Kushindulula Watachi
19 Mukuhita kwampinji, Nahashi Mwanta wawaAmoni wafwili nawa mwanindi wamuswanini nakwikala mwanta.+ 2 Hohenohu, Davidi wahosheli nindi: “Nukumumwekeshela Hanuni mwana kaNahashi kukeña kwakashinshi,+ muloña tata yindi wammwekesheleli kukeña kwakashinshi.” Dichi Davidi watemesheli antemesha kulonda ayi nakumukundeja nanochu chafwishiliyi tata yindi. Ilaña ambuña aDavidi chashikiliwu mwituña dawaAmoni+ kulonda amukundeji Hanuni, 3 ayilolu awaAmoni amulejeli Hanuni nawu: “Wunakutoñojoka neyi Davidi nakumulemesha tata yeyi nanochu chinakutemesheliyi akakukukundeja? Komana ambuñindi hiyanenzi kudi eyi kulonda atalatali chikupu musumba wejima nikuwendesha kulonda akwimiki mushinduku?” 4 Dichi Hanuni wakwatili ambuña aDavidi nakuyitewula+ nikuketula yakuvwala yawu hakachi hamahanda awu nawa wayuumbiliku nindi ayeña. 5 Davidi chamulejeliwu nsañu yanawa amayala, hohenohu watemesheli amakwawu kuya nakuwana ambuñindi, muloña awa amayala ayisawili nankashi; nawa mwanta wayilejeli nindi: “Shakamenu muYeriku+ sampu wevu wenu wunameni cheñi, kufumahu dinu mwakafunti.”
6 Haniyi mpinji, aAmoni amweni nawu anatachiki dehi kununka ivumba datama kudi Davidi, dichi Hanuni niaAmoni atemesheli ntalenta* jasiliva 1,000 kulonda afweteli makalu niakakwendela hatuwalu kufuma kuMesopotamiya,* kuArami Mayaka nikuZoba.+ 7 Dichi afweteleli makalu 32,000 hamu nimwanta wakuMayaka niantu jindi. Kufumahu, enjili nakuteekela kumbidi yaMedeba.+ AAmoni adipompesheli hamu kufuma kunyisumba yawu nawa enjili nakuzuña njita.
8 Davidi chachitiyiliyi, watemesheli Yowabi+ niamashidika ejima, kushilahu niakakuzuña njita indi añovu chikupu.+ 9 Nawa aAmoni ayili nakuditanjika kulonda azuñili njita kuwiñililu wamusumba nawa haniyi mpinji, anyanta enjili adiña kwankawawu mwisaña.
10 Yowabi chamweniyi nindi amashidika anakwinza nakumulukukila kumbidi nikunyima, watondelihu amashidika muIsarela elukisha kuzuña njita nakuyitanjika kulonda azuñi njita nawaSiriya.+ 11 Amayala ejima ashalilihu wayihanini kudi manakwindi* Abishayi+ ayilomboli nikuyitanjika kulonda azuñi njita nawaAmoni. 12 Kufumahu, wahosheli nindi: “Neyi aSiriya+ akumbadika ñovu, eyi watela kwinza nakuñamwina; ilaña neyi aAmoni akukubadika ñovu, ami nukukwamwina. 13 Twatela kwikala akola nawa ahamuka+ muloña wawantu jetu nihamuloña wanyisumba yaNzambi yetu, nawa Yehova wukwila chuma chikumonayi nindi chachiwahi.”
14 Kuhiñahu, Yowabi niantu jindi aswinini kwakwihi kulonda azuñi nawaSiriya, ilaña wena amutemukili.+ 15 AAmoni chamweniwu nawu aSiriya anatemuki, niwena amutemukili manakwindi Abishayi nakuya mumusumba. Kufumahu, Yowabi wafuntili kuYerusalema.
16 ASiriya chamweniwu nawu anayimiki mushindu kudi aIsarela, atemesheli antemesha kuya nakutambika aSiriya mwiluña dakuKaloña,*+ hamu naShofaki mukulumpi wanjita yaHadadezeri iku nakuyilombola.+
17 Davidi chamulejeliwu iyi nsañu, hohenohu wapompesheli aIsarela ejima nawa azambukili Yodani nakuya kudi wena nawa aditanjikili kulonda azuñi nawu njita. Davidi waditanjikili kulonda azuñi njita nawaSiriya nawa azuñili nindi.+ 18 Ilaña aSiriya ayitemukili aIsarela; dichi Davidi wajahili akakwendesha makalu 7,000 niamashidika akakwenda hamaseki 40,000 awaSiriya, nawa wamujahili Shofaki mukulumpi wanjita. 19 Ambuña aHadadezeri chamweniwu nawu anayimiki mushindu kudi aIsarela,+ anyakeli kuleta kuwunda naDavidi nawa ekalili akakumukalakela.+ ASiriya hiyakeñeleña kuyikwasha cheñi aAmoniku.