Likombwa za Puteho Baeza Musebezi wa Butokwa

MUAPOSITOLA PAULUSI naañolezi ba mwa puteho ya Filipi kuli: “Na Paulusi ni Timotea, batanga ba Kreste Jesu, niñolela babakenile kaufela babaswalisana ni Kreste Jesu mwa Filipi, hamoho ni baokameli ni likombwa za puteho.” (Mafil. 1:1) Mulemuhe kuli naalumelisize ni likombwa za puteho. Kaniti luli, baana bao nebatusa hahulu baana-bahulu mwa puteho ya mwa linako zeo. Kucwalo ni mwa linako zaluna. Likombwa za puteho baeza misebezi yetusa baokameli ili yetahisa kuli lika lizamaye hande mwa puteho.

² Kana mwaziba mizwale babali likombwa za puteho mwa puteho yamina? Kana mwaziba misebezi yebaeza yeemitusa ni yetusa batu kaufela mwa puteho? Kaniti luli Jehova waitebuha buikatazo bobaeza baana bao. Paulusi naañozi kuli: “Batu babasebeza ka mukwa omunde baipumanela libizo lelinde ni tukuluho yetuna ya kubulela ka za tumelo yabona ku Kreste Jesu.”—1 Tim. 3:13.

ZETOKWAHALA ZA MWA MAÑOLO KULI MUTU AKETIWE KUBA SIKOMBWA SA PUTEHO

³ Likombwa za puteho baswanela kuba Bakreste babanani mupilelo omunde, babaitingwa, ni babakona kueza hande misebezi yebafilwe. Lwakona kulemuha sisupo seo halunyakisisa zanaabulezi Paulusi mwa liñolo lahae lanaañolezi Timotea, hanaatalusa zetokwahala kuli mutu aketiwe kuba sikombwa, ka kubulela kuli: “Likombwa za puteho ni bona baswanela kuba babaisa pilu kwa lika, isiñi bababulela buhata, isiñi babaitupwaela waine, isiñi babanani mukwañuli wa kuipumanela lika ka kusasepahala, babaswala kunutu yekenile ya tumelo ka lizwalo lelikenile. Hape, bao balikiwe pili kuli kubonwe haiba baswanela; kihona bakasebeza sina likombwa, haubona habanyazahali. Sikombwa sa puteho ibe muuna wa musali alimuñwi, yazamaisa bana bahae hande ni kuzamaisa hande ba ndu yahae.” (1 Tim. 3:8-10, 12) Kulatelela likuka za mwa Mañolo zeo zebatokwa kukwanisa batu babaketiwa kuba likombwa za puteho kukasileleza puteho kuli isike yanyaziwa kuli ifile buikalabelo kwa batu babasa swaneli.

⁴ Ibe kuli ki banana kwa lilimo kamba ki babahulu, likombwa za puteho ki batu babatukufalelwa mwa bukombwa kweli ni kweli. Balikanyisa mutala wa Jesu ka kuba ni tukufalelo mwa bukombwa. Ka kutukufalelwa mwa bukombwa, babonisa kuli balikanyisa Jehova, yabata kuli batu bapiliswe.—Isa. 9:7.

⁵ Hape, mizwale babali likombwa za puteho batomela babañwi mutala ka mutinelo wabona, ponahalo yabona, litaba zebabulela, moya obabonisa, ni ka mupilelo wabona. Ki batu babanahana hande, mi taba yeo itahisa kuli babañwi babakuteke. Hape, baana bao baanga silikani sabona ni Jehova kuba sa butokwa, mi baisa pilu kwa misebezi yebafilwe kueza mwa puteho.—Tite 2:2, 6-8.

⁶ Baana bao “balikiwe pili kuli kubonwe haiba baswanela.” Mane niha nebasika ketiwa kale, nebabonisa kuli ki batu babatukufalezwi. Babonisize kuli babeya za Mubuso mwa sibaka sapili mwa bupilo bwabona mi babata kutusa mwa misebezi ifi kamba ifi yeliteñi. Kaniti luli ki mitala yeminde yebakona kulikanyisa babañwi mwa puteho.—1 Tim. 3:10.

