Mu Nepele Lipilaelo za Mina Kaufela Fahalimu a Jehova

“Mu ikokobeze mwatas’a lizoho la Mulimu le li na ni mata, kuli a mi hulise mwa nako ye swanela. Mu nepele lipilaelo za mina kaufela fahalimu a hae, kakuli wa mi tokomela.”—1 PITROSI 5:6, 7.

1. Lipilaelo li kona ku lu ama cwañi, mi seo si konwa ku swanisezwa cwañi?

LIPILAELO li kona ku ama bupilo bwa luna ka mukwa o mutuna. Li kona ku bulelwa sina ku shooma ili k’o ka linako ze ñwi ku kauleza pina ye munati ye utwiwa fa wayalesi. Ha ku si na filikanyo kwa mataseli a wayalesi, lipina ze munati za konwa ku ikoliwa mi li kona ku wetulusa. Nihakulicwalo, lilata le lituna la ku shooma li kona ku sinya nihaiba mulumo o munde ka ku fitisisa, ili ku lu filikanya ni ku lu zwafisa. Lipilaelo li kona ku ba ni ku ama ko ku swana fa moya wa luna wa buiketo. Li kona ku lu imeza hahulu kuli mane ha lu koni ku eza lika ze ñwi za butokwa. Ka buniti fela, “pilu ye tezi lipilaelo i inamisa mutu.”—Liproverbia 12:25.

2. Ki sifi sa n’a bulezi Jesu ka za “ku bilaela za bupilo”?

² Jesu Kreste n’a bulezi ka za lubeta lwa ku yembululwa ki lipilaelo ze tulile tikanyo. Mwa bupolofita bwa hae bo bu ama mazazi a maungulelo, n’a susuelize kuli: “Mu tokomele kuli lipilu za mina li si ke za sinyiwa ki ku ca maswe, ni ku kolwa bucwala, ni ku bilaela za bupilo; mane lizazi leo li t’o mi tulukela mu si ka itukisa; Kakuli li ka wela ba ba yahile mwa lifasi kaufela sina sikwela. Kifohe, mu tone mi mu lapele kamita, kuli mu kone ku banduka ku zeo kaufela ze ka bonahala, ni ku yema fapil’a Mwan’a mutu.” (Luka 21:34-36) Sina ku ca maswe ni ku nwa maswe ha li kona ku tahisa kuli munahano wa mutu u fokole, ku imelwa ki “ku bilaela za bupilo” ku kona ku lu tiseza ku latehelwa ki mubonelo o munde wa mwa munahano, ili ka ku ba ni ze zwa mwateñi ze li kozi.

Seo Pilaelo I Li Sona

3. “Pilaelo” i talusizwe cwañi, mi ki lifi ze ñwi za lika z’e tahisa kuli i be teñi?

³ “Pilaelo” i taluswa sina “ku s’a wa pilu kwa mwa munahano ko ku butuku ni kwa ku ikalelwa [hañata] ili ka za bumai bo bu atumela kamba bo bu libelezwi.” Ki “ku kalelwa kamba ku cisehela kwa ka sabo” hamohocwalo ni “maikuto a ku ikalelwa ni a sabo a’ si k’a iketa ni a’ eshula hañata ili a’ bonwa ka lisupo za kwa mubili (ze cwale ka ku fufulelwa, maikuto a ku bifa, ni ku tulatula kwa pilu), ka ku honona ka za buniti ni muinelo luli wa lubeta, ni ku ihonona ka za buikoneli bwa mutu bwa ku kondisa lika mwa ku talimana ni lona.” (Webster’s Ninth New Collegiate Dictionary) Kacwalo pilaelo i kona ku ba but’ata bo bu tatezani. Mwahal’a lika ze ñata ze i tisa ku na ni makulano, ku supala, ku saba bukebenga, ku sinyehelwa ki mubeleko, ni ku iyakatwa kwa mutu buiketo bwa lubasi lwa hae.

