Kana Mulimu U Mwa Sibaka sa Pili mwa Lubasi lwa Mina?

“Lata [Jehova, NW] Mulimu wa hao ka pilu ya hao kaufela.”—MAREKA 12:29, 30.

1. Ki kwa butokwa cwañi kuli lu late Jehova?

“KWA milao kaufela, o kwapili ki ufi?” muluti n’a buzize Jesu cwalo. Mwa sibaka sa ku fa muhupulo wa hae tota, Jesu n’a alabile puzo ya hae ka ku ama kwa Linzwi la Mulimu kwa Deuteronoma 6:4, 5. N’a alabile kuli: “Wa pili ki wo: Teeleza Isilaele, [Jehova, NW] Mulimu wa luna ki Yena [Jehova, NW] a nosi; Lata Jehova Mulimu wa hao ka pilu ya hao kaufela, ni ka [moyo] wa hao kaufela, ni ka kutwisiso ya hao kaufela, ni ka mata a hao kaufela.”—Mareka 12:28-30.

2. (a) Ki twaniso ifi yeo Jesu n’a na ni ku talimana ni yona? (b) Ki sifi se ne si ka tatafalisa ku tabisa Jehova ka linako ze ñwi?

² Ku ipeya ku utwa mulao w’o Jesu n’a u bizize wa pili—wa butokwa ka ku fitisisa—ku tokwa kuli kamita lu eze se si tabisa Jehova. Jesu n’a ezize cwalo, nihaike kuli ka nako ye ñwi muapositola Pitrosi n’a nyazize nzila ya Jesu, mi ka nako ye ñwi hape bahabo yena luli ni bona ne ba ezize cwalo. (Mateu 16:21-23; Mareka 3:21; Joani 8:29) Ku cwañi haiba mu ipumana mwa muinelo o swana? Lu bulele kuli lilama za lubasi ba mi bata kuli mu tuhele tuto ya mina ya Bibele ni swalisano ya mina ni Lipaki za Jehova. Kana mu ka beya Mulimu mwa sibaka sa pili ka ku eza se si mu tabisa? Kana Mulimu u mwa sibaka sa pili, mane nihaiba lilama za lubasi ne ba kana ba lwanisa buikatazo bwa mina bwa ku mu sebeleza?

Siteo sa Twaniso ya Lubasi

3. (a) Ki sifi se ne si kana sa zwa mwa lituto za Jesu kwa lubasi? (b) Lilama za lubasi ba kona ku bonisa cwañi yo ba lata hahulu?

³ Jesu n’a si ka keshebisa butata bo bu kana bwa taha muta ba bañwi mwa lubasi ba lwanisa silama se si amuhela lituto za hae. Jesu n’a ize: “Lila za mutu ikaba ba ndu ya hae.” Niteñi, ku si na taba ni se si swabisa seo se si zwa mwateñi, Jesu n’a bonisize ya swanela ku ba mwa sibaka sa pili ka ku bulela kuli: “Ya lata ndat’ahe, kamba m’ahe ku fita mw’a ni latela, h’a ni swaneli; ya lata mwan’a hae wa mushimani kamba wa musizana ku fita mw’a ni latela, h’a ni swaneli.” (Mateu 10:34-37) Lu beya Jehova mwa sibaka sa pili ka ku latelela lituto za Mwan’a hae, Jesu Kreste, y’o a li “siswaniso sa se [Mulimu] A li sona.”—Maheberu 1:3; Joani 14:9.

4. (a) Ki sifi sa n’a bulezi Jesu kuli ki se si amilwe mwa ku ba mulateleli wa hae? (b) Ki ka muhupulo mañi Bakreste ba lukela ku toya lilama za lubasi?

