Kapetulu 31

Kwakuwana Kuvendejeka

KUTALA shimbu jimwe weji kwivwanga kupihya nauli tahi?— Uno washinganyekaho lyehi ngwove vatu kavakuzangako nyi?— Vanyike vamwe veji kwivwanga vene ngocho. Oloze Kalunga ashika ngwenyi: ‘Ami kangweshi kukakuvulyamako.’ (Isaya 49:15) Awa ngwetu himazu amwaza chiyovo?— Eyo, Yehova Kalunga atuzanga chikuma!

Muka-kusoneka Mbimbiliya umwe asonekele ngwenyi: “Omu navanguseza tata namama, Yehova himwangwitavila.” (Samu 27:10) Kwijiva awa mazu kana chinahase kutuvendejeka, nyi ngachilihi?— Eyo, Yehova ngwenyi: ‘Kanda wivwa womako, mwomwo Ami nguli nove hamwe, . . . nangukukafwanga.’—Isaya 41:10.

Oloze Yehova shimbu jimwe eji kwechelelanga Satana atwingise muukalu. Yehova eji kwechelelanga nawa Satana eseke vangamba Jenyi. Lwola lumwe Liyavolo alingishile Yesu vamuyanjise chikuma numba alile kuli Yehova ngwenyi: “Ove Kalunga kami, Ove Kalunga kami, unangusezela ika?” (Mateu 27:46) Chipwe tuhu Yesu amwene ukalu, oloze ejivile ngwenyi Yehova amuzanga. (Yowano 10:17) Yesu atachikijile nawa ngwenyi Kalunga eji kwechelelanga Satana eseke vangamba Jenyi nakuvayanjisa. Kapetulu weka mwakalumbununa ovyo Kalunga eji kwechelelanga Satana alinge vyosenevi.

Shimbu jimwe vanyike vavandende veji kwivwanga chikuma woma. Chakutalilako, wajimbalaho lyehi tahi?— Ngwetu wevwile woma?— Mukiko veji kwivwanga navakwenu vanyike. Mulongeshi Wamunene lwola lumwe atele chishimo chakutalisa kukujimbala. Oloze mukoko ikiye ajimbalile keshi kanyikeko.

Nayove unalifwane namukoko mujijila jimwe. Mujila muka? Mwomwo mikoko kavapwa vavanene chipwe kupwa nangolo chikumako. Shikaho, vasaka mutu wakuvazakama nakuvakinga. Mutu uze eji kuvazakamanga ikiye kafunga.

Yesu muchishimo chenyi atele, avulukilemo vyakafunga uze apwile namikoko 100. Oloze mukoko umwe ajimbalile. Pamo mukoko kana asakile atale vyapwile kusali yapili. Oloze nakushimbula chiku, uze mukoko apwile jino kwakusuku navakwavo. Unashinganyeka ngwove uze mukoko evwile ngachilihi omu amwene ngwenyi ali kwauka wenyi?—

Uno kafunga eji kulinganga ngachilihi omu mwamona ngwenyi mukoko umwe wauchi? Kutala eji kwambanga ngwenyi ojo jenyi mukoko lyavene, mwomwo ikiye apihisanga nakumuliula tahi? Nyi eji kusezanga vaze 99 muchihela chamwaza nakuya nakutonda uze najimbala? Kutala chatamo kuya nakutondatonda meso ngengu mukoko umwe kaha nyi?— Kachi nge ove yove uze mukoko wakujimbala, kachi nausaka kafunga akutondetonde okwo uli tahi?—

Kafunga azangile chikuma mikoko jenyi vosena kuhakilako nauze vene ajimbalile. Ngocho, ayile nakutonda uze ajimbalile. Shinganyeka jino ocho kuwaha kana evwile uze mukoko hakumona kafunga uze mweza! Yesu alumbunwine ngwenyi nakafunga awahililile chikuma hakuwana mukoko wenyi. Awahililile chikuma hamukoko umwe kuhambakana hali vaze 99 vahonene kujimbala. Jino iya alifwana nakafunga wamuchishimo chaYesu? Iya eji kutuzakamanga chikuma ngana mwayauze kafunga azakamine mukoko wenyi?— Yesu ambile ngwenyi Ise wamwilu ikiye eji kutuzakamanga chikuma. Ou Ise ikiye Yehova.

Yehova Kalunga apwa Kafunga Wamunene eji kufunganga vatu jenyi. Yehova azanga vatu vosena vaze veji kumuzachilanga navanyike vakufwana nge yove. Yehova kasaka umwe hakachi ketu vamulemeke chipwe kumujihako. Ocho kuwaha kana hakwijiva nge Kalunga atuzakama chikuma!—Mateu 18:12-14.

