• Kana ki Mikiti Kaufela Yetabisa Mulimu?
    Muikole Bupilo Kuya Kuile!—Muitute Bibele

    • Mubale Maefese 5:10, mi kihona mukanyakisisa lipuzo zelatelela:

      • Ki lika mañi zeluswanela kunyakisisa halunahana za kuitabisa fa mazazi a lipumulo?

      • Ki ifi mikiti ya mazazi a lipumulo yeatile hahulu mwa sibaka semupila?

      • Mubona cwañi, kana mikiti yeo yatabisa Jehova?

      Ka mutala, kana mwaziba mubonelo wa Mulimu ka za mikiti ya mazazi a kupepwa? Bibele haibonisi kuli kunani mulapeli wa Jehova yakile aeza mukiti wa kuhupula lizazi la kupepwa, kono ibulela ka za mikiti yemibeli ya kuhupula lizazi la kupepwa yeneezizwe ki batu bane basalapeli Jehova. Mubale Genese 40:20-22 ni Mateu 14:6-10. Mi kihona mukanyakisisa lipuzo zelatelela:

      • Ki lika mañi zeatile hahulu zeezahalanga kwa mikiti ya kuhupula lizazi la kupepwa?

      • Ka kuya ka Bibele, Jehova uikutwa cwañi ka za mazazi a kupepwa?

      Kono mukana mwaipuza kuli, ‘Kana luli Jehova hatabeli haiba nieza mukiti wa kuhupula lizazi la kupepwa kamba mukiti feela omuñwi olwanisana ni milao yahae?’ Mubale Exoda 32:1-8. Mi mubuhe VIDIO kihona mukanyakisisa lipuzo zelatelela.

      VIDIO: Mazazi A Pumulo ni Mikiti Yesatabisi Mulimu (5:07)

      • Ki kabakalañi haluswanela kuisa pilu kwa lika zatabela Jehova?

      • Ki lika mañi zeluswanela kueza?

      Zekona kulutusa kuziba haiba mukiti olubata kueza hautabisi Mulimu

      • Kana utomile fa lituto zesazwi mwa Bibele? Kuli muzibe kalabo kwa puzo yeo, mubatisise kousimuluha.

      • Kana ufa batu, kopano, kamba lisupo za naha likute leliswanela kufiwa feela ku Mulimu? Lukuteka Jehova kufita nto ifi kamba ifi, mi lumusepile kuli ki yena feela yakafelisa matata a batu mwa lifasi.

      • Kana lizo ni likezo za fa mukiti wo zalwanisana ni likuka za mwa Bibele? Luswanela kuzwelapili kuba ni muzamao okenile.

  • Muitabisange ka Nzila Yetabisa Jehova
    Muikole Bupilo Kuya Kuile!—Muitute Bibele
    • Tuto 53. Mutu ni musalaa hae ni mwanaa bona wamusizana baca mapopukoni inze babuha TV.

      TUTO 53

      Muitabisange ka Nzila Yetabisa Jehova

      Jehova ki “Mulimu yatabile.” (1 Timotea 1:11) Ubata kuli lube babatabile ni kuli luikole bupilo. Watabanga haluba ni nako ya kuikatulusa. Mwa tuto ye, lukanyakisisa molukona kuikatuluseza ka nzila yeka lutahiseza tabo ni kutabisa Jehova.

      1. Ki lika mañi zeluswanela kuhupulanga haluketa za kuitabisa ka zona?

      Ki lika mañi zemutabelanga kueza hamuikatulusa? Babañwi batabelanga kuikatulusa inze bali fa ndu yabona, mwendi ka kubala buka, kuteeleza kwa lipina, kubuha filimu yeñwi, kamba kutatuba lika zeñwi fa Intaneti. Babañwi bona batabelanga kuikatulusa inze bali ni balikani babona, ka kupotela libaka zeñwi, kutapa, kamba kubapala papali yeñwi. Kusina taba ni mufuta wa lika zeluitabisanga ka zona, lutokwa kubona teñi kuli zeluitabisa ka zona ‘zalumelelwa ku Mulena.’ (Maefese 5:10) Lutokwa kueza cwalo luli bakeñisa kuli batu babañata kacenu mwa lifasi baitabisanga ka lika zatoile Jehova, zecwale ka mifilifili, muzamao wa buhule, ni tumelo ya mioya. (Mubale Samu 11:5.) Ki lika mañi zeka lutusa kuketa hande lika za kuitabisa ka zona?

      Haiba luketa balikani babalata Jehova, baka lutusa kueza likatulo zende haluketa za kuitabisa ka zona. Sina mone luitutezi mwa tuto yefelile, “yazamaya ni bababutali ukaba yabutali.” Kono haiba lutandanga nako ni batu babasa lateleli likuka za Mulimu, ‘lukakena mwa butata.’—Liproverbia 13:20.

      2. Ki kabakalañi halutokwa kunyakisisanga nako yelutanda kwa kuitabisa?

      Lika zeluitabisa ka zona niha likona kuba zende, luswanela kutokomela kuli halutandi hahulu nako yeñata inze luitabisa. Kakuli haiba lusaezi cwalo, haluna kubanga ni nako ya kueza lika za butokwa hahulu ni kufita. Bibele ilususueza kuli ‘luitusise hande nako yaluna.’—Mubale Maefese 5:15, 16.

      MUBATISISE

      Mubone zekona kumitusa kuezanga likatulo zende ka za lika zemuketa kuitabisa ka zona.

