Jehova Mulimu uezanga lika ka swanelo. (1 Makorinte 14:33) Taba yeo ilutusa kuutwisisa libaka batu bahae ni bona habaezanga lika ka swanelo. Puteho ya Sikreste ietelelwa cwañi? Lukona kuezañi kuli lika lizamaye hande mwa puteho?

1. Ki mañi yaetelela puteho ya Sikreste?

‘Kreste ki yena toho ya puteho.’ (Maefese 5:23) Jesu uetelela misebezi ya batu ba Jehova mwa lifasi kaufela kuzwelela kwa lihalimu. Jesu uketile “mutanga yasepahala yanani kutwisiso,” ili sikwatanyana sa baana-bahulu babanani silikani sesinde ni Mulimu ili bababizwa hape kuli Sitopa Sesietelela. (Mubale Mateu 24:45-47.) Sina mone baezezanga baapositola ni baana-bahulu ba mwa Jerusalema mwa linako za baapositola, baba mwa Sitopa Sesietelela ni bona kacenu bafanga ketelelo mwa puteho ya Sikreste. (Likezo 15:2) Nihakulicwalo, mizwale bao haki bona babaetelela kopano yaluna. Bakupanga tuso ku Jehova ni kuitusisa Linzwi lahae kuli libaetelele, mi balatelela litaelo zafile Jesu.

2. Ki musebezi mañi obaeza baana-bahulu mwa puteho?

Baana-bahulu ki baana babanani silikani sesitiile ni Mulimu ili babalutanga litaba za mwa Mañolo ni kususueza batu ba Jehova kuba ni silikani sesinde ni yena. Habaholiswangi masheleñi kabakala musebezi obaeza. Kono baeza musebezi wo “ka kuitatela fapilaa Mulimu; isiñi ka lilato la kuipumanela lika ka kusasepahala, kono ka kutukufalelwa.” (1 Pitrosi 5:1, 2) Baana-bahulu batusiwanga ki likombwa za puteho, ili bao hamulaho wa nako bakwanisanga zetokwahala kuli basebeze sina baana-bahulu.

Mizwale baba mwa Sitopa Sesietelela baketanga baana-bahulu babañwi kuli basebeze sina baokameli ba mupotoloho. Baokameli ba mupotoloho, bapotelanga mizwale ni likaizeli mwa liputeho ka mulelo wa kubafa ketelelo ni kubasusueza. Hape baketanga mizwale babakwanisize zetokwahala za mwa Mañolo kuli basebeze sina likombwa za puteho ni baana-bahulu.—1 Timotea 3:1-10, 12; Tite 1:5-9.

3. Ki musebezi mañi waswanela kueza Paki ya Jehova kaufela?

Baba mwa puteho kaufela bakona ‘kulumbeka libizo la Jehova’ ka kualaba, kuopela, kufa lingambolo kwa mikopano ya puteho, mane ni kukutaza taba yende ku babañwi.—Mubale Samu 148:12, 13.

MUBATISISE

4. Jesu ki mueteleli yomunde

Jesu ulukupa kueza nto yeñwi. Mubale Mateu 11:28-30, mi kihona mukanyakisisa puzo yelatelela:

• Jesu ubata kuli luikutwe cwañi hanze aluetelela?

VIDIO: Baana-bahulu Batusa ka Nako ya Zikinyeho Mwa Nepal (4: 56)

Bibele italusa hande mobaswanela kuezeza musebezi wabona baana-bahulu.

Mubale Isaya 32:2 ni 1 Pitrosi 5:1-3, mi kihona mukanyakisisa lipuzo zelatelela:

• Muikutwa cwañi kuziba kuli baana-bahulu balika mobakonela kaufela kususueza babañwi sina Jesu?

• Ki mwa linzila mañi zeñwi mo baana-bahulu balikanyisa Jesu?

5. Baana-bahulu balatelelanga zebalutanga

VIDIO: Baana-bahulu Batomela Babañwi Mutala Omunde! (7:39)

Jesu naatomile mutala omunde ili obaswanela kulikanyisa baana-bahulu. Mubale Mateu 23:8-12, mi kihona mukanyakisisa puzo yelatelela:

• Ka kuya ka momulemuhezi, zebaeza baeteleli ba bulapeli lishutana cwañi ni zeitalusa Bibele ka za mobaswanela kuezeza lika baana-bahulu?

