Kapetulu 18
“Kaveshi Vamuli Vaka-mavuko”
1. (a) Shimbu kanda Yesu afwenga, mazu muka alombeleleko tumbaji twenyi? (b) Mwomwo ika chapwila chachilemu ‘kuhona kupwa vamuli vaka-mavu’?
YESU alombeleleko tumbaji twenyi haufuku wakukokela kukumujiha. Hakwijiva ngwenyi tumbaji twenyi navakavashinyinyika kuli Satana, Yesu ambile kuli Ise ngwenyi: “Kangweshi kukulomba ngwami, uvafumise hamavuko, oloze ngwami, uvakingenga kuli uze wamupi. Kaveshi vamuli vaka-mavuko, nganomu ngwazenekAmi kupwa nguwamuli vaka-mavu.” (Yowano 17:15, 16) Mwomwo ika chapwila chachilemu kulihandula kuli vaka-mavu? Mwomwo Satana ikiye mwangana wavaka-mavu. Ngocho, vosena vaze vatwama muli vaka-mavu vatwama mwishi yayikiye.—Luka 4:5-8; Yowano 14:30; WaYowano 1, 5:19.
2. Muvyuma vika vize Yesu ahonene kupwa wamuli vaka-mavu?
2 Yesu hakuhona kupwa wamuli vaka-mavu kachalumbunwine nge kazangile vatu vekako nduma. Oloze ikiye ahindwilenga vaka-kuviza, nakusangula vafu, nakunangula nawa vatu vyaWangana waKalunga. Kaha nawa afwililile muyachi wavatu. Oloze kazangile vilinga vyavipi vyavaze vapwile nashipilitu yamukaye kaSatanako. Ngachize, ahuhumwine havilinga vyakufwana nge uvumbi, muchima wakufwila luheto nakufwila ulemu. (Mateu 5:27, 28; 6:19-21; Luka 20:46, 47) Chikwavo nawa Yesu alihendelenga kuvihande vyalifuchi nachiyulo. Numba tuhu apwile kaYuleya, oloze kazanyine muvikokojola vyepukilenga mukachi kavaLoma navaYuleyako.
“Wangana Wami Kaweshi Wakuli Vaka-Mavuko”
3. (a) Mazu muka vatwamina vamukwitava chavaYuleya vamuvangijikilile Yesu aze valwezele Pilatu, kaha mwomwo ika? (b) Unjiho muka wasolola nge Yesu kasakile kupwa mwangana muchiyulo chavatuko?
3 Achishinganyeke havyuma vyasolokele omu vatwamina vamukwitava chavaYuleya vakashile Yesu nakumutwala kuli Pondeu Pilatu, nguvulu yavaLoma. Vaze vatwamina vevwile kupihya mwomwo Yesu asolwele makuli avo hatoma. Ngocho, vatu hakusaka kachi ou nguvulu azangamise Yesu, kaha vamuvangijikilile jino ngwavo: “Ou mutu kana tunamuwane apwanga nakuvalumbula vaka-lifuchi lyetu nakukanyisa vatu kumulambwila Kesale, nakuvamba ngwenyi, Yami Mwangana Kulishitu.” (Luka 23:2) Awa mazu kana apwile amakuli chiyovo, mwomwo halwola vasakile ngwavo vamuswanyise kupwa mwangana, Yesu akanyine. (Yowano 6:15) Ikiye ejivile ngwenyi kulutwe namakumbi mwakapwa Mwangana wamwilu. (Luka 19:11, 12) Kaha nawa ejivile ngwenyi Yehova ikiye mwakamuswanyisa, keshi vatuko.
4. Muchima muka apwile nawo Yesu kutalisa kukufweta milambu?
4 Omu kwasalile makumbi atatu shimbu kanda Yesu vachimukase, vaFwaliseu vasakile kumuwanyina mulonga hachihande chakufweta milambu. Oloze avambile ngwenyi: “Ngulwezenu ndenali [lumbongo lwavaLoma]. Yili namutwe weya namazu vasonekaho eya?” Omu vakumbulwile ngwavo “VyaKesale,” kaha ikiye avakumbulwile jino ngwenyi: “Shikaho vyuma vyaKesale muhanenuvyo Kesale, kaha vyuma vyaKalunga muhanenuvyo Kalunga.”—Luka 20:20-25.
