Kapetulu 3

Kwachilila kuMazu aKalunga

1. (a) VaIsalele vamwene ngachilihi nge Mazu aKalunga apwa amuchano chikupu? (b) Mwomwo ika mazu kana apwila amwaza nakuli etu nawa?

“MUNATACHIKIZA mumichima yenu yosena namumyono yenu yosena ngwenu, Kuvyuma vyamwaza vyosena vize avulukile Kalunga ketu Yehova hali etu kakwalihonene chipwe chuma chimweko. Vyosena vinasoloka lyehi kuli enu.” (Yoshuwa 23:14-16) Awa himazu ahanjikile Yoshuwa kuli vakulwane javaIsalele hanyima yakwingila muLifuchi lyaLushiko. Enga, jishiko jaYehova jateselemo chikupu. Mujimbu ou namijimbu yikwavo yamuMbimbiliya yeji kutukafwa mangana “tupwenga nalutalililo.”—Wavaka-Loma 15:4.

2. (a) Uno chatalikisa mulihi hakwamba ngwavo Mbimbiliya “va[yi]hwima kuli Kalunga”? (b) Mulimo muka twatwama nawo hakwijiva nge Mbimbiliya vayihwima kuli Kalunga?

² Numba tuhu Mbimbiliya vayisonekele kuvatu vakuheta kafwe 40, oloze Yehova ikiye Mwenyayo. Uno chalumbununa nge ikiye avalwezele kusoneka vyosena vize vyatwamamo nyi? Eyo. Alingile ngocho kuzachisa shipilitu yenyi yajila, chipwe ngwetu ngolo jenyi. Kaposetolo Paulu ahanjikile ngwenyi: “Mazu-vasonekosena vawahwima kuli Kalunga . . . mangana mutu waKalunga akazuke vyosena, akapwe kuluwa mwosena kuvilinga vyamwenemwene vyosena.” Vatu vaze vetavila mazu kana awa, veji kukavangizanga mwaya jishimbi jamuMbimbiliya.—WaChimoteu 2, 3:16, 17; Wavaka-Tesolonyika 1, 2:13.

Kafwenu Vakwenu Vayimone Kupwa Yayilemu

3. Jila muka yamwaza yakukafwilamo vatu vaze kavetavila nge Mbimbiliya kayapwa Mazu aKalungako?

³ Vatu vavavulu tweji kwambulwilanga, kavetavila Mbimbiliya kupwa Mazu aKalungako. Jino tunahase kuvakafwa ngachilihi? Jila yamwaza yakuvakafwilamo shina yakupandumuna Mbimbiliya nakuvenyikila mazu vasonekamo. “Mazu aKalunga ayoya, eji kuzatanga, avambuka kuhambakana jipoko jamikwale jauvela kuvali josena, . . . kaheji kumonangomu vyaya vishinganyeka nakulihala chamuchima.” (WavaHepeleu 4:12) “Mazu aKalunga” kawapwa nge himujimbu wakushikuluko; oloze ali nakuzata chikuma namumakumbi ano! Jishiko jamuMbimbiliya josena jeji kutesangamo. Mujimbu wamuMbimbiliya watwama nangolo jakukunyula muchima wamutu kuhambakana kala mazu akufuma mutunwa twetu.

4. Vyuma vika yalumbununa Mbimbiliya vize vinalumuna michima yavatu vamwe vetavile Mbimbiliya, kaha mwomwo ika?

⁴ Vatu vavavulu vafwelela chikuma muMbimbiliya mwomwo vamona lijina lyaKalunga lize vasonekamo. Veka vanakusaka kulinangula Mbimbiliya hakumona vyuma yahanjika kupandama kukuyoya, novyo Kalunga etavishila upi, nomu mwalumbunukila vyuma vinakulingiwa makumbi ano, nalutalililo lwakuyoya chahaya myaka yosena mupalachise hano hamavu. Mumafuchi muze mwatwama kwitava chize chinalingisa vatu vavayanjisenga kuvashipilitu vavapi, mazu amuMbimbiliya aze alumbununa vyuma vyeji kukokanga ukalu kana nomwo mwahasa mutu kusokoka, analingisa vavavulu vawahilile chikuma namazu kana. Mwomwo ika awa mazu eji kwivwisanga vatu kuwaha? Mwomwo Mbimbiliya ikiko kaha yatwama namazu akukupuka havihande vyangachize.—Samu 119:130.

