Bukeni Bwa Muzamao Ki Bona Bunde Bwa Bunca

“Mutangana, u tabele bucaha bwa hao; . . . u ye ka ze latwa ki pilu ya hao, ni ka ze bonwa ki meto a hao. Nihakulicwalo u zibe kuli, ka litaba zeo kaufela, Mulimu u ka ku biza kwa katulo.”—MUEKELESIA 11:9.

1, 2. (a) Ki sifi seo Jehova a tabela kuli si be teñi ku ba banca? (b) Ki kabakalañi ha ku li ko ku butoto ku ndongwama nto ifi kamba ifi ye lakazeha kwa pilu ni meto a hao?

“BUNCA, cisehelo, ni buleta-leta li swana sina mazazi a atumela kwa mbumbi. Mwa sibaka sa ku bilaela . . . ka za bukuswani bwa ona, lika ku ikola ona.” Kona mwa n’a ñolezi mutu wa mashitanguti wa mwa Germany mwa lilimo za mwanda wa bu 19. Ona manzwi ao a kelezo ku mina ba banca a koñomeka manzwi a n’a ñozwi lilimo ze likiti-kiti kwamulaho mwa buka ya Bibele ya Muekelesia a li: “Mutangana, u tabele bucaha bwa hao; mi pilu ya hao i ku tabise mwa mazazi a bucaha [kamba, bukalibe] bwa hao; u ye ka ze latwa ki pilu ya hao, ni ka ze bonwa ki meto a hao.” (Muekelesia 11:9a) Kacwalo Jehova Mulimu h’a na mubonelo o fosahezi ka za se si hoha litakazo za mwa bunca. U bata kuli mu ikole ka ka ku fita fa sipimo se si tezi m’ata ni buikoneli bwa mwa bunca bwa mina.—Liproverbia 20:29.

² Kana se, niteñi, si talusa kuli mwa kona ku ndongwama nto ifi kamba ifi ye tabisa kwa pilu ni meto a mina? Batili ni hanyinyani! (Numere 15:39; 1 Joani 2:16) Liñolo li zwelapili ku talusa kuli: “Nihakulicwalo u zibe kuli, ka litaba zeo kaufela, [lindongwamo ze u keta mwa ku itabisa] Mulimu u ka ku biza kwa katulo.” (Muekelesia 11:9b) Ee, ha mu koni ku pima lika ze zwa mwa likezo za mina; ba banyinyani, ka ku swana ni ba bahulile, ba fita fa ku ba mwa katulo ya Jehova.—Maroma 14:12.

3, 4. (a) Ki kabakalañi ha ku swanelwa ku bulukiwa sipimo se si pahami sa bukeni bwa muzamao? (b) Ki ifi sineneketo ye li teñi ku mina ye kona ku mi biula mwa mayemo a mina a kenile fapil’a Mulimu, mi ki lipuzo mañi ze zusizwe?

³ Ku amuhela katulo ye lukile ya Jehova ha ku tahisi fela bupilo bwa ku ya ku ile kono hamohocwalo ni silikani se si tiile ni Mulimu ona cwale. Mu lukela, nihakulicwalo, ku buluka sipimo se si pahami sa bukeni bwa muzamao. Lisamu 24, litimana 3 ku isa 5, i talusa litaba ka nzila ye: “Ki mañi ya ka kona ku kambamela fa lilundu la [Jehova, NW]? Ki mañi ya ka kona ku pila mwa sibaka sa hae se si kenile? Ki ya na ni mazoho a’ si na milatu, wa pilu ye kenile, ya sa isi moya wa hae ku za lishano mi ya sa itami ka buhata. Ki yena ya ka fiwa mbuyoti ya [Jehova], a fiwe ni ku luka kwa Mulimu ya mu pilisa.” Ee, mu ba ba buheha mwa meto a Jehova haiba mu buluka bukeni bwa muzamao.