⁴ Ka nako ye ñwi Jesu ha n’a buhisana se si amiwa luli mwa ku ba mulateleli wa niti, n’a bulezi kuli: “Mutu h’a taha ku na, a sa toyi ndat’ahe ni m’ahe, ni musal’a hae, ni bana ba hae, ni banabahabo ni likaizeli, a sa toyi mane bupilo bwa hae, h’a koni ku ba mulutiwa wa ka.” (Luka 14:26) Ka mo ku inezi fela Jesu n’a sa talusi kuli balateleli ba hae ba swanela ku toya luli lilama za lubasi lwa bona, kakuli n’a laezi batu kuli ba late nihaiba lila za bona. (Mateu 5:44) Ka ku fapahana, Jesu fa n’a talusa kuli balateleli ba hae ba lukela ku lata Mulimu hahulu ku fita mo ba latela lilama za lubasi. (Mu bapanye Mateu 6:24.) Ka ku lumelelana ni kutwisiso yeo, Bibele i bulela kuli Jakobo n’a “toile” Lea ni ku lata Rahele, ili nto ye talusa kuli n’a sa lati Lea hahulu sina mwa n’a latela munyan’a hae, Rahele. (Genese 29:30-32, NW) Mane nihaiba “bupilo” bwa luna ka sibili, Jesu n’a ize, bu swanelwa ku toiwa, kamba ku latiwa hanyinyani, ka ku fitiwa ki mo lu latela Jehova!

5. Satani ka mano u itusisa maswe cwañi tukiso ya lubasi?

⁵ Ka ku ba Mubupi ni Mufi-wa-Bupilo, Jehova u swanelwa ki buipeyo bo bu tezi ku zwelela kwa batanga ba hae kaufela. (Sinulo 4:11) “Ni kubama ka mañwele fapil’a Ndate,” ki mwa n’a ñolezi muapositola Paulusi, “ye ka Yena ku shikulwa lusika ni lusika lo lu li teñi mwa lihalimu ni mwa lifasi.” (Maefese 3:14, 15) Jehova n’a tahisize tukiso ya lubasi ka nzila ye makalisa hahulu kuli lilama za lubasi ba be ni lilato la ka taho yo muñwi ku yo muñwi. (1 Malena 3:25, 26; 1 Matesalonika 2:7) Nihakulicwalo, Satani Diabulosi ka mano u itusisa maswe lona lilato la mwa lubasi leo la ka taho, le li kopanyeleza takazo ya ku tabisa balatiwa. U tiisa twaniso ya lubasi, mi ba bañata ba fumana kuli ku yema ka ku tiya kwa lineku la niti ya Bibele ha ba talimana ni twaniso yeo ki likulutendano luli.—Sinulo 12:9, 12.

Ku Talimana Hande ni Likulutendano

6, 7. (a) Lilama za lubasi ba konwa ku tusiwa cwañi ku itebuha butokwa bwa tuto ya Bibele ni swalisano ya Sikreste? (b) Lu kona ku bonisa cwañi kuli ka buniti luli lu lata lilama za lubasi lwa luna?

⁶ Ki sifi se mu ka eza haiba mu hapelezwa ku eza keto mwahal’a ku tabisa Mulimu kamba ku tabisa silama sa lubasi? Kana mu ka ipatela mabaka a ku itahiseza ku lumela kuli Mulimu ha libeleli kuli lu itute Linzwi la hae ni ku sebelisa likuka za lona haiba ku eza cwalo ku tahisa lifapahano mwa lubasi? Kono mu nahane ka za seo. Haiba mu palelwa ni ku tuhela tuto ya mina ya Bibele kamba swalisano ya mina ni Lipaki za Jehova, balatiwa ba mina ba ka fita cwañi fa ku utwisisa kuli zibo ye nepahezi ya Bibele ki taba ye ama bupilo kamba lifu?—Joani 17:3; 2 Matesalonika 1:6-8.