4. (a) Ki ko kunde ku hupula nto mañi ka za batu ni lipilaelo za bona? (b) Haiba lu ipumana mwa lipilaelo, ki sifi se si konwa ku eziwa?

⁴ Ka ku bonahala hande, ku na ni lipimo ze fitana-fitana za lipilaelo, sina ha ku na ni miinelo ye fitana-fitana ye kona ku li tisa. Haki batu kaufela ba b’a nga muhato kwa muinelo o muñwi ka nzila ye swana. Kacwalo, lu tokwa ku lemuha kuli mane nihaiba nto ye ñwi i s’a lu katazi, neikana ya tisa pilaelo ye tuna ku ba bañwi bao lu lapela Jehova ni bona. Ki sifi se si konwa ku eziwa haiba pilaelo i fita fa sipimo sa kuli i lu palelwisa ku toma mamelelo fa liniti za Linzwi la Mulimu ze lumelelana ni ze tabisa? Ku cwañi haiba lu komwa hahulu ki pilaelo kuli mane ha lu koni ku buluka mwa pono litaba za kananisano za bubusi bwa Jehova ni busepahali bwa Sikreste? Ne lu kana lwa sa kona ku cinca muinelo wa luna. Mwa sibaka sa seo, lu tokwa ku bata lisupo za mwa Mañolo ze ka lu tusa ku kondisa lika mwa ku sebelisana ni lipilaelo ze s’a swaneli ze tiswa ki but’ata bo bu tatezani bwa mwa bupilo.

Tuso Y’a Fumaneha

5. Ne lu k’a nga cwañi muhato ka ku lumelelana ni Samu 55:22?

⁵ Bakreste ha ba tokwa tuso ya kwa moya mi ba imezwi ki lipilaelo, ba kona ku omba-ombiwa ki Linzwi la Mulimu. Li fa ketelelo ye konwa ku itingiwa mi li lu fa lika ze ñata z’e lu kolwisa kuli ha lu mwa buinosi sina batanga ba Jehova ba ba sepahala. Sina ka mutala, walisamu Davida n’a opezi kuli: “U lwalise [Jehova, NW] mulwalo wa hao, mi u ka ku tiisa. H’a na ku lumela kuli ya na ni niti a nyanganyiswe.” (Samu 55:22) Lu kona k’u nga cwañi muhato ka ku lumelelana ni manzwi ao? Ka ku nepela fahalimu a Ndat’a luna wa kwa lihalimu y’a lilato lipilaelo za luna, ze lu iyakatitwe, ze lu saba, ni ku zwafa kwa luna kaufela. Seo si k’a lu tusa ku ba ni maikuto a silelezo ni a mombecima.

6. Ka ku ya ka Mafilipi 4:6, 7, ki sifi seo tapelo i kona ku lu ezeza?

⁶ Tapelo ya kamita ili ka maikuto kaufela ki ye tokwahala kuli lu kone ku lwalisa Jehova milwalo ya luna, ku kopanyeleza cwalo ni lipilaelo za luna kaufela. Seo si k’a lu tiseza kozo ya mwahali, kakuli muapositola Paulusi n’a ñozi kuli: “Mu si ke mwa bilaela ka se siñwi; kono mwa linto kaufela mu zibise Mulimu se mu bata ka tapelo ni ka kupo ye na ni buitumelo. Mi kozo ya Mulimu ye fita kutwisiso kaufela, i ka buluka lipilu za mina ni mihupulo ya mina ku Jesu Kreste.” (Mafilipi 4:6, 7) “Kozo ya Mulimu” ye s’a bapanyehi ki buiketo bo bu ipitezi ili bo bu ikoliwa ki batanga ba Jehova ba ba ineezi mane ni mwa miinelo ya tiko ye tuna ka ku fitisisa. I zwa fa swalisano ya luna ni Mulimu ya ka butu ili ye silikani hahulu. Ha lu nze lu lapelela moya o kenile ni ku u tuhelela ku lu susueza, ha lu imululwi kwa but’ata kaufela bwa mwa bupilo, kono lwa ikola muselo wa moya wa kozo. (Luka 11:13; Magalata 5:22, 23) Ha lu eshulwi ki lipilaelo, kakuli lu ziba kuli Jehova u “pilisa mwa buiketo” batu ba hae kaufela ba ba sepahala mi h’a na ku lumeleza nto ye ñwi ku ezahala ye ne i ka lu tiseza kolofalo ye inelela.—Samu 4:8.