⁴ Niteñi, ku na ni sineneketo ya kamita ye kona ku mi biula mwa mayemo a mina a kenile fapil’a Mulimu. Mazazi a maungulelo a ha nze a fita fa mafelelezo a ona, ku na ni kekezeho ye tuna ya muzamao wa buhule ni lisusuezo ze masila. (2 Timotea 3:1-5) Shemaeto ya ku buluka bukeni bwa muzamao ni kamuta kwamulaho ne i si ka fita fa sipimo seo i se i fitile ku sona cwale kwa neku la ba banca. Kana mwa talimana ni yona shemaeto yeo ka nzila ya tulo? Kana mu ka zwelapili ku eza cwalo?

Shamaeto Ye Mu Talimani Ni Yona

5. Ki lisusuezo lifi ze si ka kena ze ezisa ku ba ko ku tata ku buluka mayemo a kenile fapil’a Mulimu?

⁵ Kalulo ya za ku itabisa i yaweka ba banca linto ze kasheza kwatuko lika ze kutekeha mi i babaza lika ze li za buhule fo ku sweu-sweu. Sina ka mutala, fa ku zibahazwa kwa ku tahiswa kwa ye ñwi ya maswaniso a zamaya mwahal’a mundandwe wa a mañwi, munyazi yo muñwi wa maswaniso a zamaya n’a ñozi kuli: “Ku shelana-shelana kwa kakamalo ya tobali, kakamalo ya bubulai, ni kakamalo ya lika ze nyenyisa ka ku fita fa sipimo se situna ki sona se si petwa ki ona maswaniso ao. Haiba ku fumaneha kuli ku na ni lipalo ze zwile mubano za ba ba fumaneha teñi, i ka ba kupuzo ye ñwi mwa ku yongobela kwa batu mwa muinelo o masila . . . kwa neku la keto ya bona ya maswaniso a zamaya.” Fahalimw’a maswaniso a zamaya a mufuta o cwalo ku na ni lipina za manzwi a tobali ni likalulo za fa televishini ze babaza tobali ye fosahezi. Kana mwa kona ku icaneha ili mina kwa miinelo ye fa nalela ya mufuta o cwalo ya “buhule bo bu yuboka” ni ku buluka mayemo a mina a kenile fapil’a Mulimu? (1 Pitrosi 4:4) Sina lishitanguti ha li talusa kuli: “Kikuli mutu a ka beya mulilo fa sifuba sa hae, liapalo za hae li sa ci?”—Liproverbia 6:27.

6. Ki sineneketo ifi yeo ba banca ba talimani ni yona ku zwelela kwa litaka za bona?

⁶ Sineneketo ya ku latehelwa ki mayemo a mina a kenile ni Mulimu i zwelela hape kwa simbule se siñwi—litaka za mina. Musizana wa silifasi wa lilimo ze 17 n’a bilaezi kuli: “Ne ni ikenyize mwa tobali lwa pili ka mabaka a na fosahezi kaufela: bakeñisa kuli mulikan’a ka wa mushimani n’a tundamezi mi ni kuli ne ni hupula kuli mañi ni mañi n’a ikenyize mwa tobali.” Ha ku na mutu ya lata ku sehiwa. Ki nto ya ka taho ku bata ku latiwa ki ba bañwi. Kono muta mu nga muhato ka ku yema kwa lineku la muzamao wa Bibele, ba banca ba bañwi ne ba ka mi sheununa. Takazo ya ku lumelelwa, ku fumana ku amuhelwa ki litaka za mina, ku kona ku mi tisa mwatas’a sineneketo ya ku eza nto ye ñwi ye mu ziba kuli i fosahalile.—Liproverbia 13:20.

7. Ki kabakalañi ha ku li ko ku tata ku ba banca ku lwanisa lisusuezo ze masila, kono likiti-kiti za ba banca mwa kopano ya Jehova ba se ba iponahalisize isali bona ku ba ba ba cwañi?

