• Le Bible Ubwanya Kulumbulula Būmi Bobe Namani?
    Ikala Mūmi Nyeke!—Na Kwifunda Bible
    • Kifundwa 1. Bible muputule.

      KIFUNDWA 01

      Le Bible Ubwanya Kulumbulula Būmi Bobe Namani?

      Batwe bonso twiipangulanga pa mwanda utala būmi, masusu, lufu, ne pa būmi bwa kumeso. Kadi tutele mutyima pa myanda ya bukile-bukya, kimfwa mwa kwikadila na lupeto ne mwa kwikadila na būmi bwa nsangaji mu kisaka. Bantu bavule i bamone amba Bible i mwibalondolole bipangujo bikatampe kadi wibapanga madingi a kamweno mu būmi bwabo bwa difuku ne difuku. Le ulanga kudi muntu oyukile ukokeja kumwena mu Bible?

      1. Le i bipangujo’ka bimobimo bilondolwelwe mu Bible?

      Tala bino bipangujo bya mvubu bilondolwele Bible: Lelo būmi bwāshilwile namani? I kika kyotwikadile’ko? Mwanda waka bantu basusuka? Shi muntu wafu wikalanga namani? Shi bantu bonso basakanga ndoe, mwanda waka kudi mavita mangi nenki? I bika bisa kufikila ntanda kumeso’ku? Bible witukankamika tukimbe malondololo ku bino bipangujo, kadi bantu bavule bajingulwile amba malondololo aleta Bible i a bine.

      2. Le Bible ubwanya kwitukwasha namani tusangele būmi?

      Bible witupanga madingi mayampe. Kimfwa ufundijanga bisaka mwa kwikadila na nsangaji ya bine. Witupanga madingi a mwa kulongela shi tubazumbija mutyima ne a mwa kusangela kaji ketu. Potubandaula pamo ino myanda, usa kuyuka byobya binena’po Bible ne myanda mikwabo mivule. Usa kujingulula’mba “Kisonekwa kyonso [ko kunena’mba kyonso kidi mu Bible] i kya kamweno.”​—2 Temote 3:16.

      Kino kitabo kekipingakenepo Bible. Ino kikukankamika ubandaule Bible abe mwine. O mwanda, tukukankamika utange bisonekwa bitelelwe mu bino bifundwa ne kwibidingakanya na byobya byowifunda.

      LANGULUKA BININGE

      Tala Bible mwaakwashishe bantu bavule, mobwaninya kusangela kutanga’ye, ne mwanda waka i biyampe kulomba bukwashi pa kumwivwanija.

      3. Bible ubwanya kwituludika

      Bible udi pamo bwa kitōkeji kikatampe. Shi tumwingidije, uketukwasha tukwate butyibi buyampe ne kwitulombola bintu bidi kumeso.

      Tangai Ñimbo ya Mitōto 119:105, ne kwisambila pa bino bipangujo:

      • Le mulembi wa ino ñimbo ya mitōto wādi umwene Bible namani?

      • Le abe nobe umwene Bible namani?

      Muntu umo unanga ku nkunkujo kwa dijiba kudi bimabwemabwe na kumunika kitōkeji mwaenda.

      4. Bible ubwanya kulondolola bipangujo byetu

      Kudi mwana-mukaji umo wadi na bipangujo byamukambakenye umbula bwa myaka mivule inoko Bible wamulondolola’byo. Talai VIDEO, ne kwisambila pa bino bipangujo:

      VIDEO: Kokakōka Nansha Dimo mu Lukulupilo! (1:48)

      • Mu ino video, le i bipangujo’ka byadi na uno mwana-mukaji?

      • Le kwifunda Bible kwamukweshe namani?

      Bible witukankamika kwipangula bipangujo. Tangai Mateo 7:7, ne kwisambila pa kino kipangujo:

      • Le i bipangujo’ka byodi nabyo bibwanya kulondolola Bible?

