Kapetulu 14
Uno Yehova Eji Kutwaminyinanga Ngachilihi Liuka Lyenyi?
1. Mujimbu muka valumbununa muMbimbiliya kupandama kuliuka lyaYehova, kaha nawa mwomwo ika wapwila waulemu kuli etu?
KUTALA Kalunga atwama naliuka nyi? Mazu-vasoneka vahwima atulweza nge, eyo, atwama nalyo. Kuhichila muMazwenyi, atulwezako vyuma vimwe vyakwivwisa woma vyatwama muchihanda chaliuka lyamwilu. (Ezekele 1:1, 4-14; Ndanyele 7:9, 10, 13, 14) Numba tuhu katwahasa kumona vaze vatwama muliuka kanako, oloze vatu kana vali nakukafwanga vaka-kulemesa vamuchano makumbi ano. (Vamyangana 2, 6:15-17) Yehova atwama nawa nachihanda chikwavo chaliuka lyahano hamavu lize twamona nameso. Mbimbiliya yatukafwa twivwishise omwo lyazata eli liuka, nomu Yehova eji kulitwaminyinanga.
Mwakwijivila Liuka Lize Vamona naMeso
2. Chikungulwilo muka chachihya chize atungile Kalunga?
2 Muyachi wavaIsalele wapwile chikungulwilo chaKalunga hamyaka 1,545. (Vilinga 7:38) Oloze vaIsalele vahonene kulama jishimbi jaKalunga, kaha nawa vakanyine Mwanenyi. Echi chalingishile jino Yehova akane chize chikungulwilo nakuchumba nyima. Yesu alwezele vaYuleya ngwenyi: “Talenu, zuvo yenu vanamiselayo yamokomoko.” (Mateu 23:38) Kalunga jino atungile chikungulwilo chachihya chize alikashile nacho lushiko lweka lwaluhya. Echi chikungulwilo kana shina chavatu 144,000 vaze vasakula kuli Kalunga mangana vakalinunge hamwe naMwanenyi mwilu.—Kusoloka 14:1-4.
3. Vyuma muka vyasolokele haPendekoseta 33 C.E. vize vyasolwele nge Kalunga jino ali nakuzachisa chikungulwilo chachihya?
3 Vaze vatete kupwa muze muchikungulwilo chachihya vavawavishile nashipilitu yajila yaYehova haPendekoseta 33 C.E. Mujimbu kanou tweji kuutanganga ngwavo: “Jino omu lyahetele likumbi lyaPendekoseta, vosena vapwile mumwe. Kukasumuka, kwilu kwafumine lushindo nge kuhuhwa chapeho yangolo chikuma, kaha lwazalishile zuvo yosena yize vatwamine. Kuli vakivo kwasolokele malimi akulipanga, akufwana nge tumilangi twakakahya, kaha katwamine hali mutu himutu. Vosena vazalile naShipilitu [y]ajila.” (Vilinga 2:1-4) Shipilitu yaKalunga yahanyine unjiho nge ava vakivo jino navapwanga lizavu lyavatu mwazachisa Kalunga hakutesamo vyuma ajina mwishi yachiyulo chaYesu Kulishitu mwilu.
4. Veya makumbi ano vatunga liuka lyaYehova lize lyasoloka nameso?
4 Makumbi ano, vavandende kaha vasalaho hali vaze 144,000 vaze vachili lika hano hamavu. Jino kweseka naupolofweto waMbimbiliya, “liyongomena lyalinene” ‘lyamikoko veka’ vanavanehe jino nakuvanunga hamwe navaze vasalaho vawavisa. Yesu uze apwa Kafunga Wamwenemwene, nawanyisa hamwe mikoko veka navaze vawavisa mangana vapwenga utanga umwe mwishi yaikiye uze napu hiKafunga kavo. (Kusoloka 7:9; Yowano 10:11, 16) Vosena ava valikata hamwe nakutunga chikungulwilo chimwe, chipwe ngwetu liuka lyaYehova lize vamona nameso.
Mulyazata Liuka Vayula Kuli Kalunga
5. Iya eji kutwaminyinanga liuka lyaKalunga, kaha mujila muka?
5 Mazu amuVisoneka akwamba ngwavo “liuka lyaKalungOu ayoya” asolola uze eji kulitwaminyinanga. Liuka kaneli lyapwa hiliuka lyateokalasi chipwe ngwetu liuka lize vayula kuli Kalunga. Yehova eji kutwaminyinanga vatu jenyi kuhichila muli Yesu uze Atongola kupwa Mutwe waliuka, namuMazwenyi nawa vahwima, Mbimbiliya.—WaChimoteu 1, 3:14, 15; Wavaka-Efwesu 1:22, 23; WaChimoteu 2, 3:16, 17.