⁷ Ku lwanisa zona lisusuezo ze ku tata hahulu sihulu mwahal’a “bukalibe,” m’o litakazo za tobali li li ze tuna. (1 Makorinte 7:36) Ha ku komokisi kuli kopano ye ñwi ya patisiso ne i fitile fa mafelelezo a kuli: “Ki mutu yo munca ya zwile mubano ya si ka ba mwa tobali ya kwand’a linyalo ku to fita mane fa lilimo za buhulu ze 19.” Niteñi, likiti-kiti za mina ba banca mwa kopano ya Jehova mu se mu iponahalisize ili mina ku ba ba ba zwile mubano. Mu se mu talimani ni shemaeto ka nzila ye tiile mi mwa buluka bukeni bwa muzamao.

8. Ki kabakalañi ba banca ba bañwi ba Sikreste ha ba tuhelezi litengamo za mushengu ku ba susueza, mi ki sifi se si zwile mwateñi?

⁸ Ki maswabi ku bulela, nihakulicwalo, kuli ku se ku bile ni palo ya ba banca ba Sikreste ba se ba tuhelezi mikwa ya mushengu ku ba susueza. Hailifo ne ba kana ba bulela kuli ba lata se si li se sinde, ha ba toyi se si li se si maswe; ka ku fita fa sipimo se sinyinyani, ha ba si toyi hahulu. (Lisamu 97:10) Mwa miinelo ye miñwi, mane ba bonahala ku lata se si maswe. Sina Lisamu 52:3 ha i talusa kuli: “S’o lata ki bumaswe, ku fita bunde; ki lishano, ku fita litaba za niti.” Ba bañwi ba fita fa ku hana ka ku tala ketelelo ye zwelela kwa kopano ya Jehova fa lika ze cwale ka ku tambala ni wa silama si sili, ku itabisa, ni muzamao. Hañata, se si zwa mwateñi ki ku tahisa maswabi fahalimw’a bona ka sibili ni bashemi ba bona. Hape ba latehelwa ki ku buheha kwa bona mwa meto a Mulimu.—2 Pitrosi 2:21, 22.

Tuso mwa ku Talimana ni Shemaeto

9. Ki sifi se si tokwahala mwa ku tiyela shemaeto ya ku siyala inze mu kenile mwa muzamao?

⁹ Mu kona ku talimana cwañi ni shemaeto ya ku siyala inze mu kenile mwa muzamao? Walisamu n’a buzize puzo ye swana: “Mutangana a eze cwañi kuli a kenise mizamao ya hae?” Cwale n’a file kalabo: “Kih’a ka itemuhela yona ka ku ya ka linzwi la hao.” (Lisamu 119:9) Ee, mu tokwa ketelelo ku zwelela mwa Linzwi la Mulimu. Mi Ndat’a luna wa kwa lihalimu ya lilato u se a boni teñi kuli kopano ya hae y’a fa ketelelo ya mufuta o cwalo ili ku mi tusa ku tiyela lisineneketo ze masila za lifasi le.

10, 11. (a) Ki lifi libuka ze hatisizwe ili ku tusa batu ba banca kuli ba siyale inze ba kenile mwa muzamao? (b) Ba banca ba bañwi ba se ba tusizwe cwañi ki litaba ze latelelana za ‘Ba Banca Ba Buza . . . ’? (c) Mina ka butu mu se mu fumani tuso ifi ku zwelela kwa litaba ze latelelana za ‘Ba Banca Ba Buza . . . ’?

