Kapetulu 13
Vaze Vapwile Tumbaji twaYesu
IYA apwa ngamba yaKalunga wamwaza chikuma uze atwamaho lyehi hano hamavu?— Weka wauchi shina Yesu Kulishitu. Unashinganyeka ngwove tunahase kupwa ngana mwaikiye tahi?— Mbimbiliya yatulweza ngwayo atuselele chakutalilako chamwaza chize twatela kukavangiza. Kaha nawa atulweza mangana tupwenga tutumbaji twenyi.
Uno wejiva vyuma vyasakiwa hakupwa kambaji kaYesu nyi?— Vyapwa vyavivulu. Chakavanga, twatela kulinangula kuli ikiye. Oloze katwatela kukumina hahavene kahako. Twatela kufwelela navyuma mwatulweza nawa. Echi chinahase kutukafwa mangana tulingenga vyuma mwatulweza.
Vatu vavavulu veji kwambanga ngwavo vafwelela muli Yesu. Jino unashinganyeka ngwove vosena vapwa tumbaji twenyi?— Pimbi, vavavulu kavapwa tumbaji twenyiko. Vatu kana veji kuyanga tuhu kujichachi. Oloze kavatwama nalwola lwakulilongesa vyuma anangwile Yesuko. Shikaho, vaze veji kukavangizanga vyuma alingile Yesu vakivo kaha vapwa tumbaji twenyi.
Tuchishimutwile jino hali vaze vapwile tumbaji twaYesu omu apwile hano hamavu. Kambaji kenyi umwe wakulivanga apwile Fwilipu. Eyo, Fwilipu ayile nakutonda sepa lyenyi Natanyele (uze vavuluka nawa ngwavo MbalaTolomeu), ou unamono natwame mushi yamutondo. Jino omu Natanyele ejile kuli Yesu, kaha Yesu hikwamba ngwenyi: ‘Talenu, lunga wakuzeneka makuli, kaIsalele wamuchano.’ Natanyele jino nalikomokela, kaha himwahulisa ngwenyi: ‘Unangutachikiza ngachilihi?’
Yesu hikumukumbulula ngwenyi: “Shimbu kanda Fwilipu akusanyike, omu wapwanga mushi yamukuyu, mwaka ngwakumonanga lyehi.” Natanyele alikomokelele chikuma hakwivwa nge Yesu ejivile okwo apwile, kaha himwamba ngwenyi: “Ove yove MwanaKalunga, Ove uMwangana wavaIsalele.”—Yowano 1:49.
Shimbu kanda vaFwilipu nasepa lyenyi Natanyele vapwenga tumbaji twaYesu, kwapwile veka valivangile kupwa tumbaji twaYesu. Ava vapwile vaAndelei nandumbwenyi Petulu, kaha naYowano nandumbwenyi Yakova. (Yowano 1:35-51) Oloze hatando yayindende kaha, ava tumbaji vawana vakindulukile cheka kumilimo yavo yakuta vaishi. Yesu likumbi limwe apwile nakutambuka kwakamwihi naChijiva ChakuNgalileya, kaha himwamona Petulu naAndelei vali nakufuta lyoji muchijiva. Kaha Yesu himwavasanyika ngwenyi: “Ngukavangizenunga.”
Omu Yesu atambukileko chindende, amwene Yakova naYowano. Vapwile muwato nasevo hamwe, kaha vapwile nakutungulula moji avo. Kaha avasanyikile navakivo nawa mangana vamukavangizenga. Uno kachi nge ove yove vasanyikile kuli Yesu, kachi walingile ngachilihi? Kachi wamukavangijile hahaze vene tahi?— Ava malunga vamutachikijile Yesu. Vejivile ngwavo Yesu vamutumine kuli Kalunga. Kaha hahaze vene vasezele milimo yavo yakuta vaishi nakumukavangiza.—Mateu 4:18-22.
Uno echi chili nakulumbununa nge ava malunga kana valingilenga vyuma vyakwoloka shimbu yosena hakupwa jino vaka-kumukavangiza Yesu nyi?— Pimbi. Pamo nawanuka omu ava malunga vapwilenga nakulikokojwesa hakusaka kuwana ou apwile wamulemu hakachi kavo. Oloze vamwivwililile Yesu, kaha valumukile. Nayetu nawa nge tunakusaka kwalumuka, kaha tunahase kupwa tutumbaji twenyi.
