1. Lelo Yesu i ani?

Yesu i kipangwa kya ku mushipiditu kikomokomo kidi momwa mūlu. Wāpangilwe na Yehova Leza kumeso kwa bintu bikwabo byonso. O mwanda mwine utelwanga bu “umbedi wa bipangwa byonso.” (Bene Kolose 1:15) Bible utelanga Yesu bu “mwana wa bunka” wa Leza, mwanda Yesu kete ye wāpangilwe na Yehova bunka bwandi. (Yoano 3:16) Yesu wāingile pabwipi na Shandi, Yehova, umukwasha’ko pa kupanga bintu bikwabo byonso. (Tangai Nkindi 8:30.) Ne panenwa pano, Yesu i mupwane bininge na Yehova. Wingilanga na kikōkeji bu “Kinenwa,” musedi wa myanda wa Leza, witusambulwila musapu wandi ne bulombodi bwandi.​—Yoano 1:14.

Tulubanga, tususuka, ne kufwa mwanda ba mulume ne mukaji babajinji ba Adama ne Eva bātombokēle Leza.a Inoko kudi lukulupilo. Yehova i mushitule dishinda dya kwitunyongolola ku mafingo a bubi ne lufu kupityila kudi Mwana wandi, Yesu Kidishitu. Bible ufundija’mba Yesu wāletele kinkūlwa kupityila ku lufu lwandi. Kinkūlwa i mfutwa ifutwanga pa kukūla muntu. Bulēme bwa būmi bwa Yesu bwa bu muntu mubwaninine yo mfutwa yaāfutyile. (Tangai Mateo 20:28.) Yesu pa kupāna kyepelo kyandi kya būmi bwa nyeke pano pa ntanda, wētushitwidile dishinda dya kumona monka byonso byājimije ba Adama ne Eva. Kadi Yesu wālombwele mobetuswelele aye ne Yehova. Kino kifundwa kisa kukukwasha ufwije’ko bininge pa lufu lwa Yesu.

1. Le tumwenanga namani dyalelo mu lufu lwa Yesu?

Byotudi bipya-mambo, tuloñanga bintu bivule bifītyija Yehova mutyima. Ino, shi twialakanye bya binebine pa bubi bwetu ne kulomba Yehova lusa kupityila kudi Yesu Kidishitu, kadi twielele’ko ne kuleka kujokela mu bilubo byetu, tubwanya kupwana na Leza bya binebine. (1 Yoano 2:1) Bible unena’mba: “Kidishitu wafwile dimo kupwididile pa mwanda wa bubi, muntu moloke pa mwanda wa bakondame, amba emufikije kudi Leza.”​—1 Petelo 3:18.

2. Le kumeso, tukamwena namani mu lufu lwa Yesu?

Yehova wātumine Yesu apāne būmi bwandi bwa bu muntu mubwaninine “amba ense ulombola lwitabijo mudi aye kakyonakanibwa, ino amone būmi bwa nyeke.” (Yoano 3:16) Kupityila ku kino kintu kyālongele Yesu, Yehova usa kulongolola bintu byonso byonenwe na butomboki bwa Adama. Nanshi, shi tulombole lwitabijo mu kitapwa kya Yesu, tukekala na dyese dya kumona būmi bwa nyeke mu paladisa pano pa ntanda!​—Isaya 65:21-23.

LANGULUKA BININGE

3. Lufu lwa Yesu i lwitukūle ku bubi ne ku lufu

VIDEO: Mwanda Waka Yesu Wāfwile?​—Kipindi 1 (2:01)

• I dyese’ka dyājimije Adama paātombokēle Leza?

Tangai Bene Loma 5:12, ne kwisambila pa kino kipangujo:

• Bubi bwa Adama i bushinte namani būmi bobe?

Tangai Yoano 3:16, ne kwisambila pa kino kipangujo:

• Mwanda waka Yehova wātumine Mwana wandi pano pa ntanda?

