Kapetulu 21
Ahonesele Woma naMuchima Wakuhuhwasana
1-3. Vyuma muka amwene Petulu namusana, kaha ukalu muka amwene naufuku?
LIKUMBI limwe Petulu apwile muwato navakwavo ufuku wosena haChijiva ChaNgalileya. Omu vahetele kulungulungu lyakucha vazeyele chikuma, mwomwo vavuwilenga wato ufuku wosena. Vamwene ukalu halwiji, mwomwo hakalwiji hapwile makimba chikuma aze apwile nakuliveta hawato nakusaka kuuvombesa. Petulu navakwavo vahundanganyine ufuku wosena mangana vapingulule wato kuchina nauvomba.
2 Shimbu kanda ufuku kana, Petulu navakwavo vasele Yesu ukawenyi hatunda. Likumbi kana vamwene omu Yesu alishile makombakaji avatu vapwile nazala najimbolo jajindende kaha natuvayishi. Ngocho, vatu vasakile kukwata Yesu nakumulingisa kupwa mwangana, oloze ikiye akanyine kwazana muvihande vyalifuchi nachiyulo. Akafwile nawa vaka-kumukavangiza vahone kwazana muvihande kanevi. Hakusaka vatu vamwehuke, alwezele tumbaji twenyi vazauke musali kaha ikiye ayile ukawenyi kupili nakulomba.—Mako 6:35-45; tangenu Yowano 6:14-17.
3 Tumbaji vavuwile ufuku wosena, oloze kavayile kwakusukuko mwomwo halwiji hapwile makimba. Kavahashile kushimutwilako mwomwo yavyema vyamakimba napeho yapwile nakuhuhwa kuswa kumwe. Petulu pamo apwile nakushinganyeka vyuma vyeka.
4. Chakutalilaho muka atusela Petulu?
4 Petulu apwile nakushinganyeka vyuma vyavivulu. Hamyaka yivali yahichilemo, Petulu aliwanyine naYesu wakuNazaleta. Halwola kana alinangwile vyuma vyavivulu, oloze kuchapwile lika vyuma vyeka vyakulinangula. Petulu alisuwile kulinangula mwakuhonesela woma namuchima wakuhuhwasana Yehova naYesu. Ngocho, atusela chakutalilaho chamwaza twatela kulondezeza makumbi ano. Tutalenu ovyo twatela kulingila ngocho.
“Tunamuwane Meshiya”
5, 6. Chiyoyelo muka apwile nacho Petulu?
5 Petulu kavulyamine likumbi lyatete aliwanyine naYesuko. Ndumbwenyi Andelei, ejile nakumulweza mujimbu wakukomwesa ngwenyi: “Tunamuwane Meshiya.” Mazu kana alumwine chiyoyelo chaPetulu.—Yowa. 1:41.
6 Petulu atwaminenga muKapelenau nganda yakunote yakuChijiva ChaNgalileya. Apwile nakuzachila hamwe naAndelei, navana vaZevete vaYakova naYowano mumulimo wakuta vayishi. Petulu katwaminenga kaha napuwenyiko, oloze atwaminenga nanayewenu nandumbwenyi Andelei. Hakusaka kuzakama tanga yoseneyi, Petulu atelele kuzata nangolo nakutachikiza kanawa mulimo wenyi wakuta vayishi. Achishinganyekenu omu ayilenga nakujiha vayishi hakumbi hakumbi naufuku, nakuta moji nakwoza kala vayishi vafwile hamoji. Kuheta namusana vasakwilenga vayishi vaze vajihile nakuvalanjisa. Kufumaho vatongelenga moji nakuwawahisa kanawa numba vawate cheka nachingoloshi.
