Kapetulu 11
“Vangilenu Kusakanga Wangana”
1. (a) Mwomwo ika Yesu akolezezele vaka-kumwivwilila kuvangila kutonda Wangana? (b) Chihula muka twatela kulihulisa etu vavene?
MYAKA yakuhambakana ha 1,900 yinahichimo, Yesu akolezezele vaka-kumwivwilila omu vapwile kuNgalileya ngwenyi: “Vangilenu kusakanga wangana wenyi nakwoloka chenyi [Kalunga].” Mwomwo ika avalwezelele kulinga ngocho namichima yakwanguhwa? Lwola luze atelele kuyula Kulishitu muWangana wenyi lwasolokele kupwa kwakusuku, ngwetu? Enga, oloze Wangana waMeshiya ukiko ajinyine kuzachisa Yehova hakutohwesa wata wenyi nakutesamo vyuma vyavinene ajina kukalinga hano hamavu. Vosena vaze vevwishishile omu vyalemene vyuma kana, vahashile chikupu kuhaka Wangana kulutwe mukuyoya chavo. Kachi nge chuma kana chasolokele kupwa chamuchano mulikulukaji lyamyaka lyakulivanga, nyi ngachilihi jino oholyapwa omu Kulishitu vanamuswanyisa lyehi halitanda! Shikaho mutu himutu nahase kuhulisa jino ngwenyi, Kutala kuyoya chami chasolola nge ngunakuvangila kutonda Wangana waKalunga nyi?—Mateu 6:33.
2. Vyuma vika vanakufwila chikuma vatu vamuchivulu mukuyoya chavo?
2 Makumbi ano, vatu vavavulu mukaye kosena vanakuvangila kusakasakanga Wangana. Vali nakukundwiza chiyulo chaWangana hakulinga mwaya muchima waYehova, nahakulihana vavene kuli ikiye. Tuyokutuyoku, vatu veka vavavulu nawa vanandupukila mukutondatonda vyuma vyakumujimba. Eyo, vatu vanakufwila kupwa najimbongo jajivulu, navikumba, nakundupukila muviseke. Veka nawa vanazezama namilimo yavo yakukaye. Enga, kuyoya chavo chavasolola nge vanandupukila muvyuma vyakumujimba, naviseke vyavivulu. Numba tuhu vafwelela muli Kalunga, oloze kavamuhaka kulutwe mukuyoya chavoko.—Mateu 6:31, 32.
3. (a) Luheto muka Yesu akolezezele tumbaji twenyi kusakasaka, kaha nawa mwomwo ika? (b) Mwomwo ika katwatela kulizakaminanga chikuma navyuma vyakumujimbako?
3 Yesu ahuhumwine tumbaji twenyi ngwenyi: “Kanda mukalilunjikila luheto hano hamavuko,” mwomwo luheto kana kalweshi kukelilako. Kaha atwalileho lika ngwenyi, “oloze lilunjikilenunga luheto mwilu” hakuzachila Yehova. Yesu ahuhumwine vaka-kumukavangiza ngwenyi ‘vatalisenga liso lyavo mumwe’ hakufwila kulinga mwaya muchima waKalunga. Avalwezele ngwenyi: “Kamweshi kuhasa kumuzachilanga Kalunga naluheto hamweko.” Nyi ngachilihi vyuma vyakumujimba vyakufwana nge kulya, uvwalo, namwakusavala? Yesu ahuhumwine ngwenyi “kanda muzakamina myono yenuko.” Avalwezele chakutalilako chatujila, ngwenyi Kalunga eji kuvalisanga. Yesu ahanyine vaka-kumukavangiza chakutalilako chikwavo chajitemo ngwenyi Kalunga eji kujivwikanga. Kutala, vangamba jaYehova kavalema kuhambakana vyumevi nyi? Ngocho, Yesu ambile ngwenyi: “Vangilenu kusakanga wangana wenyi nakwoloka chenyi, kaha vyosenevi navakamihakilavyo.” (Mateu 6:19-34) Kutala vilinga vyove vyasolola nge wafwelela vene ngocho nyi?
