Mubupi Waluna Ulufa Butali Kuli Lube ni Tabo Mwa Lubasi

Baana, Mulate Basali Bamina

“Baana baswanela kulata basali babona sina mobalatela mibili yabona. Muuna yalata musalaa hae waitata ili yena, kakuli hakuna muuna yakile atoya mubili wahae, kono waufepa ni kuukatelwa.”—MAEFESE 5:28, 29.

Muuna ki yena toho ya lubasi lwahae. (Maefese 5:23) Kono muuna yomunde haki ya buhali kamba yabata kuli lika kaufela zabata lieziwe. Uunga musalaa hae kuba wa butokwa mi wamubabalela kwa mubili ni mwa maikuto. Hape walikanga kueza lika zetabisa musalaa hae mi haabatangi kueza feela zalata. (Mafilipi 2:4) Utalusezanga musalaa hae ka kulukuluha mwaikutwela ni lika zanahana, mi wateelezanga ku zabulela musalaa hae. Habonisangi “buhali bobutuna” ku musalaa hae kamba kumuutwisa butuka kwa mubili kamba kuitusisa lipulelo zemaswe kuyena.—Makolose 3:19.

Basali, Mukuteke Baana Bamina

“Musali yena uswanela kukuteka hahulu muunaa hae.”—MAEFESE 5:33.

Haiba musali akuteka muunaa hae ni kuyemela likatulo zahae, ukatahisa kuli mwa lubasi kube ni kozo yetuna. Haiba muunaa hae aeza mafosisa, ukazwelapili kuwa pilu ni kubonisa likute. (1 Pitrosi 3:4) Habata kuikambota ni muunaa hae ka za butata bobuñwi, uketanga nako yeswanela mi uambolanga ka likute.—Muekelesia 3:7.

Musepahale ku Bakumina

“Muuna . . . ukakumalela musalaa hae, mi bakaba nama iliñwi.”—GENESE 2:24.

Muuna ni musali habanyalana, baba balikani babatuna. Kacwalo, batu babanyalani baswanela kutiisa linyalo labona ka kuikambotanga kamita kuzwelela kwapilu ni kubonisana sishemo nihaiba ka kuezezana lika zenyinyani. Hape baswanela kusepahala yomuñwi ku yomuñwi ka kusaeza somano ni mutu yebasika nyalana ni yena. Mutu yasasepahali uka utwisa hahulu butuku yanyalani ni yena. Kusa sepahala kutahisa kuli mutu asike asepiwa mi kufelisa swalisano mwa lubasi.—Maheberu 13:4.

Bashemi, Mulute Bana Bamina

“Luta mwana nzila yaswanela kuzamaya ku yona; nihaka supala haana kukeluha ku yona.”—LIPROVERBIA 22:6.

Mulimu ufile bashemi buikalabelo bwa kuluta bana babona. Taba yeo ikopanyeleza kuluta bana babona mikwa yeminde ni kubatomela mutala. (Deuteronoma 6:6, 7) Haiba mwana abonisa mikwa yemaswe, mushemi yabutali hana kuhalifa hahulu. Mushemi yacwalo ki “yaakufa kuteeleza, yasaakufi kubulela, yasaakufi kuhalifa.” (Jakobo 1:19) Haiba mushemi alemuha kuli uswanela kukalimela mwanaa hae, ukaeza cwalo ka lilato, isiñi ka bunyemi.

Bana, Muutwe Bashemi Bamina

“Bana, muutwe bashemi bamina . . . ‘Kuteka ndataho ni maho’”—MAEFESE 6:1, 2.

Bana baswanela kuutwa bashemi babona ni kubakuteka hahulu. Haiba bana bakuteka bashemi babona, bakatahisa tabo fa lapa mi mwa lubasi kukaba ni kozo ni swalisano. Bana babahulile babonisa likute kwa bashemi babona ka kuba babalela. Kueza cwalo kukona kukopanyeleza kulukisa ndu yabona kamba kubatusa ka kubafa masheleñi ebatokwa.—1 Timotea 5:3, 4.