Bipangujo Bya Batangi
Mwanda waka nsekununi ya Mateo itala būmi bwa pa bwanuke bwa Yesu i mishile na ya Luka?
Nsekununi ya Mateo itala kubutulwa kwa Yesu ne būmi bwandi bwa pa bwanuke i mishile na ya Luka, mwanda bano balembi i besambile bininge yeu pa muntu ungi, au nandi pa muntu mukwabo.
Nsekununi ya Mateo i misambile bininge pa myanda itala Yosefa. Ilombola byālongele Yosefa paāyukile amba Madia waimita, kilotwa kyāmushintulwidile’mo mwikeulu mwikadile uno mwanda, ne mwaālondēle madingi a mwikeulu. (Mateo 1:19-25) Kadi ilombola mwādyumwininwe Yosefa na mwikeulu mu kilotwa anyemene mu Edipito na kyandi kisaka ne muswelo waākōkēle. Kadi Mateo witusapwila’mba Yosefa wālotele kilotwa mwaāmwene mwikeulu umusapwila ajokele mu ntanda ya Isalela, kupwa wājoka ne kukwata butyibi bwa kushikata na kyandi kisaka mu Nazala. (Mateo 2:13, 14, 19-23) Mu mashapita abidi mabajinji a mu Evanjile ya Mateo, i mutele’mo Yosefa misunsa mwānda, inoko Madia misunsa iná kete.
Inoko, nsekununi ya Luka ayo isambila bininge padi Madia. Ilombola mwaēndēle mwikeulu Ngabudyele kukapempula Madia, ne Madia paākapempwile mwanabo Edisabeta ne binenwa bya Madia byaātendele Yehova. (Luka 1:26-56) Kadi ilombola ne myanda yāsapwidilwe Madia na Shimioni pa mwanda utala masusu ādi atengēle Yesu. Kadi Luka ulombola ne kitatyi kyaēndele Yesu ne kyabo kisaka ku tempelo paādi na myaka 12. Kadi mu ino nsekununi, Luka i mutele’mo binenwa bya Madia, ino bya Yosefa mpika, kadi witulombola’mba Madia wālamine ino myanda mu mutyima wandi. (Luka 2:19, 34, 35, 48, 51) Mu mashapita abidi mabajinji a Evanjile ya Luka, i mutele’mo Madia misunsa 12, inoko Yosefa misunsa 3 kete. Nanshi Mateo i mwitusapwile myanda mivule itala pa milangwe ne bilongwa bya Yosefa. Inoko, Luka aye, i mwisambile bininge pa milangwe ya Madia ne myanda yāēmwenine.
Kadi musuku wa kisaka kya Yesu i mulembwe mu muswelo mwishile mu ano Evanjile abidi. Mateo i mulembe musuku wa kisaka kya Yosefa ne kulombola’mba Yesu mwanā Yosefa wa bulelwa wādi na kyepelo kya mungya bijila kya ku bulopwe bwa Davida. Mwanda waka? Mwanda Yosefa i wa ku kisaka kya Mulopwe Davida kupityila kudi Solomone mwanā Davida. (Mateo 1:6, 16) Inoko, Luka i mulembe musuku wa kisaka kya Madia ne kulombola’mba Yesu wādi na kyepelo kya ku mashi kya ku bulopwe bwa Davida “mwendele ngitu.” (Loma 1:3) Mwanda waka? Mwanda Madia i wa ku kisaka kya Mulopwe Davida kupityila kudi Natana mwanā Davida. (Luka 3:31) Ino mwanda waka Luka katelelepo Madia bu mwanā Hedi, shandi? Mwanda mu mukanda wa myanda ya misuku mwādi mulembwa’nka mitwe ya bisaka. Nanshi Luka paātelele Yosefa bu mwanā Hedi, bantu bāivwanije amba Yosefa i muko wa Hedi.—Luka 3:23.
Musuku wa kisaka kya Yesu udi mu Evanjile ya Mateo ne ya Luka ubingija’mba Yesu i Meshiasa wālailwe na Leza. Myanda ya amba Yesu wādi wa ku musuku wa Davida yādi miyukane biyampe, enka ne Bafadiseo ne Basadusea kebādipo babwanya kupatanya ino myanda. Myanda ilembele ba Mateo ne Luka itala musuku wa kisaka kya Yesu, ikomejanga lwitabijo lwetu kadi itukulupija’mba milao yonso ya Leza ikafikidila.