Kanda Kwechelela Muchano waWangana Ulyenyekeko
4. Kachi nge mutu mwahaka chikuma muchima wenyi kuvyuma vyakumujimba, kaha vyuma vika vinahase kulovokamo?
4 Chapwa chakutamo kuli mutu kushinganyeka havyuma vyakulikafwa navyo mutanga yenyi. Oloze nge mutu mwalizakamina chikuma havyuma vyakumujimba, kaha chinahase kumunehela ponde. Numba tuhu mwalivuluka kufwelela muWangana, oloze nge muchima wenyi wafwila vyuma vyeka, kaha muchano waWangana naulyenyeka. (Mateu 13:18-22) Chakutalilako, lwola lumwe muka-luheto ahulishile Yesu ngwenyi: “Nangulinga muka mangana ngukaswane kuyoya chahaya myaka yosena?” Uze lunga kana apwilenga navilinga vyamwaza, kaha nawa alingilenga mwamwaza kuvakwavo, oloze azangile chikuma luheto. Kahashile kuseza luheto lwenyi mangana apwenga muka-kukavangiza Kulishituko. Ngocho, alumbilishile kutokwa chenyi chize atelele kachi kukayula hamwe naKulishitu muWangana wamwilu. Yesu ambile jino ngwenyi: “Omwo chavakaluhwilava vali naluheto kwingila muwangana waKalunga!”—Mako 10:17-23.
5. (a) Vyuma vika Paulu akolezezele Chimoteu kusuuluka navyo, kaha nawa mwomwo ika? (b) Uno “kuzanga jimbongo” chapwa ngachilihi muheto waSatana uze eji kuzachisanga?
5 Mukuhita chamyaka, kaposetolo Paulu asonekelele Chimoteu uze apwile muEfwesu, nganda yaluheto. Paulu amwanwine ngwenyi: “Katwanehele chuma nachimwe hano hamavuko, kaha chipwe hakufumaho katweshi kuhasa kutwala chuma nachimweko. Oloze omu tuli navyakulya navyakuvwala, vikiko vene natusuuluka navyo.” Shikaho, chapwa chakwoloka kuli mutu kutondatonda “vyakulya navyakuvwala” vyenyi yavene navyavaka-tanga yenyi. Oloze, Paulu ahuhumwine ngwenyi: “Ava vanasake ngwavo, valivulishile luheto navaholokela mwakuveseka, namumuheto, namukufwila cheka nacheka chachivulu chakuhulama chakuvapihisa.” Satana apwa wakuzangama. Chatete, eji kwonganga mutu navyuma vize vyasoloka kupwa vyavipululu. Kufumaho, pamo nahase kuneha vyeseko vyeka vyakufwana nge kuhana mutu ukulwane hamilimo, chipwe kuhana mutu mulimo uze naumunehela jimbongo jajivulu nakumuhonesa kupwa nalwola lwakwazana muvyuma vyakushipilitu. Twatela kuzangama chikuma, mwomwo “kuzanga jimbongo” chinahase kwenyeka vyuma vyavilemu vyaWangana. Paulu ahanjikileho ngwenyi: “Vamwe hakujolovela vanahungumuka lyehi kulufwelelo, vanalituvasana namakavamavulu.”—WaChimoteu 1, 6:7-10.
6. (a) Vyuma vika twatela kulinga mangana tuhone kufwa mumuheto wakutondatonda luheto? (b) Lufwelelo muka tunahase kupwa nalwo numba tuhu vyuma vinakaluhwa chikuma mukaye kosena makumbi ano?