5. (a) Nge vatu navamba ngwavo kavafwelela muMbimbiliyako, kaha vyuma muka pamo vyavahonesa? (b) Kaha twatela kukafwa ngachilihi vatu kana?

⁵ Nyi ngachilihi nge vatu vamwe navatulweza ngwavo kavafwelela muMbimbiliyako? Uno twatela kulitwamina kushimutwila navo tahi? Nduma, katwatela kulitwaminako chikumanyi nge veji kutwitavisanga tushimutwile navo. Pamo vamona ngwavo, Mbimbiliya himukanda wavaka-Kulishitendomu kaha. Vatu vamwe vakana kwitavila Mbimbiliya mwomwo yakwijiva Kulishitendomu kupwa muka-kulyonga uze nawa asaka kundupukila muvihande vyalifuchi nachiyulo, nakulombalombanga nawa jimbongo kuvatu. Ngachize vahulisenu kanawa muwane nge vyuma kana vikiko vene vyavahonesa. Vanahase kwivwa kuwaha nge namuvalumbunwina hatoma vilinga vyavipi vyaKulishitendomu vize vakanyisa muMbimbiliya, nakulumbununa chihandwa chatwama hakachi kavaka-Kulishitu vamwenemwene naKulishitendomu.—Mika 3:11, 12; Mateu 15:7-9; WaYakova 4:4.

6. (a) Unjiho muka watwama nawo ove wasolola nge Mbimbiliya yapwa Mazu aKalunga? (b) Unjiho muka ukwavo tunahase kuzachisa hakukafwako vatu vetavile Mbimbiliya nge chikupu vene yafuma kuli Kalunga?

⁶ Vatu vamwe unahase kuvakafwa hakuvalumbunwina hatoma unjiho wosena wasolola nge Mbimbiliya vayihwima kuli Kalunga. Unjiho muka watwama nawo yove wakulingisa mangana witavile nge Mbimbiliya yafuma kuli Yehova Kalunga? Uno wetavila Mbimbiliya mwomwo yavyuma yahanjika vyakusolola okwo yafuma tahi? Nyi wayitavila mwomwo upolofweto wauvulu watwamamo uze walumbununa vyuma navikalingiwa kulutwe, hiupolofweto uze navahasa kaha kuhwima kuli Kalunga tahi? (WaPetulu 2, 1:20, 21) Nyi pamo wetavila Mbimbiliya mwomwo vayisoneka mukulonga, numba tuhu vayisonekele kuli malunga 40 vakulisezaseza hamyaka 1,600? Nyi wayitavila hamijimbu yayo yakwoloka yahanjika kupandama kuvyuma vimwe hasayasi? Nyi wayitavila mwomwo yaumwenemwene wamalunga vaze vayisonekele? Nyi pamo mujila vayilaminyinyinemo chakuzeneka kuyenyeka kuli vaka-kole? Kala vyeshovyo vyakulingisa numba uyifwelele watela nawa kuvizachisa nakukafwako vatu veka.a

Kutanganga Chetu Mbimbiliya

7, 8. (a) Vyuma vika twatela kulinganga naMbimbiliya? (b) Vyuma vika vikwavo twatela kulinga omu natutanganga Mbimbiliya hauka? (c) Vyuma muka vinakulingisa numba wivwishise kanawa vyuma ajina Yehova?

⁷ Hakusaka kukafwa vakwetu vafwelele Mbimbiliya, nayetu vavene nawa twatela kuwananga lwola lwakuyitanganga shimbu yosena. Kutala mukiko mweji kulinganga nyi? Hamikanda yosena vasoneka, ou himukanda waulemu chikuma. Echi kachalumbununa nge twatela kukumina kaha hakuyitanganga uka wetuko nduma. Mazu-vasoneka akanyisa kulihandununa kuli vakwetu. Kanda tushinganyeka ngwetu tunahase kwivwishisa vyosena hauka wetuko. Kupwanga nachilongesa chauka nakuyanga kukukunguluka chavatu jaKalunga shimbu yosena vyasakiwa chikuma nge natusaka tupwenga vaka-Kulishitu vamwenemwene.—Vishimo 18:1; WavaHepeleu 10:24, 25.