5. (a) Chilongesa muka Yesu anangwile tumbaji twenyi halwola vamukwachile? (b) Yesu alumbunwine ngachilihi vyuma alingile? (c) Vyuma vika vyafumineho hakumusopesa?
5 Yesu kanangwilenga vatu valikange kujishimbi javaka-kuyulako nduma. Omu maswalale namalunga veka vejile nakukwata Yesu, Petulu ambachile poko yamukwale nakuvatula litwitwi lyalunga umwe. Oloze Yesu ambile ngwenyi: “Someka cheka poko yove muchindalo chayo, mwomwo veshovo navakwata kupoko yamukwale navakanonga kupoko yamukwale.” (Mateu 26:51, 52) Lichako, Yesu alumbunwinyine Pilatu ngwenyi: “Wangana wami kaweshi wakuli vaka-mavuko. Wangana wami wapwanga wakuli vaka-mavu, kachi vangamba jami vanalu kuchina kungwechela kuli vaYuleya.” (Yowano 18:36) Pilatu etavilile ngwenyi “kangwamwene mulonga” muli Yesuko. Oloze Pilatu asuwile Yesu kuya nakumujiha mwomwo yakumukanjikiza kuli vatu.—Luka 23:13-15; Yowano 19:12-16.
Tumbaji Navakavangiza Kutwaminyina chaYesu
6. Vaka-Kulishitu vakulivanga vasolwele ngachilihi nge valihendelenga kushipilitu yavaka-mavu, oloze vazangilenga vakwavo vatu?
6 Tumbaji twaYesu vevwishishile vyuma atela kulinga mutu numba ahone kupwa wamuli vaka-mavu. Chalumbunwine kulihenda kushipilitu yakukaye nakuvilinga vyavaka-mavu, vyakufwana nge ulyanyi uvumbi nakuhema chachipi valingilenga vaka-Loma. Mwomwo yakuhona kwazana mukuhema kanechi, tumbaji vavavulukilenga ngwavo vapwa vaka-kuhunga vatu. Oloze tumbaji kavahungilenga vatuko. Vakivo vakafwilenga vakwavo vanganyale kuvyuma vyaulwilo alongesele Kalunga.
7. (a) Vyuma vika vyasolokelenga kuli tumbaji vakulivanga hakuhona kupwa vamuli vaka-mavu? (b) Vapwilenga namuchima muka kutalisa kuli vatwamina jalifuchi nakukufwetanga milambu, kaha mwomwo ika?
7 Vaka-kukavangiza Yesu vavayanjishile kuli vilolo jafulumende nge muze vamuyanjishilenga ikiye. Oloze kafwe mumwaka wa 56 C.E., kaposetolo Paulu asonekelele vaka-Kulishitu vamuLoma nakuvalweza ngwenyi “mutu himutu aluukenga kuli vaze vali nangolo jakuyula. Mwomwo kakweshi ngolo jakuyula jekako, shineji jakuli Kalunga kaha.” Echi kachalumbununa nge Yehova ikiye eji kuzamisanga jifulumende javatuko nduma, oloze ajitavisa kaha jipwengako swi noho Wangana wenyi naukayula hamavu hosena. Kumana chapwile chakutamo kuli Paulu kukolezeza vaka-Kulishitu valiluule kuvilolo jafulumende nakufwetanga milambu.—Wavaka-Loma 13:1-7; WaChituse 3:1, 2.
8. (a) Vaka-Kulishitu vatela kuliluula kuli vaka-kuyula nakuheta halihi? (b) Vaka-Kulishitu vakulivanga vakavangijile ngachilihi chakutalilako chaYesu?
8 Chipwe ngocho, kuliluula chetu kuli vaka-kuyula chatela kupwa naseteko. Nge jishimbi jaYehova najishimbi jachiyulo chavatu najilimbalaka, kaha vaze vazachila Yehova vatela kwononoka jishimbi jaYehova. Mukanda waOn the Road to Civilization—A World History wahanjika hali vaka-Kulishitu vakulivanga ngwawo: “Vaka-Kulishitu vakanyine kwazana muvilika vimwe vyavaka-Loma. Vaka-Kulishitu . . . vamwene kwazana mumulimo wauswalale nge hikuhokola jishimbi jalufwelelo lwavo. Kavazachilenga milimo yapandamine kuvihande vyalifuchi nachiyuloko. Kavalemeselenga mwangana ngana muvalemeselenga Kalungako.” Omu zango yayinene yavaYuleya ‘vakanjile’ tumbaji ngwavo valitwamine kwambulula mujimbu, tumbaji vakumbulwile ngwavo: “Chatela kwononokanga kuli Kalunga, vatu vasale munyima.”—Vilinga 5:27-29.
