Mu Tahise Musa

“Musa wa mina u zibwe ki batu kamukana. Mulena u fakaufi.”—MAFILIPI 4:5.

1. Ki kabakalañi ku ba ni musa ha ku li likulutendano mwa lifasi la kacenu?

“MUTU ya musa”—Mubihi wa makande wa kwa England Sir Alan Patrick Herbert n’a mu bizize kuli ki wa mwa matangu fela. Ka mo ku inezi fela, ne ku kana kwa bonahala ka linako ze ñwi kuli ha ku na batu ba ba musa ba ba siyezi mwa lifasi le li tezi lifapahano le. Bibele ne i bulezi cimo kuli mwa “mazazi a maungulelo” a’ t’ata a, batu ba k’a ba “buhali,” “matanya,” ni “ni ba ba na ni ñole”—ka mubulelelo o muñwi, ha ba na ku ba ni musa ni hanyinyani. (2 Timotea 3:1-5) Nihakulicwalo, Bakreste ba niti b’a nga musa ka butuna, ka ku ziba kuli ki sisupo sa butali bwa bumulimu. (Jakobo 3:17) Ha lu ikutwi kuli ha ku konahali ku ba ni musa mwa lifasi le li si na musa. Ka ku fapahana, lu amuhela ka ku tala likulutendano le li mwa taelo ye buyelezwi ya muapositola Paulusi ye fumanwa kwa Mafilipi 4:5 y’e li: “Musa wa mina u zibwe ki batu kamukana.”

2. Manzwi a muapositola Paulusi kwa Mafilipi 4:5 a lu tusa cwañi ku bonisisa ka za haiba lu na ni musa?

² Mu lemuhe ka m’o manzwi a Paulusi a lu tuseza ku tatuba ka za haiba lu na ni musa. Haki taba ya ka mo lu iponela isali luna; ki taba ya ka mo ba lu bonela ba bañwi, ya ka mo lu zibahalela. Toloko ya Phillips i toloka timana yeo cwana: “Mu be ni libubo la ku ba ni musa.” Yo muñwi ni yo muñwi wa luna n’a kana a ipuza hande kuli, ‘Ni zibahala cwañi? Kana ni na ni libubo la ku ba y’a musa, y’a sikuluha, ni y’a bunolo? Kamba kana ni zibahala sina y’a s’a hakululwi, y’a nga lika ka ku tula tikanyo, kamba wa toho-t’ata?’

3. (a) Linzwi la Sigerike le li tolokilwe “musa” li talusañi, mi ki kabakalañi kalemeno kao ha ka li ka ka lakazeha? (b) Mukreste n’a kana a ituta cwañi ku ba y’a musa ni ku fita?

³ Libubo la luna ku seo ka bunolo fela li k’a bonisa sipimo seo lu likanyisa Jesu Kreste ka sona. (1 Makorinte 11:1) Ha n’a li fa lifasi-mubu fa, Jesu n’a likanyisize ka ku petahala mutala o’ pahami ka ku fitisisa wa Ndat’ahe wa musa. (Joani 14:9) Ka mo ku inezi fela, Paulusi ha n’a ñozi ka za “musa ni . . . mukekecima wa Kreste,” linzwi la Sigerike la n’a itusisize fa mukekecima (e·pi·ei·kiʹas) hape li talusa “musa” kamba, ka mo li inezi fela, “ku sikululeha.” (2 Makorinte 10:1) The Expositor’s Bible Commentary i biza leo ku ba “le liñwi la manzwi a matuna a tolongosho ya muinelo mwa [Testamente ye Nca].” Li talusa kalemeno ka ka lakazeha hahulu kuli mane c’aziba yo muñwi u toloka linzwi leo sina “musa o nyakalalisa.” Kacwalo, ha lu buhisaneñi linzila ze t’alu zeo Jesu, ka ku swana Ndat’ahe, Jehova, n’a bonisize ka zona musa. Ka seo luna ka sibili ne lu kana lwa ituta ka mwa ku bela ba ba musa ni ku fita.—1 Pitrosi 2:21.