6 Paulu hakumuzanga chikuma ndumbwenyi Chimoteu, amuhuhumwine ngwenyi: “Ove vyumevi vichinenga” kaha nawa ngwenyi “lwako jita yamwaza yalufwelelo.” (WaChimoteu 1, 6:11, 12) Shikaho twatela kulilama chikuma kuchina navakatunongesela kumwe navilinga vyakano kaye vyakufwila luheto. Oloze nge natulinga kutesa namwaya lufwelelo lwetu, kaha Yehova keshi kukatusuvililako. Numba tuhu vyuma vikaluhwa ngachilihi, oloze mwakatuzakama nakutuhana vyuma twasaka. Paulu asonekele ngwenyi: “Twamenunga chakuzeneka kuzanga jimbongo. Suulukenunga navyumovyo muli navyo. Mwomwo Ivene [Kalunga] nambe ngwenyi, Kangweshi kwiza kukakumbilako, kangweshi kwiza kukakusezako. Shikaho natuhasa kuhanjika nakumika ngwetu, Yehova Ikiye Muka-kungukafwako, kangweshi kwivwa womako, vatu navahasa kungulinga ikaze?” (WavaHepeleu 13:5, 6) Kaha nawa Mwangana Ndavichi asonekele ngwenyi: “Ngwapwile ngumukweze, kaha jino ngunashinakaja lyehi, oloze kangwamona lyehi muka-kwoloka vanasezeko, chipwe vaka-tanga yenyi hakutondatonda vyakulya.”—Samu 37:25.
Tumbaji Vakulivanga Vahana Chakutalilako
7. Jindongi muka Yesu ahanyine tumbaji twenyi kupandama kukwambulula mujimbu, kaha mwomwo ika jindongi kana japwile jakutamo?
7 Omu Yesu akumishile kunangula vaposetolo jenyi, avatumine muIsalele nakwambulula mujimbu wamwaza, nakuvilika ngwavo: “Wangana wamelu uli kwakamwihi.” Mujimbu kana wapwile wamwaza chiyovo! Mwangana Yesu Kulishitu apwile navo hamwe. Hakuwana nge vaposetolo valihanyine vavene mumulimo waKalunga, Yesu avakolezezele mangana vafwelele muli Kalunga nakuvalweza ngwenyi mwavazakama. Kaha avambile ngwenyi: “Kanda mumbata chuma chakuya nacho mujila yenuko, chipwe mukombo, chipwe lipakumuna, chipwe kulya, chipwe jimbongo, chipwe kupwa navikuto vivaliko. Mwose muzuvo namukengila, katwamenungomwo lika nakukukatukamo nawa.” (Mateu 10:5-10; Luka 9:1-6) Yehova avazakamine navyuma vyasakiwile kumijimba yavo hakuvatambula nazumbu kuli vakwavo vaIsalele.
8. (a) Mwomwo ika Yesu ahanyinyine jindongi jajihya hakuya nakwambulula shimbu kanda afwenga? (b) Vyuma vika vaka-kukavangiza Yesu vatelele kuhaka kulutwe mukuyoya chavo?
8 Halwola lukwavo shimbu kanda Yesu afwenga, ahuhumwine vaposetolo jenyi ngwenyi kulutwe namakumbi navakamona ukalu mumulimo wavo. Navakavafumbukila hamulimo wavo kuli vilolo valifuchi, kaha vatu vavavulu muIsalele navakalitwamina kuvazumbula. Kaha nawa navakambululanga mujimbu waWangana kuli Vaka-mafuchi eka. Elu hilwola jino vatelele kumbata “lipakumuna” chipwe “kulya.” Numba tuhu vapwile jino namulimo wakutonda vyakulikafwa navyo, oloze vatelele chatete kusaka Wangana waYehova nakwoloka chenyi, nakufwelela nge Kalunga mwakisula kukilikita chavo chamwakuwanyina vyakulya navyakuvwala.—Luka 22:35-37.
9. Paulu ahakile ngachilihi Wangana kulutwe mukuyoya chenyi oku nawa anakuzakama vyuma vyakumujimba, kaha punga muka ahanyine hachumechi?
