hae kuli ‘na ya kwateñi ni yo zusa Lazaro.’ (Joa. 11:11) Ku Jesu, ku zusa Lazaro kwa bafu ne ku ka swana feela inge mushemi ya zusa mwanaa hae kwa buloko. Ki lona libaka Jesu ha naa si ka utwa butuku kabakala lifu la Lazaro.
Kono ki nto mañi ye ne tisize kuli Jesu a lotise miyoko? Kalabo hape lu i fumana mwa litaba ze ñwi ze mwa likande le. Jesu ha naa kopani ni Maria kaizelaa Lazaro, mi a mu bona inzaa lila ni batu ba bañwi, Jesu “a tomoha pilu mi a ziyeleha.” Jesu ha naa boni butuku bo ne ba utwa bahabo Lazaro, ni yena a utwa butuku kuli mane a “tomoha pilu.” Ki lona libaka ‘Jesu ha naa lotisize miyoko.’ Jesu naa swabile hahulu ha bona balikani ba hae ba naa lata ha ba ikutwa bumaswe.—Joa. 11:33, 35.
Likande le, li bonisa kuli Jesu u na ni maata a ku zusa bahabo luna ba ba shwile ilikuli ba to pila mwa lifasi le linca mo ku si na mapongo. Hape likande le, li lu tusa ku ziba kuli Jesu u utwelanga makeke batu ba ba shwezwi ki mutu ye ba lata. Tuto ye ñwi ye lu ituta mwa taba ye ki ya kuli ni luna lu swanela ku utwelanga makeke batu ba ba lila kabakala ku shwelwa ki mwanahabo bona ye ba lata.
Jesu naa ziba kuli naa ka zusa Lazaro ha saa shwile. Nihakulicwalo, naa lotisize miyoko bakeñisa musa ni lilato la naa na ni lona kwa balikani ba hae. Kamukwaoswana, ni luna lwa kona ku ‘lila ni ba ba lila’ kabakala mo lu ikutwela. (Maro. 12:15) Mutu ha lila kabakala lifu ha ku talusi kuli ha na tumelo ya kuli zuho i ka ba teñi. Kaniti, Jesu naa tomile mutala o munde ha naa lotisize miyoko ilikuli a bonise kuli naa utwela batu makeke ba ne ba shwezwi ki mwanahabo bona Lazaro, nihaike kuli Jesu naa ziba kuli naa tuha a mu zusa.