Kapetulu 5
Kulihehwa Vanakulivwisa Kuwaha Vaka-kulemesa Yehova
1, 2. (a) Kulihehwa muka chize Kalunga ahanyine valunga napwevo vakulivanga? (b) Vulukako jishimbi jimwe jakafwilenga vaAlama naEve mumulimo wavo.
VALUNGA napwevo vakulivanga vapwilenga vakulihehwa chikuma omu vavatengele kuli Yehova, kuhambakana vatu vosena makumbi ano. Limbo lyavo lyapwile Palachise, chihela chamwaza chize chapwile muMilemba yaEtene. Kavayanjilenga namisongoko, mwomwo vishinganyeka vyavo namijimba yavo nawa vyapwile vyakukupuka mwosena. Kavashinganyekelenga ngwavo likumbi limwe navakafwa nge omu chili makumbi anoko. Kaha nawa kavavatengele ngana mwamakina akuhona kushinganyekako, oloze vavatengele namuchima wakushinganyeka nakulisakwila vyakulinga vavene. Oloze hakusaka kulivwisa chize kulihehwa kana chasakiwile kuvumbika jishimbi jaKalunga.
2 Chakutalilako, achishinganyekenu hajishimbi ahakileko Kalunga hakutenga vyuma. Numba tuhu jishimbi kaneji kajapwile jakusonekako, oloze vaAlama naEve vavatengele mujila yatelelele kuvalingisa mangana vajononoke namichima yavo yosena. Zala yatelele kuvanukisa nge vatela jino kulya; kwivwa lipwila chatelelele kuvalingisa vanwenga meya; kulauka chalikumbi chatelelele kuvalingisa vasavale. Yehova avahanyine nawa mulimo wakuzata. Uze mulimo kana vavahanyine naukiko wapwile nge hilushimbi, mwomwo watelelele kuvakafwa mukutwama chavo. Vatelele kusema vana, nakuyula vyuma vyosena vyakuyoya hamavu, nakutohwesa jingiza jaPalachise jihete kwalenga mavu kwosena. (Kuputuka 1:28; 2:15) Lushimbi kana lwapwile lwakuvanganyalisa chikupu! Lushimbi kana lwavalingishile vasuuluke mumulimo wavo nakuvalingisa vazachise ngolo javo mujila yamwenemwene. Kaha nawa vapwilenga nangolo jakulisakwila vavene jila yakuhasa kulingilamo mulimo wavo vavahanyine. Chikupu vene Yehova avahanyine vyosena vize vasakile.
3. VaAlama naEve vatelele kwijiva ngachilihi kulihehwa chavo hakusakula vyakulinga?
3 Numba tuhu vaAlama naEve vavahanyine lisesa lyakulisakwila vyuma vyakulinga, oloze kachalumbunwine nge vyeshovyo valisakwililile vavene vyatelele kuneha vyuma vyamwazako nduma. Kulihehwa chavo chakulisakwila vyakulinga vatelele kuchizachisa kweseka namwaya jishimbi jaKalunga. Uno jishimbi jaKalunga vatelele kulinangulajo ngachilihi? Vatelele kwivwilila kuli Tengi yavo nakukekesa kanawa milimo yenyi. Kalunga ahanyine vaAlama naEve mangana akuzachisa vyuma valinangwile. Vatelelele kusakula vyuma kweseka namwaya vilinga vyaKalunga mwomwo vapwile vakukupuka mwosena. Chikupu vene, vatelele kwononoka nge vapwilenga namuchima wakusaka kumusakwilila Kalunga nakusaka nawa kumwivwisa kuwaha.—Kuputuka 1:26, 27; Yowano 8:29.
4. (a) Uno luze lushimbi vahanyine vaAlama naEve lwakuhona kulya kumutondo umwe kaha, lwavahonesele kupwa vakulihehwa nyi? (b) Mwomwo ika lushimbi kanelu lwapwililile lwakutamo?
