Kapetulu 7
Vyuma Twalinangula Kuli Kalunga Hakwitavisa Vilinga vyaKuhuka
1, 2. (a) Kachi nge Yehova ajihile vaAlama naEve muEtene hahaze vene, kachi chuma kana chakwata ngachilihi halyetu? (b) Vyuma muka vyamwaza natulongesela Yehova?
KAKULUKA yetu Yakova ambile ngwenyi: “Makumbi amyaka yami ngunayoyo anapu amandende amapi.” (Kuputuka 47:9) Yopa ahanjikile nawa ngwenyi mutu “napu wamakumbi amandende, wakumona kupinda chachivulu.” (Yopa 14:1) Etu vavavulu tunamononga ukalu, navihuli nakuyanda nawa ngana muze vamwenenga vakivo. Olozenyi Kalunga kahengeseleko hakutwitavisa mangana tusemuke. Enga, vishinganyeka namijimba yetu kavyapwa vyakukupuka mwosenako, kaha nawa katweshi muPalachise muze vapwile vaAlama naEveko. Uno kachi chapwile ngachilihi nge Yehova avajihile vaAlama naEve halwola vene luze valikangile? Numba tuhu nge misongo, naushona, nakufwa kachi vyauchi, oloze namuyachi wavatu vene kachi wauchiko. Tuvosena kachi katwasemukako nawa. Oloze Kalunga mukeke yenyi etavishile vaAlama naEve kusema vana, numba tuhu vaswanyine vilinga vyakuhona kukupuka mwosena. Kaha nawa kuhichila muli Kulishitu, Yehova alongesa kukatukindulwishila vyuma ajimbalishile Alama—kuyoya chahaya myaka yosena mupalachise yahano hamavu.—Yowano 10:10; Wavaka-Loma 5:12.
2 Ocho kuwaha kana hakupwa nalutalililo lwakukatwama haya myaka yosena mulifuchi lyalihya lyaPalachise lyamilemba yamwaza chakuzeneka misongo, ushona, kukola, nakufwa, chipwe vatu vakuhuka! (Vishimo 2:21, 22; Kusoloka 21:4, 5) Numba tuhu muMbimbiliya twalinangula nge ulwilo ukiko wapwa chuma chachilemu kuli etu nakuli Yehova, oloze kuli nawa chuma chikwavo chahambakana kulema.
Mwomwo yaLijina Lyenyi Lyalilemu
3. Vyuma muka vyasolokele hakusaka kukatesamo vyuma vize Yehova ajina kukalingila vatu nakukawahisa hamavu?
3 Lijina lyaKalunga likwechi mulimo mukutesamo vyuma vize Kalunga ajina kulingila vatu namavu. Lijina lyakwamba ngwavo, Yehova, lyalumbununa nge “Eji Kulingisanga Vyuma Kupwako.” Shikaho lijina lyenyi lyamusolola kupwa ikiye Mwata Wakutenga Chosena, Muka-kujina vyuma, kaha nawa hiKalunga wamuchano. Yehova vatela kumulemesanga nakumwononoka hakupwa ikiye Mwata wakulitulaho ayula vyuma vyosena, numba jino vyuma vatenga vyosena vimone kuunda nakutwama kanawa.
4. Vyuma muka ajinyine Yehova hakutenga mavu?
4 Omu Yehova akumishile kutenga vaAlama naEve, avahanyine nawa mulimo wakuzata. Avalumbunwinyine hatoma ngwenyi, kavatengelele kuyula mavu nakukawalingisa akapwe osena Palachise kahako—oloze vatelele nawa kukasema nakukawazalisa navana vavo. (Kuputuka 1:28) Unwechi kujina kana chahonene kutesamo mwomwo yashili yavo nyi? Lijina lyaYehova wangolo josena nalikasauka nge chikupu keshi kukatesamoko vyuma ajina kukalingila vatu nakuwahisa hamavu!
5. (a) Alama naEve vavalwezele ngwavo navakafwa lwola muka nge navalya kumutondo wakutachikiza kuwaha nakupihya? (b) Yehova ateselemo ngachilihi mazwenyi ahali Kuputuka 2:17, oku nawa anakulama vyuma ajina kukalinga kupandama kukuwahisa hamavu?