Ku “Lata ku Swalela”

4. Jesu n’a iponahalize cwañi ku ba y’a “lata ku swalela”?

⁴ Ka ku swana Ndat’ahe, Jesu n’a bonisize musa ka ku “lata ku swalela” hape ni hape. (Psalm 86:5) Mu nahane ka za nako yeo Pitrosi, mulikani yo mutuna, n’a yayile Jesu hal’alu fa busihu bwa ku tamiwa ni ku zekiswa kwa Jesu. Jesu yena ka sibili kwa makalelo n’a bulezi kuli: “Mutu kaufela ya ka ni latula kwa batu, ni na, ni ka mu latula ku Ndate.” (Mateu 10:33) Kana Jesu ka ku s’a cinca ni ka ku tokwa mufelañeke n’a sebelisize mulao w’o ku Pitrosi? Ku tokwa; hamulaho wa zuho ya Hae, Jesu n’a potezi Pitrosi ka butu, ku si na kakanyo ili kwa neku la ku omba-omba ni ku tiisa yena muapositola y’o y’a bakile, ya lobehile pilu. (Luka 24:34; 1 Makorinte 15:5) Hamulahonyana wa f’o, Jesu n’a lumelelize Pitrosi ku ba ni buikalabelo bo butuna. (Likezo 2:1-41) Se ne si sebelize ka mukwa o’ ipitezi f’o ne li musa o’ nyakalalisa! Kana haki nto ye omba-omba ku nahana kuli Jehova u ketile Jesu sina Muatuli fahalimu a mufuta wa mutu kaufela?—Isaya 11:1-4; Joani 5:22.

5. (a) Ki libubo mañi leo maeluda ba swanela ku ba ni lona mwahal’a lingu? (b) Ki litaba mañi zeo maeluda ne ba kana ba lundulula pili ba si k’a talima kale litaba za buatuli, mi ki kabakalañi?

⁵ Maeluda ha ba sebeza sina baatuli mwa puteho, ba lika ka t’ata ku latelela mutala wa Jesu o’ musa. Ha ba bati kuli lingu li ba sabe sina bafi ba koto. Ka ku fapahana, ba bata ku likanyisa Jesu ilikuli lingu li ikutwe ku silelezwa ki bona sina balisana ba ba lilato. Mwa litaba za buatuli, ba eza buikatazo kaufela bwa ku ba ba musa, ba ba lata ku swalela. Ba si k’a talima kale taba ye cwalo, maeluda ba bañwi ba fumani kuli ki ko ku tusa ku lundulula litaba za Tora ya ku Libelela ya July 1, 1992, ze li “Jehova, ‘Muatuli wa Lifasi Kaufela’ Ya Si Na Sobozi” ni “Maeluda, Mu Atule ka ku Luka.” Kacwalo ba beya mwa munahano pulelo ye kusufalizwe ya nzila yeo Jehova a atula ka yona: “Ku tiya fo ku swanela, mufelañeke fo ku konahala.” Haki mafosisa ku tengamela kwa ku ba ni makeke mwa katulo ha ku na ni mutomo o’ musa wa ku eza cwalo. (Mateu 12:7) Ki mafosisa a matuna ku eza lika ka ku tula tikanyo kamba ku tokwa mufelañeke. (Ezekiele 34:4) Maeluda kacwalo ba pima ku eza mafosisa ka ku bata ka cisehelo nzila ye lilato, ye mufelañeke ka ku fitisisa y’e konahala mwahal’a litamo za katulo ye lukile.—Mu bapanye Mateu 23:23; Jakobo 2:13.

