Mafilipi 4:6, 7—“Musike Mwabilaezwa ki Sesiñwi”

“Musike mwabilaezwa ki sesiñwi, kono mwa lika kaufela muzibise Mulimu zemukupa ka tapelo ni ka kupo hamoho ni buitumelo; mi kozo ya Mulimu yefita kutwisiso kaufela ikasileleza lipilu zamina ni maata amina a kunahana ka Kreste Jesu.”—Mafilipi 4:6, 7, Bibele ya Toloko ya Lifasi Lelinca.

“Musike mwabilaezwa ki sesiñwi, kono mwa miinelo kaufela, muzibise Mulimu zemukupa ka tapelo ni ka kupo ni buitumelo. Mi kozo ya Mulimu yefita kutwisiso kaufela ikasileleza lipilu zamina ni minahano yamina ka Kreste Jesu.”—Mafilipi 4:6, 7, Bibele ya New International Version.

Taluso ya Liñolo la Mafilipi 4:6, 7

Haiba batanga ba Mulimu babilaezwa ki nto yeñwi, bakona kulapela ku yena kuli abaombe-ombe. Mulimu usepisa kuli uka bafa kozo ya mwa munahano, ili yeka batusa kufelisa lipilaelo zabona ni kusileleza munahano wabona ni maikuto abona. Timana 6 ibonisa mufuta wa litapelo zebakona kulapela ilikuli babe ni kozo.

Likupo ki litapelo zalapela mutu ku Mulimu kumukupa ka taata kuli amutuse. Mutu wakona kukupa tuso ku Mulimu haali mwa butata sina feela mwanaaezelize Jesu. (Maheberu 5:7) Mutu hañata ukuta-kutelanga kulapela litapelo zecwalo.

Litapelo ki likupo zelibiswa ku Mulimu ka kunonga. Balapeli ba Jehova bakona kumukupa “mwa lika kaufela” kamba “mwa miinelo kaufela.” Kono litapelo zecwalo liswanela kulumelelana ni tato ya Mulimu sina feela mokutaluselizwe mwa Bibele.—1 Joani 5:14.

Litapelo za buitumelo libonisa kuli lwaitumela ku Mulimu kwa lika zaluezelize ni zaka luezeza kwapili. Haiba lulemuha libaka haluswanela kuitumela ku Mulimu kabakala zaluezelize, lukazwelapili kuba ni tabo.—1 Matesalonika 5:16-18.

Mulimu ualabanga litapelo zecwalo ka kufa batanga bahae kozo. “Kozo ya Mulimu” ki kozo ya mwa munahano yanani yona mutu kabakala kuba ni silikani sesinde ni Mulimu. (Maroma 15:13; Mafilipi 4:9) Mi kozo yeo ‘ifita kutwisiso kaufela’ kakuli izwa ku Mulimu mi yakona kulutusa mwa miinelo kaufela mane kufita ni mone lulibelelela.

Timana ye ibonisa kuli kozo ya Mulimu yakona kusileleza lipilu zaluna. Linzwi la Sigerike lelitolokilwe kuli ‘kusileleza’ liswana ni linzwi la sisole lelitalusa zebaswanela kueza masole kuli basileleze muleneñi omutuna. Ka mukwa oswana, kozo ya Mulimu yakona kusileleza munahano ni maikuto a mutu. Imutusa kusaimezwa hahulu ki lipilaelo za mwa bupilo.

Kozo yalufa Mulimu ilusileleza “ka Kreste Jesu,” bakeñisa kuli Jesu ki yena yakonahalisa kuli lube ni silikani sesinde ni Mulimu. Jesu naafile bupilo bwahae sina tiululo ilikuli libi zaluna likone kuswalelwa. Haiba lubonisa tumelo ku yena, lukaikola limbuyoti zasepisize Mulimu. (Maheberu 11:6) Jesu hape ki yena yatusa kuli lukone kuatumela Mulimu. Naabulezi kuli: “Hakuna yataha ku Ndate haisi ka na.”—Joani 14:6; 16:23.

Litaba zeñwi zeswalisana ni litaba ze kwa Mafilipi 4:6, 7

Buka ya mwa Bibele ya Mafilipi ki liñolo lanaañozi muapositola Paulusi lene liya kwa Bakreste bane bapila mwa muleneñi wa Filipi.a Mwa litaba zefumaneha mwa kauhanyo 4 ya buka yeo, Paulusi naasusuelize mizwale ni likaizeli ba mwa puteho yeo kuba ni tabo, mi naaitumezi ku bona kabakala bufani bwabona, ili nto yene mutahiselize tabo. (Mafilipi 4:4, 10, 18) Naatalusize mo kulapela kukona kutuseza batu kuba ni kozo ya Mulimu, mi naabulezi lika zeluswanela kunahananga ni zeluswanela kueza ilikuli lutusiwe ki “Mulimu wa kozo.”—Mafilipi 4:8, 9.