Yukana bu muntu wa mutyima unekena. Wiipangule amba: ‘Le bantu bamonanga bu wa mutyima unekena ne witabija binena bakwabo? Nansha le bamonanga bu muntu wa kasuminiji, wa kominija, nansha wa mutwe mūmu? Le ntejanga bakwetu ne kwitabija milangwe yabo ponso pobibwanika?’ Muswelo otwikele na mutyima unekena ulombolanga motwiwila ba Yehova ne Yesu. Tunenwe kwikala na mutyima unekena shi kubaikala kushinta mu bwetu būmi. Kushinta kumo kubwanya kwituletela bikoleja byoketwadipo tulangila. Kimfwa, batwe bonso tubwanya kutanwa na misongo mikomo mu kitulumukila. Kadi kushinta kwa misokwe mu kitulumukila nansha kwa myanda ya politike kubwanya kwituletela makambakano makomo mu bwetu būmi. (Mus. 9:11) Enka ne kushinta kwa mu bulongolodi kubwanya kwitutūla pa ditompo. Tubwanya kwibidila kushinta’kwa shi tulonge bino bintu biná: (1) itabija kushinta, (2) tala byobwanya kulonga mu kine kitatyi’ka, (3) tá mutyima pa bintu biyampe, ne (4) kwasha bantu bakwabo. w23.07 p. 21-22 mus. 7-8

Mupolofeto Danyele wākidi nkasampe pobāmuselele bu mukutwa kudi bene Babiloni, kulampe na yabo ntanda. Inoko Danyele wātulumwine bene Babiloni bāmuselele. Bāmwene “byobya bimweka na meso”—amba Danyele wādi ‘wampikwa kabulema kadi muyampe mpala,’ ne amba wātambile ku kisaka kya mvubu mpata. (1 Sa. 16:7) O mwanda bene Babiloni bāmufundije mwanda wa ekale muntu wa mvubu mpata mu babo bantu. (Dan. 1:​3, 4, 6) Yehova wāsenswe Danyele mwanda wa mwiendelejo muyampe waādi nao. Kadi bimweka bu Danyele wākidi’tu enka na kintu kya myaka 20 pāmutelele Yehova amba udi pamo bwa ba Noa ne Yoba, bene bāmwingidile na kikōkeji mu bula bwa myaka mivule. (Ngo. 5:32; 6:​9, 10; Yoba 42:​16, 17; Ezk. 14:14) Ne kadi Yehova wāendelele kusanswa Danyele mu būmi bwandi bonso bulampe kadi bwa kasekuseku.—Dan. 10:​11, 19. w23.08 p. 2 mus. 1-2

Shi kokwata butyibi bwa kupota njibo ukasaka kubandaula moikadile kada ne kada katala njibo yokimba kupota. Bino ye byotubwanya ne kulonga kitatyi kyotutanga Bible ne kwifunda’ye. Shi utanga’tu bukidibukidi, ubwanya kuyuka’mo’tu enka myanda ya kyalwilo—ko kunena’mba “bintu bya kyalwilo bya binenwa bikola bya Leza.” (Bah. 5:12) Inoko, pamo enka bwa muntu ukimba kupota njibo, twela “munda” ubandaule kanda ne kanda na katentekeji. Muswelo muyampe wa kwifunda Bible i wa kubandaula mukwatañenine bipindi palapala bya musapu udi’mo. Longa bukomko bwa kwivwanija bubine bwine boitabije ne kine kyowibwitabijije. Pa kwivwanija senene Kinenwa kya Leza, tufwaninwe kwifunda bubine bwa mushike budi’mo. Mutumibwa Polo wākankamikile banababo bene Kidishitu befunde Kinenwa kya Leza na kininga, mwanda wa bevwanije “ne pa mfulo mwikadile bunkimbwa ne bulampe ne bula bwa mūlu ne bula bwa munshi” bwa bubine. Mu uno muswelo, bādi ba kwikadila’ko “bāle miji kadi bashimatyije” mu lwitabijo. (Ef. 3:​14-19) Netu ye byotufwaninwe kulonga. w23.10 p. 18 mus. 1-3