4 Ngocho, Kalunga avesekele amone nge valihanyine kuli ikiye hakupwa Muka-kuvahana kuyoya nakusaka kumona nawa nge vasakile kutwama mwaya jishimbi avahanyine. Yehova ahanyine lushimbi kanelu kuli Alama ngwenyi: “Kumitondo yoseneyi yili mumilemba nauhasa kulyangako tuhu. Oloze kumutondo wakutachikijila kuwaha nakupihya kanda ukalyakoko, mwomwo halikumbi lize naukalyako naukafwa chakufwa.” (Kuputuka 2:16, 17) Eve naikiye nawa omu vakumishile kumutenga vamulwezele lushimbi kanolu. (Kuputuka 3:2, 3) Kutala lushimbi kana lwapwile lwakuvahonesa kupwa vakulihehwa nyi? Nduma. Vapwile nakulya chamwaza chachivulu chize vatelele kulya chakuzeneka kukwata kumutondo umwe kaha uze vavakanyishile. (Kuputuka 2:8, 9) Chapwile chakutamo kuli vakivo kusolola nge vejiva ngwavo mavu apwa ambala aKalunga, mwomwo ikiye awatengele. Ngocho atwama nangolo jakuhakako jishimbi jize jalita navyuma ajina nakunganyalisa vatu.—Samu 24:1, 10.
5. (a) VaAlama naEve vajimbalishile ngachilihi kulihehwa chavo vapwile nacho? (b) Vyuma vika vyashishile mukulihehwa chize valivwishilenga kuwaha vaAlama naEve, kaha chuma kana chakwata ngachilihi nahalyetu?
5 Jino vyuma vika vyasolokele? Kangelo umwe hakupwa namuchima walwiso enyekele kulihehwa chenyi nakwalumuka jino kupwa Satana, kulumbununa nge “Muka-kulikanga.” Kangelo kana ongele Eve hakumufwelelesa vyuma vyalimbalaka namwaya muchima waKalunga. (Kuputuka 3:4, 5) Alama naEve vosena vahokwele lushimbi lwaKalunga. Vajimbalishile nakulihehwa chavo hakulinga vyuma vize vavakanyishile. Vengilile muundungo washili, kaha vaputukile kufwa nge muze avahuhumwine chimweza Kalunga. Navana vavo jino hivaswanyine shili nakuputuka kulinganga vyuma vyakuhenga. Eyi shili yanehele nawa vyuma vyavipi vyakufwana nge misongo, ushinakaji, nakufwa. Muchima wakufwila kulinga vyuma vyavipi, vize vakundwiza kuli Satana walingisa jino kupwenga kulijinda, ukenya, luyanjisa, najijita jize jinajihi myono yavatu vavavulu. Echi chalihandununa nakulihehwa chize Kalunga ahanyine muyachi wavatu hakavanga!—Lushimbi lwamuchivali 32:4, 5; Yopa 14:1, 2; Wavaka-Loma 5:12; Kusoloka 12:9.
Kunatuhasa Kuwana Kulihehwa
6. (a) Kulihi okwo vatu vanahase kuwana kulihehwa chamwenemwene? (b) Kulihehwa muka apwile nakuhanjika Yesu?
6 Vyuma vyavipi vinakusolojoka makumbi ano mukaye kosena, vinakulingisa jino vatu vavavulu kutondatonda kunavahasa kuwaha kulihehwa chamwenemwene. Uno kulihi okwo vatu vanahase kuwana kulihehwa chamwenemwene? Yesu ngwenyi: “Kachi nge enu namutwamanga mumazu ami, kaha mwamuchano mutumbaji twami vene, kaha muchano namukautachikiza, kaha muchano naukamilingisa kupwa muvana vavisemi.” (Yowano 8:31, 32) Echi kulihehwa kana kachapwa ngana chize vafwila vatu hakusakula vaka-kuvayula chipwe jifulumendeko nduma. Oloze echi kulihehwa kana vanakuvuluka chapwa kulihehwa chize nachisuulwisa vatu kuukalu wavo wosena veji kumonanga. Yesu apwile nakushimutwila vyakulihehwa kufuma kuundungo washili. (Yowano 8:24, 34-36) Shikaho mutu mwapwa kambaji kaYesu Kulishitu wamuchano, eji kwalumukanga mukuyoya chenyi, nakupwa jino wakulihehwa!
