Kapetulu 30
Vyuma Vyakutukafwa Tuhone Kwivwanga Woma
UNO chapwa chachashi kuli yove kuzachila Yehova tahi?— Mulongeshi Wamunene kambile ngwenyi nachikapwa chachashiko. Yesu, haufuku wakutwala kukufwa chenyi, alwezele vaposetolo jenyi ngwenyi: ‘Kachi nge vaka-mavu navamijinda, munatachikiza ngwenu, vavangilile kujinda ami, numbanyi vajinde enu nawa.’—Yowano 15:18.
Petulu alisashile ngwenyi keshi kukaseza Yesuko, oloze Yesu ambile ngwenyi haufuku vene uze Petulu mwakamukana katatu ngwenyi kamwijivako. Kaha omu mukiko vene alingile Petulu! (Mateu 26:31-35, 69-75) Uno chuma muka chalingishile numba amukane?— Petulu evwile woma ngana uze vevwile navakwavo vaposetolo nawa.
Unatachikiza ovyo vaposetolo vevwililile woma tahi?— Vahonene kulinga chuma chimwe chachilemu chikuma. Kulinangula chuma kana nachitukafwa tuzachile Yehova chamokomoko tuhu navyuma navahanjika vatu chipwe vize navatulinga. Chakulivanga, twatela kushimutwila havyuma vyasolokele haufuku wakukumishilako apwile Yesu navaposetolo jenyi.
Chatete, valingile chilika chaPaseka. Echi chapwile chilika chakulya chakulipwila valingilenga hamwaka hamwaka chakwanuna vatu jaKalunga omu vavasokwele muufunge muEjipitu. Kaha Yesu aputukile kulya chikwavo nawa chakulipwila. Natushimutwila chilika kanechi mukapetulu ali kulutwe muze natukalumbununa omwo chilika kana cheji kutukafwanga kwanuka Yesu. Omu chakumine chilika, Yesu akolezezele vaposetolo jenyi, kaha avatwalile jino kulitepa lyaNgetesemane. Kulitepa kana kukiko vasakilenga chikuma kuya.
Yesu avasele, nakuya kwauka wenyi nakulomba. Kaha alwezele Petulu, naYakova, naYowano mangana valombe. Oloze vasavalile tulo. Yesu ayile mapapa katatu nakulomba uka wenyi, oloze katatu kosena akindulukile, awanyinenga Petulu navakwavo vanasavala tulo! (Mateu 26:36-47) Uno unejiva ovyo vatelele kutonena nakulomba tahi?— Mana tuchishimutwileho.
Yuta Isakalyote kwapwile kuPaseka alingile Yesu navaposetolo jenyi naufuku uze. Yuta apwile mwiji ngana muze twalinangwile. Kaha ikiye nawa amusolwele Yesu kuli vaka-kole. Yuta atachikijile kanawa litepa lyaNgetesemane kuze Yesu navaposetolo jenyi vazangilenga kuya. Ngocho, Yuta anehele maswalale vakase Yesu. Omu vahetele kuze, Yesu avehwile ngwenyi: ‘Muli nakutonda iya?’
Vaze maswalale vamukumbulwile ngwavo: ‘Tuli nakutonda Yesu.’ Yesu kevwile womako, ngocho avakumbulwile ngwenyi: “Yami uno.” Vaze maswalale valikomokelele hakumika chaYesu, ngocho vahilukile futanyima nakulimbuka hamavu. Kaha Yesu avambile ngwenyi, ‘Nge muli nakutonda yami, kaha echenu vaposetolo jami vayenga kwavo.’—Yowano 18:1-9.
Omu vamukwachile Yesu nakumukasa kuli maswalale, vaposetolo jenyi vevwile woma nakuchina. Oloze Petulu naYowano vasakile vamone navisoloka kuli Yesu, ngocho vakavangijilenga munyima chikuma. Yesu vamutwalile jino kuzuvo yakapilishitu wakulitulaho Kayafwase. Yowano naPetulu vavetavishile kwingila muchipango kuli muka-kulama chikolo mwomwo Yowano vamutachikijile kuli kapilishitu wakulitulaho.
Tupilishitu te hivanalikungulwila lyehi kuzuvo yaKayafwase mangana vamusopese Yesu. Ava tupilishitu vasakile Yesu vamujihe. Ngocho, vasanyikile vinjiho vamakuli vamuvangijikile Yesu. Vatu vaputukile jino kuveta Yesu jimbanda najikonyi. Omu vapwile nakulinga vyosenevi, Petulu apwile hakamwihi.