1. Baana-bahulu babonanga teñi kuli bona ni lubasi lwabona banani silikani sesitiile ni Jehova

2. Baana-bahulu batusanga batu kaufela mwa puteho

3. Baana-bahulu bakutazanga nako kaufela

4. Baana-bahulu ki baluti babande. Hape baezanga misebezi ya kukenisa ni yemiñwi cwalo

6. Luswanela kusebelisana hande ni baana-bahulu

Bibele ilutaluseza libaka halutokwa kusebelisana hande ni baana-bahulu. Mubale Maheberu 13:17, mi kihona mukanyakisisa lipuzo zelatelela:

• Ki kabakalañi Bibele hai lutaluseza kuli luutwe babaetelela? Muikutwa cwañi ka za taba yeo?

Mubale Luka 16:10, mi kihona mukanyakisisa puzo yelatelela:

• Ki kabakalañi haluswanela kuutwa baana-bahulu nihaiba mwa lika zebonahala kuba zenyinyani?

LITABA KA BUKUSWANI

Jesu ki yena yaetelela puteho ya Sikreste. Lusebelisana ni baana bahulu babaetelelwa ki Jesu bakeñisa kuli balususueza ni kululuta ka mupilelo wabona omunde.

Mulundulule

• Ki mañi yaetelela puteho?

• Baana-bahulu batusa cwañi mizwale ni likaizeli mwa puteho?

• Ki musebezi mañi waeza yomuñwi ni yomuñwi wa balapeli ba Jehova?

MUBONE LITABA ZEÑWI

Munyakisise bupaki bobubonisa kuli mizwale baba mwa Sitopa Sesietelela ni baana-bahulu baisa hahulu pilu kwa Bakreste kacenu.

Kutiisa Mizwale ka Nako Yeukwalilwe Musebezi Waluna (4:22)

Mubone musebezi obaeza baokameli ba mupotoloho.

Bupilo Bwa Muokameli wa Mupotoloho Mwa Libaka za Matakanyani (4:51)

Mubale ka za musebezi wa butokwa obaeza basali mwa puteho ya Sikreste.

“Kana Kunani Misebezi Yebaezanga Basali Mwa Kopano ya Lipaki za Jehova?” (Tawala ya Mulibeleli, September 1, 2012)

Mubatisise mobasebeleza baana-bahulu ka taata kuli basusueze balumeli babañwi.

“Baana-bahulu ba Sikreste ‘Babeleka Hamoho ni Luna Kuli Lube ni Tabo’” (Tawala ya Mulibeleli, January 15, 2013)

1. Bibele ifa kelezo mañi kwa baana babanyezi?

Jehova ufile muuna yanyezi buikalabelo bwa kuba toho ya lubasi. (Mubale Maefese 5:23.) Jehova ubata kuli muuna yanyezi aezange likatulo zende zetusa lubasi lwahae. Bibele ibulelela baana kaufela babanyezi kuli: “Muzwelepili kulata basali bamina.” (Maefese 5:25) Taba yeo italusañi? Muuna yalata musalaa hae upilisananga hande ni yena ibe fa lapa kamba habali mwahalaa babañwi. Ubonanga teñi kuli wasileleza musalaa hae kwa lika zemaswe ni kumubabalela kwa mubili ni mwa maikuto. (1 Timotea 5:8) Mi sa butokwa ni kufita, utusanga musalaa hae kuba ni silikani sesinde ni Mulimu. (Mateu 4:4) Ka mutala, wakona kulapela ni kubala Bibele ni musalaa hae. Kuli muuna yanyezi azwelepili kuba ni silikani sesitiile ni Jehova, uswanela kubabalela ni kulata hahulu musalaa hae.—Mubale 1 Pitrosi 3:7.

Jesu ki yena Toho ya puteho ya Sikreste. (Maefese 5:23) Kacenu, Jesu uetelela balateleli bahae kuzwelela kwa lihalimu ka kuitusisa “mutanga yasepahala yanani kutwisiso.” (Mubale Mateu 24:45.) Nihaike kuli “mutanga” yo uketilwe ki Jesu kasibili mi ufilwe maata amañwi, usali mutangaa Kreste mi usebeleza banyani ba Kreste. Ki mañi mutanga yo? Mi ulubabalela cwañi?