¹⁰ Mwahal’a lilimo ku se ku bile ni palo ya libuka ze hatisizwe sihulu ka ku ba ni ba banca mwa munahano, ze cwale ka buka ya Bunca Bwa Hao—Ku Fumana ku Bona Bunde bo bu Fitisisa. Haisali ku zwiwa ka 1982, likalulo ze tatamana za “Young People Ask . . . ” (Ba Banca Ba Buza . . . ) mwa magazini ya Awake! li se li file kelezo ye tuna fa litaba ze cwale ka maswaniso a mapunu, libuka za mushengu, ni muzamao o lukile mwahal’a libato. Kana litaba za mufuta o cwalo luli li se li tusize batu ba banca? A mu nahanisise ka za mutala o muñwi. Litaba li sikai ze ne li tatamana ne li buhisana ka za tengamo ya ku icuka, ni ku bonisa kuli mukwa o cwalo u zusulusa “maikuto a maswe” mi ku kona ku wiseza mutu mwa buhule.a (Makolose 3:5) Liakalezo ze utwahala ne li filwe ka mwa ku lwaniseza mukwa wo ni ka mwa ku talimanela ni muinelo wa hamulaho a ku wela teñi. Ka ku fa maikuto fa litaba zeo, ba banca ba bañwi ne ba ñozi kuli: “Ni se ni bile ni butata bwa ku icuka ku zwa fo ne ni bezi wa lilimo za buhulu ze 12. Cwale ni se ni fitile ku ze 18, mi cwale ni se ni fita fa ku tuhela hanyinyani-hanyinyani, ni itumezi kwa litaba za mina.” “Cwale bakeñisa kuli ni se ni amuhezi kelezo ye bonisizwe mwa litaba, ni ipumana ili na mwa muinelo wa munahano o munde ni ku fita. Ni ikutwa ku ba ya kenile ku fita pili.”

¹¹ Ku nga nako ku bala ni ku ituta litaba ze cwalo, kono ku eza cwalo ku kona ku mi tusa mwa ku siyala inze mu kenile mwa muzamao. Kana mwa itusisa ka ku tala litaba ze hatisizwe za mufuta o cwalo? Ka ku fa maikuto fa kalulo ya “Young People Ask . . . ” fa taba ye li “Sex Before Marriage—Why Not?”b (Tobali pili linyalo li si ka fita—Ki Kabakalañi ha i sa Swaneli?) musizana yo muñwi, ili ya n’a ituta Bibele ka nako yeo, n’a ñozi kuli: “Na ziba bumaswe, maswabi, ni maikuto a ku ba ni sikoto mwa pilu a taha hamulaho a tobali ye ezwa pili linyalo li si ka fita, mi ni inyaza hahulu ka za teñi. Ka zazi ni zazi ni itumela ku Jehova ka ku ni amuhela ni swalelo ya hae. Taba ya mina, ni na ni sepo, i ka tusa ba bañwi pili ba si ka eza sina mo ni ezelize. Kaniti luli i tisa masitapilu. Cwale na utwisisa libaka Jehova Mulimu ha lata kuli lu ‘zwe kwa buhule.’”—1 Matesalonika 4:3.

12. Ki sifi se si ka lu susueza ku bata ku tabisa Jehova?

¹² Se si lu tisa kwa nto ye ñwi ye ka mi tusa ku talimana ni shemaeto ka nzila ya tulo: Mu lukela ku ba ni buikolwiso bwa kuli Jehova ki Mubusi wa Pupo kaufela mi u swanelwa ku utwiwa. (Sinulo 4:11) Ka nako ye swana, nihakulicwalo, ki Ndate wa kwa lihalimu ya lilato, mi u beile kwa pilu ya hae licisehelo za luna ze nde ka ku fitisisa. (Liproverbia 2:20-22; Isaya 48:17) Milao ya hae i lelezwi ku lu sileleza, isiñi ku lu tamelela ko ku sa tokwahali. Ku i utwa kacwalo ki nzila ye butali. (Deuteronoma 4:5, 6) Ku utwisisa ka ku tala libaka Jehova h’a tundamezi fa bukeni bwa muzamao ku ka mi tusa ku bona bunde luli bo bu fumaneha teñi mi ku ka mi susueza ku bata ku mu tabisa.—Lisamu 112:1.

13. Mu kona ku talusa cwañi kuli mulao wa Jehova o hanisa buhule u lelezwi ku taleleza litakazo za luna ze nde ka ku fitisisa?