7. (a) Mujila muka natuhasa kupwa vakulihehwa kushili makumbi ano? (b) Vyuma vika twatela kulinga hakusaka tupwenga vakulihehwa?
7 Echi kachalumbununa nge vaka-Kulishitu vamuchano makumbi ano vapwa vakulihehwa kukuvulumuna shiliko nduma. Navakivo vachili nakuhundangana vene mwomwo vaswana shili. (Wavaka-Loma 7:21-25) Oloze nge mutu mwatwama mwaya kunangula chaYesu, kaha mutu kana keshi kukapwa ndungo yashiliko. Shili kayeshi kupwanga nakumuyulangako. Kaha nawa keshi kukandupukila muchiyoyelo chachipi, chize nachikamulingisa akaliveyenga shimbu yosenako. Oloze mwakapwa nachivezu chamwaza kuli Kalunga mwomwo shili yenyi avulumwine kunyima vanamukonekelayo hakufwelela chenyi muwana waKulishitu. Muchima wakufwila kulinga shili unahase kwonga mutu, oloze nge mwakavangiza kunangula chaKulishitu chitoma nakukana kulinga vyuma kana, kaha mutu kana mwasolola nge kavamufungulula kushiliko.—Wavaka-Loma 6:12-17.
8. (a) Kulihehwa muka vatwama nacho vaka-Kulishitu? (b) Muchima muka twatela kusolola kuli vaka-kuyula?
8 Achishinganyeke kulihehwa tweji kulivwisanga kuwaha hakupwa tuvaka-Kulishitu. Twapwa vakulihehwa kukunangula chamakuli, nakuuloji, nakuvilinga vyeka vyashili. Kwijiva muchano havyuma vyeji kusolokanga kuvatu nge vanafu, nakusanguka chavafu vyatulingisa tulihehwe kukwivwanga woma wakufwa. Kupwa nachinyingi chakutachikiza ngwetu jifulumende javatu vakuhona kukupuka mwosena navakajishisa kuWangana waKalunga wakwoloka chatulingisa tupwenga nalutalililo lwamwenemwene. (Ndanyele 2:44; Mateu 6:10) Oloze, kulihehwa kana kachatulingisa tulikange kuli vaka-kuyula jifulumende kaneji nakujishimbi javoko nduma.—WaChituse 3:1, 2; WaPetulu 1, 2:16, 17.
9. (a) Yehova ali nakutukafwanga ngachilihi mangana tulivwise kuwaha kulihehwa makumbi ano? (b) Natuhasa ngachilihi kusakula vyuma vyamangana?
9 Yehova katwechelela twijivenga kutaka kaha jila yamwaza yakutwaminamoko nduma. Ejiva kanawa omu atutenga, navyuma vize navihasa kutusuulwisa nakutunganyalisa nawa haya myaka yosena. Ejiva kanawa vishinganyeka navilinga vize vinahase kwenyeka usoko wavatu naIkiye, pamo nakukahonesa mutu kukengila mulifuchi lyalihya. Ngocho muzangi yenyi, eji kutulwezanga vyuma vyosena kuhichila muMbimbiliya namuliuka lyenyi twamona nameso. (Mako 13:10; Wavaka-Ngalesha 5:19-23; WaChimoteu 1, 1:12, 13) Shikaho chili jino kuli yetu kusakula mwakuzachishila kulihehwa vatuhana kuli Kalunga. Kachi nge natukavangiza vyuma vatulweza muMbimbiliya, kaha natukasakulanga vyuma vyamangana, keshi nge muze alingile Alamako. Natukasolola nawa ngwetu kupwa nausoko wamwaza naYehova chikiko chuma twamona chachilemu chikuma mukuyoya chetu chosena.