Yesu asanyikilenga vatu vosena vapwenga tumbaji twenyi. Lwola lumwe chilolo umwe wamukweze muka-luheto ejile kuli Yesu nakumwihula ejive omwo nahase kuwanyina kuyoya chahaya myaka yosena. Omu chilolo ambile ngwenyi akavangijilenga jishimbi jaKalunga kufuma kuunyike, Yesu amulwezele ngwenyi: “Twaya ungukavangizenga.” Jino unejiva vyuma vyasolokele?—
Omu vamulwezele ngwavo mutu atela kumona mulimo wakupwa kambaji kaYesu kupwa waulemu chikuma kuhambakana luheto, uze lunga kawahililileko. Kahashile kupwa kambaji kaYesuko mwomwo azangile chikuma jimbongo kuhambakana Kalunga.—Luka 18:18-25.
Hanyima yakwambulula mwaka wamuundu nachimbwa, Yesu jino asakwile vaposetolo jenyi 12 hali vaze tumbaji twenyi. Ava vaposetolo vapwile malunga vaze atumine kukazata mulimo waunene. Uno ava vaposetolo wavejiva majina avo?— Tucheseke tumone nge natuhasa kulinangula majina avo. Tala hali eyi mivwimbimbi yavo nakumona nge unahase kuvavuluka majina avo. Acheseke kuwanuka osena nakuwavuluka.
Kutwala muze, umwe hali vaze vaposetolo 12 alumukile nakupwa kaposetolo wamupi. Lijina lyenyi ikiye Yuta Isakalyote. Kufuma haze, vasakwile kambaji mukwavo nakupwa kaposetolo. Wejiva lijina lyayou kaposetolo kana nyi?— Apwile Machiya. Kufumaho, Paulu naMbalanape navakivo nawa vapwile vaposetolo, oloze kavapwile hali vaze 12 koko.—Vilinga 1:23-26; 14:14.
Yesu azangilenga vanyike vavandende ngana muze twalinangulanga muKapetulu 1 muli uno vene mukanda. Mwomwo ika avazangililile?— Mwomwo ejivile ngwenyi navakivo vanahase kupwa tumbaji twenyi. Kakavulu, vanyike veji kuhanjikanga vyuma vize vyeji kukwatanga kumichima yavakulwane nakuvalingisa valinangule vyayou Mulongeshi Wamunene.
Namapwevo vavavulu nawa vejile nakupwa tumbaji twaYesu. Vamwe vatambukilenga nenyi hamwe omu ayilenga kujinganda jeka nakukambulwilako. Maliya wakuMangatala, naYowana, naSuzana valingilenga vene ngocho. Pamo vamuwahishililenga vyakulya nakumukoselako uvwalo wenyi.—Luka 8:1-3.
Uno nayove uli nakusaka kupwa kambaji kaYesu tahi?— Anuka ngwove mutu kulivuluka kaha ngwenyi ngukambaji kaYesu kacheshi kuhasa kumulingisa kupwa kambaji kenyiko. Twatela kupwanga navilinga vyamwaza vyakutusolola kupwa tutumbaji twaYesu kweshoko tuli, keshi nge kuvanga tuli kukukunguluka kahako. Kutala unahase kuvulukako vihela vimwe kuze twatela kusolola chikupu nge tutumbaji twaYesu nyi?—
Eyo, twatela kusolola vilinga vyamwaza hazuvo. Chihela chikwavo nawa twatela kusolwelako vilinga vyamwaza shina kushikola. Oloze chuma chachinene chize katwatela kuvulyamako nge tuli nakusaka kupwa tutumbaji twaYesu shina kulinga muze alingilenga ikiye kala kweshokwo tuli.
Tutange jino vyuma yahanjika Mbimbiliya vyatumbaji twaYesu, hali Mateu 28:19, 20; Luka 6:13-16; Yowano 8:31, 32; naWaPetulu 1, 2:21.
[Muvwimbimbi halifwo 72]
Ou lunga ali aha ikiye iya, kaha apwile ngachilihi kambaji kaYesu?
[Muvwimbimbi halifwo 73]
Yesu ali nakusanyika veya vaze mwasaka mangana vapwenga tumbaji twenyi?
[Mivwimbimbi halifwo 75]
Petulu
Andelei
Yakova (ndumbwaYowano)
Yowano
Fwilipu
Natanyele
Mateu
Tomase
Yakova (mwana Alefweu)
Shimona
Yuta (uze vavuluka nawa ngwavo Tateu)
Yuta Isakalyote
[Mivwimbimbi halifwo 76]
Mapwevo muka ava vakafwile Yesu omu ayile nakwambulula?
[Muvwimbimbi halifwo 76]
Kuvihela muka kuze twatela kusolwela ngwetu chikupu vene twapwa tutumbaji twaYesu?