¹³ Mu nahanisise ka za sisupo sa kuli Mulimu u lumeleza tobali mwahal’a linyalo fela mi ka ku tiya u hanisa buhule. (Maheberu 13:4) Kana ku mamela ona mulao wo ku mi amuha nto ye ñwi ye nde? Kana Ndate wa kwa lihalimu ya lilato n’a ka eza mulao o ne u ka mi amuha ku ikola kwa mina bupilo? Ku tokwa ka mo ku inezi fela! A mu bone se si ezahala kwa litaka za mina ba ba keshebisa mulao wa Mulimu fa muzamao. Ku itwala ko ku si ka libelelwa hañata ku ba tahiseza kuli ba sulule limba kamba, mwendi, manyalo a ka sipundumukela. Mwa miinelo ye miñata ku talusa ku hulisa mwana ku si na mushemi wa munna. Fahalimw’a seo, ba banca ba ba ikenya mwa buhule ba ‘foseza mibili ya bona’ mi ba ipeya fa ngandaleza kwa neku la matuku a sihule. (1 Makorinte 6:18) Mi muta yo munca ya ineezi ku Jehova a fita fa ku eza buhule, masitapilu a kona ku ba a matuna hahulu. Ku lika ku felisa maikuto a lizwalo le li mwa maswabi ku kona ku tisa mukatala ni masihu a sikobyoti. (Lisamu 32:3, 4; 51:3) Kana haki ko ku utwahala, cwale, kuli mulao wa Jehova o hanisa buhule u lelezwi ku mi sileleza? Ku na ni tuso luli mwa ku buluka bukeni bwa muzamao!

14. Haili ka za taba ye twi linyalo la batu ba banyinyani ki silelezo, a mu taluse ka mo lu swanela ku bonela manzwi a Paulusi kwa 1 Makorinte 7:9 ni 7:36.

¹⁴ Ka mo ku inezi fela, haki nto ye bunolo ku mamela milao ya Mulimu ye tiile kwa neku la muzamao. Bakeñisa se, ba banca ba bañwi ba se ba atuzi kuli silelezo ye nde ka ku fitisisa ki ku kena mwa linyalo mutu ha sa li yo munyinyani. ‘Hailifo,’ ka ku ya ka mo ba nahanela, ‘kana 1 Makorinte 7:9 ha i buleli kuli: “Kono ha ba palelwa ku iswala ba nyale. Kakuli bunde ki ku nyala, isi ku bulaiwa ki takazo”?’ Mubonelo wa mufuta o cwalo, niteñi, ki wa makutela-kaufi. Manzwi a Paulusi ha ami kwa batu ba banyinyani kono ku bao ba ba hulile ka “ku siya bukalibe.” (1 Makorinte 7:36) Mwa miinelo ye miñwi bao ba ba sa li kwa makalelo a bukalibe bwa bona ha ba si ka hulisa kale mayemo a bona a maikuto ni a kwa moya kuli ba kone ku talimana ni lisineneketo ni buikalabelo bo bu taha mwa linyalo. Journal of Marriage and the Family (Magazini ya Linyalo ni Lubasi) i biha kuli: “Batu ba ba kena mwa linyalo inze ba li ba banyinyani ba fumana tabo ye nyinyani mwa linyalo bakeñisa kuli ha ba na buitukisezo mwa ku talimana ni kalulo ya linyalo. Ku talimana ni kalulo ka nzila ye si ka tiya ku kusufaza tabo, ili nto ye tahisa butata mwa linyalo.” Kacwalo kalabo ki, ku sa nyala mutu ha sa li yo munyinyani, kono mutu u swanela ku buluka bukwasha bwa muzamao o lukile ku fitela ha s’a hulisize tulemeno to tu tokwahala mwa ku kondisa linyalo.

Mu Ipuluke Ka Bukeni!

