Chilongesa 12

Kuvumbika Kuyoya naManyinga

Kuyoya twatela kuchimona ngachilihi? (1)

nakufumisanga majimo? (1)

Vaka-Kulishitu vasolola ngachilihi kupwa vakuvanguluka kujiponde? (2)

Uno chapwa chakuhenga kujiha tunyama tahi? (3)

Vilinga vimwe vika vize kavyavumbika kuyoyako? (4)

Lushimbi muka ahaka Kalunga hamanyinga? (5)

Kutala lwapandama nakukuhaka manyinga mumujimba tahi? (6)

1. Yehova ikiye Kaselwoke kakuyoya. Vyuma vyakuyoya vyosena Kalunga ikiye avihana kuyoya. (Samu 36:9) Kuyoya chapwa chajila kuli Kalunga. Numba kuyoya chakemba uze achili mujimo lyanaye, chapwa chachilemu kuli Yehova. Chapwa chakuhenga kumeso aKalunga kujiha kemba wamujimo mwakuchisakula kumuchima.—Kulovoka 21:22, 23; Samu 127:3.

2. Vaka-Kulishitu vamuchano vapwa vakuvanguluka kujiponde. Veji kunyingililanga kanawa ngwavo jiminyau najizuvo javo kajeshi napondeko. (Lushimbi lwamuchivali 22:8) Vangamba jaKalunga kaveshi kuhaka kuyoya chavo muponde yakulikokela mwomwo yakusaka chiseke chipwe kuwahilila. Ngocho kaveshi kwazana mukuhema chaponde chize chakuvulumuna vakwavo mwakuchisakula kumichimako. Veji kulihenda kukuhemahema chize chika-kuneha ulyanyi.—Samu 11:5; Yowano 13:35.

3. Kuyoya chatunyama chapwa chajila kuli Samatanga. Muka-Kulishitu nahase kujiha kanyama mangana awaneko yakulya navyakuvwala mokomoko mangana alikinge kumisongo nakuponde. (Kuputuka 3:21; 9:3; Kulovoka 21:28) Oloze chakuhenga kuyanjisa tunyama chipwe kuvajiha mukuhema chakulitapa chipwe kuvajihila chiseke.—Vishimo 12:10.

4. Kunwa makanya, kutafunya mikoswa yabetel, nakunwa vitumbo vyakupendesa mwomwo yakusaka chiseke, kavyapwa vyavaka-Kulishituko. Vilinga kanevi vyapwa vyakuhenga mwomwo (1) vyeji kututenganga nge tuvandungo kuli vikiko, (2) vyeji kwenyekanga mijimba yetu, kaha (3) vyapwa vyamajilo. (Wavaka-Loma 6:19; 12:1; Wavaka-Kolinde 2, 7:1) Chapwa chachikalu kwecha jitato kana. Oloze twatela kulinga vene ngocho mangana twivwise Yehova kuwaha.

5. Manyinga nawa apwa ajila kumeso aKalunga. Kalunga amba ngwenyi mwono, mokomoko kuyoya, chatwama mumanyinga. Ngocho chapwa chakuhenga kulya manyinga. Chapwa chakuhenga nawa kulya nyama yakanyama uze kavahichishile manyinga kanawako. Nge kanyama vanalingi wakunyotolola chipwe nafwila mumuheto, kanda navamulyako. Nge vanamutape likunga chipwe vanamulozo, vatela kumuhichisa kanawa manyinga washi numba vamulye.—Kuputuka 9:3, 4; VyavaLevi 17:13, 14; Vilinga 15:28, 29.

6. Uno chapwa chakuhenga kwitavila vakuhake manyinga mumujimba nyi? Anuka ngwove, Yehova atulomba kulihenda kumanyinga. Echi chili nakulumbununa nge katwatela kutambula manyinga avakwetu vatu mukala jila yosenako, chipwe manyingetu vafumishile mumijimba yetu nakuwalama. (Vilinga 21:25) Ngocho vaka-Kulishitu vamuchano kaveshi kuketavila kuvahaka manyinga mumijimbako. Vakivo navaketavila miyachi yeka yakukilamo navitumbo, yakufwana yize yakuvahaka vitumbo vyakuhona kufumisa kumanyinga. Vasaka kuyoya, oloze kaveshi kukasaka kukinga kuyoya chavo mujila yakuhokola jishimbi jaKalungako.—Mateu 16:25.

[Mivwimbimbi halifwo 25]

Hakusaka kwivwisa Kalunga kuwaha, twatela kusosoloka kukutuhaka manyinga, kujitato jamajilo, nakujiponde jakuhona kutamo