Chilongesa 7
Vyuma Vahuhumwine Kushikulu
Yehova keshi kuketavisa vatu vavapi vakenyeke Palachiseko. Masepa jenyi kaha vakivo navakatwamamo. Vyuma vika navikalingiwa kuli vatu vavapi? Hakusaka wijive, achishinganyeke hachihande chaNowa. Nowa ayoyele myaka makombakaji kushikulu. Apwile lunga wamwenemwene uze esekele chikuma kulinga vyuma asakile Yehova. Oloze vatu veka vapwilenga hamavu valingilenga vyuma vyavipi. Kaha Yehova alwezele Nowa ngwenyi Mwakaneha livaji nakunongesa vaze vaka-kuhuka vosena. Alwezele Nowa asonge wato mangana ikiye natanga yenyi vakayovoke omu nalikeza Livaji.—Kuputuka 6:9-18.
Nowa natanga yenyi vasongele wato. Nowa alwezelenga vatu ngwenyi nakukeza Livaji, oloze kavamwivwililileko. Vatwalileho lika kulinga vyuma vyavipi. Omu akumishile kusonga wato, Nowa ambachile tunyama nakuvengisa muwato, kaha ikiye natanga yenyi vengilile mukachi. Kaha Yehova anehele chijimbilanganga. Vula yanokele hamakumbi 40 namusana naufuku. Hamavu hosena hapwile livaji lyameya.—Kuputuka 7:7-12.
Vaka-kuhuka vafwile, oloze Nowa natanga yenyi vayovokele. Yehova avayowele kuLivaji nakuvahaka mulifuchi lyakuhona vilinga vyavipi. (Kuputuka 7:22, 23) Mbimbiliya ngwayo kunakwiza lwola omu Yehova mwakanongesa cheka vaze vanakukana kulinga vyuma vyakwoloka. Vatu vamwaza kaveshi kukavanongesako. Navakatwama haya myaka yosena muPalachise hamavu.—WaPetulu 2, 2:5, 6, 9.
Makumbi ano vatu vavavulu vanakulinganga vyuma vyavipi. Lifuchi linazale naukalu. Yehova kakavulu anakutumanga Vinjiho jenyi mangana vahuhumune vatu, oloze kavate kwavo kwivwilila kumazu aYehova. Kavate kwalumuna jijila javo. Kavate kwitavila vyuma anakuhanjika Kalunga havyuma vyakwoloka nevi vyakuhenga. Vyuma vika navikasoloka kuvatu vangana? Uno likumbi limwe navakalumuka tahi? Vavavulu kaveshi kukalumukako. Lwola lunakwiza omu vaka-kuhuka vosena navakavanongesa kaha kaveshi kukapwako chekako.—Samu 92:7.
Mavu kaveshi kukawanongesako; navakawalumuna kupwa palachise. Vaze navapwa masepa jaKalunga navakatwama haya myaka yosena muPalachise hano hamavu.—Samu 37:29.