⁷ Ne lu kana lwa swaniseza cwana muinelo wo: Mwendi silama sa lubasi u lata bucwala ka ku tula tikanyo. Kana ku sa isa pilu kamba ku tuhelela butata bwa hae bwa ku nwa hahulu ku ka mu tusa luli? Kana ne ku ka ba hande ku buluka kozo ka ku tuhela fela ni ku sa eza se siñwi ka za butata bwa hae? Ku tokwa, mwendi mu lumela kuli ne ku ka ba hande ka ku fitisisa ku lika ku mu tusa ku tula butata bwa hae bwa ku nwa, mane nihaiba seo si ama ku ndumeba mwa ku talimana ni buhali ni mifumbo ya mutu y’o. (Liproverbia 29:25) Ka mukwa o swana, haiba mu lata luli lilama za lubasi lwa mina, ha mu na ku kaulezwa ki buikatazo bwa bona bwa ku mi tuhelisa ku ituta Bibele. (Likezo 5:29) Ki ka ku ba fela ni mayemo a’ tiile f’o ne mu kana mwa ba tusa ku itebuha kuli ku pila ka lituto za Kreste ku ama bupilo bwa luna luli.

8. Lu fumana cwañi tuso kwa taba ya kuli Jesu n’a ezize tato ya Mulimu ka busepahali?

⁸ Ku beya Mulimu mwa sibaka sa pili ne ku kana kwa ba tata hahulu ka linako ze ñwi. Kono mu hupule kuli, Satani hape n’a tahisize kuli ku be ko ku tatafezi kwa neku la Jesu ku eza tato ya Mulimu. Niteñi Jesu ni kamuta n’a si ka tuhela; n’a tiyezi nihaiba butuku bwa kota ya linyando kabakala luna. “Jesu Kreste [ki] Mupilisi wa luna,” ki mo i bulelela Bibele. “Ya lu shwezi.” (Tite 3:6; 1 Matesalonika 5:10) Kana ha lu ba ba tabile kuli Jesu n’a si ka tuheliswa ki twaniso? Bakeñisa kuli n’a tiyezi lifu la sitabelo, lu na ni tibelelo ya bupilo bwa kamita mwa lifasi le linca la kozo ili la ku luka ka ku bonisa tumelo mwa mali a hae a’ suluzwi.—Joani 3:16, 36; Sinulo 21:3, 4.

Mupuzo o Mutuna o Kona ku Ba Teñi

9. (a) Bakreste ba kona ku abana cwañi mwa ku pilisa ba bañwi? (b) Ki ufi o ne u li muinelo wa lubasi lwa habo Timotea?

⁹ Kana mu lemuhile kuli ni mina hape mwa kona ku ba ni kabelo mwa ku pilisa ba bañwi, ku kopanyeleza cwalo ni bahabo mina bao mu lata hahulu? Muapositola Paulusi n’a susuelize Timotea kuli: “U tundamene mwateñi. Kakuli ha u eza cwalo u ka ipilisa, u pilise ni ba ba ku utwa.” (1 Timotea 4:16) Timotea n’a pila mwa lapa le li aluhani, kakuli bondat’ahe ba Magerike ne ba si balumeli. (Likezo 16:1; 2 Timotea 1:5; 3:14) Nihaike kuli ha lu zibi haiba bondat’ahe Timotea ne ba fitile fa ku ba balumeli ka nako ye ñwi, ku konahala kwa kuli ne ba kana ba fitile fa ku ba cwalo ne ku tiisizwe hahulu ki muzamao wa ka busepahali wa musal’a bona, Eunise, ni wa Timotea.

10. Ki sifi seo Bakreste ba kona ku ezeza bosinyalana ni bona ba ba sa lumeli?

¹⁰ Mañolo a patulula kuli banna ni basali ba ba mwa linyalo ba ba yemela niti ya Bibele ka ku tiya ba kona ku peta se siñwi mwa ku pilisa bosinyalana ni bona ba ba si Bakreste ka ku ba tusa ku fita fa ku ba balumeli. Muapositola Paulusi n’a ñozi kuli: “Mulumeli h’a na ni musali ya sa lumeli, mi ili ya lata ku ina ni yena, a si ke a mu leleka. Mi musali h’a na ni munna ya sa lumeli, mi yo a lata ku ina ni yena, a si ke a hana munn’a hae. Kakuli wena musali, u zibañi, nji u ka pilisa munn’a hao? Ni wena munna, u zibañi, nji u ka pilisa musal’a hao?” (1 Makorinte 7:12, 13, 16) Muapositola Pitrosi n’a talusize ka m’o basali, kacwalo, ba konela ku pilisa banna ba bona, a susueza kuli: “Mu ipeye kwatas’a banna ba mina, kuli ba bañwi ha ba ka ba teñi ba ba sa lumeli, ba koliswe ki mizamao ya basali ba bona, ku si na manzwi a’ bulelwa.”—1 Pitrosi 3:1.