5 Yehova ahuhumwine vaAlama naEve ngwenyi nge navalikanga nakulya kumutondo wakutachikiza kuwaha nakupihya, kaha navakafwa chakufwa ‘halikumbi vene lize’ navakalyako. (Kuputuka 2:17) Kwesekesa namazwenyi, Yehova avasopesele halikumbi vene lize vavulumwine nakuvavulukila kufwa. Kuli Kalunga, vaAlama naEve vafwile likumbi vene lize. Shikaho hakusaka kutesamo vyuma ajinyine kulinga hamavu, Yehova avetavishile vaseme vana shimbu kanda vafwenga. Jino hakuwana nge Kalunga amona myaka likombakaji kupwa likumbi limwe, Alama kakumishile “likumbi” lyamuunduko mwomwo ayoyele kaha myaka 930. (WaPetulu 2, 3:8; Kuputuka 5:3-5) Shikaho mazu aYehova akuvuluka lwola lwakusopesa vaAlama naEve ateselemo chikupu, kaha vyuma vyenyi ajinyine kulinga hamavu kavavihonesele hakufwa chavoko. Kaha vatu vakuhona kukupuka mwosena, navatu vakuhuka vanavechelela vatwaleho nakuyoya mukashimbu kakandende kaha.
6, 7. (a) Kwesekesa namazu ahali Kulovoka 9:15, 16, mwomwo ika Yehova etavishila upi utwaleho lika noholili? (b) Yehova asolwele ngachilihi ngolo jenyi kuli Fwalo, kaha lijina Lyenyi valijivile ngachilihi kwosena? (c) Vyuma vika navikasoloka omu navakanongesa etu tulingilo twatupi tuliko makumbi ano?
6 Vyuma ahanjikile Yehova kuli mwangana waEjipitu mumakumbi aMose vyasolola ovyo Kalunga etavishila upi kutwalaho lika. Omu Fwalo akanyishile vana vaIsalele kulovoka kufuma mulifuchi lyaEjipitu, Yehova kanongesele Fwalo hahaze veneko. Yehova atumine Vipupu Likumi mulifuchi nakusolola ngolo jenyi mujila yakulipwila. Omu Yehova ahuhumwine Fwalo vyachipupu chamuchitanu navivali, amulwezele ngwenyi chapwile chachashi kuli Ikiye kumunongesela hamwe kaha navatu jenyi nakuvafumisa mulifuchi. Oloze Yehova ambile ngwenyi: “Chamwenemwene hakiko ngunakufumakanyishila, mangana ngukakusolwele ngolo jami, kaha mangana vakambulule lijina lyami hamavu hosena.”—Kulovoka 9:15, 16.
7 Omu Yehova asokwele vaIsalele, lijina lyenyi valijivile kwosena chikupu. (Yoshuwa 2:1, 9-11) Vyuma alingile tuchili lika nakuvyanuka noholili numba tuhu munahichi lyehi myaka kafwe 3,500. Lijina lyaYehova valivilikile kwosena, hamwe kaha namuchano Wenyi. Echi chasolwele Yehova kupwa hiKalunga muka-kutesamo jishiko jenyi, uze nawa eji kuhakwilanga vangamba jenyi. (Yoshuwa 23:14) Chuma kana chasolwele nge hakupwa hiKalunga wangolo josena, nachimwe chauchi nachimuhonesa vyuma ajina kulinga. (Isaya 14:24, 27) Shikaho twatela kufwelela ngwetu, kalinwaha ahakwile vangamba jenyi vakushishika hakunongesa vilinga vyakuhuka vyatulingilo twaSatana. Ngolo jakulitulaho jaYehova naupahu walijina lyenyi kaveshi kukeza kukavivulyamako. Oloze navikanganyalisa vatu haya myaka yosena.—Ezekele 38:23; Kusoloka 19:1, 2.
‘Mangana aKalunga Akujiminyina!’