1. Adama wādi muntu mubwaninine wātombokēle Leza ne kutwala bantu mu kashinda ka bubi ne lufu

2. Yesu wādi muntu mubwaninine wākōkele Leza ne kutwala bantu mu kashinda ka būmi bwa nyeke bubwaninine

4. Bantu bonso babwanya kumwena mu lufu lwa Yesu

VIDEO: Mwanda Waka Yesu Wāfwile?​—Kipindi 2 (2:00)

• Bantu bonso babwanya kumwena namani mu lufu lwa muntu umo?

Tangai 1 Temote 2:5, 6, ne kwisambila pa kino kipangujo:

• Adama wādi muntu mubwaninine wātwele bantu mu kashinda ka bubi ne lufu. Yesu nandi wādi muntu mubwaninine. I muswelo’ka waāpēne “kinkūlwa kyenzankane”?

5. Kinkūlwa i kyabuntu kya Yehova kodi

Balunda na Yehova bamwene kinkūlwa bu kyabuntu kyabokyabo. Kimfwa, tangai Bene Ngalatea 2:20, ne kwisambila pa kino kipangujo:

• Le mutumibwa Polo wālombwele namani amba umwene kinkūlwa bu kyabuntu kyandikyandi?

Adama pa kuluba, aye ne bana bandi bonso bātyibīlwe lufu. Ino Yehova wātumine Mwana wandi afwe mwanda wa abe umone būmi bwa nyeke.

Pomutanga ano mavese, fwatakanyai’po bidi mwēivwanine Yehova pa kumona Mwana wandi ususuka. Tangai Yoano 19:1-7, 16-18, ne kwisambila pa kino kipangujo:

• Le ubeivwana namani pa bintu byākulongēle ba Yehova ne Yesu?

MU KĪPI

Lufu lwa Yesu i lupe Yehova kyalwilo kya kwitulekela bubi bwetu, kadi i lwitupe mukenga wa kukamona būmi bwa nyeke.

Pitulukai’mo

• Mwanda waka Yesu wāfwile?

• Būmi bwa Yesu bwa bu muntu mubwaninine i kinkūlwa kyenzankane mu buluji’ka?

• I bika byobwanya kumwena mu lufu lwa Yesu?

KIMBA

Wifunde umone mwanda waka būmi bwa Yesu bwa bu muntu mubwaninine butelwa bu kinkūlwa.

“Le Kitapwa kya Yesu I ‘Kinkūlwa kya Bavule Bene’ mu Buluji’ka?” (Kishinte kya pa Entelenete)

Kimba uyuke byobya byotufwaninwe kulonga pa kupanda.

“Yesu Upandijanga​—Namani?” (Kishinte kya pa Entelenete)

Le Yehova ubwanya kulekela ne bubi bukatampe?

“Malondololo ku Bipangujo Bimanine pa Bible” (Kiteba kya Mulami, 1 Kweji 5, 2013)

Tala kwifunda myanda ya kitapwa kya Kidishitu mokwakwashishe muntu umo ashinte bumuntu bwandi.

Nkikidipo Monka Umpika wa bya Lūma” (Kishinte kya pa Entelenete)

1. Le i muswelo’ka umo otubwanya kufwija’ko Leza ne Kidishitu pa byobya byobetulongēle?

Bible ulaya’mba “ense ulombola lwitabijo mudi [Yesu]” ubwanya kwikala mūmi nyeke. (Yoano 3:16) Kulombola lwitabijo le kulomba bika ne bika? Ke kukulupilapo’tu mudi Yesu kete, mhm. Ino tusakilwa kulombola lwitabijo lwetu kupityila ku butongi botutonga ne ku bintu byotulonga. (Yakoba 2:17) Shi tulombole lwitabijo lwetu mu byotulonga ne mu byotunena, nabya tukakomeja kipwano kyetu na Yesu ne na Shandi, Yehova.​—Tangai Yoano 14:21.