11, 12. (a) Ki mupuzo ufi w’o Bakreste ba ba eza likiti-kiti se ba amuhezi, mi ki sifi se ne ba ezize kuli ba u fumane? (b) Mu kandeke se si bonwi sa silama sa lubasi ya n’a fumani mupuzo wa buitiiso bwa ka ku sepahala.

¹¹ Mwa lilimo za cwanoñu fa likiti-kiti ba bañata ba fitile fa ku ba Lipaki za Jehova hamulaho wa likweli mi nihaiba lilimo za ku lwanisa misebezi ya Sikreste ya bahaho bona ba ba li Lipaki. Seo ki mupuzo o mutuna hakalo kwa Bakreste ba ba sepahalile ka ku tiya, mi si bile mbuyoti hakalo ku bao ne ba li balwanisi ka nako ye ñwi! Ka ku ba ni maikuto mwa linzwi la hae, eluda yo muñwi wa Sikreste wa lilimo za buhulu ze 74 n’a kandekile kuli: “Hañata ni itumela ku musal’a ka ni bana ba ka ka ku kumalela kwa niti mwahal’a lilimo ze ne ni ba lwanisa.” N’a bulezi kuli ka lilimo ze talu ka mañaña n’a hanile nihaiba ku lumeleza musal’a hae ku bulela ku yena ka za Bibele. “Kono n’a itusisize temuho ya za munahano ku na,” ki mwa bulelela, “mi n’a kalisize ku fa bupaki ku na ha nze a kwakula mahutu a ka. Ni ya itumela hakalo kuli n’a si ka tuhela kabakala la twaniso ya ka!”

¹² Munna yo muñwi ya n’a lwanisize lubasi lwa hae n’a ñozi kuli: ‘Ne ni li sila se si maswe ka ku fitisisa sa musal’a ka kakuli ha s’a itutile niti, ne ni mu bemba, mi ne lu omana ka zazi; f’o kikuli, kamita ki na ya n’a kalisa komano. Kono zeo kaufela ne li si ka peta se siñwi; musal’a ka n’a kumalezi kwa Bibele. Lilimo ze 12 ne li fitile cwalo mwa twaniso ya ka ye buhali kwa niti ni ku musal’a ka ni mwan’a ka. Ku ba babeli bao, ne ni li sina Diabulosi yena ka sibili.’ Kwa nalulelule munna y’o a kalisa ku tatuba bupilo bwa hae. ‘Ne ni boni kuli ne ni li sikatazi,’ ki mwa n’a taluselize. ‘Ne ni balile Bibele, mi ka tuso ya litaelo za yona, cwale se ni li Paki ya kolobelizwe.’ Mu nahane ka za mupuzo o mutuna wa musal’a hae, ee, ku fita fa ku tusa ku ‘pilisa munn’a hae’ ka ku tiyela ka busepahali twaniso ya hae ka lilimo ze 12!

Ku Ituta ku Jesu

13. (a) Ki ifi tuto ye tuna yeo banna ni basali ba ba mwa linyalo ba swanela ku ituta yona kwa nzila ya bupilo bwa Jesu? (b) Batu ba ba fumana t’ata ku ipeya kwatas’a tato ya Mulimu ba kona ku fumana cwañi tuso kwa mutala wa Jesu?

