“Bisonekwa byonsololo bisonekeja Leza shi bika, shi bika, byo bimwenwamo pa kufundija, ne kukwasha, ne kudingila madingi, ne kulombola ñeni ya umboloke; amba muntu wa Leza ēkale umbwanye byonso, ne kulongololwa biyampe senene, shē, mu mīngilo yonso milumbuluke.”—2 TEMOTE 3:16, 17.

BINE bino binenwa i bya bukomo byānene mutumibwa Polo pa kamweno kakatampe ka Bible! Inoko wādi unenena nakampata pa kipindi kya Bible kyaādi nakyo mu kitatyi’kya—bisonekwa bitelwa divule na bantu bu Kipwanino kya Kala. Ino na bubine, binenwa bitalanga bukomo bwa muswelo umo budi na mikanda yonso 66 idi mu Bible, kubadila’mo ne yoya yālembele bana ba bwanga ba Yesu ba kikōkeji ba mu myaka katwa kabajinji K.K.

Lelo umwene Bible na bulēme bukatampe pamo bwa Polo? Le ulanga amba balembi ba Bible bāpelwe bine bukomo bwa mushipiditu na Leza? Bene Kidishitu ba mu myaka katwa kabajinji bādi bakulupile’kyo. Kino kyabo kikulupiji kēkyajininepo mu bula bwa myaka tutwa yālondele’po. Kimfwa, John Wycliffe, mukulu wa kipwilo kya mu mwaka wa katwa ka 14 wa mu Angeletele, wādi umwene Bible bu “mwendeji wampikwa kukankalwa wa bubinebine.” Dibuku The New Bible Dictionary, ditela binenwa bya Polo bilembelwe kungala, amba i “bya ku bukomo bwa mushipiditu wa [Leza], o mwanda i kyeya kya bubinebine bwa byonso binene Bible.”

LELO i bika byādi bisaka kunena mutumibwa Polo pa kunena amba Bible i wa “ku bukomo bwa mushipiditu wa Leza”? (2 Temote 3:16, New World Translation) Polo wādi usaka kunena’mba Leza wāludikile balembi ba Bible kupityila ku mushipiditu sandu wandi basoneke enka bintu byaādi usaka basoneke.