      5. Ubwanya kusangela kutanga Bible

      Bantu bavule basangelanga kutanga Bible kadi bamwenanga’mo. Talai VIDEO, ne kwisambila pa bino bipangujo:

      VIDEO: Kutanga Bible (2:05)

      • Mu ino video, le bankasampe bavule badi bamonanga namani kutanga?

      • Ino pano ke bamonenga namani kutanga Bible?

      Bible unena’mba ubwanya kwitupa bufundiji busenga ne kwitupa lukulupilo. Tangai Bene Loma 15:4, ne kwisambila pa kino kipangujo:

      • Le ubasangela byobya bilaile Bible pa mwanda utala busengi ne lukulupilo?

      6. Bantu bakwabo babwanya kwitukwasha twivwanije Bible

      Kutentekela pa kutanga Bible abo bene, bantu bavule i bamone amba kwifunda’ye na bakwabo kudi na kamweno. Tangai Bilongwa 8:26-31, ne kwisambila pa kino kipangujo:

      • Le i muswelo’ka obwanya kwivwanija Bible?​—Tala vese 30 ne 31.

      Bifwatulo: 1. Fidipa musapudi wa myanda miyampe ushintulwila mwine Efiopya Bisonekwa. 2. Kamoni umo wa Yehova wifunda Bible na lolo umo ne bana bandi babidi.

      Mwine Efiopya wādi usakilwa bamukwashe kwivwanija Bisonekwa. Dyalelo nadyo, bavule i bamone amba kwifunda Bible na bakwabo kudi na kamweno

      BANTU BAMO BANENANGA’MBA: “Kwifunda Bible i kwela kyaba.”

      • Le abe unena’po namani? Ne mwanda waka?

      MU KĪPI

      Bible witupanga madingi a kamweno mu būmi, ulondolola bipangujo bya mvubu mpata, kadi useñanga bantu ne kwibapa lukulupilo.

      Pitulukai’mo

      • I madingi’ka otubwanya kutana mu Bible?

      • Le i bipangujo’ka bimo bilondolwele Bible?

      • Le i bika byobwanya kwifunda mu Bible?

      Witungile Kitungo

      KIMBA

      Tala mwikadile Bible na kamweno dyalelo.

      “Bufundiji bwa Bible​—Tunangu twa Kamweno Nyeke” (Kiteba kya Mulami No. 1 2018)

      Tala Bible mwaakwashishe mwana-mulume umo wadi wikonda na milangwe ya kwimona bu wa bituputupu pa bwanuke.

      Mwashilwidile Būmi Bwami bwa Nsangaji (2:53)

      Tala madingi a mu Bible a kamweno atala būmi bwa kisaka.

      “Bintu 12 Bileta Nsangaji mu Kisaka” (Langukai! No. 2 2018)

      Tala Bible mwalemunwina milangwe ikalanga na bantu pa mwine uludika ntanda.

      Mwanda Waka Twifunde Bible?​—Milampe (3:14)

  • Mu Bible Mudi Musapu Witutumīne Leza
    Ikala Mūmi Nyeke!—Na Kwifunda Bible

    • 1. Shi bantu bo bālembele Bible, le kyatelelwa’mba i wa Leza i kika?

      Bible wālembelwe na balembi kubwipi kwa 40 mu bula bwa myaka kubwipi kwa 1 600, tamba mu 1513 Y.K. kufika mu 98 Y.M. Bano balembi i bantu bātambile mu bibidiji bivule. Nansha nankyo, bipindi byonso bya mu Bible i bikwatañane. Le i bibwanike’tu namani? I mwanda Leza ye Mwine ulembeje Bible. (Tangai 1 Bene Tesalonika 2:13.) Boba bālembele Bible, kebālembelepo milangwe yabo. Ino, “besambile bya kwa Leza monka mobadi baludikilwa na mushipiditu ujila.”a (2 Petelo 1:21) Leza wāingidije mushipiditu wandi ujila mwanda wa kupa bantu bukomo, kwibatonona balembe milangwe yandi.​—2 Temote 3:16.