TUTO 49
Ki Lika Mañi Zekona Kumitusa Kuba ni Tabo Mwa Lubasi?—Kalulo 1
Batu babasazo nyalana babatanga kuli tabo yene babile ni yona lizazi lebanyalana izwelepili. Mi nto yeo yakonahala luli. Bakreste base banyalani ka nako yetelele ili babazwezipili kusebelisa zeibulela Bibele, baziba kuli kwakonahala kuzwelapili kuba ni tabo mwa lubasi.
1. Bibele ifa kelezo mañi kwa baana babanyezi?
Jehova ufile muuna yanyezi buikalabelo bwa kuba toho ya lubasi. (Mubale Maefese 5:23.) Jehova ubata kuli muuna yanyezi aezange likatulo zende zetusa lubasi lwahae. Bibele ibulelela baana kaufela babanyezi kuli: “Muzwelepili kulata basali bamina.” (Maefese 5:25) Taba yeo italusañi? Muuna yalata musalaa hae upilisananga hande ni yena ibe fa lapa kamba habali mwahalaa babañwi. Ubonanga teñi kuli wasileleza musalaa hae kwa lika zemaswe ni kumubabalela kwa mubili ni mwa maikuto. (1 Timotea 5:8) Mi sa butokwa ni kufita, utusanga musalaa hae kuba ni silikani sesinde ni Mulimu. (Mateu 4:4) Ka mutala, wakona kulapela ni kubala Bibele ni musalaa hae. Kuli muuna yanyezi azwelepili kuba ni silikani sesitiile ni Jehova, uswanela kubabalela ni kulata hahulu musalaa hae.—Mubale 1 Pitrosi 3:7.
2. Bibele ifa kelezo mañi kwa basali babanyezwi?
Linzwi la Mulimu libulela kuli musali yanyezwi “uswanela kukuteka hahulu muunaa hae.” (Maefese 5:33) Kono ukona kueza cwañi cwalo? Musali yanyezwi wakona kuitebuha mikwa yeminde ya muunaa hae ni buikatazo bwaeza bwa kubabalela lubasi kaufela. Hape uswanela kukuteka muunaa hae ka kuyemela likatulo zaeza ni kuambola hande ni yena mane ni kubulela zende ka za hae ku babañwi nihaikaba kuli muunaa hae haki Mukreste.
3. Ki lika mañi zebaswanela kueza batu babanyalani kuli batiise linyalo labona?
Bibele ibulela cwana ka za babanyalani: “Bubeli bwabona bakaba nama iliñwi.” (Mateu 19:5) Taba yeo italusa kuli baswanela kueza mobakonela kaufela kuli bazwelepili kuba hamoho. Muuna ni musali babanyalani baswanela kutandanga nako hamoho mi hape baswanela kulukuluha kutalusezana mobaikutwela. Baanga Jehova kuba wa butokwa mwa bupilo bwabona kufita nto ifi kamba ifi. Hape batu babanyalani baswanela kutokomela kuli habaezi hahulu silikani ni mutu yebasika nyalana ni yena.
MUBATISISE
Munyakisise likuka za mwa Bibele zekona kumitusa kutiisa linyalo lamina.
4. Baana babanyezi—mulate ni kubabalela basali bamina
Bibele ibulela kuli “baana baswanela kulata basali babona sina mobalatela mibili yabona.” (Maefese 5:28, 29) Taba yeo italusañi? Mubuhe VIDIO, mi kihona mukanyakisisa puzo yelatelela.
Muuna yanyezi ukona kubonisa cwañi kuli walata ni kubabalela musalaa hae?
Mubale Makolose 3:12, mi kihona mukanyakisisa puzo yelatelela:
Muuna yanyezi ukona kubonisa cwañi tulemeno to mwa linyalo?
