Kapetulu 37

Kwanukanga Yehova Namwanenyi

UNAHASE kwivwa ngachilihi nge mutu mwakuhana wana wamwaza chikuma?— Uno nawamba kaha ngwove ngunasakwililako mwane, nakumuvulyama mutu kana tahi? Nyi mumwanukanga mutu kana havyuma akuhanyine?—

Yehova Kalunga atuhana wana wamwaza chiyovo. Atumine mwanenyi hano hamavu mangana atufwile. Unejiva ovyo atufwilililile Yesu?— Echi hichihande chachilemu chikuma twatela kwivwishisa kanawa.

Nganomu twalinangwile muKapetulu 23, Alama avulumwine shili hakuhokola jishimbi jaKalunga jakwoloka. Ngocho tuvosena twatambwileko shili yasetu Alama. Jino unashinganyeka ngwove tuli nakutonda ika?— Chili kwijiva nge tuli nakutonda jino setu weka wamuhya, uze ayoyele chiyoyelo chakukupuka mwosena hano hamavu. Ove mukushinganyeka chove ngwove iya atamo kupwa setu wakufwana ngana?— Ou setu ikiye Yesu.

Yehova atumine Yesu hamavu mangana ngwenyi apwenga setu wakushisa muli Alama. Mbimbiliya yamba ngana ngwayo: ‘Mutu wakulivanga Alama apwile mwono wakuyoya. Alama wakukumishilako apwile Shipilitu muka-kuyoyesa.’ Uno Alama wakulivanga apwile iya?— Alama wakulivanga apwile uze mutu wakavanga kutenga kuli Kalunga kufuma kulukungu. Nyi jino Alama wamuchivali ikiye iya?— Ikiye Yesu. Mbimbiliya yalumbununa hatoma ngwayo: ‘Mutu wakulivanga Alama, napu wakumavu, wakuumba namavu. Mutu wamuchivali Yesu, Ikiye wakufuma mwilu.’—Wavaka-Kolinde 1, 15:45, 47; Kuputuka 2:7.

Hakuwana nge Kalunga anungulwile kuyoya chaYesu kuchifumisa mwilu nakuchihaka mujimo lyaMaliya, ngocho Yesu hakusemuka katambwile shili yaAlamako. Echi chikiko chamulingishile Yesu kupwa himutu wakukupuka mwosena. (Luka 1:30-35) Kaha chikiko nawa chalingishile numba kangelo ahanjike kutufunga hakusemuka chaYesu ngwenyi: “Lelo lino kwimbo lyaNdavichi kunamisemukila Mulwilo.” (Luka 2:11) Uno ou vene kemba Yesu chatete atelele kulinga ika numba atemo kupwa Mulwilo?— Chatete atelele kukola nakupwa mukulwane nge Alama. Omu akolele, apwile jino ‘Alama wamuchivali.’

Mulwilo wetu Yesu mwakapwa ‘Setu wamyaka yosena.’ Omu mukiko vamulumbununa muMbimbiliya. (Isaya 9:6, 7) Ngachize twafwelela ngwetu Yesu uze apwa wakukupuka mwosena ikiye nahase kupwa setu keshi Alamako uze apwile jino wakuhona kukupuka mwosena hakuvulumuna shili. Echi chikiko tuli nakusakila ‘Alama wamuchivali’ ngwetu apwenga setu. Oloze Yesu apwa MwanaYehova Kalunga.

Nge natumutachikiza kanawa Yesu, kaha natuhasa kumwitavila kupwa Mulwilo wetu. Kutala uchili nakwanuka vyuma vatela kutulwila nyi?— Vatela kutulwila kushili nakufwa twaswana kuli Alama. Kuyoya chaYesu chakukupuka mwosena chize alisuwile mwachimuna wakuvatula vachivuluka ngwavo ndando yakusokola. Yehova alongesele jila kaneyi yandando yakusokola mangana ngwenyi atukonekele shili yetu.—Mateu 20:28; Wavaka-Loma 5:8; 6:23.

Kutala tunahase kuvulyama vyuma vyosenevi atulingila Kalunga naMwanenyi tahi?— Yesu alwezele tumbaji twenyi jila yimwe yamwaza yize nayihasa kutukafwa twanukenga vyuma alingile. Tuchishimutwile jino hajila kaneyi.

Twambenga ngana ngwetu uli muzuvo yahelu muYelusalema. Hilwola lwaufuku jino, kaha Yesu navaposetolo jenyi vanatwame kumesa. Hamesa hali nyama yamukoko yakwocha, nambolo, navinyo. Yesu navaposetolo jenyi vali nachilika chakulipwila. Unejiva ovyo vali nakulingila chilika kanechi tahi?—

Echi hichilika chakuvanukisa mulimo waunene azachile Yehova kumyaka yakunyima omu vatu jenyi vaIsalele vapwile muufunge muEjipitu. Yehova hashimbu yize alwezele vatu jenyi ngwenyi tanga hitanga yijihe mwanamukoko, nakumbata manyingenyi nakuwasapwila havipamba vyavikolo vyajizuvo javo. Kaha avalwezele nawa kwingila mujizuvo javo nakulya yize nyama.