7. Ki kalulo mañi yeo maeluda ba Sikreste ba kona ku peta mwa ku lu tusa ku kondisa lika mwa ku talimana ni lipilaelo?

⁷ Niteñi, ku cwañi haiba lipilaelo za luna li zwelapili, nihaiba kuli lu nahana ka butungi fa Mañolo ni ku tundamena mwa tapelo? (Maroma 12:12) Maeluda ba ba ketilwe mwa puteho ni bona ki tukiso ya Jehova ya ku lu tusa kwa moya. Ba kona ku lu omba-omba ni ku lu tusa ka ku itusisa Linzwi la Mulimu ni ku lapela ni luna ni ku lu lapelela. (Jakobo 5:13-16) Muapositola Pitrosi n’a susuelize maeluda sina yena kuli ba lise mutapi wa Mulimu ka ku lata, ka cisehelo, ni ka nzila ya ku ezeza mutala. (1 Pitrosi 5:1-4) Bona banna bao ba cisehela ka mukwa o buniti buiketo bwa luna mi ba bata ku tusa. Ka mo ku inezi fela, kuli lu tusiwe ka ku tala ki tuso ye ba fa maeluda ni ku ba hande kwa moya mwa puteho, kaufel’a luna lu tokwa ku sebelisa kelezo ya Pitrosi ye li: “Mina micaha, mu ipeye kwatas’a ba bahulu. E, mu ipeye ba bañwi kwatas’a ba bañwi kaufel’a mina, mi mu apale buikokobezo; kakuli Mulimu u hanela ba ba ikuhumusa, mi u shemuba ba ba ishuwa.”—1 Pitrosi 5:5.

8, 9. Ki ku omba-ombiwa kufi ko ne ku kana kwa fumanwa kwa 1 Pitrosi 5:6-11?

⁸ Pitrosi n’a ekelize kuli: “Kabakaleo mu ikokobeze mwatas’a lizoho la Mulimu le li na ni mata, kuli a mi hulise mwa nako ye swanela. Mu nepele lipilaelo za mina kaufela fahalimu a hae, kakuli wa mi tokomela. Mu n’o iswala, mu libelele. Diabulosi, sila sa mina u nz’a zamaya sina tau ye lila ye bata ye i ka ca; Mu hane ku yena ka ku tiya mwa tumelo, mu nze mu ziba kuli butata ki bu li buñwi bo bu tahela banabahabo mina ba ba mwa lifasi. Mulimu wa sishemo kaufela, ya mi bizelize ka Jesu Kreste kwa kanya ya hae ye sa feli, ha mu se mu utwile butuku hanyinyani u ka mi eza ba ba petehile, a mi tiise, a mi fe mata, a mi tome. Mata ki a hae mwa linako ni linako. Amen.”—1 Pitrosi 5:6-11.

⁹ Ki nto ye omba-omba hakalo ku lemuha kuli lwa kona ku ‘lwalisa Mulimu lipilaelo za luna kaufela kakuli wa lu tokomela’! Mi haiba ze ñwi za lipilaelo za luna li tahiswa ki ku lika kwa Satani mwa ku sinya swalisano ya luna ni Jehova ka ku tisa nyandiso ni makandauko a mañwi ku luna, kana haki ko ku nyakalalisa ku ziba kuli lika kaufela li k’a ba hande ku ba ba buluka busepahali? Ee, hamulaho se lu utwile butuku hanyinyani, Mulimu wa sishemo kaufela u ka lu eza ba ba petehile mi u k’a lu tiisa mi a lu fe m’ata.