15. Ki ifi mihato ye tiile ye tokwahala kuli mu siyale inze mu kenile mwa muzamao?

¹⁵ Muapositola Paulusi n’a ñozi kuli: “Kifo, mu bulaye lilama za mina ze mwa lifasi, kikuli buhule ni ze masila, ni maikuto a maswe.” (Makolose 3:5) Ee, mihato ye tiile ya tokwahala; mu lukela ku tundamena ku ba ba ba kenile mwa muzamao. Ka ku bulela fa linzwi le li talusa ku eza sika le li tolokilwe kuli mu “bulaye,” buka ye bizwa The Expositor’s Bible Commentary i talusa kuli: “Li akaleza kuli ha lu kokobezi kamba ku kuyula fela likezo ze maswe ni litengamo. Lu na ni ku li zwisa, ku tanyela ka ku tala nzila ya bupilo bwa kale. ‘Ku bulaya sika ngambu’ ne i kana ya bonisa m’ata a linzwi leo. . . . Taluso ya linzwi leo le li bonisa ku eza sika hamohocwalo ni m’ata a mubulelelo wa lona li akaleza kezo ya tundamo ya ka butu ili ye tiile, ye butuku.”—Mu bapanye Mateu 5:27-30.

16. Ku siyala inze mu kenile mwa muzamao, ki kabakalañi ha mu swanela ku sebeza ka tata kuli mu be ba ba kenile mwa munahano, mi mu kona ku fita cwañi fa ku kona ku eza cwalo?

¹⁶ Ki kamukwaufi, nihakulicwalo, mu kona ku “bulaya sika ngambu” kamba ku ‘tanyela ka ku tala’ likezo za muzamao o si ka kena ni litengamo? Jesu n’a bonisize fo ne ku tomile butata ha n’a bulezi kuli: “Kakuli ki mwa lipilu za batu fo ku zwa mihupulo ye maswe, ni bubuki, . . . ni buhule, ni meto a’ shalima ka ku lakaza.” (Mareka 7:21, 22) Pilu ya swanisezo i kopanyeleza cwalo ni m’ata a ku nahana, ki lona libaka ha i ama “mihupulo.” Ku siyala inze mu kenile mwa muzamao, kacwalo, mu swanela ku tundamena ku buluka bukeni bwa munahano. Kamukwaufi? Bakeñisa kuli booko bu amuhela lika ku zwelela kwa likalulo ze tahisa ku ba ni tulemeno, mu tokwa ku bonisa tokomelo ku seo mu talima ku sona ka meto a mina, ku pima libuka, litukiso za fa TV, kamba maswaniso a zamaya a bonisa kamba ku yemela nzila ya buhule. Hape, mu tokwa ku ba ni tokomelo ka za seo mu teeleza ku sona ka mazebe a mina, ku hana lipina ze na ni manzwi a mushengu. Ku tokwa bundume mwa ku nga mayemo a mufuta o cwalo, sihulu fapil’a litaka za mina, kono ku eza cwalo ku ka mi tusa ku siyala inze mu kenile mwa muzamao ni ku buluka likute la ka butu.

17. Ki kabakalañi muzamao o masila ha u sa swaneli nihaiba ku bulelwa mwahal’a mina?

¹⁷ Muapositola Paulusi ni yena n’a elelize kuli: “Kono haili ka za buhule, ni mikwa ye maswe kaufela, ni takazo ya ku luwa, ku si ke kwa bulelwa nihaiba mabizo a lika zeo ko ku mina, mo ku swanelela balumeli.” (Maefese 5:3; mu bone hape timana 12.) Kacwalo masila a muzamao ha swaneli nihaiba ku bulelwa, fo kikuli, ku ndongwamwa kamba ku itusiswa sina taba ya ku eza lishea ka yona. Ki kabakalañi ha ku li cwalo? Sina caziba ya li muituti wa Bibele William Barclay ha na bulezi kuli: “Ku bulela ka za sika, ku eza lishea ka za sika, ku si eza sina yona taba mwa ngambolo kamita ki ku si tisa mwa booko, ni ku tahisa bukaufi mayemo a ku si eza ka sibili.” (Jakobo 1:14, 15) Ku tokwa tundamo ye tiile ku ‘swala mulomo ka tumo,’ sihulu muta ba banca ba bañwi ba bulela manzwi a sehisa a’ masila kamba ku itusisa puo ye maswe mwa ku bulela ka za likezo za mushengu. (Lisamu 39:1) Kono ka ku siyala inze mu lukile ni ba ba kenile, mu ka tabisa pilu ya Jehova.—Lisamu 11:7; Liproverbia 27:11.