Kulihehwa Chikwavo Vasaka Vatu
10. Kulihehwa chamuyachi muka vali nakufwilanga Vinjiho jaYehova vamwe?
10 Shimbu jimwe vakweze vaze vapwa Vinjiho jaYehova vasaka kachi vapwenga nakulihehwa chakulipwila. Veji kumonanga lifuchi nge lili navyuma vyamwaza chiyovo, kaha hakushinganyeka chikuma vyuma kana, cheji kuvalingisanga jino vafwile chikuma vyuma vyalimbalaka najishimbi javaka-Kulishitu vize vinalisale mukaye. Vatu kana hakavanga kaveshi kushinganyeka vyakunwa maundu akupendesa, chipwe wala, chipwe kulinga ujilako nduma. Oloze veji kuputukanga chindende chindende kulikata navatu vaze kavapwa vaka-Kulishitu vamuchanoko. Kutwala muze jino veji kuputukanga kulondezeza hanjikiso navilinga vyavatu kana.—WaYowano 3, 11.
11. Uno vishinganyeka vyakusaka kulinga kuvyuma vyakuhenga lwola lumwe vyeji kufumanga kuli veya?
11 Shimbu jimwe vishinganyeka vyakusaka kwazana muvilinga vyalimbalaka navaka-Kulishitu vyeji kufumanga kuli mutu uze alivuluka kupwa muka-kuzachila Yehova. Echi chinahase kusoloka makumbi ano, ngana muze chasolokelenga kuli vaka-Kulishitu vamwe vakushikulu. Vatu kana, kakavulu vasaka kulinga vyuma vamona vavene ngwavo vinahase kuvanehela viseke, olozenyi vyuma kana vyalimbalaka najishimbi jaKalunga. Veji kukokanga navakwavo mangana ngwavo valinge ‘viseke.’ Veji ‘kuvashikanga valihehwe, oloze vavene vapwa vandungo jakulumbuka.’—WaPetulu 2, 2:19.
12. Vyuma muka vyavipi vyeji kufumanga muvilinga vize vyalimbalaka najishimbi jaKalunga?
12 Vyuma vyeji kufumanga muviseke kakavulu vyapwa vyavipi, mwomwo vyeji kwizanga hakulikanga kujishimbi jaKalunga. Chakutalilako, uvumbi unahase kuyanjisa vishinganyeka vyamutu, nakuneha misongo, kufwa, namajimo amuujila, nakujiha malo. (Wavaka-Kolinde 1, 6:18; Wavaka-Tesolonyika 1, 4:3-8) Maundu akupendesa eji kulingisanga mutu kupwa muka-kutenuka chikuma nakasautu chipwe kuneha misongo yakufwana nge asima, kwilava meso, chiseta namatachi chipwe vene kumujiha kuvakwavo. Kaha nawa eji kwijilika mutu mwamupi nakumulingisa apwenga chihwanga. Ukalu kanou nawa weji kufumanga hakunwa chikuma wala nakupenda. (Vishimo 23:29-35) Vaze veji kulinganga vyuma kana vanahase kushinganyeka ngwavo pamo vapwa vakulihehwa, olozenyi kumana vali muundungo washili. Ocho kuyanda kana veji kumonanga vaze vafungulula kushili! Kushinganyeka hachihande kanechi oholyapwa chinahase kutukinga kuukalu wangana.—Wavaka-Ngalesha 6:7, 8.
Okwo Kweji Kufumanga Ukalu
13. (a) Vyuma veji kufwilanga vatu mumuchima vize vyeji kunehanga ukalu kakavulu vyeji kuputukanga ngachilihi? (b) Twatela kupwa navishinganyeka vyeya hakusaka kwijiva kanawa “vatu vavapi”? (c) Omu naukumbulula vihula vili mupalangalafu 13, lumbununa nawa omu Yehova amona chuma kana.