Ku Kona ku Sikuluha Ha ku Talimanwa ni Miinelo ye Cinca

6. Jesu n’a bonisize cwañi musa mwa ku sebelisana ni musali wa Mulicaba y’o mwan’a hae n’a nyandiswa ki mioya ye maswe?

⁶ Ka ku swana sina Jehova, Jesu n’a iponahalize ku ba ya bubebe mwa ku cinca nzila kamba ku lumelelana ni lika miinelo ye minca ha inze i zuha. Ka nako ye ñwi musali wa Mulicaba n’a mu kupile ku alafa mwan’a hae ya n’a nyandiswa ki mioya ye maswe. Ka linzila z’e talu ze fapahana, Jesu pili n’a mu bonisize kuli n’a si ke a mu tusa—pili, ka ku s’a mu alaba; sa bubeli, ka ku bulela ka ngambu kuli n’a si ka lumiwa kwa Balicaba, kono kwa Majuda; mi sa bul’alu, ka ku fa mutala o ne u talusize sisupo seo ka mukwa o sishemo. Nihakulicwalo, musali y’o a tundamena mwahal’a zeo kaufela, ili nto ye fa bupaki bwa tumelo ye ipitezi. Ka ku beya mwa munahano muinelo o’ ipitezi w’o, Jesu n’a kona ku bona kuli yeo ne i si nako ya ku ndondwela fa mulao wa ka nañungelele; ne li nako ya ku cinca ka k’u nga muhato kwa likuka ze pahami ni ku fita.a Kacwalo, Jesu n’a ezize sa n’a bonisize hal’alu kuli n’a si ke a’ si eza. N’a folisize mwan’a musali y’o!—Mateu 15:21-28.

7. Ki ka linzila lifi bashemi ne ba kana ba bonisa musa, mi ki kabakalañi?

⁷ Kana ni luna ka ku swana lu zibahala ka ku itatela ku cinca kwa luna ha ku swanela? Bashemi hañata ba tokwa ku bonisa musa o cwalo. Bakeñisa kuli mwana ni mwana u ipitezi, miezezo ye sebeza ku yo muñwi neikana ya s’a swanela yo muñwi. Fahalimu a seo, bana ha ba nze ba hula, butokwi bwa bona bwa cinca. Kana nako ye ba lukela ku ba fa lapa i swanelwa ku cinciwa? Kana tuto ya lubasi neikana ya tusiwa ki muzamaisezo wa ku ba ye pila ni ku fita? Mushemi h’a nga muhato ka nzila ye tula tikanyo kwa fosonyana ye ñwi, kana ki y’a itatela ku ikokobeza ni ku lukisa litaba? Bashemi ba ba fetuha mwa linzila ze cwalo ba pima ku halifisa bana ba bona ka ku s’a tokwahala ni ku ba zwisa ku Jehova.—Ephesians 6:4.

8. Maeluda ne ba kana b’a nga cwañi ketelelo mwa ku cinca ka ku lumelelana ni miinelo kwa butokwi bwa kalulo?

⁸ Maeluda ni bona ba tokwa ku eza ka nzila ye swanela miinelo ye minca ha i nze i zuha, kono ni kamuta ba s’a sheng’oki milao ya Mulimu ye nongile fa taba. Mwa ku okamela musebezi wa ku kutaza, kana mu ba ba tona kwa neku la licinceho mwa kalulo? Mipilelo ha i nze i cinca fa sibaka, mwendi ku fa bupaki kwa manzibwana, ku fa bupaki kwa mwa makululu, kamba ku fa bupaki kwa fa luwaile ku swanelwa ku huliswa. Ku cinca ka ku lumelelana ni miinelo ka linzila ze cwalo ku lu tusa ku taleleza ka buanyu ni ku fita musebezi wa luna wa ku kutaza. (Mateu 28:19, 20; 1 Makorinte 9:26) Paulusi hape n’a boni teñi kuli w’a cinca ka ku lumelelana ni miinelo kwa batu ba mikwa kaufela mwa bukombwa bwa hae. Kana ni luna lu eza nto ye swana, sina ka mutala, ka ku ituta ze likani ka za bulapeli ni lizo za fa sibaka kuli lu kone ku tusa batu?—1 Makorinte 9:19-23.

9. Ki kabakalañi eluda h’a s’a swaneli ku pihelela ku sebelisana ni but’ata kamita ka nzila ya n’a sebelisani ni bona kwamulaho?