7. Mujimbu muka wakuvuluka Yesu uze evwile Petulu, kaha mwomwo ika wapwililile wamwaza?
7 Mbimbiliya yatulweza ngwayo, Andelei apwile kambaji kaYowano muka-Kumbapachisa. Chikupu vene Petulu evwililile kumujimbu vamulwezele kuli ndumbwenyi uze ambulilenga Yowano. Likumbi limwe, Andelei amwene Yowano mwenyika Yesu wakuNazaleta nakwamba ngwenyi: “Talenu, Mwanamukoko waKalunga!” Hahaze vene Andelei aputukile kukavangiza Yesu nakulweza Petulu ngwenyi: Meshiya neza. (Yowa. 1:35-40) Kunyima omu vatu valikangile muEtene, Yehova Kalunga ashikile ngwenyi nakukeza mutu wakulipwila uze mwakalwila vatu. Halwola kana te munahichi lyehi jino myaka 4,000. (Kupu. 3:15) Andelei awanyine Meshiya uze apwile muka-kusokola vatu. Kaha Petulu alahile nakuya nakumona Yesu.
8. Lijina lize valukile Petulu kuli Yesu lyalumbununa ika, kaha mwomwo ika vatu vamwe veji kuhuhwasanyinanga lijina kana?
8 Hamyaka yosena vatu vatachikijile ngwavo Petulu ikiye Shimona. Oloze halikumi kaneli Yesu amutalile nakwamba ngwenyi: “Ove yove Shimona mwanaYowano; navakuvulukanga ngwavo Kefwase” (kulyalumuna ngwavo, Petulu).” (Yowa. 1:42) Lizu “Kefwase” lyalumbununa “lilolwa.” Mazu ahanjikile Yesu apwile aupolofweto. Amwene ngwenyi Petulu mwakapwa lilolwa lyakukola uze mwakajikijisa vaka-kukavangiza Kulishitu. Uno mazu kana amulumbunukilile Petulu tahi? Nduma. Navaka-kutanga mikanda yaMujimbu Wamwaza vamakumbi ano, veji kuhuhwasananga ngwavo Petulu kapwile nge lilolwako. Vamwe veji kwambanga ngwavo kapwile lunga wakujikizako kaha nawa alumwinenga vishinganyeka kala lwola.
9. Vyuma muka Yehova naMwanenyi veji kumonanga muli etu, kaha mwomwo ika twatela kuvafwelela?
9 Petulu hakupwa mutu ngana mwayetu, nayikiye apwilenga natutenga kaha naYesu atumwenenga. Oloze Yesu uze eji kulondezezanga Ise Yehova, ahakilenga kaha mangana kuvyuma vyamwaza valingilenga vatu. Amwene vyuma vyamwaza muli Petulu, kaha asakile kumukafwa mangana atwalilileho lika kupwa navilinga kana. Namakumbi ano Yehova naMwanenyi veji kutalanga vyuma vyamwaza muli yetu. Pamo katweshi kuhasa kushinganyeka ngwetu tuli nakulinga vyuma vyamwaza vize navamona muli etuko. Oloze twatela kufwelela muli Yehova naMwanenyi nakwitavila vatunangule ngana muze alingile Petulu.—Tangenu WaYowano 1, 3:19, 20.
“Kanda Wivwa Womako”
10. Vyuma muka amwene Petulu, oloze ahilukile kumulimo muka?
10 Petulu atela apwile hamwe naYesu omu ayile nakwambulula mujimbu wamwaza. Atela amwene omu Yesu alingile chuma chakukomwesa chatete chakwalumuna meya kupwa vinyo hachifupawenga chapwile kuKana. Chachinenenyi evwile mujimbu waWangana waKalunga ambulile Yesu. Chipwe ngocho, Petulu asezele Yesu nakukinduluka kumulimo wenyi wakuta vayishi. Omu mwahichile tukweji vavandende, Petulu aliwanyine cheka naYesu kaha Yesu alwezele Petulu amukavangizenga shimbu yosena mumulimo wakwambulula.
11, 12. (a) Mulimo muka azachilenga Petulu naufuku? (b) Vyuma muka ashinganyekele Petulu omu evwililile kuli Yesu?
11 Petulu navakwavo vanyingamine ufuku wosena nakuta vayishi. Oloze kavahashile kwoza yishi numba umweko. Petulu azachishile uhashi wenyi nakwesejeka nakutela kuvihela vyakulisezaseza mangana ozenga vayishi. Esekele nakuta mumeya avundu pamo ngwenyi mwoza vayishi vavavulu ngana muze veji kulinganga vakwavo vaka-kuta vayishi, oloze likumbi kana vyuma vyakaluhwile. Atela ahombele chikuma mwomwo ahonene kujiha vayishi likumbi kana. Atelenga vayishi mangana azakame tanga yenyi. Kufumaho, ejile kutunda mavokovoko nakuputuka kukosa moji enyi mangana aliyile kwenyi. Kaha Yesu ejile nakumuwana ali nakukosa moji.