VaIsalele valingile vene nge muze avalwezele Yehova. Kaha kangelo kaYehova apulasanyine muEjipitu haufuku wauze vene. Uze kangelo ajihile vana vatwatwa mujizuvo jajivulu. Oloze azombokele hajizuvo haze vasapwilile manyinga amwanamukoko havipamba. Nakanyike afwile hajizuvo kana wauchi. Mwangana waEjipitu, Fwalo, evwile chikuma woma hakumona vyuma alingile kangelo kaYehova. Ngachize Fwalo alwezele vaIsalele ngwenyi: ‘Ngunamyeche, fumenu muno muEjipitu, liyilenu kwenu.’ Kaha hahaze vene valongejekele viteli vyavo havangamela nahavimbulu nakukatuka ungeji wavo.

Yehova kasakile ngwenyi vatu jenyi vavulyame omwo avasokwele kufuma muEjipituko. Ngachize avalwezele ngwenyi: ‘Hamwaka hamwaka mwatela kupwa nakulya ngana echi mwalyanga ufuku uno.’ Chilika kanechi vachivulukile ngwavo Paseka. Mwomwo ika?— Mwomwo haufuku uze, kangelo kaKalunga azombokelenga hajizuvo japwile natutachikijilo twamanyinga.—Kulovoka 12:1-13, 24-27, 31.

Shikangaho Yesu navaposetolo jenyi vali nakushinganyeka hachuma kanechi omu vali nakulinga chilika chaPaseka. Kufumaho Yesu jino himwalinga chuma chimwe chachilemu chikumakuma. Oloze shimbu kanda alinge chuma kanechi, vavangilile kuhanga kaposetolo Yuta uze ahonene kushishika. Kaha Yesu himwambata chihanda chambolo chasalileho, himwalomba nakuyipuzula nakuhana vaposetolo jenyi ngwenyi: “Tambulenu, lyenu.” Kaha himwavalumbunwina ngwenyi: ‘Eyi mbolo yinemanyinako mujimba wami nanguhana hakumifwila enu.’

Kaha Yesu himwambata nawa lupasa lwavinyo, nakulomba cheka nakuhana kuli vaposetolo jenyi. Himwavalweza ngwenyi: “Nwenumo muvosena.” Kaha nawa himwavalumbunwina ngwenyi: ‘Evi vinyo vinemanyinako manyinga ami. Kalinwaha vene nguwamwange mangana ngumisokole kushili yenu. Kalingalingenunga ngana mangana mukangwanukilengaho Ami.’—Mateu 26:26-28; Wavaka-Kolinde 1, 11:23-26.

Ngwetu wamono omu Yesu alwezele tumbaji twenyi ngwenyi valingenga chuma kana mangana vamwanukilengaho?— Ngocho kaveshi cheka kukalinganga chilika chaPasekako. Oloze mwaka himwaka navapwanga jino nachilika chakulipwila chakwanuka Yesu nakufwa chenyi. Chilika kana vachivuluka ngwavo Kulya chaMwata chaChingoloshi. Makumbi ano tweji kuchivulukanga kakavulu ngwetu Kwanuka Kufwa chaMwata. Mwomwo ika?— Mwomwo cheji kutwanukisanga vyuma atulingila Yesu naIse, Yehova Kalunga.

Mbolo yatela kutwanukisanga mujimba waYesu. Yesu alihanyine yavene kutufwila etu mangana tukayoye haya myaka yosena. Nyi vinyo?— Vinyo vyatela kutwanukisanga omu alema manyinga aYesu. Manyinga aYesu alema chikuma kuhambakana manyinga amwanamukoko vasapwilile havipamba vyavikolo muEjipitu. Mwomwo ika?— Mbimbiliya yalumbununa ngwayo manyinga aYesu anahase kutulingisa mangana vatukonekele shili yetu. Kaha omu navakatufumisa shili yetu yosena, katweshi kukaviza cheka, chipwe kushinakaja, chipwe kufwako. Ngachize, twatela kushinganyekanga havyuma kanevi hakuya kuchilika chaKwanuka Kufwa chaMwata.

Uno vatu vosena vatela kulya mbolo nakunwa vinyo hachilika kanechi chaKwanuka Kufwa chaMwata tahi?— Yesu alwezele vaze veji kulyangako ngwenyi: ‘Namukapwa nachihela muwangana wami kaha namukatwama hamatanda nayami mwilu.’ (Luka 22:19, 20, 30) Echi chalumbunwine nge vatu kanava navakaya kwilu nakukapwa vamyangana naYesu hamwe. Shikaho, kuvanga kaha vaze vakwechi lutalililo lwakukayula naYesu mwilu vakivo vatela kulya mbolo nakunwa vinyo.

Oloze navaze kaveshi kulya mbolo nakunwa vinyoko vatela navakivo nawa kupwanga kuchilika kanechi chaKwanuka Kufwa chaMwata. Mwomwo ika?— Mwomwo Yesu alisuwile nakutufwila tuvosena. Shikaho kuyanga kuchilika chaKwanuka Kufwa chaMwata, cheji kusololanga nge tuchili lika nakwanukanga ou wana waulemu chikuma atuhana Kalunga.

Visoneka vyasolola omu yalema ndando yakusokola yaYesu shina Wavaka-Kolinde 1, 5:7; Wavaka-Efwesu 1:7; WaChimoteu 1, 2:5, 6; naWaPetulu 1, 1:18, 19.

[Mivwimbimbi halifwo 193]

Uno Alama naYesu valifwana mujila muka, kaha kulifwana chavo chalemena haka?

[Muvwimbimbi halifwo 194]

Uno manyinga amwanamukoko akingile ngachilihi vaIsalele?

[Muvwimbimbi halifwo 194]

Uno tunahase kunganyala ngachilihi kumanyinga aYesu aze vafwanyisa kuvinyo?