¹³ Tuto ye tuna yeo banna ni basali ba ba mwa linyalo ba swanela ku ituta kwa nzila ya bupilo bwa Jesu ki ya ku ipeya ku utwa Mulimu. “Kamita ni eza ze mu tabisa,” ki mwa n’a bulelezi Jesu. “Ha ni ezi se si latwa ki na, kono ni eza se si latwa ki Ndate ya ni lumile.” (Joani 5:30; 8:29) Mane ni muta Jesu n’a fumana kalulo ye ñwi ya tato ya Mulimu ku ba ye sa tabisi, n’a ipeya ku utwa. N’a lapezi kuli: “Kabe u ka lata ku sutisa sinwiso seo ku na.” Kono kapili-pili n’a ekelize kuli: “Kono ku si ke kwa ezwa se si latwa ki na, ku ezwe se si latwa ki Wena.” (Luka 22:42) Jesu n’a si ka kupa Mulimu ku cinca tato ya Hae; n’a bonisize kuli n’a lata luli Mulimu ka ku ipeya kwatas’a miinelo ifi kamba ifi ye ne i li tato ya Mulimu kwa neku la hae. (1 Joani 5:3) Ku beya tato ya Mulimu mwa sibaka sa pili kamita, sina mwa n’a ezelize Jesu, ki kwa butokwa hahulu mwa ku kondisa lika isiñi fela mwa bupilo bwa sikwasha kono hape ni mwa bupilo bwa linyalo ni bwa lubasi. Mu nyakisise libaka seo ha si li cwalo.

14. Bakreste ba bañwi ba nahana cwañi ka ku sa swanela?

¹⁴ Sina ha se ku bonwi, balumeli ha ba beya Mulimu mwa sibaka sa pili, ba bata ku siyala ni bosinyalana ni bona ba ba si balumeli mi hañata ba kona ku ba tusa ku fita fa ku konwa ku piliswa. Nihaiba kuli bubeli bwa bosinyalana ki balumeli, linyalo la bona ne li kana li si le li petehile. Bakeñisa litengamo za buezalibi, banna ni basali ba ba mwa linyalo haki kamita ba ba ni mihupulo ye lilato yo muñwi ku yo muñwi. (Maroma 7:19, 20; 1 Makorinte 7:28) Ba bañwi mane ba fitanga fa sipimo sa ku bata sinyalana ni yena u sili, niha ba si na mutomo wa mwa Mañolo wa telekano. (Mateu 19:9; Maheberu 13:4) Ba nahana kuli seo ki sona se sinde ka ku fitisisa ku bona, kuli tato ya Mulimu ya kuli banna ni basali ba ba mwa linyalo ba zwelepili ku pila hamoho ki ye t’ata hahulu. (Malaki 2:16; Mateu 19:5, 6) Ku si na kakanyo wo ki muinelo o muñwi wa ku nahana mihupulo ya batu mwa sibaka sa yeo ya Mulimu.

15. Ki kabakalañi ku beya Mulimu mwa sibaka sa pili ha ku li silelezo?

¹⁵ Ku beya Mulimu mwa sibaka sa pili ki silelezo hakalo! Bosinyalana ba ba eza cwalo ba ka lika ku pila hamoho ni ku tatulula butata bwa bona ka ku sebelisa kelezo ya Linzwi la Mulimu. Kacwalo ba pima masitapilu kamukana a’ taha muta tato ya hae i sa isiwi pilu. (Samu 19:7-11) Seo si swaniselizwe ki bosinyalana ba banca bao, ha ne ba li bukaufi ni telekano ne ba ikatulezi ku latelela kelezo ya Bibele. Ha ku fitile lilimo-limo musali ha n’a nahanile ka za tabo yeo n’a se a bile ni yona mwa linyalo la hae, n’a bulezi kuli: “Ni ina fafasi ni ku lila ha ni nyakisisa taba ya kuli ne ni ka be ni pilile bupilo bwa ka ni kauhani ni munn’a ka mwa lilimo ze kaufela. Cwale n’a lapela ku Jehova Mulimu ni ku itumela ku yena kabakala kelezo ni ketelelo ya hae ye ne i lu tisize hamoho mwa swalisano ye tabisa cwalo.”

Banna, Basali—Mu Likanyise Kreste!