10. Liñolo la Pitrosi la Pili 1Pe 5:6, 7 li ama kwa tulemeno tufi to tul’alu to tu kona ku tusa ku imulula kwa lipilaelo?

¹⁰ Liñolo la Pitrosi la Pili 1Pe 5:6, 7 li ama kwa tulemeno to tul’alu to tu kona ku lu tusa ku kondisa lika mwa ku talimana ni lipilaelo. Ka kañwi ki ku ikokobeza, kamba “buikokobezo.” 1Pe 5 Timana 6 i fela ka pulelo ye li “mwa nako ye swanela,” ili ku akaleza tokwahalo ya ku ba ni pilu-telele. 1Pe 5 Timana 7 i bonisa kuli lu kona ku nepela lipilaelo za luna kaufela fahalimu a Mulimu ‘kakuli wa lu tokomela,’ mi manzwi ao a susueza ku sepa Jehova ka ku tala. Kacwalo ha lu boneñi ka m’o buikokobezo, pilu-telele, ni ku sepa Mulimu ka ku tala li kona ku tuseza mwa ku imululwa kwa lipilaelo.

Buikokobezo ka Mo Bu Kona ku Tuseza

11. Buikokobezo ne bu kana bwa lu tusa cwañi ku kondisa lika mwa ku sebelisana ni lipilaelo?

¹¹ Haiba lu ikokobeza, lu k’a lumela kuli mihupulo ya Mulimu ki ye fita hahulu ya luna. (Isaya 55:8, 9) Buikokobezo bu lu tusa ku lemuha sipimo sa munahano wa luna sa makutela-kaufi ha si bapanyiwa ni mubonelo wa Jehova o’ ngelela z’ote. U bona lika ze lu s’a lemuhi, sina ha ku bonwi mwa taba ya Jobo munna ya lukile. (Jobo 1:7-12; 2:1-6) Ka ku ikokobeza “mwatas’a lizoho la Mulimu le li na ni mata,” lu itumelela mayemo a luna a’ kwatasi ha lu bapanyiwa ni Mubusi ya Pahami ka ku fitisisa. Hape, seo si lu tusa ku kondisa lika mwa ku sebelisana ni miinelo yeo a lumeleza. Lipilu za luna ne li kana za nyolelwa kimululo ya onaf’o, kono bakeñisa kuli tulemeno twa Jehova tu mwa ku itikanelela ko ku petahezi, w’a ziba hande-nde nako ya k’u nga muhato ni ka mwa ku u’ ngela kwa neku la luna. Kacwalo he, ka ku swana sina bana ba banyinyani, haike lu kumalele ka buikokobezo fa lizoho la Jehova le li m’ata, lu nze lu na ni buikolwiso bwa kuli u ka lu tusa ku kondisa lika mwa ku talimana ni lipilaelo za luna.—Isaya 41:8-13.

12. Lipilaelo ka za buiketo bwa za sifumu ne li kana za amiwa cwañi ha ne lu ka sebelisa ka buikokobezo manzwi a’ kwa Maheberu 13:5?

¹² Buikokobezo bu kopanyeleza cwalo ku itatela ku sebelisa kelezo ye zwa mwa Linzwi la Mulimu, ili yeo hañata i kona ku kusufaza lipilaelo. Sina ka mutala, haiba lipilaelo za luna li tahisizwe ki ku tupwikela ka butungi mwa ndongwamo ya za sifumu, ne ku ka ba hande ha ne lu ka nahana ka za kelezo ya Paulusi ye li: “Mwa mukwa wa mina, lilato la ku lata bufumu li be siyo; mu kolwe ki se mu na ni sona; kakuli Mulimu u ize: Ha ni na ku ku tuhela, ha ni na ku ku fulalela.” (Maheberu 13:5) Ka ku sebelisa kelezo ye cwalo ka buikokobezo, ba bañata ba itukuluzi kwa lipilaelo ze tuna ka za buiketo bwa za sifumu. Hailif’o muinelo wa bona wa za mali ne u kana u si k’a kondoloka, ha u komi minahano ya bona ka ku ba tiseza lubeta lwa kwa moya.