⁹ Mazazi a maungulelo a h’a nze a ba a’ tata ni ku fita, balisana hape ne ba kana ba tokwa ku cinca ka ku lumelelana ni miinelo kwa ku tatafala ni ku s’a tabisa ko ku lyanganisa kwa bo buñwi bwa but’ata b’o mutapi wa bona u talimana ni bona cwale. (2 Timotea 3:1) Maeluda, ye haki nako ya ku s’a cinca! Ka buniti fela eluda n’a si ke a pihelela ku sebelisana ni but’ata ka mukwa w’a sebelisani ni bona kwamulaho haiba miezezo ya hae se i fitile fa ku ba ye si na buanyu kamba haiba “mutanga ya sepahala, ya na ni kutwisiso” u boni swanelo ya ku hasanya litaba ze nca fa miinelo yeo. (Mateu 24:45; mu bapanye Muekelesia 7:10; 1 Makorinte 7:31.) Eluda yo muñwi y’a sepahala n’a likile ka buniti ku tusa kaizeli ya n’a li mwa maswabi a matuna ili ya n’a tokwa muteelezi yo munde. Nihakulicwalo, n’a si k’a nga maswabi a hae ka butuna mi a fa litatululo ze si k’a tunga. Cwale Watch Tower Society ya hasanya litaba ze ñwi ze tomile fa Bibele ze ne li talima but’ata bwa hae luli. Eluda y’o n’a ikolwisize ku bulela ni kaizeli y’o hape, mi ka nako yeo ili ka ku sebelisa litaba ze nca ni ku bonisa ku mu utwela butuku mwa maswenyeho a hae. (Mu bapanye 1 Matesalonika 5:14, 15.) Ki mutala kwa bunde wa musa!

10. (a) Maeluda ba swanela ku bonisa cwañi mubonelo wa ku fetuha yo muñwi ku yo muñwi ni kwa sitopa sa maeluda kamukana? (b) Sitopa sa maeluda si swanela k’u nga cwañi bao ba ba iponahaza ku s’a ba ni musa?

¹⁰ Maeluda hape ba tokwa ku bonisa mubonelo wa ku sikuluha yo muñwi ku yo muñwi. Sitopa sa maeluda ha si kopana, ki kwa butokwa hakalo kuli ku si ke kwa ba ni eluda a li muñwi y’a pahamela ba bañwi mwa puhisano! (Luka 9:48) Sihulu y’a nga ketelelo u tokwa buiswalo mwa muinelo w’o. Mi muta eluda a li muñwi kamba ba babeli ba s’a lumelelani ni katulo ya sitopa kamukana sa maeluda, ha ba na ku tundamena ku eza lika ka mo ba batela. Ka ku fapahana, haiba ku si na sikuka sa mwa Mañolo se si lobiwa, ba k’a sikuluha, ka ku hupula kuli musa ki o’ tokwahala kwa maeluda. (1 Timotea 3:2, 3) Kwa lineku le liñwi, sitopa sa maeluda si swanela ku beya mwa munahano kuli Paulusi n’a nyazize hahulu puteho ya mwa Korinte kabakala ku ‘lumelela batu ba ba si na musa’ (NW) ba ne ba itahisa sina “baapositola ba batuna ku fita.” (2 Makorinte 11:5, 19, 20) Kacwalo ba swanela ku itatela ku kalimela eluda yo muñwi y’a eza lika ka mukwa wa sinundwe, o’ si na musa, kono bona ka sibili ba swanela ku ba ni buitikanelelo ni sishemo mwa ku mu kalimela.—Magalata 6:1.

Musa mwa ku Sebelisa M’ata a Tamaiso

11. Ki fapahano mañi ye ne i li teñi mwahal’a m’o baeteleli ba bulapeli ba Sijuda mwa lizazi la Jesu ne ba sebeliseza m’ata a tamaiso ni mwa n’a ezeza Jesu?

