Kapetulu 38

Vyuma Twatela Kumuzangila Yesu

ACHISHINGANYEKE uli muwato uze uli nakuvomba. Kutala nausaka mutu wakukuzambula hameya tahi?— Jino ngachilihi nge mutu umwe nalisuula nakulimbila hakalwiji mangana akuzambuleho?— Omu mukiko alingile Yesu Kulishitu. Kweseka nomu twalinangulanga muKapetulu 37, Yesu alihanyine yavene mwandando yakusokola mangana tukayovoke.

Oloze katweshi nakwamba ngwetu Yesu mwatuzambulanga hameyako. Nawanuka okwo atusokola Yesu tahi?— Atusokola kushili nakufwa twaswanyine kuli Alama. Yesu afwililile vatu vosena numba tuhu vamwe veji kulinganga vyuma vyavipi chikuma. Kutala unahase kulingisa muponde mangana ukafwe vatu vangana nyi?—

Mbimbiliya ngwayo: “Mutu mwamona ngwenyi, kufwila mutu wakwoloka hichachikalu. Oloze vamwe navahasuka pamo kufwila mutu wamwenemwene.” Mbimbiliya yalumbununa kanawa nawa ngwayo Yesu “avafwililile vaka-kumuzamukila Kalunga.” Havatu kanava hali navaze kavazachila Kalungako. Mbimbiliya yatwalaho lika ngwayo: “Shimbu haze twapwilenga tuchili tuvaka-shili [kulumbununa lwola twapwilenga nakulinga vyuma vyavipi], Kulishitu atufwilile.”—Wavaka-Loma 5:6-8.

Unahase kuvulukako kaposetolo umwe alingilenga vyuma vyavipi nyi?— Kaposetolo kana asonekele ngwenyi: ‘Kulishitu Yesu ejile hano hamavu nakulwila vaka-shili. Kuli vakivo ami ngunahambakana.’ Kaposetolo ahanjikile mazu awa ikiye Paulu. Atwalileho lika nakwamba ngwenyi ‘hamwaka apwilenga wakuhona mangana’ kaha nawa ‘apihishilenga.’—WaChimoteu 1, 1:15; WaChituse 3:3.

Achishinganyeke oyo zangi kana atwama nayo Kalunga hakutuma Mwanenyi ezenga nakufwila vatu vamuyachou! Mbata Mbimbiliya yove tutange chishina kanechi hali Yowano kapetulu 3, vesi 16. Vasoneka ngana ngwavo: “Mukiko vene mwavazangilile Kalunga vaka-mavu, kuvahanyina Mwanenyi umwe kaha lyamunwe, mangana ngwenyi, wose mwamwitavila akazeneke kunonga, oloze ngwenyi, atwamenga nakuyoya chahaya myaka yosena.”

NaYesu asolwele nawa nge apwilenga nazangi ngana yize apwilenga nayo Ise. Mukapetulu 30 wamukanda vene uno, twalinangwile omwo vamuyanjishile Yesu haufuku vamukashile. Vamutwalile kuzuvo yaKapilishitu Wakulitulaho Kayafwase, kuze vayile nakumusopesa. Vasanyikile vinjiho vamakuli vaze vamuvangijikilile Yesu. Kaha vapilishitu nawa vamuvetele Yesu jikonyi. Aha hakiko Petulu amukanyine Yesu ngwenyi kamutachikijileko. Tuchishinganyeke jino nge nayetu kutuli kaha tuli nakumona vyosena vili nakusoloka.

Kunachi jino. Oloze Yesu kasavalileko ufuku wosena pupu lyacha. Hakuwana jino nge kavasopanga kanawa naufukuko, vapilishitu hikusanyika vaka-Sunendeline chipwe ngwetu vaka-zango yayinene yavaYuleya, mangana ngwavo vamusopese cheka. Kaha hinavamuvangijikila Yesu cheka ngwavo nasaula Kalunga.

Vapilishitu hinavamukashisa cheka Yesu, nakumutwala kuli Pilatu, nguvulu wavaLoma. Kaha hinavamulweza Pilatu ngwavo: ‘Yesu vatela kumujiha mwomwo nafumbukila fulumende.’ Oloze Pilatu namono ngwenyi vapilishitu vali nakulyonga. Ngachize himwavalweza ngwenyi: ‘Kangwamwene mulonga napihisa ou lungako. Nangumwecha aliyile kwenyi.’ Oloze vapilishitu navatu veka hinavahamika ngwavo: ‘Nduma, vamujihe tuhu.’

Pilatu hikulweza cheka vatu ngwenyi mwecha Yesu aliyile kwenyi. Oloze vapilishitu hikusowangiza vatu nakwamba ngwavo: ‘Kachi nge naumwecha, kaha nayove nawa unafumbukila fulumende. Mujihe kaha.’ Vatu jino hikuneha liuya. Uno watachikiza vyuma alingile Pilatu tahi?—

Pilatu hikwivwilila mutunwa twavatu. Kaha himwalweza malunga vamulipule Yesu vikote. Kufumaho hikumuhana jino kumaswalale vakamujihe, nakumuvwika namuchama wamingonga kumutwe nakulyonga kumulemesa. Hinavamuhana chitondo chakumuyanjishilaho ngwavo ambate oku vali nakuya kuchihela chize vavuluka ngwavo kuKayoya. Omu vanahete kuze jino hinavamupapalila jimbambo mumavoko nakumahinji hali chize chitondo. Kaha hinavemika chize chitondo vanamupapalilaho. Yesu hikuputuka jino kumbwambumuka manyinga. Kaha nawa ali nakwivwa kukola chikuma!

