Boba bateja “mwana-mukaji kivila” badi na butyibi bwa kukwata: Bwa kwitabija nansha kupela lwito lwandi. Kudi bubinga buyampe botufwaninwe kunyemena busekese. Betulombola’mba “mwana-mukaji kivila” udi bwa aye unena’mba: “Mema mebwe i mayampe.” (Nki. 9:17) Le “mema mebwe” i bika? Bible ukwatañanya nsangaji ya kusambakena pamo kwa boba besongele na mema atalaja mutyima. (Nki. 5:​15-18) Ba mwana-mulume ne mwana-mukaji besongele mungya bijila babwanya kutana nsangaji mu kusambakena pamo kwa mu busongi bwabo. Inoko i bishile bininge na “mema mebwe.” Ano mema mebwe abwanya kufunkila pa busekese nansha kusambakena pamo kupelejibwe. Kuno kusambakena pamo kwikalanga kwa mu bufyafya, pamo’nka na mwibilanga ngivi bintu mu bufyafya. “Mema mebwe” abwanya kumweka nakampata bu mayampe shi boba balonga busekese bamona bu kekudipo muntu uyukile byobalonga. Kuno shako ko kwiongola! Yehova umonanga bintu byonso. Kekudipo kintu kibi mpata bwa kujimija kwitabijibwa na Yehova. O mwanda kekudipo kintu kiyampe mu kulonga bino bintu.—1 Ko. 6:​9, 10. w23.06 p. 22 mus. 7-9

Le i bika byofwaninwe kulonga shi milombelo yobe ke ya kūlukūlu nansha kukisangelapo monka busapudi na mafuku kunyuma? Kokafula ku kulanga’mba kukidipo na mushipiditu wa Leza. Wi muntu wa kubulwa kubwaninina, kadi mwiivwanino obe ubwanya kushinta kyaba ne kyaba. Shi ubashilula kutyepeja bupyasakane, langulukila pa kimfwa kya mutumibwa Polo. Nansha byaālongele bukomo bwa kwiula Yesu, wādi uyukile amba kyaba kimo wādi ubulwa mutyima wa kulonga bintu byaādi usaka kulonga. Polo wādi usumininwe kuvuija mwingilo wandi nansha shi ubudilwe mutyima wa kwiwingila mu kine kitatyi’kya. Ne abe nobe, kokakwata butyibi mungya mwiivwanino obe wa kubulwa kubwaninina. Sumininwa’mba ukalonga byoloke nansha shi kudipo na mutyima wa kwibilonga. Shi wendelele kulonga byobya byoloke, mwiivwanino obe ukashinta mu kupita kwa kitatyi.—1 Ko. 9:16. w24.03 p. 11-12 mus. 12-13

Netu tubwanya kulombola’mba tusenswe batutu ne bakaka na kupwana nabo. (2 Ko. 6:​11-13) Tubwanya kuningija buswe botwibasenswe na kuta mutyima pa ngikadila yabo miyampe. Shi twifunde kumona bantu bakwabo mwibamwena Yehova, tukalombola’mba twibasenswe. Buswe bukekala bwa mvubu mpata pa kyamalwa kikatampe. Le Yehova uketukinga namani pakashilula kyamalwa kikatampe? Tutalei byāsoñenye Yehova bantu bandi pobātambilwe bulwi na Babiloni wa kala. Wēbasoñenye amba: “A bantu bami, endai, katwelei mu byumba byenu bya munda, kadi shitai bibelo byenu. Fyamai kitatyi kityetye Kufika ne bipita bukalabale.” (Isa. 26:20) Bimweka’mba bino binenwa bitutala ne batwe bakatanwa na kyamalwa kikatampe. w23.07 p. 6-7 mus. 14-16