6. (a) Uno kutwaminyina chakufuma muliuka lyamwilu chasolokele ngachilihi mulikulukaji lyamyaka lyakulivanga? (b) Vyuma vika vyasolola nge Yesu achili lika Mutwe waliuka?
6 Echi kutwaminyina kana chasolokele hatoma haPendekoseta. (Vilinga 2:14-18, 32, 33) Chasolokele omu kangelo kaYehova atwaminyinyine mujimbu wamwaza kuya nakuwambulula muAfrica, nahalwola luze kwejile lizu lyakufuma kuli Yesu nakulumbununa vyuma atelele kulinga Saulu wakuTalasu omu alumukile, kaha nomu nawa Petulu aputukile mulimo wakwambulwila vaka-mafuchi eka. (Vilinga 8:26, 27; 9:3-7; 10:9-16, 19-22) Kutwala muze jino kakwapwile nawa kwivwa mazu eka akufuma mwiluko, chipwe kumona cheka tungelo, chipwe kutambula cheka shipilitu mujila yakukomwesako. Oloze Yesu afwelelesele ngwenyi: “Talenu, Ami nguli nayenu hamwe makumbi osena, palanga nakukukuma chamyaka.” (Mateu 28:20; Wavaka-Kolinde 1, 13:8) Makumbi ano, Vinjiho jaYehova vanakwakula kukutwaminyina chaYesu, mwomwo chikeshi kutwaminyina kana, kachi nakwambulula mujimbu waWangana kachi kacheshi nakufukilako.
7. (a) Veya vaze vatunga lizavu “[lya]ndungo wakushishika wakuzangama,” kaha mwomwo ika? (b) Mulimo muka vahanyine kuli uze “ndungo”?
7 Shimbu kanda afwenga, Yesu alwezele tumbaji twenyi ‘vyandungo wakushishika wakuzangama’ uze ambile ngwenyi mwakahana mulimo wakulipwila hakupwa ikiye Mwata wenyi. Ou “ndungo” kana kwapwile halwola ayile Mwata wenyi mwilu kaha nakilikitanga lika swi nakukukinduluka chaKulishitu chakuzeneka kumona nameso muWangana wenyi. Jila valumbunwinamo ou ndungo kayenyikila kumutu umwe kahako, oloze yenyikila kuliuka lyavaze vawavisa vaKulishitu. Yesu avulukile lize lizavu ngwenyi “ndungo” mwomwo alilanjile namanyingenyi. Ahanyine vaze vamuliuka kana mulimo wakuya nakutunga tumbaji nakuvalisa kanawa “kulya chavo halwola lwakuvahana.”—Mateu 24:45-47; 28:19; Isaya 43:10; Luka 12:42; WaPetulu 1, 4:10.
8. (a) Milimo muka ali nayo ndungo wakushishika oholyapwa? (b) Mwomwo ika chapwila chachilemu kwononoka kujindongi jaKalunga eji kutunangulanga kuhichila muli ndungo wakushishika?
8 Hakuwana nge lize lizavu lyandungo lyapwilenga nakuzata mulimo waMwata swi nakukukinduluka chenyi chakuzeneka kumona nameso mu 1914, unjiho wasolola nge, lize lizavu kana valihanyine jino milimo yikwavo yayivulu mu 1919. Myaka yoseneyi yinahichimo yinapunga myaka yakwambulula mujimbu waWangana mukaye kosena, kaha munafumu jino liyongomena lyalinene lyavaka-kulemesa Yehova vaze navakayovoka haluyando lwalunene. (Mateu 24:14, 21, 22; Kusoloka 7:9, 10) Ava navakivo nawa vatela kulya kulya chakushipilitu, ngocho veji kuvahanangacho kuli ndungo wakushishika. Shikaho nge natusaka kwivwisa Yehova kuwaha, kaha twatela kwitavila jindongi jenyi jize eji kutuhananga kuhichila muli ou ndungo nakukavangiza vyuma eji kutunangulanga.