13 Achishinganyeke kuweji kuputukilanga ukalu kana. Mbimbiliya yalumbununa ngwayo: “Mutu himutu hakumweseka, kufwila chamumuchima wenyi nachimuzondola nakumwonga. Jino kufwila kana hakukumisa kwimita, hinachisema shili, kaha shili hakukula hinayisema kufwa.” (WaYakova 1:14, 15) Uno muchima weji kuputukanga ngachilihi kufwila vyuma? Muchima weji kuputukanga kufwila vyuma vize eji kushinganyekanga mutu. Kakavulu cheji kwizanga hakulikata navatu vaze kavazachisa jishimbi jamuMbimbiliya. Enga, tuvosena twatela kulihenda kukulikata “navatu vavapi.” (Wavaka-Kolinde 1, 15:33) Uno vatu vamuyachi muka katwatela kulikata navo? Nyi Yehova amona ngachilihi chihande kanechi? Kukekesa kanawa havihula vinakavangizaho nakutanga visoneka vanenyikilako nachitukafwa tuwane mwakulingila.
Uno vatu vosena vaze vasoloka kupwa vakalemesa vanahase kupwa vamwaza kulikata navo nyi? (Kuputuka 34:1, 2, 18, 19)
Kutala kuhanjika chavo, chipwe kuseseka chavo chasolola nge tunahase tuhu kulikata navo chikuma nyi? (Wavaka-Efwesu 5:3, 4)
Jino Yehova eji kwivwanga ngachilihi nge natulikata navatu vaze vahona kumuzanga? (Mijimbu 2, 19:1, 2)
Mwomwo ika twatela kuzangama navatu vaze vahona kwitavila vyuma twafwelela numba tuhu twazata navo hamwe chipwe kuyanga navo kushikola? (WaPetulu 1, 4:3, 4)
Kutalanga mivwimbimbi yahajitelevijini najisinima, nakuzachisa Internet, nakutanganga mikanda najimangazini, namapapilo amijimbu hijijila jimwe jakulikachilamo navatu. Shikaho vyuma vyamuyachi uka vyakufuma kujijila kaneji vize twatela kuzangama navyo? (Vishimo 3:31; Isaya 8:19; Wavaka-Efwesu 4:17-19)
Vatu twalikata navo veji kutusololanga kuli Yehova nge twapwa tuvatu vamuyachi muka? (Samu 26:1, 4, 5; 97:10)
14. Kulihehwa muka chinakuvandamina vaze vanakuzachisa punga yamuMazu aKalunga nakashishi?
14 Lifuchi lyalihya lyaKalunga lili hakamwihi chikupu. Fulumende yaWangana waKalunga yamwilu nayikalingisa vatu kulihehwa kuchiyulo chaSatana natulingilo twenyi twakuhuka. Kaha vyuma vyosena vize vyaneha shili kuvatu vakwononoka navakavikumisa, nakukavalingisa jino kupwa vakukupuka mwosena muvishinganyeka nakumujimba mangana vakalivwise kuwaha kuyoya chahaya myaka yosena muPalachise. Vyuma vyakutenga vyosena navikapwa vyakulihehwa kweseka “[na]shipilitu yaYehova.” (Wavaka-Kolinde 2, 3:17) Kutala nachiwaha kuhona kupwa navyumevi mwomwo kaha yakuleununa punga yamuMazu aKalunga oholyapwa nyi? Shikaho nge natufwila tuzachise kanawa kulihehwa chetu chauKulishitu makumbi ano, kaha twatela kusolola chikupu ngwetu twasaka kwingila “mukulihehwa chavana vaKalunga chaupahu.”—Wavaka-Loma 8:21.
Kushimutwila Chakuhitulukamo
• Kulihehwa chamuyachi uka valivwishilenga kuwaha valunga napwevo vakulivanga? Kulihehwa kana unahase kuchesekesa ngachilihi nechi vanakumona vatu makumbi ano?
• Kulihehwa muka vali nacho vaka-Kulishitu vamuchano? Echi kulihehwa kana chalihandununa ngachilihi nachize vamona vaka-lifuchi?
• Mwomwo ika chapwila chakuhenga kulikatanga navatu vavapi? Nge natusaka tulihandunune naAlama, kaha twatela kumona vyuma vyavipi kweseka navishinganyeka vyeya?
[Mivwimbimbi halifwo 46]
Mazu aKalunga ahuhumuna ngwawo: “Kanda muhungumukako. Kulikata navatu vavapi nachikenyeka vilika vyamwaza.”