Kalulo ya Pilu-Telele

13, 14. (a) Ha ku amiwa kwa buitiiso bwa ka pilu-telele, Jobo n’a file mutala o cwañi? (b) Ku libelela ku Jehova ka pilu-telele ku kona ku lu ezeza nto mañi?

¹³ Pulelo ya kuli “mwa nako ye swanela” ye kwa 1 Pitrosi 5:6 i akaleza tokwahalo ya buitiiso bwa ka pilu-telele. Fokuñwi but’ata bu zwelapili ka nako ye telele, mi seo si kona ku hulisa pilaelo. Sihulu ki ka yona nako yeo ha lu tokwa ku siya litaba mwa mazoho a Jehova. Mulutiwa Jakobo n’a ñozi kuli: “Lu ba bulela kuli ba na ni mbuyoti ba ba konile ku itiisa; mu utwile za Jobo, za ku sa fela pilu kwa hae; mi mu boni mafelelezo a hae, a’ mu file Mulena; kakuli Mulena u tezi sishemo ni mukekecima.” (Jakobo 5:11) Jobo n’a ipumani mwa ku sinyehelwa kwa za sifumu, n’a shwezwi ki bana b’a lishumi, n’a kulile butuku bo bu nyenyisa, mi n’a atuzwi ka mafosisa ki baomba-ombi ba buhata. Sipimo se siñwi sa pilaelo si kona ku ba sa ka sipepo mwatas’a miinelo ye cwalo.

¹⁴ Ku be cwañi kamba cwañi, Jobo n’a li mutala o munde mwa buitiiso bwa ka pilu-telele. Haiba lu ipumana mwa tiko ye tuna ya tumelo, ne lu kana lwa ba ni ku litela kimululo, nihaiba sina mwa n’a ezelize yena. Kono Mulimu n’a ngile muhato kwa lineku la hae, ili ku imulula Jobo kwa nalulelule kwa manyando a hae ni ku mu fa mupuzo o mutuna. (Jobo 42:10-17) Ku libelela ku Jehova ka pilu-telele ku hulisa buitiiso bwa luna mi ku bonahaza butungi bwa buipeyo bwa luna ku yena.—Jakobo 1:2-4.

Mu Sepe Jehova

15. Ki kabakalañi ha lu swanela ku sepa Jehova ka ku tala?

¹⁵ Pitrosi n’a susuelize balumeli sina yena ku ‘nepela lipilaelo za bona kaufela ku Mulimu kakuli wa ba tokomela.’ (1 Pitrosi 5:7) Kacwalo lwa kona ku sepa Jehova ka ku tala mi lu swanela ku eza cwalo. Liproverbia 3:5, 6 i bulela kuli: “U sepe [Jehova, NW] ka pilu ya hao kaufela, mi u si ke wa tiyela fa butali bwa hao; U beye [Jehova, NW] mwa milelo ya hao kaufela, mi Yena u ka lukisa linzila za hao.” Bakeñisa ze ne li bonwi kwamulaho, ba bañwi ba ba tezi lipilaelo ba fumana kuli ku t’ata ku sepa batu ba bañwi. Kono lu na ni mabaka luli a ku sepa Mubupi wa luna, yena Simbule ni Mubuluki wa bupilo. Nihaiba lu s’a sepi maikuto a luna luli mwa taba ye ñwi, lwa kona ku itinga ku Jehova kamita kuli u ka lu lukulula mwa likayamana la luna.—Samu 34:18, 19; 36:9; 56:3, 4.