16. Ki mutala ufi w’o Jesu n’a tomezi banna hamohocwalo ni basali ba ba mwa linyalo?

¹⁶ Jesu, y’o kamita n’a beya Mulimu mwa sibaka sa pili, n’a tomezi banna hamohocwalo ni basali ba ba mwa linyalo mutala o munde hahulu, mi ba eza hande ha ne ba ka u fa mamelelo ya ka tokomelo. Banna ba susuezwa ku likanyisa nzila yeo Jesu a sebelisa ka yona butoho bo bu lilato fahalimu a lilama za puteho ya Sikreste. (Maefese 5:23) Mi basali ba Sikreste ba kona ku ituta kwa mutala wa Jesu o si na koli wa ku ipeya kwatas’a Mulimu.—1 Makorinte 11:3.

17, 18. Jesu n’a tomezi banna mutala o munde ka linzila lifi?

¹⁷ Bibele i laela kuli: “Banna, mu late basali ba mina, sina Kreste mw’a latezi Keleke mi a itobohile bakeñisa yona.” (Maefese 5:25) Nzila ya butokwa yeo Jesu n’a bonisize ka yona lilato la hae kwa puteho ya hae ya balateleli ne li ka ku ba mulikan’a bona yo mutuna. Jesu n’a bulezi kuli: “Ni mi biza balikani, kakuli ni mi zibisize ze ni utwile kaufela ku Ndate.” (Joani 15:15) Mu nahane ka za nako kaufela yeo Jesu n’a sebelisize mwa ku ambola ni balutiwa ba hae—lipuhisano ze ñata-ñata za n’a bile ni zona ni bona—ni ka za buikolwiso bwa n’a na ni bona ku bona! Kana wo haki mutala o munde hahulu kwa banna?

¹⁸ Jesu n’a bile ni cisehelo luli kwa balutiwa ba hae mi n’a na ni lilato le li buniti ku bona. (Joani 13:1) Lituto za hae ha ne li si ka utwahala ku bona, ka pilu-telele n’a bile ni nako ya ku utwahaza litaba kwa mukunda. (Mateu 13:36-43) Banna, kana buiketo bwa kwa moya bwa musal’a mina ki bwa butokwa bo bu swana ku mina? Kana mwa b’a nga ni nako ye ñwi ya ku ba ni yena, ili ku ikolwisa kuli bubeli bwa mina mu beile liniti za Bibele mwa munahano ni mwa pilu ka ku utwahala? Jesu n’a y’a nga ni baapositola ba hae mwa bukombwa, mwendi ili ku twaeza yo muñwi ni yo muñwi wa bona ka buñwi. Kana mwa y’a nga ni musal’a mina mwa bukombwa, ku abana mwa ku pota kwa fa ndu ni ndu ni mwa ku zamaisa lituto za Bibele?

19. Nzila yeo Jesu n’a sebelisani ka yona ni bufokoli bo bu kuta-kutelwa bwa baapositola ba hae i tomela cwañi banna mutala?

¹⁹ Sihulu ne li mwa ku sebelisana ni ku sa petahala kwa baapositola ba hae m’o Jesu n’a file mutala wa sipimo se si pahami kwa banna. Mwahal’a sico sa hae sa mafelelezo ni baapositola ba hae, n’a kona ku lemuha moya o ne u kuta-kutelwa wa kangisano. Kana n’a ba nyazize ka buhali? Ku tokwa, kono ka buikokobezo n’a tapisize mahutu a yo muñwi ni yo muñwi. (Mareka 9:33-37; 10:35-45; Joani 13:2-17) Kana mwa bonisanga pilu-telele ye cwalo ku musal’a mina? Mwa sibaka sa ku bilaela ka za bufokoli bo bu sweli ku kuta-kutelwa, kana ka pilu-telele mwa lika ku mu tusa ni ku fita kwa pilu ya hae ka mutala wa mina? Basali ne ba kana b’a nga muhato kwa mufelañeke o lilato cwalo, sina mo ne ba ezelize baapositola kwa nalulelule.

