Kapetulu 12

Yesu Atulongesa Kulomba

KUTALA weji kuhanjikanga naYehova Kalunga tahi?— Kalunga asaka uhanjikenga nenyi. Kuhanjika naKalunga chapwa kulomba. Yesu kakavulu ahanjikilenga naIse mwilu. Shimbu jimwe asakilenga kupwa uka wenyi hakuhanjika naKalunga. Mbimbiliya yamba ngwayo shimbu imwe, “akandukile kupili kwauka wenyi nakulomba. Kahomu lyalingile likumbi hilinalauka lyehi, apwile uka wenyi kuze.”—Mateu 14:23.

Nyi yove unahase kuya kulihi hakusaka ulombe kuli Yehova uka wove?— Unahase kulomba kuli Yehova uka wove naufuku shimbu kanda usavale. Yesu ahanjikile ngwenyi: ‘Shimbu kanda ulombe, ingila muzuvo yove, kahomu nausokako, lomba kuli Iso.’ (Mateu 6:6) Kutala weji kulombanga kuli Yehova ufuku hiufuku shimbu kanda usavale nyi?— Watela kulinganga ngocho.

Yesu nawa alombelenga omu apwile navatu. Omu afwile sepa lyenyi Lazalu, Yesu alombele hamwe navakwavo kuze vasavalikile Lazalu. (Yowano 11:41, 42) Yesu alombelenga nawa nomu vakungulukilenga natumbaji twenyi. Kutala weji kupwanga kukukunguluka kuze veji kulombanga tahi?— Mukulwane wakukola kakavulu ikiye eji kulombanga hakukunguluka. Shikaho, watela kwivwililanga kanawa kuvyuma mwahanjika mwomwo ali nakukuhanjikilako kuli Kalunga. Ove watela jino kwitavila ngwove “Amene” omu navakumisa kulomba. Uno watachikiza omwo chalumbunukila nge mwamba ngwove “Amene” hakukumisa kulomba tahi?— Chalumbununa nge kulomba kana unachizange. Chalumbununa nawa nge unetavila vyuma vanalombo kaha nawa vyuma kana vikiko uli nakusaka nayove nawa.

Yesu alombelenga nawa nahalwola lwakulya. Asakwililenga Yehova hakulya chenyi. Kutala weji kulombanga shimbu kanda ulyenga kulya chove tahi?— Chapwa chamwaza kusakwililanga Yehova shimbu kanda tuputuke kulya. Mutu weka nahase kulomba nge muli nakulila hamwe. Jino ngachilihi nge uli nakulya uka wove? Chipwe nawa nge uli nakulya navatu vaze vahona kulemesa Yehova?— Nge chili ngocho kaha watela kulomba uka wove.

Uno kumana watela kulombelanga kaha helu shimbu yosena tahi, nyi Yehova nahase kwivwa nakulomba chamumuchima wove?— Tunahase kulinangula kuvyuma vyasolokele kuli Nehemiya. Nehemiya apwile muka-kulemesa Yehova uze azachilenga munganda yaMwangana Alatakaseleke wakuPeleja. Likumbi limwe Nehemiya evwile kupihya omu vamulwezele ngwavo jikembwe janganda yaYelusalema, muze mwapwile vatu jenyi vanajishiula.

Omu Nehemiya vamwihwile kuli mwangana ejive ovyo asolokelele wakuzeya, chuma chakavanga alingile shina alombele mumuchima wenyi. Kaha Nehemiya alwezele mwangana vyuma vyamuzeyesele, nakumulomba ngwenyi amwitavise ayenga kuYelusalema nakutungulula jize jikembwe. Uno vyuma muka vyasolokele?—

Kalunga akumbulwile kulomba chaNehemiya. Mwangana amwitavishile aliyile tuhu kwenyi. Kaha mwangana amuhanyine Nehemiya vitondo vyavivulu vyakutungisa jize jikembwe. Shikaho, Kalunga nahase kukumbulula nakulomba chetu chamumuchima nawa.—Nehemiya 1:2, 3; 2:4-8.

Achishinganyeke hachuma chikwavo nawa echi. Uno watela kunongama hakulomba tahi? Kutala watela kufukama hamambuli ove nyi? Ove ngwove ngachilihi?— Shimbu jimwe Yesu afukaminenga hakulomba. Shimbu jikwavo nawa emanyinenga. Kaha halwola lweka nawa andwilenga mutwe wenyi mwilu hakulomba ngana muze alombele hakusangula Lazalu.