⁸ Hakulumbununa chihandechi, Mbimbiliya yahanjika vyachilolo wakaEchopa apwile nakutanga upolofweto waIsaya. Kangelo atwaminyinyine muka-Kulishitu umwe muka-kwambulula mujimbu, Fwilipu, mangana ahulise uze lunga ngwenyi: “Owo mazu uli nakutanga anakulumbunukila tahi?” Uze kaEchopa amukumbulwile ngwenyi: “Nanguwahasa ngachilihi? shina kuvanga kuli mutu mwangulumbunwinawo.” Alwezele Fwilipu mangana amulumbunwine chize Chisoneka. Fwilipu kapwilenga mutu atangililenga Mbimbiliya kwauka wenyi nakwijiva kulumbununa Mazu-vasoneka mwaya vishinganyeka vyenyiko. Oloze alikachile nawa naliuka lyaKalunga lyahamavu. Ngachize, ahashile kukafwa uze kaEchopa mangana anganyale kuvyuma Yehova apwile nakunangula muliuka kana lize. (Vilinga 6:5, 6; 8:5, 26-35) Namakumbi ano nawa, naumwe pimbi nahase kwivwishisa vyuma ajina Yehova mukunangakana chenyi kaha. Tuvosena vatela kutukafwa navyuma vyamwaza atuwahishila Yehova kuhichila muliuka lyenyi lyahamavu.

9. Kunoneka muka vanoneka chakutanganga Mbimbiliya nachihasa kutunganyalisa tuvosena?

⁹ Liuka lyaYehova lyeji kutuhananga mikanda yayivulu yavihande vyamuVisoneka mangana yitukafwe kwivwishisa kanawa Mbimbiliya. Chikwavo nawa, Shikola yaMulimo waTeokalasi yeji kupwanga muvikungulwilo vyosena vyaVinjiho jaYehova mukaye kosena vanonekamo visoneka vyamuMbimbiliya vize twatela kutanga lwola lwosena. Tunahase kunganyala chikuma nge natukekesanga Mazu-vasoneka Ajila. (Samu 1:1-3; 19:7, 8) Shikaho tanganga Mbimbiliya shimbu yosena. Numba tuhu kaweshi kuhasa kwivwishisa Visoneka vyosenako, oloze unahase kunganyala chikuma hakupwa nachinyingi chavyuma vahanjikamo. Chakutalilaho, kachi nge nautanganga mafwo awana chipwe atanu halikumbi, kaha unahase kukumisa Mbimbiliya yosena mumwaka umwe.

10. (a) Lwola muka weji kutanganga Mbimbiliya? (b) Vatu vakwavo veya nauhasa kutanganga navo Mbimbiliya, kaha nawa mwomwo ika chapwila chachilemu kulinganga ngocho shimbu yosena?

¹⁰ Lwola muka watela kutanganga Mbimbiliya? Nge nauzachisanga minyutu 10 chipwe 15 halikumbi, kaha nachikunganyalisa chikuma. Nge pimbi, kaha unahase kunoneka lwola lwove muchalumingo, nakukakachila kulwola kana shimbu yosena. Nge mwalimbata, kaha munahase kutangilanga hamwe Mbimbiliya nalizu lyakwivwakana kuli umwe namukwavo. Nge watwama navana vaze vatachikiza kutanga, kaha vanahase kutanga umwe naumwe oku muvosena munakwivwilila. Watela kutanganga Mbimbiliya shimbu yosena mukuyoya chove chosena nge muze muweji kulyanga vyakulya. Nganomu wejiva lyehi ngwove mutu nahase kuviza misongo nge keshi nakulyanga vyakulya vyakutamoko. Shikaho kuyoya chetu chakushipilitu nalutalililo lwetu lwahaya myaka yosena vyapendamina hakulyanga “mazu akulovoka mukanwa kaKalunga osena.”—Mateu 4:4.