8. Vyuma vika natukolezeza Paulu vize twatela kushinganyekaho kanawa?
8 Kaposetolo Paulu hakusonekela vaka-Loma, avehwile chihula ngwenyi: “Kuli Kalunga kuli kuhengesa numba?” Kaha akumbulwile ngwenyi: “Chijilocho!” Kufumaho ashimutwilile hakeke yaKalunga nakuvuluka jino vyuma ahanjikile Yehova omu etavishile Fwalo atwaleho lika nakuyoya. Paulu alumbunwine nawa ngwenyi, etu vatu twapwa ngana mwaunonga uli mumavoko atengi. Atwalileho lika nakwamba ngwenyi: “Kaha ngachilihi, kachi nge Kalunga, hakusaka ngwenyi, asolole ndombo yenyi ajimbule ngolo jenyi, oloze hakuvitalililanga chikoki chikuma ayanjiwilile vyuma vyandombo evi natengela kuvinongesa, kaha mangana ngwenyi, luheto lwaupahu wenyi akalujimbwile havyuma vyakutetela, evi avangilile kulongesa ngwenyi, vikapwenga kuupahu, ngwetu, yetu vene, etu asanyikile nawa, keshi kuli vaYuleya kahako, oloze nakuli vaka-mafuchi eka nawa.”—Wavaka-Loma 9:14-24.
9. (a) Veya vaze vapwa “vyuma vyandombo evi natengela kuvinongesa”? (b) Mwomwo ika Yehova natalililanga chikoki vaka-kole jenyi, kaha kuvanongesa chavo nachikanganyalisa ngachilihi vaze vazanga Kalunga?
9 Kufuma halwola lwakulikanga muEtene, vosena vaze vanafumbukilanga Yehova najishimbi jenyi vanapunga “vyuma vyandombo evi natengela kuvinongesa.” Lwola lwosenelu lunahichimo, Yehova navatalililanga chikoki. Vaka-kuhuka vanatolekanga jijila jenyi, nakuyanjisa vangamba jenyi, nakujiha naMwanenyi nawa. Yehova netavisa lwola lwalusuku mangana vatu vosena valimwene kanawa ukalu watwama hakulikanga kuli ikiye nahakuliyula vatu vavene. Kaha nawa kufwa chaYesu chapwile jila yakusokwelamo vatu vakwononoka ‘nakwenyeka milimo yaLiyavolo.’—WaYowano 1, 3:8; WavaHepeleu 2:14, 15.
10. Mwomwo ika Yehova nechelela vaka-kuhuka hamyakeyi 1,900 yinahichimo?
10 Hamyaka kafwe 1,900 yinahichimo kufuma hakusanguka chaYesu, Yehova nechelela lika “vyuma vyandombo” chakuzeneka kuvinongesa. Mwomwo ika? Mwomwo napunga lika nakusakula vaze navakayula hamwe naYesu Kulishitu muWangana wenyi wamwilu. Vatu kana vaheta ku 144,000, kaha vapwa “vyuma vyakutetela” vize ahanjikile kaposetolo Paulu. Chatete, valanyine vaYuleya mangana vapwenga mulizavu lyakukayula mwilu. Kufumaho, Kalunga alanyine nawa vatu vakumafuchi eka. Yehova kavakanjikijile mangana vamuzachileko. Oloze hali vaze vetavilile namuchima wakuwahilila kuvyuma alongesele, ahanyineko vamwe kutokwa chachinene chakukayula naMwanenyi muWangana wamwilu. Kulongesa chalizavu kaneli lyamwilu chinakuya jino nakukuma.—Luka 22:29; Kusoloka 14:1-4.
11. (a) Lizavu muka lili nakunganyala jino kukutalilila chikoki chaKalunga? (b) Uno vafu navakanganyala ngachilihi?
11 Nyi ngachilihi vaze navakaswana lifuchi? Yehova hakutalilila vatu chikoki chinalingisa nawa vakungulule “liyongomena lyalinene” kufuma kumiyachi yosena. Oholyapwa jino vanavulu kuheta kujimiliyoni. Yehova afwelelesa ngwenyi eli lizavu lyahamavu nalikayovoka tuno tulingilo twavyuma nakukalivwisa kuwaha kuyoya chahaya myaka yosena mupalachise hano hamavu. (Kusoloka 7:9, 10; Samu 37:29; Yowano 10:16) Kalunga mwakasangula mayongomena avafu halwola ajina yivene, kaha navakavayula kuchiyulo chaWangana wamwilu. Mazu aKalunga ahali Vilinga 24:15 ahanjika chimweza ngwawo: “Nakukapwa kusanguka chavafu, chavaka-kwoloka nachavaka-kuhenga.”—Yowano 5:28, 29.