MOBASEBELEZA

⁷ Likombwa za puteho baeza misebezi yeshutana-shutana yetusa mizwale ni likaizeli mwa puteho, mi habanze baeza misebezi yeo, batusa baokameli ni kubaimulula kuli babe ni nako yeñata ya kueza misebezi ya kuluta ni kulisa mutapi. Sitopa sa baana-bahulu hasifanga likombwa za puteho misebezi, sinyakisisanga buikoneli bwabona ni misebezi yetokwa kuezwa mwa puteho ka nako yeo.

⁸ Halunyakisiseñi misebezi yemiñwi yebaezanga: Muzwale yali sikombwa sa puteho ukona kufiwa musebezi wa kutalima za libuka zeluka tokwa kuitusisa ka butu ni haluya mwa bukombwa. Babañwi bakona kufiwa musebezi wa kutalima za liakaunti za puteho kamba likalulo za kukutaleza.Babañwi bakona kufiwa misebezi ya kutalima za limaikrofoni, mishini ya za mulumo, kuba balibeleli, ni kutusa baana-bahulu ka linzila zeñwi. Mi bakeñisa kuli kunani misebezi yemiñata yeswanela kuezwa kuli Ndu ya Mubuso ibabalelwe hande ni kuba yekenile, likombwa za puteho hañata bakupiwanga kutusa mwa misebezi yeo.

⁹ Mwa liputeho zeñwi, kwakonahala kuli yomuñwi ni yomuñwi wa likombwa za puteho afiwe musebezi ulimuñwi kwa misebezi yeo. Kono mwa liputeho zeñwi, sikombwa sa puteho alimuñwi ukona kufiwa misebezi yemiñata. Mi fokuñwi, likombwa za puteho basikai bakona kufiwa kueza musebezi ulimuñwi. Haiba hakuna likombwa za puteho babañata babakona kueza misebezi yeo, sitopa sa baana-bahulu sakona kuketa mizwale babañwi babakolobelizwe ili babali mutala omunde kuli baeze misebezi ya butokwa yeo. Ka kueza misebezi yeo, mizwale bao bakaba ni yeloseli yeka batusa kwapili habaka kwanisa zetokwahala kuli baketiwe kuba likombwa za puteho. Haiba hakuna mizwale mwa puteho, kaizeli yali mutala omunde wakona kukupiwa kuli atuse mwa misebezi yemiñwi, nihaike kuli sina haluziba, haakoni kuketiwa kuba sikombwa sa puteho. Mutu yali mutala omunde ki Mukreste yanani mupilelo omunde ili yebakona kulikanyisa babañwi. Ki mutu yatomela babañwi mutala omunde mwa lika zecwale ka kufumaneha kwa mikopano, kuya mwa bukombwa, yapilisana hande ni lubasi lwahae, yaketa hande za kuitabisa ka zona, ni yanani mutinelo omunde ni ponahalo yekutekeha.

¹⁰ Mwa liputeho mokunani baana-bahulu babanyinyani hahulu, likombwa za puteho babali baluti babande bakona kukupiwa kunyakisisa ni batu bababata kukolobezwa lipuzo za kolobezo zeama lituto zebalumela Bakreste. Lipuzo zeo lifumaneha mwa Litaba Zeekelizwe, “Kalulo 1: Lituto Zebalumela Bakreste.” Bakeñisa kuli “Kalulo 2: Mupilelo wa Bakreste” iama litaba za bupilo bwa mutu za ka butu, muuna-muhulu ki yena yaswanela kunyakisisa kalulo ye ni mutu yabata kukolobezwa.