      3. Muambuke kuitabisa ka lika zemaswe

      Ki kabakalañi haluswanela kutokomela haluketa za kuitabisa ka zona? Mubuhe VIDIO, mi kihona mukanyakisisa lipuzo zelatelela.

      VIDIO: Ki Lika Mañi Zeniswanela Kuitabisa ka Zona? (4:39)

      • Lipapali zene baezanga Maroma ba kwaikale liswana cwañi ni lipapali zeñwi zebaezanga batu kacenu?

      • Ka kuya ka zemuboni mwa vidio, ki lika mañi zanaaitutile Danny ka za lika za kuitabisa ka zona?

      Mubale Maroma 12:9, mi kihona mukanyakisisa puzo yelatelela:

      • Timana ye ikona kumitusa cwañi kuketa hande lika za kuitabisa ka zona?

      Ki lika mañi zeñwi zatoile Jehova? Mubale Liproverbia 6:16, 17 ni Magalata 5:19-21. Hamulaho wa kubala leliñwi ni leliñwi la mañolo ao, munyakisise puzo yelatelela:

      • Kwa lika zebulezwi mwa litimana zeo, ki lifi zeatile hahulu kacenu?

      Zekona kumitusa kuketa hande lika za kuitabisa ka zona

      Muipuze kuli:

      • Ki lika mañi zenibata kuitabisa ka zona? Kana likopanyeleza lika zatoile Jehova?

      • Ki lili fonibata kuitabiseza? Kana nako yenika itabisa ikatahisa kuli nisike naeza pili lika za butokwa?

      • Ki bo mañi bonika itabisa ni bona? Kana niitabisa ni batu babasa lati Jehova?

      Luswanela kueza molukonela kaufela kuambuka lika zekona kulukenya mwa kozi. Kona libaka haluswanela kuambuka kuitabisa ka lika zemaswe

      Mota izamaya mwa mukwakwa o kwatuko ni lilundu. Mota kikale izwa hanyinyani mwa mukwakwa.

      4. Muitusise hande nako yamina

      Mubuhe VIDIO, mi kihona mukanyakisisa puzo yelatelela.

      VIDIO: Muitusisanga Cwañi Nako Yamina? (2:45)

      • Nihaike kuli muzwale yeluboni mwa vidio naasabuhi lika zemaswe, ki lika mañi zanaasaezi hande?

      Mubale Mafilipi 1:10, mi kihona mukanyakisisa puzo yelatelela:

      • Timana ye ikona kulutusa cwañi kueza katulo yeswanela ka za nako yelutanda kwa lika za kuitabisa ka zona?

      5. Mukete kuitabisa ka lika zende

      Nihaike kuli lika za kuitabisa ka zona zeñwi halitabisi Jehova, kunani lika zende zemutabisa zemukona kuitabisa ka zona. Mubale Muekelesia 8:15 ni Mafilipi 4:8, mi kihona mukanyakisisa puzo yelatelela:

      • Ki lifi lika za kuitabisa ka zona zemutabela hahulu?

      Maswaniso: Batu babanani lisimuluho zeshutana baikola kuitabisa ka lika zende mi baikatulusa. 1. Musizana uteeleza kwa lipina mi uswanisa maswaniso. 2. Mitangana babalaalu balaha mbola. 3. Bashimani bababeli bacoba linjinga. 4. Mushimani upanga mota ya kubapalisa. 5. Muuna uliza ngoma. 6. Mushimani ubapala lipapali za fa kompyuta ni bo ndatahe. 7. Musali uunga siswaniso.

      Mwakona kubanga ni nako yende ya kuitabisa ni ya kuikatulusa

      BABAÑWI BABULELANGA KULI: “Hakusika fosahala kuitabisa ka kubuha mifilifili, buhule, ni za tumelo ya mioya, ibile feela haniezi lika zeo.”

      • Nemuka alaba cwañi mutu yabulela cwalo?

      LITABA KA BUKUSWANI

      Jehova ubata kuli luitabise ka lika zende.

      Mulundulule

      • Bakreste baswanela kuambuka kuitabisa ka lika zecwañi?

      • Ki kabakalañi haluswanela kutokomela kuli halutandi hahulu nako yeñata kwa kuitabisa?

      • Ki kabakalañi hamubata kuketa kuitabisa ka lika zetabisa Jehova?

      Za Kueza

      MUBONE LITABA ZEÑWI

      Munyakisise kubona yaswanela kumiketelanga lika za kuitabisa ka zona.

      “Kana Lipaki za Jehova Bahanisanga Mafilimu, Libuka ni Lipina Zeñwi?”(Taba ya fa webusaiti)

      Mubone zekona kumitusa kueza likatulo zende ka za kuitabisa ka zona ni momukona kuitusiseza hande nako yamina ya kupumula.

      “Kana Zemuitabisa ka Zona Zamitusa?” (Tawala ya Mulibeleli, October 15, 2011)

      Mwa likande lelili: “Mane Nenitulile Saluluti Sene Ninani,” mubone libaka muuna yomuñwi hanaatuhezi kuitabisanga ka lika zeñwi.

      “Bibele Yacincanga Bupilo Bwa Batu” (Tawala ya Mulibeleli, July-September, 2010)

      Mubone libaka me haeza katulo yende ka za lika za kuitabisa ka zona zebonisa litumelo za mioya.

      Muambuke Kuitabisa ka Lika Zebonisa Tumelo ya Mioya (2:02)