9. (a) Mwomwo ika vaka-Kulishitu vamuYelusalema valingilile vyuma kana mu 66 C.E.? (b) Chuma kana chinapu ngachilihi chakutalilako chamwaza?
9 Numba tuhu kwapwile vikokojola vyavihande vyalifuchi nachiyulo navyamaswalale, oloze tumbaji kavazanyine muvihande kanako. Mumwaka wa 66 C.E., vaYuleya vaze vapwilenga muYuleya vamwimanyinyine Kesale nakole. Kaha maswalale vavaLoma washiwashi vajingilikile Yelusalema. Jino vaka-Kulishitu vapwile muze munganda valingile ngachilihi? Vanukile mazu aYesu aze avalwezele ngwenyi vakafume muze munganda. Omu vaze vaLoma vafumineko chindende, vaka-Kulishitu vachinyinyine musali yaKalwiji Yotau kujipili jaPela. (Luka 21:20-24) Vahanyine chakutalilako chamwaza kuli vaka-Kulishitu vakushishika hakuhona kwazana muvihande vyalifuchi nachiyulo.
MuMakumbi Akukuminyina Vaka-Kulishitu Kavatela Kwazana muMapolitikiko
10. (a) Mulimo muka veji kukilikitanga Vinjiho jaYehova, kaha mwomwo ika? (b) Muvyuma vika vize vahona kwazana?
10 Kutala namuno mumakumbi akukuminyina kuli lizavu lize kalyeshi nakwazana muvihande vyalifuchi nachiyuloko hakulondezeza vaka-Kulishitu vakulivanga nyi? Enga, Vinjiho jaYehova vanalinginga vene ngocho. Myaka yoseneyi vanambululanga lika ngwavo Wangana waKalunga ukiko naukaneha kuunda, nakuwahilila chahaya myaka namyaka kuli vaze vazanga kwoloka. (Mateu 24:14) Oloze kavazana muvikokojola vyakupandama kuvihande vyalifuchi nachiyuloko.
11. (a) Vinjiho valihandununa ngachilihi navatwamina vamukwitava chamakuli kupandama kuvihande vyalifuchi nachiyulo? (b) Vinjiho jaYehova vamona ngachilihi vakwavo vaze veji kwazananga muvihande vyalifuchi nachiyulo?
11 Oloze vatwamina vamukwitava chamakuli vanandupukilanga muvihande vyalifuchi nachiyulo. Mumafuchi amwe vanazananga mukapeni yakuvwotela vatu vamwe nakuhonesako vakwavo. Vatwamina vamukwitava chamakuli vamwe, veji kuzatanga namilimo yaupolitiki. Vamwe vanalwezenga vatwamina vaupolitiki mangana valinge vyuma vize vetavila navatwamina vamukwitava chamakuli. Oloze Vinjiho jaYehova kaveshi kulimbila muvihande vyalifuchi nachiyuloko. Kaha nawa kaveshi kukanyisa vakwavo kwingila muvikongo vyaupolitiki, chipwe kwimana vavavwotele, chipwe kuya nakuvwotako. Yesu ambile ngwenyi tumbaji twenyi kaveshi kukapwa vamuli vaka-mavuko, ngocho Vinjiho jaYehova kaveshi kwazana muvihande vyalifuchi nachiyuloko.
12. Vyuma vika vili nakusolojoka mwomwo yakwitava chachivulu chize chili nakwazana muvihande vyalifuchi nachiyulo?
12 Vaka-mavu vanapunga lika nakuya kujita nge muze ahanjikile lyehi Yesu. Namauka amwe amulifuchi analizungisanga mwavomwavo. (Mateu 24:3, 6, 7) Vatwamina vamukwitava chimwe vanakundwizanga lifuchi limwe chipwe chiyulo chimwe mangana lifumbukile likwavo, nakulweza vaka-kuvakavangiza vavalondezeze. Vyuma muka vinafumungamo? Vatu vamukwitava chochimwe vanalijihinga mwavomwavo mwomwo yakulihandununa chalifuchi chipwe lilimi. Echi chalimbalaka navyuma asaka Kalunga.—WaYowano 1, 3:10-12; 4:8, 20.