12. (a) Vyuma vika tunalinangula kuli Yehova hakwechelela vilinga vyakuhuka? (b) Uno weji kwivwanga ngachilihi hajijila azachisa Yehova jakukumishilamo echi chihande?
12 Kutala chuma kana chakuhenga tahi? Nduma, mwomwo muchima atwama nawo Kalunga wakufwila kutetela vatu kweseka namwaya muchima wenyi ukiko wamulingisa numba ahone kunongesa washi vaka-kuhuka, chipwe ngwetu “vyuma vyandombo.” Echi chamusolola kupwa himuka-kutetela kaha nawa wazangi. Chikwavo nawa, kupwanga nalwola lwakukekesa havyuma ajina Yehova, nachitulingisa tulinangule vyavivulu vyaikiye. Tweji kulikomokelanga havilinga vyenyi vize asolola kuli etu—chiyulo chenyi, nakutetela chenyi, nakutalilila chenyi chikoki, namangana enyi akulitulaho. Jila yamangana yize Yehova avatwililemo chihande chakuvuluka wata wenyi—chipwe ngwetu ngolo jenyi jakuyula—navakavyanukanga lika haya myaka yosena nakusolola nge chiyulo chenyi chikiko kaha chiyulo chamwaza. Nayetu tunahase kuhanjika ngana muze asonekele kaposetolo Paulu ngwenyi: “Ocho kujiminyina chaluheto lwamangana nakutachikiza vyaKalunga! Ocho kuyula chenyi, omwo vahonena kuchihehula! Nojo jijila jenyi, omwo vahonena kujilengeza!”—Wavaka-Loma 11:33.
Jila Yakusolwelamo Kulihana Chetu
13. Vyuma vika twatela kwanuka nge natumona lamba, kaha nawa vyuma vika vinahase kutukafwa kutwama mumangana?
13 Vangamba jaKalunga vavavulu vali nakumonanga ukalu mukuyoya chavo. Vachili lika nakuyanda mwomwo Kalunga kanda achinongese vaka-kuhuka nakukindulwisa vyuma afwelelesele vatu. Uno twatela kupihilila havyuma kana tahi, nyi twatela kumona vyuma kana nge hijila yambwende natuhasa nayetu nawa kusolwelamo Liyavolo kupwa muka-kwonga? Tunahase kulinga ngocho nge natwanukanga mazu akwamba ngwavo: “Ove mwanami, twamanga namangana, uwahisenga muchima wami, mangana ngukamukumbulule ou mwangutomba.” (Vishimo 27:11) Satana, uze eji kutombanga Yehova, ambile ngwenyi vatu nge navahutwa nakuyanda chipwe kuviza, kaha navaleununa Kalunga chipwe vene kumwangula. (Yopa 1:9-11; 2:4, 5) Shikaho tweji kwivwisanga Yehova kumuchima kuwaha hakwononoka kuli ikiye numba tuhu tuli mukilika, nakumupayisa Satana nge mazu ahanjikile amakuli.
14. Nganyo muka natuhasa kuwana kachi nge natupendamina hali Yehova omu natumona vyeseko?
14 Nge natupendamina hali Yehova omu natumona ukalu, kaha natupwa navilinga vyamwaza. Chakutalilako, havyuma vize ayanjile Yesu, hakiko “alinangwilile kwononoka” mujila yize kanda ononokengamo lyehi. Nayetu nawa, muvyeseko mukiko tunahase kulinangwila vilinga vyakufwana nge kutalilila vatu chikoki, kupwa nalukakachila, namuchima wakusakwilila Yehova havilinga vyenyi vyakwoloka.—WavaHepeleu 5:8, 9; 12:11; WaYakova 1:2-4.
15. Vatu veka vanahase kunganyala ngachilihi nge natukilikita nakumika omu natumona kilika?
15 Vatu veka navamonanga vyuma natulinganga. Omu vatu navamona vihuli tuli nakumona mwomwo yakuzanga vyuma vyakwoloka, kaha vamwe vanahase kwijiva jino vatu muka vapwa vaka-Kulishitu vamuchano makumbi ano. Shikaho nge navalikata nalizavu kana hakulemesa Kalunga, kaha navakalivwisa kuwaha kuyoya chahaya myaka yosena. (Mateu 25:34-36, 40, 46) Yehova naMwanenyi vasaka vatu vosena vakapwe nechi kutokwa kana.