16. Ki sifi sa n’a bulezi Jesu Kreste ka za lipilaelo za lika za kwa mubili?

¹⁶ Ku sepa Mulimu ku kopanyeleza cwalo ni ku ipeya ku utwa Mwan’a hae, Jesu Kreste, ya n’a lutile sa n’a itutile ku Ndat’ahe. (Joani 7:16) Jesu n’a susuelize balutiwa ba hae ku ‘ikubukanyeza bufumu kwa lihalimu’ ka ku sebeleza Jehova. Kono ku cwañi ka za ze tokwahala za kwa mubili ze ama sico, liapalo, ni mukunda? ‘Mu si ke mwa bilaela,’ ki mwa n’a elelize Jesu. N’a bonisize kuli Mulimu u fepa linyunywani. U apesa mayangayanga ka bunde. Kana batanga ba Mulimu ba batu haki ba butokwa ku fita zeo? Ka mo ku inezi fela ki ba butokwa. Kacwalo, Jesu n’a susuelize kuli: “Mu bate pili mubuso wa Mulimu ni Ku Luka kwa Hae, mi linto zeo kamukana mu ka li ekelezwa kwateñi.” Jesu n’a zwezipili kuli: “Cwalehe, mu si ke mwa bilaelela za kamuso; kakuli la kamuso li ka ipatela za lona. Lizazi le liñwi ni le liñwi li likanwa ki ziyezi ya lona.” (Mateu 6:20, 25-34) Ee, lu tokwa lico, lino, liapalo, ni mukunda, kono haiba lu sepa Jehova, ha lu na ku bilaela hahulu ka za lika zeo ka mukwa o s’a swaneli.

17. Ne lu kana lwa swaniseza cwañi tokwahalo ya ku bata pili Mubuso?

¹⁷ Kuli lu bate pili Mubuso, lu lukela ku sepa Mulimu ni ku buluka lika ze li za butokwa ka ku tatamana ko ku swanela. Munweli ya si na sipangaliko sa ku buyelela teñi n’a kana a nwela mwa mezi ku y’o bata mufuta wa ñongolo ye na ni pelela mwahal’a yona. Yeo ki yona nzila y’a pilisa ka yona lubasi lwa hae. Ki nto ya butokwa, ka buniti hakalo! Kono ki sifi sa butokwa ni ku fita? Ki Moya! U lukela ku tumuk’anga kuli a t’o buyela. Moya ki sika sa butokwa ni ku fita. Ka ku swana, ne lu kana lwa ba ni ku amiwa ka mukwa o muñwi mwa muinelo wo wa linto ilikuli lu fumane ze tokwahala za bupilo. Nihakulicwalo, lika za kwa moya li swanela ku ba za pili kakuli bupilo luli bwa b’a ndu ya luna bu itingile ku zona zeo. Kuli lu pime lipilaelo ze s’a swaneli mwa lika ze tokwahala za kwa mubili, lu lukela ku sepa Jehova ka ku tala. Fahalimu a zeo, ‘ku itiisa kamita mwa musebezi wa Mulena’ ne ku kana kwa tusa ku imululwa kwa lipilaelo kakuli “tabo ya Muñ’a Bupilo” i fita fa ku ba ona m’ata a luna.—1 Makorinte 15:58; Nehemia 8:10.