¹¹ Fokuñwi, haiba kunani libaka, sitopa sa baana-bahulu sakona kushimbulula misebezi yanaaeza sikombwa sa puteho yomuñwi ni kuifa ku yomuñwi. Kono kwatusa haiba mizwale baeza musebezi ulimuñwi ka nako yetelelenyana, kakuli bakaba ni yeloseli mwa musebezi wo mi baka ueza hande.

¹² Kulikana ni miinelo ya puteho, misebezi yemiñwi yakona kufiwa kwa likombwa za puteho, ili bao zwelopili yabona ‘ilemuhiwa ka kutala ki batu kaufela.’ (1 Tim. 4:15) Haiba hakuna baana-bahulu babañata, sikombwa sa puteho wakona kuketiwa kuli abe mutusi wa muokameli wa sikwata, kamba mane kuli abe sikombwa sa sikwata, yakaetelelwa ki baana-bahulu hanzaa peta musebezi wo. Likombwa za puteho bakona kufiwa likalulo zeñwi mwa Mukopano wa Bupilo ni Bukombwa, mane ni kuzamaisa Tuto ya Bibele ya Puteho haiba kwatokwahala, ni kufa lingambolo za nyangela. Misebezi yemiñwi yakona kufiwa likombwa za puteho hakuba ni butokwi ni haiba bakwanisa zetokwahala kuli bapete misebezi yeo. (1 Pit. 4:10) Habanze batusa baana-bahulu cwalo, likombwa za puteho baswanela kueza misebezi yabona ka kuitatela.

¹³ Nihaike kuli musebezi obaeza likombwa za puteho ushutana ni obaeza baana-bahulu, ni ona ki sebelezo yekenile ku Mulimu mi utusa kuli lika lizamaye hande mwa puteho. Hamulaho wa nako, haiba likombwa za puteho baeza hande misebezi yebafilwe mi haiba bakwanisa zetokwahala kuli babe balisana ni baluti, bakona kubabaziwa ilikuli babe baana-bahulu.

¹⁴ Haiba mu mizwale baba mwa lilimo za kunonoboka kamba mu mizwale babasazo kolobezwa, kana mwaeza ka taata kuli muketiwe kuba likombwa za puteho? (1 Tim. 3:1) Bakeñisa kuli silimo ni silimo kunani batu babañata babasweli kutaha mwa bulapeli bwa niti, kutokwahala baana babakwanisize zetokwahala, ili babatiile kwa moya, babakato swala misebezi yeezwa mwa puteho. Mwakona kubonisa kuli mwatabela kufiwa misebezi yeo ka kutusa babañwi. Mukatusiwa haiba munahanisisa mutala wa Jesu. (Mat. 20:28; Joa. 4:6, 7; 13:4, 5) Takazo yamina ya kutusa babañwi ikahula hamuka iponela tabo yetiswa ki kufana. (Lik. 20:35) Kacwalo, muitatelange kutusa babañwi, mutusange mwa musebezi wa kubabalela Ndu ya Mubuso, kamba muitatelange kufa lingambolo mwa Mukopano wa Bupilo ni Bukombwa muñaa ngambolo haasiyo. Kueza ka taata hape kutalusa kuli muswanela kubanga ni tuto ya ka butu kamita yeka mitusa kuba ni tulemeno twa kwa moya. (Samu 1:1, 2; Magal. 5:22, 23) Hape, muzwale yaeza ka taata ukabonisa kuli waitingwa mi wasepahala haafiwa misebezi ya kueza mwa puteho.—1 Makor. 4:2.

¹⁵ Likombwa za puteho baketilwe ka moya okenile kuli batuse puteho. Ba mwa puteho kaufela bakabonisa kuli baitebuha misebezi yebaeza ka taata likombwa za puteho ka kuswalisana ni bona habanze bapeta misebezi yebafilwe. Habaeza cwalo, bakabonisa kuli baitebuha tukiso yeo yaezize Jehova ilikuli lika lizwelepili kuzamaya hande mwa lubasi lwahae.—Magal. 6:10.