¹¹ Jesu ha n’a li fa lifasi-mubu, musa wa hae kaniti luli ne u bonahala ka nzila ya n’a itusisa ka yona m’ata a hae a n’a filwe ki Mulimu. N’a li ya fapahana hakalo kwa baeteleli ba bulapeli ba mwa lizazi la hae! Mu nahane ka za mutala o muñwi. Mulao wa Mulimu ne u laezi kuli ha ku na musebezi, nihaiba ku lwalela likota, o ne u ka eziwa la Sabata. (Exoda 20:10; Numere 15:32-36) Baeteleli ba bulapeli ne ba bata ku zamaisa ka m’o batu ne ba sebeliseza mulao w’o. Kacwalo ne ba ipile musebezi wa ku atula seo luli mutu n’a kona ku nanula la Sabata. Ne ba atuzi kuli: i si ke ya ba nto ye fita buima bwa lifeiga ze peli ze omile. Mane ne ba hanisize ni makatulo a’ na ni limapo, ka ku bulela kuli ku nanula buima bo bu ekelizwe bwa limapo ikaba ku sebeza! Ku bulelwa kuli, hamoho, baluti ne ba ekelize milao ye 39 fa mulao wa Mulimu ka za Sabata mi cwale ba ekeza ye si na palo fa milao yeo. Jesu, kwa lineku le liñwi, n’a s’a bati ku zamaisa batu ka ku ba swabisa ka ku toma milao ye miñata ya ku hanisa-hanisa kamba ka ku toma lipimo ze s’a cinci, ze s’a konwi ku fitiwa ku zona.—Mateu 23:2-4; Joani 7:47-49.

12. Ki kabakalañi ha lu kona ku bulela kuli Jesu n’a si k’a zina-zina ha ne ku amiwa kwa lipimo ze lukile za Jehova?

¹² Kana, cwale, ne lu k’a nga kuli Jesu n’a s’a yemeli lipimo ze lukile za Mulimu ka ku tiya? Ka buniti fela n’a li yemela! N’a utwisisa kuli milao i ba ye buanyu ka ku fitisisa batu ha ba amuhela likuka ze li mutomo wa milao yeo. Hailif’o Bafalisi ne ba ipungelelize mwa ku lika ku zamaisa batu ka milao ye miñata, Jesu n’a bata ku fita kwa lipilu. Sina ka mutala, n’a ziba hande kuli ne ku si na ku cinca ha ku amiwa kwa milao ya bumulimu ye cwale ka wa kuli “mu sabe buhule.” (1 Makorinte 6:18) Kacwalo Jesu n’a lemusize batu ka za mihupulo ye ne i ka libisa kwa muzamao o maswe. (Mateu 5:28) Tuto ye cwalo ne i’ ngile butali ni temuho ye tuna hahulu ku fita ku toma fela milao ye s’a cinci, ya miezezo fela.

13. (a) Ki kabakalañi maeluda ha ba swanela ku pima ku tahisa milao ni litaelo ze s’a cinci? (b) Ki lifi likalulo ze ñwi m’o ku li kwa butokwa ku kuteka lizwalo la mutu ka buñwi?

¹³ Mizwale ba ba na ni buikalabelo kacenu ni bona ba cisehela ku fita kwa lipilu ka mukwa o swana. Kacwalo, ba pima ku toma milao ye si na mayemo hande, ili ye s’a cinciwi kamba ku fetula mibonelo ni maikuto a bona a ka butu ku ba mulao. (Mu bapanye Daniele 6:7-16.) Ka linako ze ñwi, likupuliso ze sishemo fa litaba ze cwale ka mutinelo ni mubonahalelo ne li kana za ba ze swanela ni za ka bunako, kono eluda n’a kana a beya libubo la hae la ku ba munna ya musa mwa lubeta haiba n’a ka ngongwela fa litaba ze cwalo kamba ku lika ku koñomeka lika zeo ka mutomo li li fela litato za hae za ka butu. Kaniti luli, kaufela mwa puteho ba swanela ku pima ku lika ku zamaisa ba bañwi.—Mu bapanye 2 Makorinte 1:24; Mafilipi 2:12.