Yesu kafwile hahaze veneko. Hanga achili lika hachitondo. Vaze vapilishitu hikuputuka jino kumutoleka. Kaha mahita-jila nawa ngwavo: ‘Kachi nge uMwanaKalunga, kaha sulukokwo kuchitondo.’ Oloze Yesu kwenyi nejiva vyuma amutuminyine Ise. Natachikiza ngwenyi atela kuhana kuyoya chenyi chakukupuka mangana tupwenga nalisesa lyakukayoya haya myaka yosena. Omu lwola lunahete kuma 15:00 nachingoloshi, Yesu himwalila nalizu lyakukanguka kuli Ise, nakufwa jino.—Mateu 26:36–27:50; Mako 15:1; Luka 22:39–23:46; Yowano 18:1–19:30.

Yesu alihandununa chikupu naAlama! Eyo, Alama kasolwele zangi yakumuzanga Kalungako. Alikangile kuli Kalunga. Kaha nawa kasolwele zangi hali etuko. Hakuvulumuna chenyi shili, tuvosena jino twasemuka nashili. Oloze Yesu kwenyi asolwele zangi yakumuzanga Kalunga nakutuzanga etu. Ononokelenga Kalunga shimbu yosena. Kaha alisuwile nakuhana kuyoya chenyi mangana afumise ponde yize atunehelele Alama.

Kutala weji kusakwililanga hachuma chachinene alingile Yesu tahi?— Kutala weji kulombanga Kalunga nakumusakwilila hakusuula Mwanenyi atufwiletu nyi?— Kaposetolo Paulu asakwililile chikuma havyuma amulingilile Kulishitu. NaPaulu asonekele ngwenyi MwanaKalunga ‘anguzangile alyechele Ivene hali ami.’ (Wavaka-Ngalesha 2:20) Yesu akufwililile yove nakungufwila nayami nawa. Alisuwile nakuhana kuyoya chenyi mangana tukayoye haya myaka yosena! Eyo, echi hichuma chachinene chatela kutulingisa tumuzange chikuma Yesu.

Kaposetolo Paulu asonekelele vaka-Kulishitu vamuKolinde ngwenyi: “Zangi yaKulishitu yeji kutushinjilanga.” Uno zangi yaKulishitu yeji kutushinjilanga kulinga ika? Unashinganyeka muka?— Achitale mazu akumbulwile Paulu, ngwenyi: ‘Kulishitu avafwilile vosena manganava vayoya vakanenga kuliyoyela cheka vavene, oloze vamuyoyelenga Uze avafwilile.’—Wavaka-Kolinde 2, 5:14, 15.

Kutala unahase kuvulukako jijila jimwe muhasa kusolwelamo nge katwamino kove keji kumwivwisanga Kulishitu kuwaha nyi?— Jila yimwe yapwa shina yakulwezako vakwenu vyuma unalinangula hali ikiye. Chipwe eseka kushinganyeka hachumechi: Twambenga ngana ngwetu uli uka wove muzuvo. Kakweshi noko chipwe iso chipwe kala mutu mwamona vyuma naulingako. Jino unahase kutala mivwimbimbi haTV, chipwe vyuma vimwe vyahaInternet vize navivwisa Yesu kupihya kumuchima tahi?— Watela kwanuka ngwove Yesu kwali wamutonyi kaha eji kumonanga vyuma tweji kulinganga.

Chuma chikwavo nawa twatela kumuzangila Yesu shina chakusaka kulondezeza Yehova. Yesu ambile ngwenyi ‘Tata anguzanga.’ Unatachikiza ovyo amuzangila Yesu novyo twatela kumuzangila nayetu nawa nyi?— Mwomwo Yesu alisuwile kufwa mangana atesemo muze mwayile muchima waKalunga. (Yowano 10:17) Ngachize twatela kulinga vyuma vatulweza muMbimbiliya ngwavo: “Pwenunga muvaka-kumulondezeza Kalunga, mwavana venyi azanga, kaha tambukenunga muzangi nganomu amizangilile Kulishitu nawa nakulyecha Ivene hali etu.”—Wavaka-Efwesu 5:1, 2.

Nge natusaka tumusakwilile Yesu havyuma atulingilile, kaha tanga Yowano 3:35; 15:9, 10; naWaYowano 1, 5:11, 12.

[Mivwimbimbi halifwo 199]

Yesu vamuyanjishile ngachilihi omu alihanyine yavene hali etu?

[Muvwimbimbi halifwo 200]

Vyuma muka tunahase kulinga mangana tusolole ngwetu Yesu twamuzanga?

[Muvwimbimbi halifwo 201]

Iya nahase kumona vyuma vyosena natulinga?