16. Muchima tweji kusololanga halwola lwaukalu weji kusololanga ngachilihi nge twalinunga hamwe?
16 Nachiwaha nge natumonanga lwola lwaukalu kupwa hilwola lwakusolwelamo kulihana chetu kuli Yehova nakutesamo vyuma ajina! Kulinga ngocho chinahase kusolola nge tunakulinunga hamwe naKalunga naKulishitu. Yesu alombeleleko vaka-Kulishitu vamuchano vosena kuli Yehova ngwenyi: “Kangweshi kulombelava [tumbaji twenyi vaze alikachile navo chikuma] kahako, oloze navaka-kungwitavila nawa hamazu avo, mangana vosena vakapwenga umwe, nganomu uli Ove Tata muli Ami, nomu nguli Ami nawa muli Ove, mangana navakivo nawa vakapwenga muli Etu.”—Yowano 17:20, 21.
17. Vyuma muka tunahase kufwelela kachi nge natwononoka kuli Yehova?
17 Kachi nge natwononoka kuli Yehova, kaha mwakatunganyalisa chikupu. Mazwenyi amba ngwawo: “Zamenunga mbe, mupwenga muvaka-kuzeneka kusosoloka, muvulisenga chikuma kuzata milimo yaMwata makumbi osena, mwomwo munatachikiza ngwenu, Kukilikita chetu kacheshi chakulishina tuhu muli Mwatako, shikaho.” (Wavaka-Kolinde 1, 15:58) Amba cheka ngwawo: “Kalunga keshi wakuhenga numba avulyame vilinga vyenu, nazangi kana munalumbununa yakuzanga lijina lyenyi.” (WavaHepeleu 6:10) Mazu ahali WaYakova 5:11 nawa ngwawo: “Talenu, vaze vakakachilile tweji kuvavulukanga ngwetu, Vatokwa. Mwevwa lyehi kukakachila chaYopa, kaha munamono lyehi omu eji kukumishilanga Yehova, mwomwo Yehova azala nakeke, Ikiye Muka-kutetela.” Vyuma vika valingililile Yopa? “Yehova amuwahishile Yopa hakukuminyina kuhambakana hakulivanga.” (Yopa 42:10-16) Enga, Yehova ikiye “Muka-kuvafwetava navamusakasaka.” (WavaHepeleu 11:6) Chikupu vene tuli nakuvandamina wana waunene navakatuhana kulutwe—kuyoya chahaya myaka yosena mupalachise hano hamavu!
18. Vyuma muka navikalingiwa kuvishinganyeka vyakwanukanga lamba tunakumona makumbi ano?
18 Chiyulo chaWangana waKalunga nachikakumisa vyuma vyosena vyavipi vize vinayanjisanga vatu hamyaka yayivulu yinahichimo. Vatu navakawahilila chikuma nakukavulyama kuyanda chosena chiliko makumbi ano. Katweshi kukanuka cheka lamba tunamononga kunyimako. Vishinganyeka vyamwaza namilimo yakusuulwisa navakalinganga vatu mukuyoya chavo chahakumbi hakumbi mulifuchi lyalihya, navikavalingisa vakahonenga kwanuka cheka lamba vamwenenga kunyima. Yehova ngwenyi: “Nangutanga melu amahya namavu amahya, kaha vyuma vyakulivanga kaveshi kukavyanuka chekako chipwe kuvivezuka mumichima. Oloze sambwojokenunga nakukinyinyina makumbi osena kuvyumevi nguli nakutanga.” Enga, mulifuchi lyalihya lyaYehova, vaka-kwoloka navakamba ngwavo: “Kumavu kwosena kuli nakunoka nakulihulika, navalusuka nakutwa jingunda.”—Isaya 14:7; 65:17, 18.
Kushimutwila Chakuhitulukamo
• Numba tuhu Yehova netavisa vilinga vyakuhuka, oloze nasolola ngachilihi kavumbi halijina lyenyi?
• Kalunga hakwechelela “vyuma vyandombo” chinalingisa ngachilihi kutetela chenyi chihete nakuli etu?
• Vishinganyeka muka twatela kupwanga navyo halwola natumona lamba?
[Mivwimbimbi halifwo 67]
Yehova “amuwahishile Yopa hakukuminyina kuhambakana hakulivanga”