12 Vatu vavavulu vejile nakwivwilila vyuma apwile nakunangula Yesu. Hakuwana nge vatu vavulile chikuma, Yesu engilile muwato waPetulu nakumulweza avuweko chindende. Liyongomena lyevwililile kanawa vyuma anangwile Yesu mwomwo lizu lyapwile nakwivwakana kanawa. Petulu nayikiye evwililile kanawa vyuma apwile nakunangula Yesu. Atwalilengaho lika kwivwilila omu Yesu ambulwilenga mujimbu wamwaza, uze wazamine haWangana waKalunga nakupwa mutwe wachihande. Chapwile hikutokwa chachinene kuli Petulu kukafwa Kulishitu atandakanyise mujimbu wamwaza mujingalila josena. Kutala chapwile chakutamo Petulu kuseza tanga yenyi nakuya nakwambulula mujimbu tahi? Nyi mwahasa kuzakama ngachilihi tanga yenyi? Pamo Petulu ashinganyekele ngwenyi mulimo wakwambulula wapwa waukalu ngana wakuta vayishi.—Luka 5:1-3.
13, 14. Chakukomwesa muka chize Yesu alingilile Petulu, kaha Petulu evwile ngachilihi?
13 Omu Yesu akumishile kuhanjika, alwezele Petulu ngwenyi: “Twala wato kuze kwakukunama, kaha futenu moji enu mukwate vaishi.” Petulu ahuhwasanyine nakushinganyeka ngwenyi mwalishina tuhu. Kaha ambile ngwenyi: “Ove Muka-kunangula, tunafulyangila ufuku wosena, kaha katwajihile ishi numba umweko, oloze kweseka namazu ove nangufuta moji.” Halwola kana te Petulu anakufuma hakukosa moji enyi. Aputukile kushikumwisa moji enyi mumeya oku anakushinganyeka ngwenyi nayishi mwafwaho vene wauchi. Alwezele vakwavo vapwile muwato ukwavo mangana vavakavangize.—Luka 5:4, 5.
14 Petulu evwile lyoji linaleme omu lyaputukile kuheta hamashima. Aputukile kukoka najingolo kaha amwene vayishi vavavulu vanafu halyoji. Hahaze vene asanyikile vakwavo vaze vapwile muwato weka vezenga nakumukafwa. Vayishi vavulile chikuma kaha kavahashile kuta muwato umwe kahako. Ngocho, vazalishile mato osena avali, kaha mato asakile nakuvomba. Petulu alikomokelele chikuma. Numba tuhu kunyima amwene vyuma vyakukomwesa alingilenga Kulishitu, oloze halikumbi kana alikomokelele chikuma hakumona omu alingishile vayishi vafwenga halyoji. Chapundu vene, Yesu apwile nangolo jakulingisa vayishi vafwenga halyoji. Petulu evwile chikuma woma. Afukamine kumambuli aYesu nakwamba ngwenyi: “Ove Mwata, fuma kuli ami, mwomwo ami ngumuka-shili.” Petulu ashinganyekele ngwenyi katelele kulikata naMutu kanako mwomwo apwile nangolo jakufuma kuli Kalunga.—Tangenu Luka 5:6-9.
15. Yesu akafwile ngachilihi Petulu amone ngwenyi katelele kwivwa woma nakulizakaminako?
15 Yesu ambile ngwenyi: “Kanda wivwa womako. Kufuma vene oholili naufutanga vatu.” (Luka 5:10, 11) Petulu katelele kwivwa woma chipwe kuhuhwasana. Petulu atelelele kuhaka muchima kumulimo waulemu wakwambulula mujimbu muchishishisa chakulizakamina mwakukafwila tanga yenyi nyi chipwe mwakwambulwila vatu mujimbuko. Yesu apwile namulimo waulemu uze naukakafwa vatu kulutwe. Apwile nakuzachila Kalunga uze eji ‘kuvulisanga kukonekela.’ (Isa. 55:7) Shikaho, Petulu atelele kufwelela kaha muli Yehova nakushinganyeka ngwenyi mwazakama tanga yenyi kumujimba nakushipilitu.—Mateu 6:33.