Vyuma Twatela Kulingila Ngocho

11. Vyuma muka twatela kufwila hakutanga Mbimbiliya?

¹¹ Vyuma muka natusaka kutangila Mbimbiliya? Katwatela kwijiva kutanga Mbimbiliya mangana tuyikumise washiwashiko, nduma. Oloze twatela kufwila kumwijiva kanawa Kalunga nakumuzanga chikuma nakumulemesa mujila yamwenemwene. (Yowano 5:39-42) Twatela kupwa namuchima nge uze apwile nawo muka-kusoneka Mbimbiliya uze asonekele ngwenyi: “Ove Yehova, ngulweze jijila jove, ngunangule omu weji kutambukilanga.”—Samu 25:4.

12. (a) Mwomwo ika chapwila chachilemu kupwa “[na]chinyingi chakwoloka,” kaha nawa vyuma muka twatela kufwila kulinga hakusaka kupwa nachinyingi kana? (b) Vishina muka viwana vize navihasa kutunganyalisa omu natutanganga Mbimbiliya? (Tala lipwata lili halifwo 30) (c) Lumbununa evi vishina hakukumbulula vihula vili muno mupalangalafu. Tanga visoneka vize vyakuzeneka kunungulula.

¹² Kulinangula chetu chakuli Yehova chatela kutulingisa tupwenga “[na]chinyingi chakwoloka.” Nge chiku, kaha natuhasa ngachilihi kuzachisa Mazu aKalunga mukuyoya chetu nakuwalumbununa kuvakwetu? (Wavaka-Kolose 3:10; WaChimoteu 2, 2:15) Kupwa nachinyingi chakwoloka chasaka kutanga nakunangakana, kaha nge chihanda chimwe chinakaluhwa kwivwishisa twatela kuchitanga cheka mangana tuchivwishise kanawa. Kuhunanana havihande natutanganga, nakushinganyekanga mwakuvizachishila nachitunganyalisa chikuma. Kuli vishina viwana vyavilemu tunawahisa vize nauhasa kuzachisa vili halifwo 30. Vihanda vyavivulu vyamuVisoneka vinahase kutunganyalisa kachi nge natuzachisa vishina kanevi. Omu naukumbulula vihula vili hamafwo anakavangizaho, naumona omu chalumbunukila kulinga ngocho.

(1) Kakavulu, Visoneka vize nautanganga vinahase kukulweza omu apwa Yehova. Chakutalilaho, hali Samu 139:13, 14, twalinangulaho omwo Kalunga azakama chikuma navakemba vachili mujimo, hakwamba ngwenyi: “Wangunungasanyine mujimo lyamama. Nangukusakwilila, mwomwo unanguzate mwakwivwisa woma mwakukomwesa, shikaho. Vilinga vyove vinapu vyakukomwesa, mwono wami unatachikiza chikuma.” Chikupu vene vilinga vyaYehova vyapwa vyakukomwesa chiyovo! Jila Kalunga atengelamo vatu yasolola zangi yenyi yakutuzanga etu.

Mazu ahali Yowano 14:9, 10 asolola nge, kala mijimbu natutanga yize yasolola omwo Yesu atwaminenga navatu, yeji kutulwezanga chikupu mwaya vilinga vyaYehova. Hakwijiva ngocho jino, vyuma vika natukukulula hali Yehova hakutanga mujimbu vasoneka hali Luka 5:12, 13 naLuka 7:11-15?

(2) Shinganyeka omu mujimbu kana wapandama kumutwe wachihande wamuMbimbiliya: mujimbu wakutohwesa wata waYehova nakutomesa lijina lyenyi naWangana kuhichila muli Yesu Kulishitu, Muka-tanga uze vashikile.