14. Jesu n’a bonisize cwañi kuli n’a na ni musa ku sa n’a libelela ku ba bañwi?

¹⁴ Maeluda ne ba kana ba bata ku itatuba fa taba ye ñwi: ‘Kana ni y’a na ni musa ku se ni libelela ku ba bañwi?’ Ka buniti fela Jesu n’a li cwalo. N’a bonisize balateleli ba hae ka ku s’a cinca-cinca kuli n’a s’a libeleli ku bona nto ye fitelela buikatazo bwa bona bwa ka moyo kaufela ni kuli n’a nga b’o ka butuna hahulu. N’a lumbile mbelwa y’a shebile kabakala ku fa mali a hae a butokwa bo bunyinyani. (Mareka 12:42, 43) N’a omanyize balutiwa ba hae ha ne ba nyazize nubu ye tula ya Maria, ka ku bulela kuli: “Mu mu tuhele. . . . U ezize mw’a konezi kaufela.” (Mareka 14:6, 8) N’a bile ni musa mane ni muta balateleli ba hae ne ba eza z’a si k’a libelela. Sina ka mutala, mane nihailikuli n’a susuelize baapositola ba hae ba bal’alu ba ne ba li balikani ba batuna kuli ba tone ni ku libelela ni yena mwa busihu bwa ku tamiwa kwa hae, ne ba mu swabisize ka ku ozela ka ku kuta-kutela. Niteñi, n’a bulezi ka ku ba utwela butuku kuli: “Pilu yona ya lata, kono nama ya fokola.”—Mareka 14:34-38.

15, 16. (a) Ki kabakalañi maeluda ha ba swanela ku mamela kuli ba si ke ba tahisa sineneketo kamba ku bemba mutapi? (b) Kaizeli yo muñwi y’a sepahala n’a fitile cwañi fa ku cinca sa n’a libelela ku ba bañwi?

¹⁵ Ki niti, Jesu n’a susuelize balateleli ba hae kuli ‘ba eze ka t’ata.’ (Luka 13:24) Kono ni kamuta n’a si k’a ba beya mwa sineneketo ya ku eza cwalo! N’a ba susuelize, ku fa mutala, ku ba etelela, ni ku bata ku fita kwa lipilu za bona. N’a sepile m’ata a moya wa Jehova kuli u k’a eza ze siyezi kaufela. Maeluda kacenu ni bona ba swanela ku susueza mutapi ku sebeleza Jehova ka moyo kaufela kono ba swanela ku pima ku ba lindaula ka maikuto a mulatu kamba a maswabi, ili ku talusa kuli se ba eza cwale mwa sebelezo ya Jehova ki se si si k’a likana kamba se si s’a amuhelehi ka mukwa o muñwi. Muatumelelo wa “mu eze ze ñata, mu eze ze ñata, mu eze ze ñata!” o s’a hakuluhi, o’ tahisa sineneketo ne u kana wa zwafisa ba ba eza se ba kona kaufela. Ne ku k’a ba ko ku swabisa cwañi eluda ha n’a ka itahiseza libubo la ku ba y’a “tata”—ili nto ye fapahana hahulu ni musa.—1 Pitrosi 2:18.

¹⁶ Kaufel’a luna lu swanela ku ba ni musa ku se lu libelela ku ba bañwi! Kaizeli yo muñwi, yena ni munn’a hae ha ne ba siile kalulo ya bona ya bulumiwa kuli ba y’o babalela bom’ahe ba ne ba li mwa mapongo, n’a ñozi kuli: “Linako ze li t’ata luli ku luna bahasanyi kwanu mwa liputeho. Ka ku ba ba ne ba bile mwa musebezi wa mupotoloho ni wa sikiliti, ili ku silelezwa kwa lisineneketo ze ñata ze cwalo, ka sipundumukela ni ka mukwa o’ butuku ne lu fitisizwe fa ku lemuha seo. Sina ka mutala, ne ni ipulelel’anga kuli, ‘Ki kabakalañi kaizeli y’a ni ha s’a fi se si fiwa luli sa kweli ye? Kana h’a bal’angi Bukombwa bwa Mubuso nji?’ Cwale se ni ziba libaka. Ku ba bañwi ki sona se ba kona ku eza fela ku zwela [mwa simu].” Ki ko kunde hakalo ku babaza mizwale ba luna ka se ba eza ku fita ku ba atula ka se ba s’a ezi!