16. Uno Petulu, naYakova, naYowano vakwile ngachilihi omu Yesu avasanyikile, kaha mwomwo ika chuma vasakwile chapwile chachilemu?
16 Petulu ononokele mazu aYesu ngana muze alingile Yakova naYowano. Ngocho “vakindulukile nakusulika mato avo kutunda, kaha vasezele vyuma vyosena, vamukavangijile.” (Luka 5:11) Petulu afwelelele muli Yesu naIse uze amutumine. Asakwile chuma chachilemu chikuma mukuyoya chenyi. Navaka-Kulishitu makumbi ano vatela kuhamuka numba vahase kuzachila kanawa Yehova. Vatela kwanuka ngwavo Yehova eji kuzakamanga vosena vaze veji kufwelelanga muli ikiye.—Samu 22:4, 5.
“Ikaze Wahuhwasanyinanga?”
17. Vyuma muka apwile nakushinganyeka Petulu omu mwahichile myaka yivali kufuma haze aliwanyine naYesu?
17 Omu mwahichile myaka yivali kufuma haze aliwanyine naYesu, Petulu ayile muwato muChijiva chaNgalileya ngana muze twavulukanga kumaputukilo akapetulu uno. Katwejivile vyuma apwile nakushinganyeka halwola kanako. Oloze apwile nakushinganyeka vyuma vyavivulu amu apwile nakuzauka chijiva. Yesu okile nayewenu yaPetulu. Anangwile vatu Chihande ChahaPili. Kaha nawa omu apwilenga nakunangula vatu nakulinga vyuma vyakukomwesa, asolwele hatoma nge apwile chikupu Meshiya uze Vatongola Kuli Yehova. Omu mwahichile tukweji vamwe, Petulu alinangwile mwakuhonesela woma nakuhona kuhuhwasana. Yesu asakwile Petulu kupwa umwe wavaposetolo 12. Chipwe ngocho, Petulu achipwile lika nawoma namuchima wakuhuhwasana.
18, 19. (a) Lumbununenu vyuma amwene Petulu haChijiva chaNgalileya. (b) Yesu akumbulwile ngachilihi Petulu havyuma alombele?
18 Omu kwapwile kwakamwihi nakucha, pamo nalwola lwa 03:00, Petulu amwene chuma chimwe chapwile nakutambuka hameya kaha alitwaminyine kuvuwa wato mangana amone kanawa. Chuma kana chamunyikile kufuma mwilu mbwe nahameya oku chili nakutambuka. Omu chaputukile kupandama kwakamwihi, Petulu amwene jino nge mutu ali nakutambuka hameya oku ali nakwiza kuze kuwato. Tumbaji vevwile woma chikuma nakulichikimina. Oloze uze mutu ambile ngwenyi: “Likolezezenu! Yami vene, kanda namwivwa womako.” Mutu kana apwile Yesu.—Mateu 14:25-28.
19 Petulu amukumbulwile ngwenyi: “Ove Mwata, kachi nge yove vene, ngulweze ngwizenga kuli ove hameya.” Hakavanga ahamukile. Petulu asakile kumona ngolo jaYesu jakukomwesa mangana azamise lufwelelo lwenyi. Ngachize asakile atambuke hameya ngana mwaYesu. Kaha asulukile muwato nakuputuka kutambuka hameya. Achishinganyekenu omu Petulu evwile hakulyata hameya kwijiva nge hamavu. Atela evwile kuwaha omu apwile nakuya kuli Yesu. Oloze aputukile kwivwa woma.—Tangenu Mateu 14:29.
20. (a) Petulu ahakile mangana kuvyuma muka omu apwile hameya, kaha vyuma muka vyasolokele? (b) Yesu alwezele Petulu mazu muka?