Uno echi chili nakulumbununa ika?— Echi chili nakulumbununa nge unahase kulomba mweshomwo unasakila ove lyavene. Shimbu jimwe chapwa chamwaza kunongama nakufwika kumeso hakulomba. Kaha shimbu jikwavo nawa unahase kufukama hamambuli ngana muze alingilenga Yesu. Oloze anuka ngwove, tunahase kulomba kuli Kalunga kala lwola, musana chipwe ufuku kaha ikiye mwatwivwa. Chuma chachilemu hakulomba shina kufwelela ngwetu Yehova ali nakutwivwilila. Uno wafwelela ngwove Yehova eji kwivwililanga kukulomba chove tahi?—

Vyuma muka twatela kuvulukanga mukulomba chetu kuli Yehova?— Achingulweze: Vyuma muka weji kuvulukanga hakulomba kuli Kalunga?— Yehova eji kutuhananga vyuma vyamwaza vyavivulu vize twatela kumusakwililanga, nyi chiku?— Tunahase kumusakwilila hakutuhana vyakulya. Kutala wamusakwililaho lyehi havyuma atenga vyakufwana nge melu, namitondo, najitemo jamwaza tahi?— Watela kumusakwilila mwomwo ikiye atengele vyosenevi.

Likumbi limwe tumbaji twaYesu vamwihwile Yesu avanangule kulomba. Kaha ou Mulongeshi Wamunene avanangwile, nakuvalweza nawa vyuma vyavilemu vatelele kulomba. Uno vyuma kana wavijiva tahi?— Pandumuna Mbimbiliya yove hali Mateu kapetulu 6. Kufuma muvesi 9 swi naku 13 natuwana kulomba chize vavuluka vatu vavavulu ngwavo Kulomba chaMwata. Tutange jino tuvosena.

Hano Yesu natunangula ngwenyi twatela kupwanga nakulombelanga lijina lyaKalunga. Ambile ngwenyi twatela kulomba mangana lijina lyaKalunga valijilile. Uno Kalunga lijina lyenyi ikiye iya?— Lijina lyenyi ikiye Yehova, kaha nawa twatela kuzanga chikuma eli lijina kana.

Chamuchivali, Yesu atunangula tulombelenga Wangana waKalunga wizenga. Ou Wangana kana wapwa waulemu mwomwo ukiko naukaneha kuunda hano hamavu nakwalumunaho kupwa palachise.

Chamuchitatu, ou Mulongeshi Wamunene ambile ngwenyi twatela kulomba mangana vyuma asaka Kalunga vilingiwe hano hamavu nganomu vyeji kulingiwanga mwilu. Nge natulomba vyuma kana evi, kaha twatela kulinga mwaya muchima waKalunga.

Chikwavo nawa chize Yesu atunangula tumulombenga Kalunga shina kulya chahalikumbi halikumbi. Kaha nawa ambile ngwenyi twatela kulikonekela kuli Kalunga nge tunavulumuna milonga numbanyi atukonekele. Shikaho twatela kumulombanga Kalunga atukonekele. Oloze shimbu kanda atukonekele, chakavanga twatela kukonekela vakwetu vaze vanatuvulumuna. Uno chapwa chachashi kuli ove kukonekela vakwenu nyi?—

Chakukumishilako, Yesu ambile ngwenyi, twatela kulomba kuli Yehova Kalunga mangana atukinge kuli uze wamupi, Satana Liyavolo. Ngocho, evi vikiko vyuma twatela kulomba kuli Kalunga.

Twatela kufwelela ngwetu Yehova eji kwivwililanga kulomba chetu. Shikaho hakumulomba atukafwe, twatela nakumusakwililanga nawa. Eji kwivwanga kuwaha nge natumulomba namuchima wetu wosena, kaha nawa nge natumulomba vyuma vyakwoloka. Chikupu vene mwakatuhana vyuma kanevi. Uno mukiko wafwelela nayove tahi?—

Punga yikwavo yamwaza yahanjika hakulomba yatwama hali Wavaka-Loma 12:12; WaPetulu 1, 3:12; naWaYowano 1, 5:14.

[Mivwimbimbi halifwo 67]

Yesu alombelenga uka wenyi . . . nomu nawa apwilenga navakwavo

[Muvwimbimbi halifwo 68]

Mwomwo ika watela kwivwilila kanawa kukulomba chahakukunguluka?

[Mivwimbimbi halifwo 69]

Lwola muka unahase kulomba mumuchima wove ngana muze alingile Nehemiya?

[Muvwimbimbi halifwo 70]

Vyuma muka nauhasa kuvuluka hakulomba kuli Kalunga?