17. Jesu n’a lu file cwañi mutala wa musa?

¹⁷ Mu nyakisise mutala wa mafelelezo wa ka m’o Jesu a sebeliseza m’ata a hae a tamaiso ka nzila ye musa. Ka ku swana ni Ndat’ahe, Jesu h’a bukelezi m’ata a hae a tamaiso ka moya wa muñaña-toho. Ni yena hape ki y’a fa ba bañwi m’ata ka ku ipitela, ili ku keta sitopa sa mutang’a hae ya sepahala kuli si babalele “z’a luwile kaufela” fa lifasi-mubu fa. (Mateu 24:45-47) Mi h’a sabi ku teeleza kwa mihupulo ya ba bañwi. Hañata n’a buz’anga bateelezi ba hae kuli: “Mo mu hupulela ki cwañi?” (Mateu 17:25; 18:12; 21:28; 22:42) Ki mo ku swanela ku bela mwahal’a balateleli kaufela ba Kreste kacenu. Ha ku na butuna bwa m’ata a tamaiso bo bu swanela ku ba bisa ba ba s’a tabeli ku teeleza. Bashemi, mu teeleze! Banna, mu teeleze! Maeluda, mu teeleze!

18. (a) Ne lu kana lwa ziba cwañi haiba lu na ni libubo la ku ba ni musa? (b) Ki sifi seo kaufel’a luna ne lu kana lwa eza hande ku ikatulela?

¹⁸ Ku si na cwañi kamba cwañi, yo muñwi ni yo muñwi wa luna u bata ku “ba ni libubo la ku ba ni musa.” (Mafilipi 4:5, Phillips) Kono lu ziba cwañi haiba lu na ni libubo le li cwalo? Kihona, Jesu ha n’a bata ku ziba seo ne ba bulela batu ka za hae, n’a buzize balikani ba hae ba n’a sepile. (Mateu 16:13) Ki kabakalañi ha mu sa lateleli mutala wa hae? Ne mu ka buza mutu ya konwa ku itingiwa mwa ku bulela ka busepahali ka za haiba mu na ni libubo la ku ba mutu ya na ni musa, ya sikuluha. Ka buniti fela ku na ni ze ñata zeo luna kaufela lu kona ku eza kuli lu likanyise hande ni ku fita mutala wa Jesu o’ petahezi wa musa! Sihulu haiba lu na ni sipimo se siñwi sa m’ata a tamaiso fahalimu a ba bañwi, haike lu latelele mutala wa Jehova ni Jesu kamita, ili ku sebelisa m’ata a luna a tamaiso ka nzila ye musa kamita, lu nze lu itukiselize kamita ku swalela, ku sikuluha, kamba ku cinca miinelo ha ku swanela. Ka buniti fela, haike mañi ni mañi ku luna a like ka t’ata ku ba ya “na ni musa”!—Tite 3:2.

[Litaluso za kwatasi]

Ne Mu k’a Alaba Cwañi?

◻ Ki kabakalañi Bakreste ha ba swanela ku bata ku ba ni musa?

◻ Maeluda ba kona ku likanyisa cwañi Jesu mwa ku lata ku swalela?

◻ Ki kabakalañi ha lu swanela ku bata ka t’ata ku cinca sina mwa n’a bezi Jesu?

◻ Lu kona ku bonisa cwañi musa mwa nzila yeo lu sebelisa ka yona m’ata a tamaiso?

◻ Ne lu kana lwa itatuba cwañi ka za haiba lu ba ba na ni musa luli?

[Siswaniso se si fa likepe 15]

Jesu n’a itatezi ku swalela Pitrosi ya n’a bakile

[Siswaniso se si fa likepe 16]

Musali yo muñwi ha n’a bonisize tumelo ye ipitezi, Jesu n’a boni kuli ne i si nako ya ku ndondwela fa mulao wa ka nañungelele

[Siswaniso se si fa likepe 18]

Bashemi mu teeleze!

[Siswaniso se si fa likepe 18]

Banna mu teeleze!

[Siswaniso se si fa likepe 18]

Maeluda mu teeleze!