Bene Kodinda Umbajinji

12 Pa mwanda wa byabuntu bya mushipiditu,+ banwe banabetu, nkisakilepo mwikale ba kubulwa kuyuka. 2 Muyukile amba pomwadi bantu ba mizo,* mwadi mutādilwa ne kongolwa na byobya bilezaleza byampikwa kunena,+ mulonda konso kobimutwala. 3 Pano nsaka muyuke amba muntu panena na mushipiditu wa Leza kakanena’mba: “Yesu i mufingwe mafingo!” kadi muntu kakokejapo kunena’mba: “Yesu i Mfumwami!” shi ke’nkapo na mushipiditu ujila.+

4 Kudi byabuntu bishileshile, ino kudi mushipiditu umo onka;+ 5 kadi kudi mingilo mishileshile,+ ino kudi Mfumwetu umo enka; 6 kadi kudi bilongwa* bishileshile, ino i Leza umo enka uloñanga’byo byonso mu muntu ne muntu.+ 7 Inoko mushipiditu umwekanga mu muntu ne muntu pa mwanda wa kamweno ka bonso.+ 8 Kimfwa, yeu i mupebwe binenwa bya* tunangu kupityila ku mushipiditu, yewa nandi binenwa bya buyuki mwendele mushipiditu umo onka, 9 mukwabo lwitabijo+ na mushipiditu umo onka, ungi nandi byabuntu bya kundapa+ na owa mushipiditu umo onka, 10 yeu kulonga bilongwa bya bukomo,+ yewa kunena bupolofeto, mukwabo kusansanya myanda inenenwe ku mushipiditu,+ mukwabo nandi ndimi palapala,+ ungi nandi kushintulula ndimi.+ 11 Inoko bino bilongwa byonso’bi biloñwanga’nka na mushipiditu umo onka’wa, wabanya ku muntu ne muntu monka mousakila.

12 Mwanda monka mwikadile umbidi umo ino udi na bipindi bingi, kadi bipindi byonso bya umbidi’wa, nansha byobidi bingi, ino i umbidi umo,+ mo monka ne Kidishitu mwine. 13 Mwanda batwe bonso twabatyijibwe na mushipiditu umo mu umbidi umo, twikale Bayuda nansha Bangidiki, twikale bapika nansha banapabo, kadi batwe bonso twatomejibwe mushipiditu umo onka’wa.

14 Mwanda na bubine, umbidi keudipo na kipindi kimo, ino i na bivule.+ 15 Shi kinyantyilo kinene amba, “Byonkidipo kikasala, nkidipo kipindi kya ku umbidi,” ke kunenapo amba kekikidipo ku umbidi. 16 Kadi shi kutwi kunene amba, “Byonkidipo diso, nkidipo kipindi kya ku umbidi,” ke kunenapo amba kekukidipo ku umbidi. 17 Shi umbidi onso wadi diso, le wadi wa kwivwana namani? Shi ao onso wadi kutwi, le wadi wa kulula luvumba namani? 18 Ino Leza walongolwele kipindi kyonso kya ku umbidi monka mwaadi usakila.

19 Shi byonso byadi kipindi kimo kyonka, le umbidi wadi wa kwikala namani? 20 Ino pano i bipindi bivule, inoko umbidi umo. 21 Diso kedikokejapo kunena kikasala’mba, “Nkidipo nobe buya,” ne kadi, mutwe keukokejapo kunena binyantyilo amba, “Nkidipo nenu buya.” 22 Inoko, bipindi bya ku ngitu bimweka’mba i bizoze kutabuka, bidi na mvubu, 23 kadi bipindi bya ku umbidi byotulanga’mba i bya bulēme butyetye, twibipanga bulēme bukatampe,+ ne bipindi byetu bimweka bu bya bumvu twibilamanga na butūkanye bukatampe, 24 abyo papo bipindi byetu binengele kusakilwa kintu nansha kimo mpika. Inoko, Leza i mupunge umbidi uno muswelo, wape bulēme bukatampe kipindi kibudilwe’bo, 25 amba kekwakikala kwilalulula mu umbidi, ino bipindi byao bikale kwita mutyima abyo bine.+ 26 Shi kipindi kimo kya ku ngitu kisusuka, bipindi bikwabo byonso bisusukanga pamo nakyo;+ kadi shi kipindi kimo kya ku ngitu kitumbijibwe ntumbo, bipindi bikwabo byonso bisangalanga pamo nakyo.+

27 Banwe mwi umbidi wa Kidishitu,+ kadi muntu ne muntu i kipindi kya ku ngitu yandi.+ 28 Kadi Leza i mutūle’ko bonso umo ne umo mu kipwilo: babajinji, batumibwa;+ ba bubidi, bapolofeto;+ ba busatu, bafundiji;+ kupwa ke bilongwa bya bukomo;+ ebiya ke byabuntu bya kundapa;+ mingilo ya bukwashi; bukomo bwa kuludika;+ ne ndimi palapala.+ 29 Le bonso i batumibwa’ni? Le bonso i bapolofeto’ni? Le bonso i bafundiji’ni? Le bonso baloñanga bilongwa bya bukomo’ni? 30 Le bonso badi na byabuntu bya kundapa’ni? Le bonso besambanga ndimi’ni?+ Le bonso i ba kushintulula’ni?*+ 31 Ino mwielelei’ko nyeke kukimba* byabuntu bikatampe kutabuka.+ Ino ami nsa kwimulombola dishinda dipityile onso.+