9 Kaposetolo Paulu apwile wakutalilako wamwaza hali vaze vazachishile punga yaYesu. Paulu alingishile mulimo wakwambulula kupwa watete mukuyoya chenyi. (Vilinga 20:24, 25) Kweshokwo ayile nakwambulula, alitondelelenga ivene vyuma vyakulikafwa navyo kumujimba, kaha atungilengako najimbalaka. Katalililenga kuli vakwavo mangana vamuzakamengako. (Vilinga 18:1-4; Wavaka-Tesolonyika 1, 2:9) Oloze atambwilenga nakusakwilila mawana osena vamuhanyinenga vakwavo hazangi yavo. (Vilinga 16:15, 34; Wavaka-Fwilipi 4:15-17) Paulu akolezezele vaka-Kulishitu ngwenyi kanda vasuvilila jitanga javo mwomwo yakusaka kwambululako, oloze vatela kupezalisa kanawa vawane omu navahashila kutesamo milimo yavo yosena. Avahuhumwine vakilikitenga, nakuzanga jitanga javo, nakwazananga hamwe navakwavo. (Wavaka-Efwesu 4:28; Wavaka-Tesolonyika 2, 3:7-12) Kaha nawa avakolezezele mangana vafwelelenga muli Kalunga, keshi muluhetoko, nakuzachisa kuyoya chavo mujila yize yatelele kuvasolola nge vejivile vyuma vize vyahambakana kuwaha. Kwesekesa navyuma anangwile Yesu, chuma kana chalumbunwine nge vatelele chatete kusakasaka Wangana waKalunga nakwoloka chenyi.—Wavaka-Fwilipi 1:9-11.
Vangilenu Kusakanga Wangana Mukuyoya Chenu
10. ‘Uno kuvangila kusaka Wangana’ chalumbununa ika?
10 Uno tweji kwambululanga mujimbu wamwaza waWangana nakuheta kuseteko muka? Echi chapendamina hachiyoyelo chetu nomu twamwena vyuma vyaWangana. Anukenu ngwenu Yesu kambile ngwenyi, ‘Sakasakenunga Wangana nge munahono vyakulingako.’ Hakwijiva omu walema Wangana, Yesu ahanjikile mwaya muchima waIse ngwenyi: “Sakenunga wangana wenyi.” (Luka 12:31) Numba tuhu etu vavavulu twatela kuzata mangana tuwaneko vyakulikafwa navyo kumujimba najitanga jetu, oloze kupwa nalufwelelo chinahase kulingisa kuyoya chetu chipwenga chakuzakama mulimo waWangana atuhana Kalunga. Echi, chinahase kutulingisa nawa tuzakame milimo yetu yamutanga.—WaChimoteu 1, 5:8.
11. (a) Uno Yesu alumbunwine ngachilihi ngwenyi, vatu kaveshi kutesa hamwe mukwambulula mujimbu waWanganako? (b) Vyuma muka vimwe vize vyeji kuhonesanga vatu kuzata nangolo javo josena?
11 Etu vamwe tweji kwambululanga jola jajivulu mumulimo wakwambulula mujimbu wamwaza waWangana kuhambakana vakwetu. Oloze muchishimo atele Yesu chamavu awilo akulisezaseza, alumbunwine ngwenyi vosena vaze vakwechi michima ngana yize yamavu amwaza, navakema mihako. Kutala vali nakwima mihako nyi? Chiyoyelo chavatu chapwa chakulihandununa handununa. Ushinakaji, kuvizaviza, nakulama jitanga, vyosena hivyuma vyeji kuhonesanga vatu. Chipwe ngocho, nge vatu kana vazanga chikupu kwambulula mujimbu wamwaza, kaha vanahase kutesamo mulimo wavo.—Mateu 13:23.
12. Mulimo muka wakushipilitu vakolezeza vakweze kushinganyekangaho chikuma?
12 Chapwa chamwaza kusakula vyakulinga vize navitukafwa kwazana nakutohwesa mulimo wetu waWangana. Vakweze vatela kushinganyeka kanawa hachakutalilako chamwaza chamukweze wamuka-Kulishitu Chimoteu. (Wavaka-Fwilipi 2:19-22) Chapwa chamwaza kushinganyeka kukazatako mulimo washimbu yosena omu navakumisa shikola yakukaye. Kaha vakulwane navakivo vanahase kunganyala nge navahaka vyuma vyakushipilitu kulutwe.
13. (a) Iya nahase kwijiva hakumina ngolo jetu tweji kuzatanga mumulimo waWangana? (b) Kachi nge natuvangila kusaka Wangana, kaha chuma muka natusolola hatoma?
