KIFUNDWA 03
Lelo Ubwanya Kukulupila Byobya Binena Bible?
Bible i mulaye bintu bivule, kadi uletanga madingi mavule mene. Padi udi na mutyima wa kuyuka byobya byafundija, pakwabo kadi, ye uno utatana. Lelo ubwanya kukulupila milao ne madingi a mu dibuku dya kala bininge namino? Lelo ubwanya bine kukulupila byobya binena Bible pa mwanda utala būmi bwa nsangaji dyalelo ne mu mafuku a kumeso? Bantu bavule i bamukulupile. Tutale shi nobe ubwanya kumukulupila.
1. Lelo Bible i dibuku dya myanda ya bine’ni nansha dya mfumo bitupu?
Bible witela bu udi na “binenwa byoloke bya bubine.” (Musapudi 12:10) Usekununanga myanda ya bine īsambila pa bantu bādi’ko bine. (Tangai Luka 1:3; 3:1, 2.) Balembi ba mānga ne befundi ba bintu bya kala bavule i betabije amba mafuku a myeji matumbe, bantu, bifuko, ne binkumenkume bitelelwe mu Bible i bya bine.
2. Mwanda waka tubwanya kunena’mba Bible ukidi na mvubu nansha byadi wa kala?
Mu myanda mivule, Bible udi na myanda yādi keiyukenepo mu kitatyi kyaālembelwe. Kimfwa, i mutenge myanda itala sianse. Myanda mivule ya sianse yanenene yādi ipatanibwa mu kine kitatyi’kya. Inoko sianse ya dyalelo i mitabije amba Bible unenanga bya binebine. Aye i ukulupilwa “kyaba kyonso, dyalelo ne nyeke.”—Ñimbo ya Mitōto 111:8.
3. Mwanda waka tubwanya kukulupila byobya binena Bible pa mafuku a kumeso?
Mu Bible mudi bupolofetoa buvule bwālaile “bintu kebyalongekele.” (Isaya 46:10) Wālaile pampikwa kwitupa myanda keibadika ya mu mānga, myaka mivule kumeso kwa kulongeka’yo. Kadi wālaile ne myanda mivule ilongeka dyalelo mu ino ntanda kamo ne kamo. Tusa kubandaula bupolofeto bumo bwa mu Bible mu kino kifundwa. Muswelo obufikidila i utulumukwa bininge!
LANGULUKA BININGE
Bandaula muswelo ukwatañene myanda ya sianse dyalelo na Bible, kadi kimba bupolofeto bumobumo bwa mu Bible butulumukwa.
4. Sianse ibaitabija binena Bible
Mu kitatyi kya kala, bantu bavule bādi balanga’mba ntanda ishikete pa kintu kampanda. Talai VIDEO.
Tala byobya bilembelwe mu mukanda wa Yoba pano ke padi myaka 3 500. Tangai Yoba 26:7, ne kwisambila pa kino kipangujo:
Mwanda waka binenwa bya amba ntanda ‘iyelanga patuputupu’ i bitulumukwa?
Bantu baivwanije mujokolokelo wa mema ke mu myaka ya 1 800. Ino, tala byānenene kala Bible myaka tununu kunyuma. Tangai Yoba 36:27, 28, ne kwisambila pa bino bipangujo:
Mwanda waka bino binenwa bya mujokolokela mema i bitulumukwa?
Lelo bisonekwa byotwatanga bibakomeja kikulupiji kyobe mu Bible?
5. Bible wālaile binkumenkume bikatampe
Tangai Isaya 44:27–45:2, ne kwisambila pa kino kipangujo:
Le i bika byālaile Bible kamo ne kamo pa Babiloni myaka 200 kumeso kwa kupona’ye?
Mānga ibingija’mba Mulopwe Kilusa wa Peleshia pamo ne kibumbo kyandi kya bulwi bātambile kibundi kya Babiloni mu 539 Y.K.b Bākupwidile mema a munonga pafula mwine wādi ulamine kibundi. Abo pa kutwela mu kibundi, bātana bibelo bishale pululu, bēkikwata pampikwa ne kulwa kwine. Dyalelo, Babiloni i mushale masala, pano ke padi myaka 2 500. Tala byālaile Bible.
Tangai Isaya 13:19, 20, ne kwisambila pa kino kipangujo:
Lelo byobya bifikīle Babiloni bibingija namani amba buno bupolofeto i bufikidile?
Mumwekela masala a Babiloni mu Irake dyalelo
6. Bible wālaile bintu byotumona dyalelo
Bible utela kino kyetu kitatyi amba “mafuku a mfulo.” (2 Temote 3:1) Tala byobya byālaile Bible pa kino kitatyi.
Tangai Mateo 24:6, 7, ne kwisambila pa kino kipangujo:
Le i ngikadilo’ka yālaile Bible amba ikekala’ko mu mafuku a mfulo?
Tangai 2 Temote 3:1-5, ne kwisambila pa bino bipangujo:
Lelo i ngikadila’ka yātelele Bible imweka mu bantu bavule dyalelo?
Le abe i yepi yokodi mumone?
BANTU BAMO BANENANGA’MBA: “Bible i dibuku dya mfumo ne ñano bitupu.”
Molangila, i bukamoni’ka bulengeja twitabije amba Bible i ukulupilwa?
MU KĪPI
Mānga, sianse, ne bupolofeto, byonso bilombola’mba Bible i ukulupilwa.
Pitulukai’mo
Lelo Bible i kitabo kya myanda ya bine’ni nansha ya kufwatakanya?
Le i mu myanda’ka mumo mukwatañene sianse na byobya binena Bible?
Le ulanga Bible ulayanga bintu bya kumeso? Mwanda waka ubalondolola nankyo?
KIMBA
Lelo mu Bible mudi ne myanda ya bubela itala sianse?
“Le Sianse Itabije Binena Bible?” (Kishinte kya pa Entelenete)
I myanda’ka ya bine itala “mafuku a mfulo”?
“Bupolofeto 6 bwa mu Bible Bomona Bufikidila” (Kiteba kya Mulami, 1 Kweji 6, 2011)
Wifunde uyuke mwāfikidile bupolofeto bwa mu Bible bwisambila pa Umbikalo wa Ngidiki.
Tala bupolofeto bwa mu Bible mobwashintyile muswelo wadi umona muntu umo Bible.
“Nadi Nkulupile Amba Leza I Kutupu’ye” (Kiteba kya Mulami No. 5 2017)
a Mu bupolofeto mubadilwa ne musapu utamba kudi Leza wisambila pa myanda ya kumeso.
b Bilembwa Y.K. bishintulula’mba “Yesu Kaile,” ebiya bilembwa Y.M. bishintulula’mba “Yesu Ke Mwiye.”