18. (a) Ku tula mwa ndwa ya ku lwanisa muzamao o masila, ki kabakalañi ha ku si ko ku likani ku hana mihupulo ni lipulelo ze si ka kena? (b) Mu kona ku fumana tuso cwañi ku zwelela kwa kelezo ya Paulusi ku ba mwa Filipi?

¹⁸ Ku tula mwa ndwa ya ku lwanisa muzamao o masila, ha ku si ka likana ku hana fela mihupulo ni lipulelo ze si ka kena. Lishitanguti la Si-China li talusa kuli: “Booko mo ku si na sika bu amuhela liakalezo kamukana.” (Mu bapanye Mateu 12:43-45.) Paulusi n’a lemuhile tokwahalo ya ku taza booko bwa luna ka mihupulo ye minde, ye kenile. Kacwalo, n’a susuelize ba mwa Filipi kuli: “Linto kaufela ze li za niti, kaufela ze kutekeha, kaufela ze lukile, kaufela ze kenile, kaufela ze na ni libubo le linde, kaufela ze na ni swanelo, ni ze lukela ku lumbwa, ibe zona ze mu nze mu hupula [‘mu li eze sina yona taba ya nahanisiso ya ka tokomelo’c].”—Mafilipi 4:8.

19. Ki kabakalañi ha ku swanelwa ku itutiwa ka cisehelo Linzwi la Mulimu, mi seo si ka mi tusa cwañi mwa ku siyala inze mu kenile mwa muzamao?

¹⁹ Se si talusa ku ituta Linzwi la Mulimu ka cisehelo. (Joshua 1:8; Lisamu 1:2) Seo si ka sileleza booko ni pilu ya mina mi si ka mi tusa ku hulisa silikani sa ka butu se si tiile ni Jehova. Kamukwaocwalo mu ka ba mwa sibaka se sinde hahulu ni ku fita mwa ku tiyela litiko za ku ikenya mwa muzamao o si ka kena. Ka bunolo fela ha mu na ku ba mwa kozi ya ku tahisa kashwau kwa libizo la Jehova ni maswabi kwa lubasi lwa mina ni puteho. Ka ku fapahana, mu ka itusisa m’ata ni buikoneli bwa bunca ka nzila ye si ke ya tisa buinyazo. Ee, mu ka latelela sikuka sa bukeni bwa muzamao, kaniti luli ki bona bunde bwa ba banca ba ba fumanwa inze ba sebeleza Jehova!—Liproverbia 3:1-4.

[Litaluso za kwatasi]

Ba Banca—Ne Mu Ka Alaba Cwañi?

◻ Ki kabakalañi ha mu swanela ku buluka sipimo se si pahami sa bukeni bwa muzamao?

◻ Ki lifi lisineneketo ze tahisa kuli i be shemaeto ku buluka mayemo a kenile fapil’a Mulimu?

◻ Ki sifi se si ka mi tusa ku talimana ni shemaeto ya ku siyala inze mu kenile mwa muzamao?

◻ Ki mihato ifi ye tiile ye tokwahala kuli mu ipuluke inze mu kenile?

[Siswaniso se si fa likepe 13]

Buñata bwa bao ba ba sa li kwa makalelo a bukalibe ki banana hahulu kuli mane ha ba koni ku taleleza buikalabelo bwa bushemi