13. Unjiho muka wasolola nge Vinjiho jaYehova kavazana muvihande vyalifuchi nachiyuloko?
13 Vinjiho jaYehova kaveshi kwazana muvikokojola vyavihande vyalifuchi nachiyuloko. Kaposhi Kakutalila kaMuchingeleshi kaNovember 1, 1939, ambile ngwenyi: ‘Vosena vaze vali kusali yaMwata kaveshi kukakundwizanga mafuchi ali nakulwanga jijitako.’ Chamokomoko tuhu kweshokwo vatwama nomwo vayoya, Vinjiho jaYehova valama jishimbi kaneji. Kaveshi kwitavila vihande vyalifuchi nachiyulo vivahandunune navandumbwavoko. “Jipoko javo jamikwale navakajifululula nakutenga matemo.” Ngocho kaveshi kulinangula jita, mwomwo kavazana muvihande vyalifuchi nachiyuloko.—Isaya 2:3, 4; Wavaka-Kolinde 2, 10:3, 4.
14. Vyuma vika vali nakumona Vinjiho jaYehova mwomwo yakulihandununa kuli vaka-mavu?
14 Vyuma vika vinafumumo hakuhona kwazana muvihande vyalifuchi nachiyulo? Yesu ambile ngwenyi: “Kamweshi muvaka-mavuko, . . . shikaho vaka-mavu vanamihungu.” (Yowano 15:19) Vinjiho jaYehova vavavulu vanavakasenga mutumenga mwomwo yakupwa vangamba jaKalunga. Vamwe vanavayanjisanga, kaha veka vanavajihinga, ngana muze chapwilenga nakuli vaka-Kulishitu vamulikulukaji lyamyaka lyakulivanga. Enga, vihuli kana vinakusoloka mwomwo Satana ikiye “kalunga wamyaka yino” kaha ali nakwimanyina vangamba jaYehova nakole, mwomwo kaveshi vamuli vaka-mavuko.—Wavaka-Kolinde 2, 4:4; Kusoloka 12:12.
15. (a) Vinjiho jaYehova vanakusosoloka kuvyuma muka, kaha vaka-mavu vali nakuumbukila kulihi? (b) Mwomwo ika kuhandunuka kuli vaka-mavu chapwila chachilemu?
15 Vangamba jaYehova vapwa vakuwahilila hakuhona kupwa vamuli vaka-mavu, mwomwo mawangana akano kaye osena kalinwaha vawanongese haAlamangetone. (Ndanyele 2:44; Kusoloka 16:14, 16; 19:11-21) Etu kaveshi kukatunongesako, mwomwo twalihandununa kuli vaka-mavu. Hakupwa vatu valinunga hamwe mukaye kosena, twalyononona kuWangana waKalunga wamwilu. Enga, veji kututolekanga nakutuyanjisa mwomwo yakuhona kupwa muli vaka-mavu. Oloze vyosenevi kalinwaha vikume mwomwo kano kaye kaSatana navakakanongesa nakuzeneka kupwako cheka haya myaka yosena. Tuyokutuyoku nawa, vaze navazachila Yehova navakatwama haya myaka yosena mulifuchi lyalihya lyakwoloka muWangana waKalunga.—WaPetulu 2, 3:10-13; WaYowano 1, 2:15-17.
Kushimutwila Chakuhitulukamo
• Yesu asolwele ngachilihi vyuma vyasakiwa kuli vaze “kaveshi vamuli vaka-mavuko”?
• Vaka-Kulishitu vakulivanga vamwenenga ngachilihi (a) shipilitu yavaka-mavu (b) vaka-kuyula vamufulumende (c) chilika chakufwetanga milambu?
• Muvyuma muka Vinjiho jaYehova makumbi ano vanasolola nge vapwa vaka-Kulishitu vaze kaveshi kwazana muvihande vyalifuchi nachiyuloko?
[Muvwimbimbi halifwo 165]
Yesu alumbunwine ngwenyi ikiye navaka-kumukavangiza ‘kavapwile vamuli vaka-mavuko’