Chilongesa 11
Vyuma Vafwelela Vatu naVisemwa Vyeji Kwivwisanga Kalunga Kupihya
Vyuma vika vafwelela vatu navisemwa vize vyapwa vyakuhenga? (1)
Uno vaka-Kulishitu vatela kufwelela Kalunga kupwa muUkalunga Utatu tahi? (2)
Mwomwo ika vaka-Kulishitu vamuchano kavalinga viwanyino vyakulisimasi, Ishita, chipwe vyamakumbi akusemukako? (3, 4)
Uno vafu vanahase kwenyeka vatu vavatonyi tahi? (5)
Yesu afwilile hakulusu nyi? (6)
Kwivwisanga Kalunga kuwaha chalema ngachilihi? (7)
1. Vyuma vafwelela vatu navisemwa kavyapwa vyosena vyavipiko. Oloze Kalunga ketavila vize vyakufuma mukwitava chamakuli chipwe vize vyalimbalaka nakunangula chaMbimbiliyako.—Mateu 15:6.
2. Ukalunga Utatu: Uno Yehova apwa Mutatu—vatu vatatu muKalunga umwe nyi? Nduma! Yehova, Setu, apwa ‘uka wenyi hiKalunga wamuchano.’ (Yowano 17:3; Mako 12:29) Yesu apwa Mwanenyi watwatwa, kaha eji kumwononokanga Kalunga. (Wavaka-Kolinde 1, 11:3) Ise amuhambakana Mwanenyi. (Yowano 14:28) Shipilitu wajila kayapwa mutuko; yapwa ngolo jaKalunga jize jeji kuzatanga.—Kuputuka 1:2; Vilinga 2:18.
3. Kulisimasi naIshita: HaDecember 25 keshi hakiko asemukile Yesuko. Asemukile kafwe kujiOctober 1, ngonde yize tufunga vatwaminenga kuchipapa nakulama vimuna javo naufuku. (Luka 2:8-12) Yesu kahanyine vaka-Kulishitu lushimbi lwakulinganga chiwanyino chalikumbi lyakusemuka chenyiko. Oloze, alwezele tumbaji twenyi kwanukanga kufwa chenyi. (Luka 22:19, 20) Kulisimasi navisemwa vyacho vyafuma mukwitava chamakuli chakushikulu. Chochimwe nawa navisemwa vyaIshita, vyakuzachisa maulu navambwanda. Vaka-Kulishitu vakulivanga kavalingilenga viwanyino vyaIshita naKulisimasiko, numba navaka-Kulishitu vamuchano vamakumbi ano navakivo kaveshi kuvilingako.
4. Makumbi Akusemuka: MuMbimbiliya vavulukamo viwanyino vyamakumbi akusemuka vivali kaha, vize nawa valingile kuli vatu vaze kavapwile vaka-kulemesa Yehovako. (Kuputuka 40:20-22; Mako 6:21, 22, 24-27) Vaka-Kulishitu vakulivanga kavalingilenga viwanyino vyamakumbi akusemukako. Visemwa vyakulinganga viwanyino vyamakumbi akusemuka vyafuma mukwitava chamakuli chakushikulu. Vaka-Kulishitu vamuchano veji kulihananga mawana nakulivwisanga kuwaha navakwavo hakala shimbu mukachi kamwaka.
5. Kwivwanga Woma waVafu: Vafu kaveshi kuhasa kulinga kala chuma numba tuhu kwivwako. Katweshi kuhasa kuvakafwako, kaha navakivo nawa kaveshi kuhasa kutulemekako. (Samu 146:4; Muka-kwambulula 9:5, 10) Mwono weji kufwanga; kaweshi kutwalaho lika nakuyoya hanyima yakufwako. (Ezekele 18:4) Oloze shimbu jimwe vangelo vakuhuka, vaze vavuluka ngwavo vandemone, veji kulyalumunanga kupwa vashipilitu vavafu. Visemwa vyosena vyeji kunehanga woma chipwe kulemesa vafu vyapwa vyakuhenga.—Isaya 8:19.
6. Kulusu: Yesu kafwililile hakulusuko. Afwililile hachitondo, mokomoko hakamangula. Lizu lyachiHelase lize valumuna ngwavo “kulusu” mujiMbimbiliya jajivulu, lyalumbunwine chitondo chimwe kaha. Chifwanyisa chakulusu chafuma mukwitava chamakuli chakushikulu. Kulusu kavayizachishile chipwe kuyilemesa kuli vaka-Kulishitu vakulivangako. Jino, unashinganyeka ngwove nachihasa kupwa chakwoloka kuzachisa kulusu mukulemesa Kalunga?—Lushimbi lwamuchivali 7:26; Wavaka-Kolinde 1, 10:14.
7. Chinahase kupwa chachikalu chikuma kumbila vyuma vimwe wafwelela navisemwa kanevi. Vausoko chipwe masepa vanahase kweseka kukukunyula mangana uhone kwalumuna vyuma wafwelela. Oloze kwivwisanga Kalunga kuwaha chikiko chuma chachilemu chikuma kuzomboka vatu.—Vishimo 29:25; Mateu 10:36, 37.
[Muvwimbimbi halifwo 22]
Kalunga kapwa Ukalunga Utatuko
[Mivwimbimbi halifwo 23]
Kulisimasi naIshita vyafuma mukwitava chamakuli chakushikulu
[Mivwimbimbi halifwo 23]
Kakweshi chuma chatela kutulingisa tulemese vafu chipwe kuvevwa womako