13 Kanda natufwefulula vaze twamona ngwetu vapwa vaka-kukilikitako, oloze twatela kupwa nalufwelelo lwakufwila kuzata chikuma mangana nayetu nawa tuhase kuzachila Kalunga nangolo jetu josena kwesekesa nakatwamino ketu. (Wavaka-Loma 14:10-12; Wavaka-Ngalesha 6:4, 5) Nge muze chapwile kuli Yopa, Satana achili lika navishinganyeka vyovimwe ngwenyi tweji kuzachilanga Kalunga hakusaka kupwa naluheto, chipwe hakusaka kutwama kanawa muuhando. Oloze nge natuvangila kusaka Wangana, kaha natusolola hatoma Liyavolo kupwa muka-kwonga. Shikaho, hakulinga ngocho, hakiko tweji kuhanyinanga unjiho wakumona nge kuzachila Kalunga chikiko chapwa chatete mukuyoya chetu. Vyuma tweji kuhanjikanga nevi tweji kulinganga vyasolola nge twamuzanga chikuma Yehova, nakukundwiza wata wenyi, nakuzanga nawa vakwetu vatu.—Yopa 1:9-11; 2:4, 5; Vishimo 27:11.
14. (a) Mwomwo ika kunoneka mulimo wamuwande chapwila changanyo? (b) Vinjiho vavavulu vali nakwazana mumulimo wamuwande nakuheta kuseteko muka?
14 Kunonekanga vyuma hichuma chinahase kutukafwa kutesamo milimo yetu twatela kuzata. Yehova akwechi ‘lwola’ lwenyi lwakutesamo vyuma ajina. (Kulovoka 9:5; Mako 1:15) Nge chinahase, kaha chapwa chamwaza kwazananga mumulimo wamuwande kamwe chipwe kavali muchalumingo. Vinjiho jaYehova vavavulu mukaye kosena veji kulisonekesanga upayiniya wakukafwa, nakuzatanga jola jivali halikumbi mumulimo wakwambulula mujimbu wamwaza. Kaha veka vanakuzatanga mwavapayiniya vashimbu yosena, nakwambulula kafwe jola jivali nachimbwa halikumbi mukuvilika mujimbu waWangana. Vapayiniya vakulipwila navamishonali veji kuzatanga jola jajivulu mumulimo waWangana. Nayetu nawa tunahase kuwanako lwola lwakwazana navakwetu vaze navevwilila vyalutalililo lwaWangana. (Yowano 4:7-15) Chuma tunakufwila shina kwazana chikuma mumulimo kana nge chinahase, mwomwo Yesu ahanjikile ngwenyi: “Kahou mujimbu kana wamwaza wawangana navakawambulula kumafuchi osena nakupwa unjiho kuli vaka-mafuchi osena, numbanyi kukuma chamyaka yino chikeze.”—Mateu 24:14; Wavaka-Efwesu 5:15-17.
15. Mwomwo ika mazu ahali Wavaka-Kolinde 1, 15:58 apwila akutamo makumbi ano kupandama kumulimo wetu?
15 Kala kweshokwo vatwama Vinjiho jaYehova mukaye kosena, valinunga hamwe nakwazana mumulimo kanou wamwaza. Vanakuzachisa punga vahwima muMbimbiliya yakwamba ngwavo: “Zamenunga mbe, mupwenga muvakuzeneka kusosoloka, muvulisenga chikuma kuzata milimo yaMwata makumbi osena, mwomwo munatachikiza ngwenu, Kukilikita chetu kacheshi chakulishina tuhu muli Mwatako, shikaho.”—Wavaka-Kolinde 1, 15:58.
Kushimutwila Chakuhitulukamo
• Yesu hakwamba ngwenyi ‘vangilenu kusaka Wangana,’ vyuma vika alumbunwine nge vyatela kwiza hanyima?
• Twatela kumona ngachilihi chilika chakuzakama vyuma vyetu vyakumujimba navize vyavaka-tanga yetu? Vyuma vika mwakatukafwa Kalunga?
• Natuhasa kwazana mumilimo muka yaWangana?
[Muvwimbimbi halifwo 107]
Mumafuchi osena, Vinjiho jaYehova makumbi ano vanakwambulula mujimbu wamwaza shimbu kanda kukuma chizenga