Kutala nayove wafwelela muli Yehova Kalunga tahi?— Uno weji kushinganyekanga ngwove kwatwama?— Kumumonanyi, Yehova katwamumonako vene. Mwomwo apwa Shipilitu. Ikiye atwama namujimba uze katweshi kumona nameso etuko. Oloze kwatwama chikupu vene kaha nawa eji kutumonanga. Eji kwijivanga nawa nge tuli muukalu. Kaha tunahase kuhanjika kuli ikiye hakulomba, nganomu tweji kuhanjikanga kuli mukwetu mutu wahano hamavu. Eyo, Yehova asaka etu tulombenga kuli ikiye.

Jino watela kulinga ngachilihi nge naunyengetela chipwe uli nakwivwa uli?— Watela kuhanjika naYehova. Pandama kuli ikiye kaha mwakuvendejeka nakukukafwa. Anuka nawa ngwove numba wivwa tuhu nge uli uka wove, oloze Yehova akuzanga chikuma. Tuchimbate jiMbimbiliya jetu. Hali Samu 23 kuputuka muvesi 1 vatulweza ngwavo: “Yehova ikiye kafunga kami, kangweshi kuhona chumako. Eji kunguutamisanga kumalilo amwila wachimbete, eji kungutwalanga kumeya akuunda.”

Achitale nawa mazu ahakilileko muka-kusoneka muvesi 4 ngwenyi: “Chamwenemwene, chipwe nge nangutambuka muchinema chamuvwimbimbi wakufwa, kangweshi kwivwa woma walupiko, mwomwove uli nayami hamwe, kovokovo yove namukombo wove vyeji kunguvendejekanga.” Omu mukiko veji kwivwanga vatu vaze vatwama naKalunga kavo Yehova. Veji kuvavendejekanga nge vali muukalu. Uno omu mukiko weji kwivwanga nayove tahi?—

Nganomu kafunga wazangi eji kuzakamanga utanga wenyi, mukiko naYehova nawa eji kuzakaminangamo vatu jenyi. Eji kuvatwaminyinanga mujila yakwoloka, kaha veji kuwahililanga kumukavangiza. Kaveshi kwivwa womako numba kupwa tuhu ukalu wakufwana ngachilihi. Kafunga eji kuzachisanga kovokovo chipwe ngwetu mukombo wenyi nakukinga mikoko kutunyama vaze vanahase kuvakwata. Mbimbiliya yatulweza vyakafunga wakanyike Ndavichi omwo akingile mikoko jenyi kuli ndumba naulusu. (Samwele 1, 17:34-36) Ngocho, navatu jaKalunga nawa vatachikiza kanawa ngwavo Yehova mwavakinga. Veji kwivwanga vakukingiwa mwomwo vali naKalunga.

Yehova chikupu vene azanga mikoko jenyi, kaha eji kuvazakamanga mujila yazangi. Mbimbiliya yamba ngwayo: ‘Mwatwaminyina mikoko jenyi ngana mwakafunga. Vana vamikoko mwakavakungulwila mulivoko lyenyi.’—Isaya 40:11.

Unevu jino kuwaha hakutachikiza omu apwa Yehova ngwetu?— Nausaka kupwa umukoko wenyi tahi?— Mikoko veji kwivwililanga kulizu lyakafunga kavo. Veji kupandamanga kuli kafunga kavo. Kutala nayove weji kumwivwililanga Yehova nyi?— Weji kupandamanga kuli ikiye tahi?— Nge mukiko kaha kawatela kwivwa womako. Yehova mwapwanga nayove.

Yehova eji kuzakamanga vaze veji kumuzachilanga. Tutangile hamwe Mbimbiliya mangana tuwane vyuma yahanjika hachihande echi: Samu 37:25; 55:22; naLuka 12:29-31.

[Muvwimbimbi halifwo 163]

Unashinganyeka ngwove ou mukoko wamundende najimbala ali nakwivwa ngachilihi?

[Muvwimbimbi halifwo 164]

Iya nalifwane nakafunga ou nayovola mukoko wenyi?

[Muvwimbimbi halifwo 165]

Uno weji kushinganyekanga ngwove Yehova kwatwama chikupu vene nganomu weji kumonanga iso chipwe mutu weka tahi?

[Muvwimbimbi halifwo 166]

Uno iya nahase kutukafwa nge tuli muukalu nganomu kafunga eji kukinganga mikoko jenyi?