Chilongesa 6
Palachise Yinapandama Hakamwihi!
Vyuma vyavipi vinakulingiwa hano hamavu vinakusolola nge Palachise yinapandama hakamwihi. Mbimbiliya yahanjika ngwayo natukamona myaka yayikalu shimbu kanda Palachise yizenga. Tuli jino mumyaka kaneyi! Evi vikiko vyuma vimwe yahanjika Mbimbiliya nge vikiko navikalingiwa:
Jijita jajinene. “Vaka-lifuchi limwe navakafumbukila vaka-lifuchi likwavo, vaka-wangana umwe nawa navakafumbukila vaka-wangana ukwavo.” (Mateu 24:7) Ou upolofweto unatesamo mwamuchano. Kufuma mumwaka wa 1914, kunapunga jijita jakaye jivali najijita jajindende jajivulu. Vatu jimiliyoni vanafu mujijita kaneji.
Misongo yavihita. Nakukapwa “misongo yavihita.” (Luka 21:11) Uno omu mukiko tahi? Eyo. Misongo yakufwana nge kasa, namusongo wamuchima, naTB, namusongo wamashika, naAIDS, namisongo yeka yinajihi vatu jimiliyoni.
Zala. Mukaye kosena muli vatu vamwe vanahono kulya chakutamo. Vatu jimiliyoni vanakufwanga kuzala mwaka himwaka. Echi hichinjikizo chikwavo chasolola nge Palachise kalinwaha yizenga. Mbimbiliya ngwayo: “Nakukaholoka nawa myaka yazala yakalombolombo.”—Mako 13:8.
Mindenda. “Nakukapwa . . . namindenda kweka nakweka.” (Mateu 24:7) Evi vikiko tunakumona namumakumbi ano nawa. Kufuma mumwaka wa 1914, vatu vanafu kumindenda vanahambakana hamiliyoni yimwe.
Vaka-kuhuka. Vatu navakapwa “vaka-kulizanga vavene, [na]vaka-kuzanga jimbongo.” Navakapwa “vaka-kuzanga chiseke, kavamuzanga Kalungako.” Vanyike ‘navakalikanga kuli visemi vyavo.’ (WaChimoteu 2, 3:1-5) Uno kawetavile ngwove kuli vatu vavavulu vangana makumbi anoko nyi? Kaveshi nakulemesa Kalungako, kaha veji kufwila kutangula vaze navasaka kulinangula vyaKalunga.
Uhwanga. Nakukapwa nawa ‘nakuvula chaupapwoki.’ (Mateu 24:12) Chikupu vene nawitavila ngwove makumbi ano uhwanga unatoho chikuma kuhambakana myaka yakunyima. Vatu kwosena, vali muchiwomawoma chakuvevila vyuma, kuvalyapula chipwe kuvevwisa woma.
Vyosenevi vyasolola nge Wangana waKalunga unapandama hakamwihi. Mbimbiliya ngwayo: “Omu namukamona vyumevi vili nakusolwojoka, tachikizenu ngwenu, Wangana waKalunga uli kwakamwihi.” (Luka 21:31) Wangana waKalunga chuma muka? Yapwa fulumende yaKalunga yamwilu yize nayikaneha Palachise hano hamavu. Wangana waKalunga naukashisa jifulumende javatu.—Ndanyele 2:44.