Mwanapwevo alaminenga kuchikolo uze engishile Petulu naYowano amumwene Petulu nakumwamba ngwenyi: “Nayove nawa wapwanga naYesu.” Oloze Petulu akanyine ngwenyi Yesu kamutachikijileko. Kufumaho nawa mwanapwevo weka amwene Petulu nakulweza vaze vapwile hakamwihi ngwenyi: “Ou apwanga naYesu.” Oloze Petulu cheka ahamikile ngwenyi kamutachikijileko. Hakushimbulako chindende lizavu lyavatu vamwe lyamwene Petulu nakumwamba ngwavo: ‘Chamuchano vene ove usepa lyaYesu.’ Petulu ahamikile cheka kamuchitatu ngwenyi: “Mutu ou kangwamwijivako.” Petulu hikulishinga nakulishinga ngwenyi chamuchano vene Yesu kamutachikizako, kaha Yesu alumukile nakumutala.—Mateu 26:57-75; Luka 22:54-62; Yowano 18:15-27.
Uno unejiva vyuma vyalingishile Petulu numba alyonge?— Petulu evwile woma. Jino mwomwo ika evwilile woma? Vyuma muka ahonene kulinga numba ahone kumika? Achishinganyeke hachuma kanechi. Nyi vyuma muka vyamulingishile Yesu numba omike?— Yesu avangile kulomba kuli Kalunga, kaha Kalunga amukolezezele. Kaha anuka omu Yesu alwezele Petulu mapapa katatu ngwenyi alombe, nakutona. Oloze alingile ngachilihi?—
Petulu asavalile tulo katatu kosena. Kalombeleko kaha nawa katoneneko. Ngocho akasumukile kaha hakumona omu maswalale vejile nakukasa Yesu. Jino hakumona Yesu navamuveta nakufwila kumujiha halwola vapwile nakumusopesa, Petulu evwile woma chikuma. Oloze shimbu kanda lwola kanelu luhete, Yesu alwezele vaposetolo jenyi ngwenyi navakamona ika?— Yesu avalwezele ngwenyi nganomu vaka-lifuchi vamujinjile ikiye, mukiko navakavajinda navakivo nawa.
Tuchishinganyeke jino havyuma vinahase kusoloka kuli etu ngana vize vyasolokele kuli Petulu. Twambenga ngana ngwetu uli mushikola navakwenu kaha navaputuka kuhanjika vyavipi hali vatu vaze kaveshi kuhana chilutu kulipandelo chipwe kulemesa Kulisimasiko. Kachi nge umwe mwakuhulisa ngwenyi: “Uno muchano vene kaweshi kuhana chilutu kulipandeloko tahi?” Chipwe veka navamba ngwavo: “Twevwa ngwavo kaweshi kulinga chilika chaKulisimasiko!” Kutala mwivwa woma wakuvalweza muchano tahi?— Nyi naulyonga ngana muze alingile Petulu?—
Hanyima yakuhamika ngwenyi kamwijiva Yesuko, Petulu evwile kumuchima kukola. Hakushinganyeka chikuma havyuma alingile, alovokele haweluka, nakuya nakulila. Kaha akindulukile cheka kuli Yesu. (Luka 22:32) Achishinganyekeho. Uno chuma muka nachitukafwa tuhone kupwa nawoma nakulinga ngana muze alingile Petulu?— Anuka ngwove Petulu ahonene kulomba nakutwalaho lika kutona. Uno chuma muka twatela kulinga mangana tukavangizenga Mulongeshi Wamunene?—
Twatela kulomba kuli Yehova mangana atukafwe. Unejiva vyuma vamulingilile Yesu kuli Kalunga omu alombele?— Kalunga atumine kangelo nakukolezeza Yesu. (Luka 22:43) Uno vangelo jaKalunga vanahase kutukafwa nayetu tahi?— Mbimbiliya yamba ngwayo: “Kangelo kaYehova eji kutunganga chilombo chenyi kuli vaze vamwivwa woma jingulwishi ndo, nakuvayovola.” (Samu 34:7) Oloze hakusaka Kalunga atukafwe, katwatela kukumina hakulomba kahako. Unejiva chuma chikwavo twatela kulinga nyi?— Yesu alwezele tumbaji twenyi ngwenyi vatonenga. Unashinganyeka ngwove natuhasa ngachilihi kulinga ngocho?—
Twatela kwivwililanga kanawa kuvyuma navatunangulanga kukukunguluka chetu chavaka-Kulishitu nakwivwishisa vyuma natutanga muMbimbiliya. Kaha nawa twatela kulombanga kuli Yehova shimbu yosena mangana atukafwe tumuzachilenga. Kachi nge natulinga vyuma vyosenevi, kaha katweshi kwivwanga womako. Ngocho, natuwahilila nakulwezako vakwetu vyaMulongeshi Wamunene naIse.
Evi Visoneka vinahase kutukafwa tuhone kwivwanga vatu woma hakulinga vyuma vyakwoloka: Vishimo 29:25; Yelemiya 26:12-15, 20-24; naYowano 12:42, 43.
[Muvwimbimbi halifwo 159]
Mwomwo ika Petulu, naYakova, naYowano vatelelele kutona?
[Muvwimbimbi halifwo 160]
Mwomwo ika Petulu evwile woma numba alyonge ngwenyi Yesu kamutachikijileko?
[Muvwimbimbi halifwo 160]
Unahase kupwa ngachilihi muukalu ngana uze amwene Petulu?