9, 10. (a) Jila muka valongesele mulikulukaji lyamyaka lyakulivanga yize vazachishilenga hakutala havihula vyakupandama kuvyuma valinangwile nakukuhana jindongi jakwambulula mujimbu wamwaza? (b) Jila muka yiliko makumbi ano yakutalilamo mulimo wavatu jaYehova?
9 Lwola lumwe kweji kupwanga vihula vyakupandama kuvyuma twalinangula najishimbi tweji kukavangizanga. Jino twatela kulinga ngachilihi nge vanatwihula? Mukanda waVilinga kapetulu 15 watulweza omu vakumishilile chihande chimwe chavaze vaka-mafuchi eka vaze valumukile. Chihande kana vachitwalile kuli vaposetolo navakulwane vapwilenga muYelusalema, vaze vazachilenga mwalizavu lyakutwaminyina. Malunga kana kavapwile vatu vakukupuka mwosenako, oloze Kalunga avazachishilenga. Vakekeselenga visoneka vyahanjikile hachihande kana nakusolola unjiho womu yazata shipilitu yaKalunga hakuvetavila navaka-Mafuchi eka nawa. Shikaho vavatwile kanawa chihande chosena, kaha Kalunga akiswile vyosena vize valongesele. (Vilinga 15:1-29; 16:4, 5) Lizavu kaneli lyakutwaminyina likiko lyatongwelenga vatu nakuvatuma kuya nakwambulula mujimbu waWangana.
10 Makumbi ano, muLizavu Lyakutwaminyina liuka lyaYehova lize vamona nameso mwatwama vandumbwetu vaze vawavisa nashipilitu vakufuma kumafuchi akulisezaseza, vaze vatwama kuchikota chaVinjiho jaYehova chakaye kosena. Eli Lizavu Lyakutwaminyina valiyula kuli Yesu Kulishitu, kaha lili nakukundwiza kulemesa chamuchano mumafuchi osena nakulongesa mulimo wakwambulula waVinjiho jaYehova muvikungulwilo vyavivulu. Vaze vatwama muLizavu Lyakutwaminyina vakwechi vishinganyeka ngana vize vyakaposetolo Paulu uze asonekelele vakwavo vaka-Kulishitu ngwenyi: “Kacheshi nge tukwechi wata hakufwelela chenuko, oloze tuvaka-kumikwachisako mukuwahilila chenu, mwomwo hakufwelela hakiko vene munemanyina.”—Wavaka-Kolinde 2, 1:24.
11. (a) Vakulwane navaka-kuzata muliuka veji kuvatongolanga ngachilihi? (b) Mwomwo ika twatela kuzachila hamwe navaze vatongola?
11 Vinjiho jaYehova mukaye kosena veji kutalanga kuLizavu Lyakutwaminyina litongole malunga vakuhya, vaze veji kuhananga jingolo jakutongola vakwavo vakulwane navaka-kuzata muliuka, mangana vazakame chikungulwilo. Vyuma vyasakiwa kuli vaze navatongola vavisoneka muMbimbiliya, oloze malunga kana ava kavakupuka mwosenako, ngocho shimbu jimwe veji kulimbenjanga navakivo nawa. Vakulwane vosena vaze veji kutongolanga ava vandumbwetu vakwechi chilika chachinene kumeso aKalunga. (WaChimoteu 1, 3:1-10, 12, 13; WaChituse 1:5-9) Ngachize, veji kukekesanga Mazwenyi vahwima nakulomba shipilitu yaKalunga mangana yivatwaminyine. (Vilinga 6:2-4, 6; 14:23) Shikaho twatela kusakwililanga ava “mawana muli vatu” mwomwo veji kutukafwanga tuvosena mangana tupwenga “mumwe kaha [mulufwelelo].”—Wavaka-Efwesu 4:8, 11-16.
12. Yehova eji kuzachisanga ngachilihi mapwevo mumilimo yateokalasi alongesa?
12 Visoneka vyasolola nge malunga vakivo kaha vatela kutwaminyina muchikungulwilo. Echi kachalumbununa nge mapwevo vapwa vamokomokoko nduma, mwomwo mapwevo vamwe vapwa vamyangana vaWangana wamwilu, kaha nawa veji kukilikitanga chikuma mumulimo wakwambulula. (Samu 68:11) Mapwevo veji kulingisanga nawa chikungulwilo kupwa napuho yamwaza mwomwo yakuzakama jitanga javo kanawa. (WaChituse 2:3-5) Oloze mulimo wakunangula muchikungulwilo vauhana kuli malunga vaze vatongola kuzata mulimo kanou.—WaChimoteu 1, 2:12, 13.