5. Basali babanyezwi—mulate ni kukuteka baana bamina
Bibele isusueza musali yanyezwi kukuteka muunaa hae kusina taba kuli muuna yo wasebeleza Jehova kamba kutokwa. Mubale 1 Pitrosi 3:1, 2, mi kihona mukanyakisisa lipuzo zelatelela:
Haiba munyezwi ki muuna yasalapeli Jehova, mwendi mubata kuli bo muunaa mina basebeleze Jehova. Munahana kuli ki lika mañi zekona kutusa bo muunaa mina—kana ki kukutaza ku bona kamita kamba ki kubabonisa tulemeno totunde ni kubakuteka? Ki kabakalañi hamualaba cwalo?
Muuna ni musali babanyalani bakona kuezanga likatulo zende hamoho. Nihakulicwalo, ka linako zeñwi musali yanyezwi wakona kuba ni mubonelo oshutana ni wa muunaa wahae mwa litaba zeñwi. Mwa muinelo ocwalo, musali yanyezwi uswanela kufitisa maikuto ahae inze awile pilu ni ka likute, inze ahupula kuli Jehova ufile muunaa hae buikalabelo bwa kuezeza lubasi likatulo. Kacwalo, musali yanyezwi uswanela kueza mwakonela kaufela kuyemela likatulo za muunaa hae. Mi kueza cwalo kukatahisa kuli mwa lubasi kube ni tabo. Mubale 1 Pitrosi 3:3-5, mi kihona mukanyakisisa puzo yelatelela:
Jehova uikutwa cwañi musali yanyezwi hakuteka muunaa hae?
6. Mwakona kutiyela miinelo yetaata mwa linyalo
Batu babanyalani habasika petahala. Kacwalo, batu babanyalani baswanela kuswalisana hamoho kuli batiyele miinelo yetaata. Mubuhe VIDIO, mi kihona mukanyakisisa lipuzo zelatelela.
Ka kuya ka vidio yemubuhile, ki lika mañi zenebonisa kuli bo Shane ni bo Kiara nebasa swalisani mwa linyalo labona?
Ki lika mañi zene baezize kuli batiise linyalo labona?
Mubale 1 Makorinte 10:24 ni Makolose 3:13. Hamulaho wa kubala liñolo ni liñolo, munyakisise puzo yelatelela:
Kusebelisa kelezo ye, kukona kutiisa cwañi linyalo?
Bibele ibulela kuli luswanela kubonisana likute. Kubonisa yomuñwi likute kukopanyeleza kupilisana ni yena hande ni ka likute. Mubale Maroma 12:10, mi kihona mukanyakisisa lipuzo zelatelela:
Kana baana babanyezi kamba basali babanyezwi baswanela kulibelelanga kuli bakubona bababonise likute pili kona ni bona baka babonisa likute? Ki kabakalañi hamualaba cwalo?
BABAÑWI BABULELANGA KULI: “Na ni bakuluna halusa utwana inge kwamulaho.”
Mukona kutaluseza cwañi batu babacwalo kuli Bibele yakona kubatusa?
LITABA KA BUKUSWANI
Muuna ni musali babanyalani bakona kuba ni tabo haiba balatana, babonisana likute, ni kusebelisa likuka za mwa Bibele.
Mulundulule
Ki lika mañi zaswanela kueza muuna yanyezi kuli mwa linyalo kube ni tabo?
Ki lika mañi zaswanela kueza musali yanyezwi kuli mwa linyalo kube ni tabo?
Haiba mu mwa linyalo, ki sikuka sifi sa mwa Bibele sesikona kutiisa linyalo lamina?
MUBONE LITABA ZEÑWI
Munyakisise zemukona kueza kuli muikole bupilo mwa lubasi lwamina.
Mubuhe pina yebonisa bunde bwa kusebelisa likuka za Mulimu mwa linyalo.
Munyakisise zatokwa kueza musali kuli akuteke muunaa hae ka kuba toho ya lubasi.
“Basali, ki Kabakalañi Hamuswanela Kuipeya Kwatasi?” (Tawala ya Mulibeleli, May 15, 2010)
Mubone mo Bibele ituselize batu babañwi kukondisa mwa linyalo.