Mutwe wachihande waMbimbiliya vaushindakanyine ngachilihi kuli Ezekele naNdanyele? (Ezekele 38:21-23; Ndanyele 2:44; 4:17; 7:9-14)

Mbimbiliya yasolola ngachilihi Yesu kupwa Muka-tanga uze vashikile? (Wavaka-Ngalesha 3:16)

Mukanda waKusoloka walumbununa ngachilihi munavakatesamo ou mutwe wachihande wakuvuluka Wangana? (Kusoloka 11:15; 12:7-10; 17:16-18; 19:11-16; 20:1-3; 21:1-5)

(3) Lihulise ove yavene umone omu nauhasa kuzachisa vyuma uli nakutanganga. Chakutalilaho, kufuma hali Kulovoka swi nakuLushimbi Lwamuchivali, tweji kutanganga vilinga vyakuhuka nakulikanga chavaIsalele. Tweji kulinangula nge vishinganyeka vyavo navilinga vyavo vyavanehelele makava. Shikaho katwatela kulondezeza vilinga vyavipi vyavaIsaleleko mangana tumwivwise Yehova kuwaha. “Vyuma vyosenevi vyavawanyine vipwenga vyakutalilaho, kaha vavisonekelele kutuhuhumunetu, etu vene chinatuwane lyehi kukumisa chamyaka.”—Wavaka-Kolinde 1, 10:11.

Mujimbu waKena wakujiha Avele weji kutunangula ika? (Kuputuka 4:3-12; WavaHepeleu 11:4; WaYowano 1, 3:10-15; 4:20, 21)

Uno punga yamuMbimbiliya vahuhumuna vaka-Kulishitu vakwechi lutalililo lwamwilu yeji kuzatanga nakuli vaze vakwechi lutalililo lwakukatwama hano hamavu nyi? (Kulava 15:16; Yowano 10:16)

Mwomwo ika twatela kuzachisanga chikuma punga yamuMbimbiliya yize twejiva lyehi, numba tuhu twapwa vatwamiso yamwaza muchikungulwilo? (Wavaka-Kolinde 2, 13:5; Wavaka-Tesolonyika 1, 4:1)

(4) Shinganyeka omu nauhasa kuzachisa vyuma unakutanga hakukafwako vakwenu. Vatu vosena valizakamina haukalu wakulikangula kumujimba, shikaho tunahase kuvatangila vyuma alingile Yesu hakusolola unjiho wavyuma vyavinene vize mwakalinga omu mwakayula muWangana: “Kuli Ikiye kwayile mayongomena amanene nakutwala vaka-kumbilikita natupuputa natumama navitonji naveka vavavulu nawa. . . . Avahindwile.”—Mateu 15:30.

Veya unahase kukafwa namujimbu wakusanguka chamwana Yailu? (Luka 8:41, 42, 49-56)

13. Vyuma muka natuhasa kunganyala hakupwanga natato yakutanganga nakulinangula Mbimbiliya shimbu yosena muliuka lyaYehova?

¹³ Chikupu vene tunahase kunganyala chikuma hakutanga Mbimbiliya nge natuzachisa vishina viwana vanavuluka helu! Pundu vene, kutanga Mbimbiliya chapwa chachikalu. Oloze kutanganga Visoneka chinahase kutunganyalisa mukuyoya chetu chosena, nakutulingisa tukule kushipilitu. Kutanganga Mbimbiliya shimbu yosena nachitulingisa tupandame kuli Setu wazangi, Yehova nakuli vandumbwetu vaka-Kulishitu. Nachitukafwa nawa kulama punga ‘yakuzundula mazu akuvuluka kuyoya.’—Wavaka-Fwilipi 2:16.

[Kwinyikila chamwishi]

Kushimutwila Chakuhitulukamo

• Mwomwo ika vasonekelele Mbimbiliya nakuyilama swi nakumakumbi ano?

• Natuhasa ngachilihi kukafwa vakwetu navakivo valinangule Mbimbiliya?

• Mwomwo ika kutanganga Mbimbiliya hauka shimbu yosena chapwila changanyo? Vishina muka viwana twatela kukavangiza omu natutanganga Mbimbiliya numba tunganyale chikuma?

[Lipwata halifwo 30]

OMU NAUTANGA MBIMBILIYA, KEKESANGA VYUMA VINO

Vyumovyo vali nakukunangula kupandama kuli Yehova

Omu mujimbu kana wapandama kumutwe wachihande waMbimbiliya yosena

Omu nauhasa kukukafwa mukuyoya chove

Omu nauhasa kuuzachisa hakukafwa vakwenu