13. (a) Mbimbiliya yahuhumuna ngachilihi vakulwane kutalisa kuvihela vyavo? (b) Mulimo uka uze twatela kwazanamo tuvosena?
13 Kulifuchi, vatu vamona mutu uze atwama nachihela chachinene kupwa wamulemu chikuma, oloze muliuka lyaKalunga mwatwama lushimbi lwakwamba ngwavo: “Ou napu wamokomoko chikuma muli enu muvosena, ikiye napu wamulemu.” (Luka 9:46-48; 22:24-26) Visoneka vyahuhumuna vakulwane nge kavatela kulemuwisa vatu jaKalungako, oloze vatela kupwa vakutalilako kuutanga. (WaPetulu 1, 5:2, 3) Keshi nge vaze vavandende vasakula vakivo vatwama namulimo wakwambulula kahako nduma, oloze Vinjiho jaYehova vosena, malunga namapwevo, vakwechi chilika chakwimanyinako Mwata Wakutenga chosena hakwambulwila vatu vyalijina lyenyi naWangana wenyi.
14 Twatela kulihulisa etu vavene ngwetu: ‘Kutala ngweji kusakwililanga Yehova hajijila ali nakuzachisa hakutwaminyina liuka lyenyi eli twamona nameso nyi? Kutala muchima wami, nahanjikiso yami, navilinga vyami nawa vyasolola nge ngwasakwilila chikupu nyi?’ Kukekesa havishina evi vili mwishi chinahase kutukafwa kulinga ngocho.
14. Shimutwila havihula vanahulisa kusongo yapalangalafu kuzachisa visoneka vanenyikilako.
Kachi nge ngwononoka kuli Kulishitu kupwa Mutwe wachikungulwilo, kaha vyuma vika ngwatela kulinga kweseka nevi visoneka vinakavangizaho? (Mateu 24:14; 28:19, 20; Yowano 13:34, 35)
Iya nangupwanga nakulemesa nge nangwitavilanga nakusakwilila vyuma vyakushipilitu vize vyeji kufumanga kuli ndungo wakushishika naLizavu lyenyi Lyakutwaminyina? (Luka 10:16)
Vatu vosena muchikungulwilo, chikumanyi vakulwane, vatela kutwama ngachilihi navakwavo? (Wavaka-Loma 12:10)
15. (a) Michima yetu yeji kusololanga vyuma muka kupandama kuliuka lyaYehova lyakumona nameso? (b) Jijila muka natuhasa kusolwelamo Liyavolo kupwa muka-kwonga, nakwivwisa jino Yehova kumuchima kuwaha?
15 Makumbi ano, Yehova ali nakututwaminyina kuhichila muliuka lyenyi lyakumona nameso lize vayula kuli Kulishitu. Ngocho, michima tweji kusololanga havyumevi valongesa yeji kusololanga omu tweji kwivwanga hachihande chawata waKalunga. (WavaHepeleu 13:17) Satana alisasa ngwenyi tweji kuzachilanga Kalunga namuchima walifwi. Oloze nge natuzachila Kalunga chakuzeneka muchima walifwi, kaha natusolola Liyavolo kupwa muka-kwonga. Kachi nge natuzanga nakuvumbika vaze vali nakututwaminyina, nakuhona ‘kuvakomoka kumeso mangana tuwanyineho vyuma’ kaha natukevwisa Yehova kumuchima kuwaha. (WaYuta 16; WavaHepeleu 13:7) Nge natulyononona kuliuka lyaYehova, kaha natukasololanga chikupu ngwetu, Yehova ikiye Kalunga ketu kaha nawa twalinunga hamwe hakumulemesa.—Wavaka-Kolinde 1, 15:58.
Kushimutwila Chakuhitulukamo
• Liuka lyaYehova lize vamona nameso lyapwa lika makumbi ano? Uno lyazata mulimo uka?
• Iya uze vatongola kupwa Mutwe wachikungulwilo, kaha eji kuchitwaminyinanga kuhichila muli veya?
• Michima muka twatela kupwa nayo kuli vaze vatwama muliuka lyaYehova?
[Muvwimbimbi halifwo 133]
Yehova eji kututwaminyinanga kuhichila muliuka lyenyi lyakumona nameso lize vatwaminyina kuli Kulishitu