Bilongwa bya Mafuku wa Bubidi

6 Mu kine kitatyi’kya Solomone wanena’mba: “Yehova wanenene amba ukekala mu mfindi idi bwī.+ 2 Ino pano nakūbakila njibo ya ntumbo, kifuko kyobe kikomejibwe kya kwikala’mo nyeke.”+

3 Kupwa mulopwe waalamuka kaesela kipwilo kyonso kya Isalela papo kipwilo kyonso kya Isalela kimene.+ 4 Wanena’mba: “Yehova Leza wa Isalela atendelwe, mwine walaile tata Davida na kyakanwa kyandi, ne wafikidija na maboko andi, amba, 5 ‘Tamba difuku dyonātambije bantu bami mu ntanda ya Edipito, nkyatongele kibundi mu bisaka byonso bya Isalela mwa kūbaka njibo ya kwikala’mo dijina dyami,+ kadi nkyatongele muntu wa kwikala mutangidiji wa bantu bami bene Isalela. 6 Ino natonge Yelusalema+ mwanda wa dijina dyami dikale’mo, kadi natonge Davida abikale bantu bami bene Isalela.’+ 7 Mutyima wa tata Davida wasakile kūbaka njibo ya dijina dya Yehova Leza wa Isalela.+ 8 Ino Yehova wanena tata Davida amba, ‘Mutyima obe wasakile kūbaka njibo ya dijina dyami, kadi walongele biyampe pa kusaka kino mu mutyima obe. 9 Inoko ke abepo ukōbaka njibo, ino obe mwana okabutula* ye aye ukōbaka njibo ya dijina dyami.’+ 10 Yehova wafikidija mulao waalaile, mwanda napingakena tata Davida kadi nashikata pa lupona lwa Isalela,+ monka mwalaile’kyo Yehova.+ Naubaka ne njibo ya dijina dya Yehova Leza wa Isalela, 11 kadi natūla’mo Sanduku mudi kipwano+ kyasambile Yehova na bantu ba Isalela.”

12 Penepo waimana kumeso kwa kisōkelo kya Yehova ku meso a kipwilo kyonso kya Isalela, wabāla makasa andi.+ 13 (Mwanda Solomone wapungile lukala lwa mukuba welutūla pa bukata bwa kipango.*+ Lwadi na maboko* atano mu bula, maboko atano mu bunkimbwa, ne maboko asatu mu bwimwa; waimana’po.) Ebiya wafukata mu manwi ku meso a kipwilo kyonso kya Isalela, wabāla makasa andi mūlu,+ 14 kanena’mba: “A Yehova Leza wa Isalela, kekudipo Leza pamo bwa abe mūlu nansha pano panshi, ulama kipwano ne kulombola buswe bwa ndamatyidile ku bengidi bobe bananga ku meso obe na mutyima wabo onso.+ 15 Ubalama mulao owalaile mwingidi obe tata Davida.+ Walaile mulao na kyakanwa kyobe, kadi dyalelo’di ubafikidija’o na kuboko kobe.+ 16 Shi ke pano, a Yehova Leza wa Isalela, lama mulao owalaile mwingidi obe tata Davida powanenene amba: ‘Kekukabulwepo nansha dimo muntu wa ku musuku obe wa kushikata pa lupona lwa Isalela, shi’tu bobe bana bate mutyima ku dishinda dyabo na kunangila mu bijila byami,+ monka mowanangile abe ku meso ami.’+ 17 Shi ke pano, a Yehova Leza wa Isalela, mulao owalaile mwingidi obe Davida ufikidile.

18 “Ino le bine Leza ukashikata na bantu pano panshi?+ Tala! Madiulu, bine, diulu dya madiulu, keakokejapo kukubwana;+ le ino njibo yonaubaka papo ke pepi!+ 19 Pano tá mutyima ku milombelo ya mwingidi obe ne ku kulomba kwalomba kutōkelwa mutyima, a Yehova Leza wami, teja kwabija ne milombelo ikulomba mwingidi obe. 20 Meso obe apūtukile dya ku ino njibo dyuba ne bufuku, dya ku kifuko kowanenene amba ukatūla’ko dijina dyobe,+ kuteja milombelo ikulomba mwingidi obe dya ku kino kifuko. 21 Kadi teja kuzenza kwa mwingidi obe amba umukwashe ne kuzenza kukuzenza bantu bobe bene Isalela pobalombela dya ku kino kifuko,+ kadi ivwana kwako ku kīkalo kyobe, mwamo mūlu;+ bine ivwana ne kwibalekela.+

22 “Shi muntu walubila mukwabo, nandi wamutyipija mutyipo* ne kumūminija mutyipo* wandi, ino shi pākidi mu mutyipo* waiya kumeso kwa kisōkelo kyobe mu ino njibo,+ 23 ivwana’po mwamo mūlu ne kulonga’po kintu ne kutyibila bengidi bobe mambo na kulubwila yewa mubi ne kujokeja pa mutwe wandi+ byobya byaalongele, ne kubingija moloke na kumutela bu wampikwa mambo* ne kumupala mpalo mungya boloke bwandi.+