20. Ki sifi seo basali ba Sikreste ba sa swaneli ku libala ni kamuta, mi ki mañi ya filwe sina mutala ku bona?

²⁰ Basali ni bona ba tokwa ku nyakisisa Jesu, ili y’o ni kamuta n’a si ka libala kuli “Mulimu ki toho ya Kreste.” N’a ipeya kamita kwatas’a Ndat’ahe wa kwa lihalimu. Ka ku swana, basali ha ba swaneli ku libala kuli “munna ki toho ya musali,” ee, kuli munn’a bona ki toho ya bona. (1 Makorinte 11:3; Maefese 5:23) Muapositola Pitrosi n’a susuelize basali ba Sikreste ku nyakisisa mutala wa “basali ba ba kenile” ba mwa linako za kwa makalelo, sihulu wa Sara, ili y’o “n’a utwa Abrahama, mi a mu biza mulen’a hae.”—1 Pitrosi 3:5, 6.

21. Ki kabakalañi linyalo la Abrahama ni Sara ha ne li kondile hailif’o la Lota ni musal’a hae ne li palile?

²¹ Ka mo ku bonahalela fela Sara n’a siile ndu ya mbombolelwa mwa muleneñi o’ fumile kuli a yo pila mwa litende mwa naha i sili. Kabakalañi? Kana ki ka libaka la kuli n’a lata mupilelo w’o? Ha ku koni ku ba cwalo. Kana ki ka libaka la kuli munn’a hae n’a mu kupile ku ya ni yena? Ku si na kakanyo seo ne si petile kalulo ye ñwi, bakeñisa kuli Sara n’a lata ni ku kuteka Abrahama kabakala tulemeno twa hae twa silumeli. (Genese 18:12) Kono libaka le lituna ha n’a ile ni munn’a hae ne li lilato la hae ku Jehova ni takazo ya hae ye tuna ya ku latelela ketelelo ya Mulimu. (Genese 12:1) N’a tabiswa ki ku ipeya ku utwa Mulimu. Musal’a Lota, kwa lineku le liñwi, n’a kata-katile ku eza tato ya Mulimu mi kacwalo n’a itemuzi ka ku lakaza lika ze ne li siilwe mwa munzi wahabo wa Sodoma. (Genese 19:15, 25, 26; Luka 17:32) Linyalo leo ne li fitile fa mafelelezo a maswe cwañi—zeo kaufela ili kabakala ku sa ipeya ku utwa Mulimu kwa musali y’o!

22. (a) Ki ku itatuba kufi k’o lilama za lubasi ba ka eza ka butali? (b) Ki sifi se lu ka nyakisisa mwa tuto ya luna ye tatama?

²² Kacwalo ka ku ba munna kamba musali ya mwa linyalo, ki kwa butokwa ku ipuza kuli, ‘Kana Mulimu u mwa sibaka sa pili mwa lubasi lwa luna? Kana ka buniti fela ni lika ka t’ata ku taleleza kalulo ya mwa lubasi yeo Mulimu a ni file? Kana ni eza buikatazo bo bu buniti bwa ku lata sinyalana ni na ni ku mu tusa ku fumana ni ku buluka swalisano ye nde ni Jehova?’ Mwa mabasi a mañata hape ku na ni banana. Se si tatama se lu ka nyakisisa ki kalulo ya bashemi ni tokwahalo ya kuli bona hamohocwalo ni bana ba bona ba beye Mulimu mwa sibaka sa pili.

Kana Mwa Hupula?

◻ Ki sifi se ne si kana sa zwa mwa lituto za Jesu kwa mabasi a mañata?

◻ Ki mupuzo ufi w’o Bakreste ba ba na ni tundamo ba ba eza likiti-kiti ba fumani?

◻ Ki sifi se si ka tusa bosinyalana ku pima muzamao o maswe ni telekano?

◻ Ki sifi seo banna ba kona ku ituta kwa mutala wa Jesu?

◻ Basali ba kona ku peta cwañi kalulo ye ñwi kwa linyalo le li na ni tabo?

[Siswaniso se si fa likepe 7]

Sara n’a petile cwañi kalulo ye ñwi mwa ku konda kwa linyalo la hae?