Mu Zwelepili ku Nepela Lipilaelo za Mina Fahalimu a Jehova

18. Ki bupaki mañi bo bu li teñi bwa kuli ku nepela lipilaelo za luna kaufela ku Jehova kwa kona ku lu tusa luli?

¹⁸ Kuli lu siyale lu tomile hande mamelelo fa mayemo a kwa moya, lu lukela ku swalelela ku nepela lipilaelo za luna kaufela fahalimu a Jehova. Kamita mu hupule kuli w’a babalela luli batanga ba hae. Ka ku fa mutala: Bakeñisa sa kuli munn’a hae n’a si k’a sepahala ku yena, lipilaelo za musali yo muñwi wa Sikreste za ekezeha hahulu ku fita fa sipimo sa kuli na s’a koni ku lobala. (Mu bapanye Samu 119:28.) Nihakulicwalo, h’a li fa bulobalo, n’a nepela lipilaelo za hae kaufela fahalimu a Jehova. N’a talusez’anga Mulimu maikuto a hae kaufela a kwa pilu, ili ku mu bulelela ka za butuku b’o yena ni bana ba hae ba banyinyani ba babeli ili ba basizana ne ba ipumana ku bona. Hamulaho wa ku itilelela ka za kimululo mwa tapelo ya ka maikuto a matuna, kamita n’a kona ku wela mwa buloko, kakuli n’a sepa kuli Jehova n’a ka mu babalela yena ni bana ba hae. Yena musali y’o ya s’a fumani kauhano ya ka mañolo cwale s’a li mwa linyalo le li na ni tabo ili ku nyalwa ki eluda.

19, 20. (a) Ki lifi linzila ze ñwi zeo lu kona ku kondisa ka zona lika mwa ku talimana ni lipilaelo? (b) Ki sifi se lu swanela ku swalelela ku eza ka za lipilaelo za luna kaufela?

¹⁹ Ka ku ba batu ba Jehova, lu na ni linzila ze fitana-fitana za ku kondisa ka zona lika mwa ku talimana ni lipilaelo. Sihulu ku sebelisa Linzwi la Mulimu ki ko ku tusa hahulu. Lu na ni sico sa kwa moya sa mayemo a’ pahami se si fiwa ki Mulimu ka “mutanga ya sepahala, ya na ni kutwisiso,” ku kopanyeleza cwalo ni litaba ze tusa ni ze katulusa ze hasanyiwa mwa Tora ya ku Libelela ni Awake! (Mateu 24:45-47) Lu tusiwa ki moya o kenile wa Mulimu. Tapelo ya ka maikuto mi ili ya kamita i lu tusa hahulu. Maeluda ba Sikreste ba ba ketilwe ba itukiselize mi b’a itatela ku fa tuso ni ku omba-omba kwa moya.

²⁰ Buikokobezo ni pilu-telele ya luna ki ze tusa hahulu mwa ku sebelisana ni lipilaelo ze ne li kana za lu kataza. Sihulu nto ya butokwa ki ku sepa Jehova ka ku tala, kakuli tumelo ya luna y’a hula ha lu nze lu iponela tuso ni ketelelo ya hae. Hape, tumelo ku Mulimu i kona ku lu sileleza kwa ku fita fa ku katazeha ka mukwa o s’a swaneli. (Joani 14:1) Tumelo i lu susueza ku bata pili Mubuso ni ku zwelapili ku pateha mwa musebezi wa tabo wa Mulena, ili o’ kona ku lu tusa ku kondisa lika mwa ku talimana ni lipilaelo. Musebezi o’ cwalo u lu tahiseza ku ikutwa ku ba mwa silelezo mwahal’a ba ba k’a opela milumbeko ya Mulimu mwa nako kaufela ya ku ya ku ile. (Samu 104:33) Kacwalo ha lu swaleleleñi ku nepela lipilaelo za luna kaufela fahalimu a Jehova.

Ne Mu K’a Alaba Cwañi?

◻ Pilaelo neikana ya taluswa cwañi?

◻ Ki lifi linzila ze ñwi zeo lu kona ku kondisa ka zona lika mwa ku talimana ni lipilaelo?

◻ Buikokobezo ni pilu-telele li kona ku lu tusa cwañi ku imululwa kwa lipilaelo?

◻ Mwa ku talimana ni lipilaelo ka ku kondisa lika, ki kabakalañi ha ku li kwa butokwa ku sepa Jehova ka ku tala?

◻ Ki kabakalañi ha lu swanela ku zwelapili ku nepela lipilaelo za luna fahalimu a Jehova?

[Siswaniso se si fa likepe 31]

Kana mw’a ziba libaka Jesu ha n’a bulezi kuli, ‘Mu si ke mwa bilaela’?