24 “Kadi shi bantu bobe bene Isalela abanekenibwa na walwana pa mwanda wa mambo obakupya’nka kukupya,+ ino shi abajoka ne kutumbija dijina dyobe+ kebalombela+ ne kukwisāshila ku meso obe mu ino njibo amba wibatōkelwe mutyima,+ 25 ivwana’po mwamo mūlu+ ne kulekela bantu bobe bene Isalela bubi ne kwibajokeja mu ntanda yowebapele abo ne bakulutuba babo.+

26 “Shi madiulu abashitwe ne kekukidipo mvula+ mwanda wa mambo obakupya’nka kukupya,+ ino shi abalombela dya ku kino kifuko ne kutumbija dijina dyobe, abavundamina bubi bwabo mwanda webafwijije bumvu,*+ 27 ivwana’po mwamo mūlu ne kulekela bengidi bobe bubi, ke bwa bantu bobe bene Isalela kadi, mwanda ukebafundija dishinda dyobe diyampe dyobafwaninwe kwenda’mo;+ ne kuleta mvula+ pa ntanda yobe yowapele bantu bobe bu bupyani.

28 “Shi kipupo kya nzala kibaponena ntanda,+ nansha kipupo kya misongo,+ kyanga kyūmija bidibwa, mūndila,+ kibumbo kya njie, nansha njie ya* kyonakanya;+ nansha shi walwana nabo webatēkela kasāla mu kibundi kampanda kya mu ntanda yabo*+ nansha shi kipupo kyo-kyonso nansha misongo yo-yonso ibapone,+ 29 milombelo yo-yonso,+ ne kulomba ko-konso kwa kutōkelwa mutyima+ kukalomba muntu ye-yense nansha bantu bobe bonso bene Isalela (mwanda muntu yense uyukile kilonda kyandi ne masusu andi)+ pobabāla makasa abo dya ku ino njibo,+ 30 ivwana’po mwamo mūlu, mu kīkalo kyobe,+ wibalekele,+ ne kupala muntu yense mungya mashinda andi onso, mwanda uyukile mutyima wandi (abe bunka bobe uyukile senene mutyima wa muntu),+ 31 amba bakutyine na kunangila mu mashinda obe mafuku onso obekele mu ntanda yowapele bakulutuba betu.

32 Kadi pa mwanda wa mweni kabadilwapo mu bantu bobe bene Isalela, utamba ku ntanda ya kulampe pa mwanda wa dijina* dyobe dikatampe+ ne dikasa dyobe dya bukomokomo ne kuboko kobe kōlole, shi waiya ne kulombela ku ino njibo,+ 33 ivwana’po mwamo mūlu, mu kīkalo kyobe, kadi longa byonso bikulomba mweni’wa, mwanda wa bantu bonso ba pano pa ntanda bayuke dijina dyobe+ ne kukutyina mukutyinina bantu bobe bene Isalela, kadi bayuke amba dijina dyobe dityilwanga pa ino njibo yonaubaka.

34 “Shi bantu bobe abakalu na balwana nabo mu dishinda dyokebatuma,+ ino abalombela+ kodi batadidile ku kibundi kyowatongele ne dya ku njibo yonaubaka pa mwanda wa dijina dyobe,+ 35 ivwana’po mwamo mūlu milombelo yabo ne kulomba kobakulomba wibatōkelwe mutyima kadi fikidija butyibi pa mwanda wabo.+

36 “Shi abakupi mambo (mwanda kekudipo muntu kaloñangapo bubi),+ nobe ubebalobela ne kwibapāna kudi walwana nabo, kadi balwana nabo abebaselela bu misungi mu ntanda, kulampe nansha kubwipi,+ 37 ino abajokeja ñeni yabo mu ntanda yobebaselēle’mo bu misungi, abajokela kodi kebakuzenze wibatōkelwe mutyima mu ntanda yobadi’mo bu misungi, amba, ‘Tubapi mambo kadi tubaluba; tubalonga bibi,’+ 38 kadi shi abajokela kodi na mutyima wabo onso+ ne muya* wabo onso mu ntanda ya bu musungi yobebaselēle’mo bu misungi,+ abalombela batadidile ku ntanda yabo yowapele bakulutuba babo ne ku kibundi kyowatongele+ ne ku njibo yonaubaka pa mwanda wa dijina dyobe, 39 ivwana’po mwamo mūlu, mu kīkalo kyobe, milombelo yabo ne kulomba kobakulomba wibatōkelwe mutyima, kadi fikidija butyibi pa mwanda wabo+ ne kadi lekela bantu bobe bakulubila.

40 “Shi ke pano, a Leza wami, nakwisāshila, meso obe apūtuke kadi matwi obe ateje milombelo ilombelwa mu* kino kifuko.+ 41 Ino pano, a Yehova Leza, kandila ku kifuko kyobe kya kukōkolokwa,+ abe ne Sanduku wa bukomo bobe. Babitobo bobe, a Yehova Leza, bavwikwe lupandilo, kadi bantu bobe ba lulamato basangele buyampe bobe.+ 42 A Yehova Leza, kokyela* mushingwe māni obe.+ Vuluka’po buswe bobe bwa ndamatyidile bowalombwele mwingidi obe Davida.”+