20 Petulu atelele kutala kaha hali Yesu uze apwile najingolo jaYehova jize jamulingishile atambuke hamakimba. Yesu alingile ngocho mwomwo Petulu apwile nalufwelelo muli ikiye. Oloze Petulu ahungukilile kuvyuma vyeka. Mbimbiliya ngwayo: “Hakumona nyamanganda evwile woma.” Petulu aputukile kutala hamakimba aze apwile nakuliveta hawato nakunganjanga napeho, ngocho alizakaminyine. Aputukile kwivwa woma ngwenyi mwalondomana nakufwa hameya, kaha lufwelelo lwenyi lwazeyele. Lunga uze valukile ngwavo lilolwa mwomwo yakuhamuka navilinga vyamwaza, aputukile kulondomana nge lilolwa hakuwana nge lufwelelo lwenyi lwazeyele. Numba tuhu atachikijile kuhala, oloze halwola kana amwene ngwenyi keshi kuhasako. Kaha atambakanyine ngwenyi: “Ove Mwata, ngulwile.” Yesu amukwachile kulivoko nakumuzambula mumeya. Omu vapwile hameya, Yesu alwezele Petulu ngwenyi: “Ove muka-lufwelelo lwalundende, ikaze wahuhwasanyinanga?”—Mateu 14:30, 31.
21. Mwomwo ika kuhuhwasana chapwila chachipi, kaha tunahase kuchihonesa ngachilihi?
21 Yesu ahanjikile mwakwoloka hakuzachisa lizu ‘kuhuhwasana.’ Kuhuhwasana chapwa chachipi mwomwo cheji kulingisanga mutu azeye. Nge natupwa namuchima wakuhuhwasana, kaha lufwelelo lwetu lunahase kuzeya nakufwa jino kushipilitu. Twatela kuzata nangolo mangana tuhonese muchima kana. Mujila muka? Hakujika michima yetu mumwe. Nge natushinganyekanga lika havyuma vize vinahase kutwivwisa woma, nakutuhombesa, navyuma vize navitusosolola kuli Yehova naMwanenyi, kaha natupwanga lika namuchima wakuhuhwasana. Oloze twatela kuhaka muchima kuli Yehova naMwanenyi, nahavyuma vatulingilile kunyima, nevi vali nakutulingila oholyapwa, navize navakatulingila kulutwe. Echi nachizamisa lufwelelo lwetu nakuhona kwivwa woma chipwe kuhuhwasananga.
22. Mwomwo ika chapwila chachilemu kulondezeza lufwelelo lwaPetulu?
22 Omu Petulu akavangijile Yesu kuwato, nawaze makimba vene aunjile. Chijiva chaNgalileya chaunjile kulu. Petulu navakwavo tumbaji vambile ngwavo, “Chikupu vene ove uMwanaKalunga.” (Mateu 14:33) Omu kwachele, Petulu atela awahililile chikuma. Amwene ngwenyi woma ukiko wamulingishile numba aputuke kulondomana hameya. Enga, Petulu atelele kwalumuna muchima wenyi numba apwenga muka-Kulishitu wakukola nge lilolwa lize avulukile Yesu. Petulu afwililile kuzachila hatutenga twenyi mangana azovoloke. Uno nayenu mweji kufwila kulinga ngocho tahi? Chikupu vene twatela kulondezeza lufwelelo lwaPetulu.
VYUMA WATELA KUSHINGANYEKAHO . . .
• Petulu ahonesele ngachilihi muchima wakuhuhwasana hakukavangiza Yesu?
• Yesu asolwele ngachilihi nge amwene vyuma vyamwaza muli Petulu?
• Vyuma muka alinangwile Petulu haChijiva chaNgalileya vize vyasolwele nge apwile nakuhuhwasana?
• Mujila muka munahase kulondezezelamo lufwelelo lwaPetulu?
[Muvwimbimbi halifwo 180]
[Mukuku wavasona velava uli mukachi kamazu halifwo 180]
Petulu alinangwile vyavivulu hali Yesu mumyaka yivali kaha, oloze achipwile navyuma vyavivulu vyakulinangula
[Mukuku wavasona velava uli mukachi kamazu halifwo 183]
Petulu evwilenga Yesu mwambulula vyaWangana waKalunga uze wapwile mutwe wachihande chenyi
[Muvwimbimbi halifwo 184]
“Ove Mwata, . . . ami ngumuka-shili”
[Muvwimbimbi halifwo 187]
“Hakumona nyamanganda evwile woma”